ЭСКЕРОН ПОННА 30-ТӤ СТАТЬЯ
36-ТӤ КЫРӞАН «Сюлэмдэ уть»
Малы ми дышетскиськомы Израильлэн умой но урод эксэйёсызлэсь
«Тӥ нош ик адӟыны быгатоды шонер улӥсьлэсь но сьӧлыклэсь кышкатэк улӥсьлэсь маин ог-огзылэсь висъяськемзэс, Инмарлы ужаса улӥсьлэсь но Солы ужатэк-тыршытэк улӥсьлэсь пӧртэмлыксэс» (МАЛ. 3:18).
МИ ТОДОМЫ
Малы Иегова куд-ог эксэйёсты умой шуыса лыдъяз, нош мукетъёссэ — урод шуыса. Та милемлы валаны юрттоз, мае Иегова возьма аслаз ужась-тыршисьёсызлэсь.
1, 2. Мар вера Библия куд-ог израиль эксэйёс сярысь?
БИБЛИЫН гожтэмын 40-лэсь но тросгес израиль эксэйёс сярысь a. Отын ватытэк вераське куд-огъёсызлэн янгышъёссы сярысь. Умой эксэйёс но куддыръя асьсэды урод возизы. Кылсярысь, Давид эксэй. Иегова со сярысь шуиз: «Давид ляльчие... вань сюлмыныз... Мон сьӧры мынӥз, Мынам син азям ярамон ужъёс лэсьтыса улӥз» (3 Экс. 14:8). Озьы ке но Давид бызем кышномуртэз аслыз кариз, нош солэсь картсэ виыны косӥз (2 Экс. 11:4, 14, 15).
2 Со дыре ик тросэз оскымон луисьтэм эксэйёс куддыръя асьсэды шонер возизы. Соос пӧлысь одӥгез — Ровоам. Иегова вераз, со «лек ужъёс лэсьтыса улӥз» шуыса (2 Пар. 12:14). Озьы ке но, куке 10 выжыос люкиськыны малпазы но асьсэлы мукет эксэй пуктӥзы, Ровоам Иеговалэсь кылзӥськиз но соосын ожмаськыны ӧз мыны. Озьы ик со Иудеялэсь каръёссэ юнматылӥз. Солы луыса адямиос кышкатэк улӥзы (3 Экс. 12:21—24; 2 Пар. 11:5—12).
3. Кыӵе юан кылдэ но мае ми эскеромы та статьяын?
3 Таӵе юан кылдэ: израиль эксэйёс умой но, урод но ужъёс лэсьтылӥзы ке но, малы Иегова куд-огъёссэ умой эксэйёсын лыдъяз, нош куд-огъёссэ — ӧз? Та юанлы валэктон валаны юрттоз, мае Иегова милесьтым возьма. Ми эскеромы, мае Иегова лыдэ басьтылӥз, куке ужпум кутылӥз, эксэй умой-а, урод-а шуыса. Иегова учкиз: эксэй сое вань сюлмыныз яратэ-а, вань сюлмысьтыз ӧпкеле-а но солы йыбыртъя-а.
СООС ВАНЬ СЮЛМЫНЫЗЫ ИЕГОВАЕЗ ЯРАТӤЗЫ
4. Маин пӧртэм вал оскымон эксэйёс оскымон луымтэ эксэйёслэсь?
4 Иегова возьма вал, эксэйёс сое вань сюлмынызы яратозы шуыса. Умой Иосафат эксэй сярысь гожтэмын, «со вань сюлмыныз Кузё-Инмарез» утчаз шуыса (2 Пар. 22:9). Иосия сярысь Библиын вераське: «Солэсь азьвыл вань сюлмыныз... Кузё-Инмар пала берытскись, со кадь эксэй ӧй вал; со бӧрсьы но солы укшась эксэй ӧз ӝутӥськы» (4 Экс. 23:25). Нош мае ми тодӥськомы Соломон сярысь, кудӥз улонэзлэн пумаз урод эксэй луиз? «Солэн сюлмыз... быдэсак Инмарезлы Кузё-Инмарлы сётэмын ӧй вал» (3 Экс. 11:4). Мукет оскымон луымтэ Авия эксэй сярысь гожтэмын: «Солэн сюлмыз Инмарезлы Кузё-Инмарлы сётэмын ӧй вал» (3 Экс. 15:3).
5. Валэктэ, кызьы возьматоно, ми Иеговалы вань сюлмысьтымы ужаськомы-тыршиськомы шуыса.
5 Кызьы адями возьматыны быгатэ, Иеговалы вань сюлмысьтыз ужа-тырше шуыса? Сыӵе адями, кулэ шуыса гинэ, Инмарлы уг йыбыртъя. Со сое яратэ но оскымон луыны тырше. Со сяна, со быдэс улонэз ӵоже Иеговаез яратэ но солы оскымон кыле.
6. Мар кароно, сюлэммес утён понна? (Мадёнъёс 4:23; Матфей 5:29, 30).
6 Кызьы ми быгатӥськомы умой эксэйёслэсь адӟем карыны но Иеговаез вань сюлмынымы яратыны? Милемлы сюлэммес утёно. Палэнсконо ваньмызлэсь, маин сэрен Иеговаез яратонмы лябӟыны быгатэ. Кылсярысь, туж чакласькыса быръёно шутэтскон амалъёсты но эшъёсты. Озьы ик чакласьконо, коньдон сярысь гинэ медам малпаське шуыса. Ми шӧдӥськомы ке, Иеговаез яратонмы лябӟе шуыса, ӝегатскытэк палэнтоно ваньзэ, мар соин кусыпъёсмес куашкатэ. (Лыдӟе Мадёнъёсты 4:23; Матфейлэсь 5:29, 30.)
7. Малы палэнсконо ваньмызлэсь, мар Иеговаез яратонмес сӥятыны быгатэ?
7 Малы кулэ сюлэммес утьыны? Кин ке но тазьы малпаны быгатэ: «Духовной ужъёсы тросгес пыриськид ке, соку Шайтан номыр уродзэ тыныд лэсьтыны уз быгаты». Но со шонер ӧвӧл. Учкомы тае пример вылын. Пуктэ син азяды: кезьыт куазен урамын ветлыса, тӥ туж кынмиды. Тӥ дорады бертӥськоды но гурдэс эстыны кутскиськоды. Нош ӧсты пась кылиз ке но урамысь кезьыт омыр пыриз ке, коркады шуналоз-а? Ӵапак озьы ик, Иеговаез яратонмы медаз сӥя шуыса, со доры матэ кариськыны гинэ тырмыт ӧвӧл. Со сяна, «ӧсэз пытсано» — та дуннелы лэзёно ӧвӧл Иеговаез яратонмес лябӟытыны. Малы ке шуоно та дуннелэн дышетонъёсыз, кезьыт омыр кадь, быгато сюлмамы пырыны но Иеговаез яратонмес сӥятыны (Еф. 2:2).
СООС ӦПКЕЛИЗЫ
8, 9. Кызьы асьсэды возизы Давид но Езекия, куке Иегова азьын сьӧлыкамзэс валазы? (Учке суредэз.)
8 Кызьы ми верамы ини, Давид бадӟым сьӧлык лэсьтӥз. Но, куке Нафан юрттӥз солы валаны, макем вӧсь со кариз Иеговаез, Давид ӧпкелиз (2 Экс. 12:13). Со ӧз ӧпкельы, Нафанэз пӧян понна яке кыл кутытэмлэсь палэнскон понна гинэ. 50-тӥ псаломысь адӟиське, Давид вань сюлмысьтыз ӧпкелиз шуыса (Пс. 50:1, 2, 5, 6, 19).
9 Езекия эксэй но Иегова азьын сьӧлыказ. Библиын гожтэмын: «Солэн сюлмыз вылтӥяськыны кутскиз. Со вылэ, Иудея вылэ но, Иерусалим вылэ но Инмарлэн вожез потӥз» (2 Пар. 32:25). Езекия вылтӥяськыны кутскиз, вылды, малы ке шуоно солэн трос ваньбурез вал, со ассир калыкез вормиз но Иегова сое паймымон амалэн бурмытӥз. Вылтӥяськеменыз, вылды, со аслаз ваньбуреныз вавилон калык азьын ушъяськиз. Соин ик Исаия пророк солы шуиз, Иеговалэн солы вожез потӥз шуыса (4 Экс. 20:12—18). Но, Давид сямен, Езекия зӥбыт-востэм сямзэ возьматӥз но ӧпкелиз (2 Пар. 32:26). Талы луыса Иегова сое оскымон эксэен лыдъяз но вераз, со «ярамон ужъёс лэсьтыса улӥз» шуыса (4 Экс. 18:3).
Куке Давид но Езекия валазы Иегова азьын сьӧлыкамзэс, соос зӥбыт-востэм кариськизы но ӧпкелизы. (Учке 8-тӥ но 9-тӥ абзацъёсты.)
10. Кылзӥськиз-а Амасия пророклэсь?
10 Иудей эксэй Амасия, Давид но Езекия сямен, ассэ ӧз возьы. Со Иегова азьын шонер ужъёс лэсьтӥз ке но, «вань сюлэмзэ поныса ӧз лэсьты» (2 Пар. 25:2). Кыӵе янгыш лэсьтӥз Амасия? Куке Иегова солы юрттӥз едом калыкез вормыны, Амасия со калыклэн инмаръёсызлы йыбыртъяны кутскиз b. Соку Иегова со доры лек иворен пророкез ыстӥз. Но эксэй, пророкез пумозяз кылзытэк но, сое улляз (2 Пар. 25:14—16).
11. Мар кароно, Иегова милемыз простить мед кароз шуыса? (2 Коринфъёслы 7:9, 11) (Озьы ик учке суредэз.)
11 Малы милям дышетскеммы луэ та эксэйёслэсь? Лэсьтэм сьӧлыкъёсмы понна ӧпкелёно но тыршоно соосты выльысь лэсьтытэк улыны. Нош мар кароно, тӧроос тӥледлы визь-кенеш сётӥзы ке, нош тӥ малпаськоды ке, со тӥледлы кулэ ӧвӧл шуыса? Эн малпалэ, Иегова но тӧроос тӥледыз уг ярато шуыса. Малы ке шуоно Израильлэн умой эксэйёсызлы но куддыръя Иегова чурыт визь-кенеш сётылӥз (Евр. 12:6). Куке милемлы визь-кенеш сёто, туж кулэ: 1) зӥбыт-востэмен сое кылзыны; 2) кулэ луись воштӥськонъёс лэсьтыны но 3) азьланяз но вань сюлмысьтымы Иеговалы ужаны-тыршыны. Сьӧлыкъёсмы понна ӧпкелимы ке, Инмар милемыз простить кароз. (Лыдӟе 2 Коринфъёслы 7:9, 11.)
Куке милемлы визь-кенеш сёто, туж кулэ: 1) зӥбыт-востэмен сое кылзыны; 2) кулэ луись воштӥськонъёс лэсьтыны но 3) азьланяз но вань сюлмысьтымы Иеговалы ужаны-тыршыны. (Учке 11-тӥ абзацез.) e
СООС ИЕГОВАЛЫ ГИНЭ ЙЫБЫРТЪЯЗЫ
12. Кызьы тодманы луэ вал оскымон эксэйёсты?
12 Умой эксэйёс Иеговалы ярамон амалэн солы йыбыртъязы но талы ик калыкез дышетӥзы. Валамон, соос янгышъёс но лэсьтылӥзы. Но та эксэйёс Иеговалы гинэ йыбыртъязы но музъемзэс идолъёслэсь чылкытатӥзы c.
13. Малы Иеговалэн син азяз Ахав эксэй оскымон ӧй вал?
13 Нош мар вераны луэ оскымон луымтэ эксэйёс сярысь? Соос урод ужъёс гинэ лэсьтыса улӥзы-а? Ӧз. Кылсярысь, куке Ахав нимо лек эксэй тодӥз, соин сэрен Навуфеез виизы шуыса, со ӝожомиз но Инмар азьын зӥбыт-востэм кариськиз (3 Экс. 21:27—29). Озьы ик та эксэй городъёсты пуктылӥз но Израильлэн тушмонъёсыныз ожмаськиз (3 Экс. 20:21, 29; 22:39). Но Ахав тодмо луиз «Кузё-Инмарлэн син азяз... ярантэм ужъёс» лэсьтэменыз. Кышноезлэн узатэменыз со зэмос луисьтэм инмаръёслы йыбыртъянэз вӧлмытӥз. Та сьӧлыкез понна со ноку ӧз ӧпкельы (3 Экс. 21:25, 26).
14. а) Малы Иегова Ровоамез оскымон луымтэ эксэен лыдъяз? б) Мар огкадез вал оскымон луымтэ эксэйёслэн?
14 Вераськомы на Ровоам нимо эшшо одӥг оскымон луымтэ эксэй сярысь. Кызьы вераськиз ини 2-тӥ абзацын, кивалтыкуз со умой ужъёс но лэсьтылӥз. Но куке солэн эксэйлыкез юнмаз, со Иеговалэсь законзэ кельтӥз но зэмос луисьтэм инмаръёслы йыбыртъяны кутскиз (2 Пар. 12:1). Со дырысен со Иеговалы но, мукет инмаръёслы но йыбыртъяз (3 Экс. 14:21—24). Ровоам но Ахав сяна, вал мукет но оскымон луымтэ эксэйёс. Израиль эксэйёс пӧлысь тросэз Иеговалы оскымон ӧй вал, малы ке шуоно соос зэмос луисьтэм йыбыртъянэ пыриськылӥзы. Нош Иегова понна валтӥсез вал, эксэй солы гинэ мед йыбыртъялоз шуыса.
15. Малы Иегова возьма, адями солы гинэ йыбыртъялоз шуыса?
15 Малы Иегова возьма вал, эксэйёс солы гинэ йыбыртъялозы шуыса? Нырысетӥез, эксэйёс калыклы адӟем карон возьматыны кулэ вал, кызьы Инмарлы йыбыртъяно. Кыкетӥез, зэмос луисьтэм инмаръёслы йыбыртъяса, адямиос кутско мукет секыт сьӧлыкъёс лэсьтыны но матысь адямиосынызы асьсэды шонертэм возьыны (Ос. 4:1, 2). Куинетӥез, быдэс калык, озьы ик эксэйёс но, Иеговалы сӥземын вал. Соин ик Библия зэмос луисьтэм инмаръёслы йыбыртъянэз азон-калгон сьӧлыкен ӵошатэ (Иер. 3:8, 9). Адями, кудӥз кузпалэзлы оскымон уг кыльы, сое туж вӧсь каре. Ӵапак озьы ик Иеговалы но туж вӧсь луэ, куке ужась-тыршисьёсыз мукет инмаръёслы йыбыртъяло (К. Зак. 4:23, 24) d.
16. Маин пӧртэм шонер улӥсь но сьӧлыклэсь кышкатэк улӥсь Иеговалэн син азяз?
16 Малы милям дышетскеммы луэ? Палэнсконо ваньмызлэсь, мар зэмос луисьтэм йыбыртъянэн герӟаськемын. Со сяна, вань сюлмысьтымы Иеговалы гинэ йыбыртъяно. Малахия пророк валэктӥз, маин пӧртэм умой адями урод адямилэсь Иеговалэн син азяз. Со гожтӥз: «Нош ик адӟыны быгатоды шонер улӥсьлэсь но сьӧлыклэсь кышкатэк улӥсьлэсь маин ог-огзылэсь висъяськемзэс, Инмарлы ужаса улӥсьлэсь но Солы ужатэк-тыршытэк улӥсьлэсь пӧртэмлыксэс» (Мал. 3:18). Соин ик номырлы лэзёно ӧвӧл люкетыны Инмарлы ужаны-тыршыны. Кылсярысь, куддыръя тырмымтэосмы но янгышъёсмы сэрен киосмы ик лэзисько. Но Иеговалы ужамысь-тыршемысь дугдоно ӧвӧл, малы ке шуоно со бадӟым сьӧлык луысал.
17. Малы кузпалэз туж чакласькыса быръёно?
17 Тӥляд семья кылдытэмды потэ ке, Малахиялэн кылъёсыз тӥледлы юрттозы тупась кузпал бырйыны. Шуом, адямилэн умой сямъёсыз вань. Но лыдъялоз Иегова шонерлыко адямиен сое, кин солы ужатэк-тыршытэк улэ? (2 Кор. 6:14). Тӥ соин кузпалъяськиды ке, юрттоз-а со тӥледлы Иеговалы матэгес кариськыны? Малпаське Соломон сярысь. Мурт кунъёсысь кышноосызлэн умой сямъёссы но вал, дыр. Но соос Иеговалы ӧз йыбыртъялэ. Соин ик пумен-пумен Соломонлэсь «сюлэмзэ... мурт инмаръёс пала берыктӥзы» (3 Экс. 11:1, 4).
18. Малы дышетыны кулэ анай-атайёс асьсэлэсь нылпиоссэс?
18 Анай-атайёс, та статьяысь визь-кенешъёсты кутыса, нылпиостылэсь мылкыдзэс ӝутэ Иеговалы ужаны-тыршыны. Юрттэ соослы валаны, малы Иегова куд-ог эксэйёсты умой шуыса лыдъяз, нош куд-огъёссэ — урод шуыса. Иегова возьма вал, эксэйёс солы гинэ йыбыртъялозы но талы мукетъёссэ но дышетозы шуыса. Нылпиостылы валэктэ, Иеговалы йыбыртъян улонын нырысетӥ интыын луыны кулэ шуыса. Асьтэос но та пумысен умой адӟем карон возьматэ. Нылпиосты мед адӟозы, Библиез эскерон, пумиськонъёсы ветлон, тодытон уж — тӥ понна валтӥсез шуыса (Матф. 6:33). Нылпиослы валаны кулэ, Адӟись-Ивортӥсьёслэн семьяысьтызы луыны гинэ тырмыт ӧвӧл шуыса. Соослы асьсэлы Иеговаен эшъяськыны кулэ. Соос тае ӧз валалэ ке, Иеговалы йыбыртъянэз нырысетӥ интые уз пуктэ яке воксё зэмлыкысь кошкозы.
19. Мар карыны кулэ соослы, кинъёслэн Иегова доры берытскемзы потэ? (Озьы ик учке «Берытске Иегова доры!» рамкаез.)
19 Кин ке но Иеговалы ужамысь-тыршемысь дугдӥз ке, возьматэ-а та, со Иеговалэн эшез луыны ноку уз быгаты ни шуыса? Уг, уг возьматы. Со быгатэ ӧпкельыны но Иегова доры берытскыны. Со понна солы вылтӥяськон сямзэ вормыны но тӧроослэсь юрттэт курыны кулэ луоз, вылды (Иак. 5:14). Со капчи ӧвӧл ке но, туж тыршоно. Малы ке шуоно соку адями Иеговаен кусыпъёссэ тупатыны быгатэ.
20. Кызьы ми шоры учкоз Иегова, ми оскымон эксэйёслэсь адӟем каримы ке?
20 Мае ми тодӥмы та статьяысь? Милемлы оскымон эксэйёслэсь адӟем кароно. Нош со понна сюлэммес утёно но быдэсак Иеговалы оскымон луоно. Ойдолэ зӥбыт-востэм луэммес возьматомы, янгышъёсмы вылын дышетскыса, сьӧлыкъёсмы понна ӧпкельыса но визь-кенешъёслэсь кылзӥськыса. Озьы ик ойдолэ тодамы возёмы, Иеговалы гинэ йыбыртъяны кулэ шуыса. Соку Иеговалэн син азяз ми шонерлыкоесь луомы.
45-ТӤ КЫРӞАН Сюлэмлэн малпанъёсыз
a Та статьяын «израиль эксэйёс» шуыса нимасько Инмарлэн калыкезлэн вань эксэйёсыз, маин гинэ соос медам кивалтэ: Иудеяен, Израилен яке 12 выжыосын.
b Амасия ассэ возиз, вылды, зэмос луисьтэм инмаръёслы йыбыртъясь эксэйёс сямен, кудъёсыз киултэм калыкъёссылэн инмаръёссылы йыбыртъязы.
c Кылсярысь, Аса эксэй бадӟым янгышъёс лэсьтылӥз (2 Пар. 16:7, 10). Но Библиын вераське, со «Инмар азьын ярамон ужъёс лэсьтыса улӥз» шуыса. Аса нырысь пророклы вожзэ поттӥз ке но, берлогес со ӧпкелиз, вылды. Быдэс улонзэ учконо ке, урод ужъёс сярысь, умой ужъёс со тросгес лэсьтӥз. Валтӥсез, Аса Иеговалы гинэ йыбыртъяз но туж тыршиз эксэйлыкысьтыз идолъёслы йыбыртъянэз быдтыны (3 Экс. 15:11—13; 2 Пар. 14:2—5).
d Моисейлэн законысьтыз нырысетӥ кык куронъёс уг лэзё вал, Иеговалы сяна, кинлы ке яке малы ке эшшо йыбыртъяны (Пот. 20:1—6). Та возьматэ, Иегова туж возьма, ми солы гинэ йыбыртъяломы шуыса.
e СУРЕДЫН. Егит тӧро адӟе, агайлэн вина юонэн герӟаськем шуг-секытъёсыз вань, вылды, шуыса, но та сярысь солы вера. Агай зӥбыт-востэмен сое кылзэ, кулэ луись воштӥськонъёс лэсьтэ но азьланяз но вань сюлмысьтыз Иеговалы ужа-тырше.
