Никола́ но Сели́на кузпалъёс мукет шуг-секытэн пумиськизы. Француз филиал соосты куриз мукет кенеше потыны. Соос верало: «Нырысь ми туж шумпотӥмы. Но берлогес ми валамы, азьвыл эшъёсмылэсь туж мӧзмиськомы шуыса. Нош выль интыын ми нокинэн умой-умой тодматскемын ӧй вал на» a. Ваньзэ тае лыдэ басьтыса, мар карыны луэ, выль кенеше выжон капчигес мед сётӥськоз шуыса? Кызьы юрттыны быгато выль кенешысь агайёс но сузэръёс? Озьы ик мар карыны луэ, мукет кенеше выжон тӥледлы но, со кенешысь агайёслы но, сузэръёслы но шумпотон мед ваёз шуыса?

НЬЫЛЬ ПАЙДАЁ ВИЗЬ-КЕНЕШЪЁС

1. Иеговалы оскиське (Пс. 36:5). Япониысь Кадзу́ми нимо сузэр аслаз кенешаз 20 ар ӵоже ужаз-тыршиз. Но берлогес картсэ мукет интые ужаны ыстӥзы. Соин ик сузэрмылы но кошконо луиз. Кызьы со аслэсьтыз сюрессэ Иегова кие сётӥз? Со вера: «Куддыръя мыным туж кышкыт луэ вал. Мон малпасько вал, воксё огнам кыли шуыса. Но мон ваньмыз сярысь Иеговалы вералляй. Со монэ котьку юнматылӥз».

Мар тӥледлы юрттоз выль интыын Иеговалы оскиськыса улыны? Ми тодӥськомы, будосъёслы ву но умой музъем кулэ шуыса. Ӵапак озьы ик осконмес но юнматыны кулэ. Никола, кудӥз сярысь вераськиз ини, Авраамлэсь, Иисуслэсь но Павеллэсь улон-вылонзэс эскериз. Та пиосмуртъёс, Иеговалэсь эриксэ быдэстон понна, туж троссэ кельтӥзы. Соослэн учыръёссы агаймылэсь осконзэ юнматӥзы, Иегова сое но уз кельты шуыса. Ас поннады Библиез ялан эскерыса, тӥ воштӥськонъёслы дышоды но оскондэс юнматоды, озьы ик выль кенешысьтыды  агайёстэс но сузэръёстэс юнматыны быгатоды.

2. Эн ӵошатэ (Екк. 7:10). Куке Жюль агай Бенинысь Огазеяськем Штатъёсы кошкиз, солы воксё мукет сям-йылолъёслы дышоно луиз. Со вера: «Мон туж жади юанъёслэсь. Мыным потэ вал, ваньмызлэн мон сярысь ваньзэ тодэмзы потэ шуыса». Жюль сыӵе юанъёслы дышемын ӧй вал, соин ик агайёслэсь но сузэръёслэсь палэнскыны кутскиз. Но куке агаймы соосын умойгес тодматскиз, со соос шоры мукет сямен учкыны кутскиз. Жюль азьланьтэ: «Табере мон валасько, кытын гинэ адямиос медам улэ, соос одӥг кадесь шуыса. Соослэн вераськемзы но асьсэды воземзы гинэ пӧртэм луэ. Соин ик соосты гажаны кулэ». Озьыен, эн ӵошатэ выль кенештэс азьвыл кенешеныды. Тани мар вераз А́нна-Ли́за сузэр, кудӥз пионер луыса ужа-тырше: «Мон уг малпаськы вал, выль интыын ваньмыз азьвыл сямен луоз шуыса. Мон мукет интые кошки, мае ке выльзэ шедьтон понна».

Тӧроослы но выль кенешсэс азьвыл кенешенызы ӵошатоно ӧвӧл. Оло нош, выль кенешысьтыды агайёс мае ке но мукет сямен лэсьто. Но со уг возьматы, соос сое шонертэм лэсьто шуыса. Соин ик визь-кенеш сётэмлэсь азьло умой луысал валаны, малы соос сое озьы лэсьто (Екк. 3:1, 7б). Агайёсты дышетэм интые, тырше соослы умой адӟем карон возьматыны (2 Кор. 1:24).

3. Тэк эн пуке (Флп. 1:27). Мукет интые кошкон понна, трос дыр но кужым кулэ ке но, соку ик тырше выль кенеше ветлыны, луэ ке, Эксэйлык юртэ мыныса. Агайёс но сузэръёс тӥледын ноку ӧз пумиськылэ ке яке туж шер пумиськылӥзы ке, кызьы соос тӥледлы юрттыны быгатозы? Люси́нда сузэр, кудӥз кык нылъёсыныз Лымшор Африкаысь бадӟым каре кошкиз, тодаз вае: «Эшъёсмы милемлы ӵектӥзы ӝоггес выль кенешен тодматскыны: агайёсын но сузэръёсын тодытыны но пумиськонъёсын валэктонъёс сётъяны. Со сяна, ми асьмеос ӵектӥмы ми дорын тодытонлы сӥзем пумиськонъёсты ортчытылыны».

Выль кенешысьтыды агайёсын но сузэръёсын огкылысь ужалэ-тырше. Та тӥледыз но, соосты но юнматоз. Тӧроос Анна-Лизалэсь мылкыдзэ ӝутӥзы котькуд ивортӥсен тодытыны. Кыӵе со пайда вайиз? Со вера: «Мон ӝог валай, та мыным туж юрттэ шуыса выль духовной семьяеным эшъяськыны». Юрттэ Эксэйлык юртэз утялтыны но эскерон-тупатъян ужъёсы пыриське. Озьы тӥ ӝоггес валалоды, табере та тӥляд кенешты шуыса. Тӥ ӧд ке возьмалэ, куке тӥледыз кытчы ке ӧтёзы яке мар ке сярысь курозы, тӥ ӝоггес эшъяськоды выль кенешысьтыды агайёсын но сузэръёсын.

4. Выль эшъёс шедьтэ (2 Кор. 6:11—13). Адямиен эшъяськон понна самой умой амал — соин тунсыкъяськыны. Тырше пумиськонъёсы вазьгес лыктыны но пумиськонлэн  йылпумъяськемез бере ик эн кошке. Соку тӥ быгатоды агайёсын но сузэръёсын вераськыны но соосын умойгес тодматскыны. Мукетъёсызлэсь нимъёссэс тодады возьыны тырше, малы ке шуоно адямиослы кельше, куке соослы нимзыя вазисько. Лякытэсь луэ но вераськыны дась луэ. Соку адямиос тӥ доры кыстӥськозы но ӝоген тӥляд эшъёсты луозы, вылды.

Выль кенешысьтыды агайёсын но сузэръёсын эшъяськон понна, соосын асьтэды возе озьы, кызьы огшоры дыръя асьтэды возиськоды. Со понна соосын дырдэс ортчытъялэ. Люсинда сузэр вера: «Ми агайёсты но сузэръёсты ас дорамы куное ӧтьылӥмы. Та милемлы юрттӥз соосын эшъяськыны».

ОГ-ОГДЫ СЯРЫСЬ СЮЛМАСЬКЕ

Куд-огъёсыз туж кышкало мыныны Эксэйлык юртэ, малы ке шуоно нокинэ уг тодо. Кызьы ми пӧлысь котькудӥз лыктэм агайёслы но сузэръёслы юрттыны быгатэ? Апостол Павел гожтӥз, Христос сямен, милемлы но ог-огмы сярысь сюлмаськоно шуыса (Рим. 15:7). Иисуслэсь адӟем карыса, тӧроос выль ивортӥсьёслы юрттыны тыршо кенешсылы ӝоггес дышыны. (Учке  «Мар кароно, выль кенеше выжон капчигес мед сётӥськоз шуыса» рамкаез.) Со сяна, кенешысь ваньзы, озьы ик нылпиос но, лыктэм агайёслы но сузэръёслы юрттыны быгато.

Кызьы возьматоно выль агайёс но сузэръёс сярысь сюлмаськеммес? Соосты ас дорамы куное ӧтьыны луэ. Озьы ик соослы юрттэтмес ӵектыны луэ. Кылсярысь, куке одӥг сузэр мукет городэ улыны кошкиз, отысь пионер луыса ужась-тыршись сузэр солы со интыез возьматӥз но валэктӥз, кызьы городысь транспортэн ветлоно. Сыӵе юрттэт сузэрмес туж шумпоттӥз но выль интылы ӝоггес дышыны юрттӥз.

ВЫЛЬ КЕНЕШЕ ВЫЖОН ИЕГОВАЕН КУСЫПЪЁСТЫ ЮНМАТЫНЫ БЫГАТЭ

Саранча лобаны мед быгатоз шуыса, солэн юн бурдъёсыз луыны кулэ. Нош солэсь азьвыл  со кӧня ке пол кузэ воштэ. Ӵапак озьы ик выль кенеше выжемъёслы вань сюлмаськонъёссэс палэнтоно, Иеговалы ужаны-тыршыны номыр медаз люкетыны шуыса. Никола но Селина кузпалъёс верало: «Мукет интые кошкыса, выль югдурын но выль адямиос пӧлын выль сямъёс будэтоно луэ». Жан-Шарль агай вера, кызьы мукет интые кошкон семьязы вылын шӧдӥськиз: «Выль кенеше выжон нылпиосмылы бадӟым пайда вайиз. Кӧня ке толэзь ортчыса гинэ, нылмылы арня куспысь пумиськонын дышетскон ужъёсты сётъяны кутскизы, нош пимы пылатӥськымтэ ивортӥсь луиз».

Нош мар кароно, тросгес тодытон понна, тӥляд мукет интые кошкемды потэ ке, но кыӵе ке муген тӥ уд быгатӥське? Тырше та статьяысь визь-кенешъёсты асьтэлэн кенешады уже кутыны. Соку асьтэлэн кенешты шоры тӥ воксё мукет сямен учкоды. Азьланяз но оскондэс юнматэ. Кенешлэн ужъёсаз тросгес пыриське. Пӧртэм агайёсын но сузэръёсын тодытэ. Выль эшъёс шедьтэ но азьвылъёсыз сярысь эн вунэтэ. Малпаське, агайёс но сузэръёс пӧлысь кинлы тӥ юрттыны быгатӥськоды. Мукетъёсызлы яратондэс возьматыса, Иеговаен кусыпъёсты эшшо но юнэсь луозы (Иоанн 13:35). Малы ке шуоно «сыӵе курбонъёс Инмарлы ярамонэсь луо» (Евр. 13:16).

Шуг-секытъёс шоры учкытэк, трос агайёс но сузэръёс шумпотыса выль кенешын ужало-тыршо. Тӥляд но ваньмыз пӧрмоз! Анна-Лиза вера: «Мукет интые кошкыса, мон валай, сюлэмме паськыт усьтэме луэ шуыса: мон быгатӥсько азьвыл эшъёсыным но, выль эшъёсыным но эшъяськыны». Кадзуми сузэр юн оске, выль интыын Иегова юрттоз шуыса озьы, кызьы ноку ӧз юрттылы. Нош Жюль агай вера: «Мон выль адямиосын эшъяськи. Али мон асме умой шӧдӥсько. Та кенеш мынам семьяе луиз. Табере соосты кельтыны мыным секыт луысал».