1, 2. Мае ми тодӥськомы Садок сярысь? (1 Паралипоменон 12:22, 26—28).

 ПУКТЭ син азяды, кызьы 340 000-лэсь тросгес пиосмуртъёс Хеврон котырысь гурезё интые люкаськизы. Соос отчы лыктӥзы, Давидэз быдэс Израильлы эксэе пуктон понна. Соос отын куинь нунал ӵоже сылӥзы, серекъязы, вераськизы но Иеговаез данъян кырӟанъёс кырӟазы (1 Пар. 12:39). Соос пӧлын вал Садок нимо егит пиосмурт. Мукет пиосмуртъёслэсь со номырин пӧртэм ӧй вал, дыр. Но Иегова солы саклыксэ висъяз. Солэн потӥз, ми но со сярысь мед тодомы шуыса. (Лыдӟе 1 Паралипоменонэз 12:22, 26—28.) Мае ми тодӥськомы Садок сярысь?

² Садок священник вал, кудӥз Авиафар быдӟым священникен ӵош ужаз-тыршиз. Озьы ик Библиын со нимаське азьпалзэ адӟись шуыса. Со возьматэ, Инмар солы трос визьлык сётӥз но аслэсьтыз эриксэ валаны юрттӥз шуыса (2 Экс. 15:27). Соин ик адямиос Садоклы визь-кенеш курыса вазисько вал. Со сяна, Садок кышкасьтэм вал. Ӵапак та сямыз сярысь ми та статьяын вераськомы.

3. а) Малы Иеговалэн ужась-тыршисьёсызлы кышкасьтэмесь луоно? б) Мае ми эскеромы та статьяын?

³ Та берпум дыре Шайтан эшшо но зол тырше Иеговалы осконмес лябӟытыны (1 Пётр 5:8). Ми туж возьмаськомы, ку Иегова Шайтанэз но та лек дуннеез быдтоз (Пс. 30:25). Нош со дырозь милемлы Инмарлэн Эксэйлыкез пала кариськыса  улоно, агайёслы но сузэръёслы юрттӥськоно но Иеговалы оскымон луоно. Нош со понна кышкасьтэмесь луыны кулэ. Ойдолэ эскеромы, кызьы милемлы Садоклэн примерез юрттоз.

ИНМАРЛЭН ЭКСЭЙЛЫКЕЗ ПАЛА КАРИСЬКЫСА УЛЭ

4. Малы, Инмарлэн Эксэйлыкез пала кариськыса улон понна, кышкасьтэм луыны кулэ? (Озьы ик учке суредэз.)

⁴ Ми, Иеговалэн калыкез, туж тыршиськомы Инмарлэн Эксэйлыкез пала кариськыса улыны (Матф. 6:33). Но со котьку ик капчи ӧвӧл. Кылсярысь, кышкасьтэм луоно, Шайтанлэн лек дуннеяз Иеговалэсь кылзӥськыса улон понна но Эксэйлык сярысь ӟеч иворез тодытон понна (1 Фес. 2:2). Озьы ик политикаен сэрен та дуннеын тросгес но тросгес бугыръяськонъёс кылдо. Нош милям нокин пала кариськытэк улэммы потэ (Иоанн 18:36). Тросэзлэн Адӟись-Ивортӥсьёслэн, кудъёсыз армие ӧз мынэ яке политикае ӧз пыриське, коньдонэн герӟаськем шуг-секытъёссы кылдӥзы, соосты жугизы яке пытсэтэ пуктӥзы. Нош со понна нош ик кышкасьтэм луыны кулэ.

5. Малы, Давид пала кариськон понна, Садоклы кышкасьтэм луыны кулэ вал?

⁵ Садок Хевронэ, Давидэз эксэе пуктон понна гинэ, ӧз лыкты. Та егит пиосмуртлэн ожтӥрлыкез вал — со ожмаськыны дась вал (1 Пар. 12:38). Солэн юн мылкыдыз вал Давид палан ожмаськыны но Израилез тушмонъёслэсь утьыны. Садок священник вал, соин ик со трос ожмаськемын ӧй вал, дыр. Но со туж кышкасьтэм вал.

6. Малы Давид кышкасьтэм луон пумысен Садоклы умой адӟем карон возьматӥз? (Псалтирь 137:3).

⁶ Мар юрттӥз Садок священниклы кышкасьтэм луыны? Со котырын кужмоесь но кышкасьтэмесь адямиос вал. Со соослэсь адӟем кариз, луоз. Кылсярысь, соос пӧлын  вал Давид. Со туж кышкасьтэм вал но ожгарчиосын кивалтӥз. Соин ик израиль калыклэн сое эксэе пуктэмез потӥз (1 Пар. 11:1, 2). Тушмонъёсыныз ожмаськыкуз, Давид котьку Иегова вылэ оскиськиз (Пс 27:7; лыдӟе Псалтирез 137:3). Садок вӧзын вал на мукет адӟем карымон пиосмуртъёс: Иодай но кышкасьтэм Ванея пиез, озьы ик мукет «кызь кык мурт кивалтӥсь йыръёс» (1 Пар. 11:22—25; 12:26—28). Соос туж тыршизы Давидлы юрттӥськыны но дась вал солэсь эксэйлыксэ утьыны.

7. а) Кин туннэ кышкасьтэм луон пумысен умой адӟем карон возьматэ? б) Малы тӥ дышетскиды, Нси́лу агай сярысь видеороликез учкыса?

⁷ Мар милемлы кароно, кужмоесь но кышкасьтэмесь луон понна? Милемлы малпаськоно соос сярысь, кинъёс кышкатэк Иегова пала кариськизы. Нырысь ик, со милям Эксэймы, Иисус Христос. Со Шайтан дуннелэн политикаен герӟаськем ужъёсаз ӧз пыриськы (Матф. 4:8—11; Иоанн 6:14, 15). Озьы ик Иисус ачиз вылэ ӧз оскиськы, нош котьку Иеговалэсь юрттэтсэ утчаз. Со сяна, ми быгатӥськомы малпаськыны соос сярысь, кинъёс туннэ умой адӟем карон возьмато. Трос егит пиосмуртъёс армие уг мыно но политикае уг пырисько. Соослэн учыръёссы сярысь тросгес тодыны луэ jw.org сайтысь a.

АГАЙЁСЛЫ НО СУЗЭРЪЁСЛЫ ЮРТТӤСЬКЕ

8. Кыӵе учыръёсы тӧроослы кышкасьтэм луыны кулэ?

⁸ Иеговалэн ужась-тыршисьёсыз ярато ог-огзылы юрттӥськыны (2 Кор. 8:4). Куддыръя со понна кышкасьтэм луыны кулэ, кылсярысь, ожмаськонъёс дыръя. Агайёсмы но сузэръёсмы Библитэк, публикациостэк, сиёнтэк но дӥськуттэк кыльыны быгато. Нош яратӥсь тӧроос тыршо, Иеговалэн калыкезлэн ваньмыз кулэез мед луоз шуыса. Со понна соос улонзэс но ыштыны дась (Иоанн  15:12, 13). Та пумысен соос Садоклэсь адӟем каро.

9. Кыӵе уж сётӥз Давид Садоклы? (2 Эксэйлыкъёслэн 15:27—29). (Озьы ик учке суредэз.)

⁹ Огпол Авессалом малпаз Давид атайзэ виыны но со интые эксэй луыны (2 Экс. 15:12, 13). Давидлы ӝегатскытэк Иерусалимысь кошконо вал. Соин ик со медоосызлы шуиз: «Султэлэ, ойдолэ пегӟоме, Авессалом асьмелы улыны маза уз сёты» (2 Экс. 15:14). Городысь кошкыкузы, Давид валаз, Иерусалиме оскымон адямиосты кельтоно шуыса, кудъёсыз солы Авессаломлэн малпанъёсыз сярысь верасалзы. Та ужез Давид сётӥз Садоклы но мукет священникъёслы. (Лыдӟе 2 Эксэйлыкъёслэсь 15:27—29.) Соослы туж чакласькыса улоно вал. Малы ке шуоно мукетъёсыз тодысалзы ке, мар карыса соос уло, соосты виыны быгатысалзы. Авессалом туж лек но ассэ гинэ яратӥсь вал — со аслаз атаезлы пумит султӥз. Малпалэ гинэ, мар со карысал Садокен но мукет священникъёсын, тодысал ке, соос сое лушкемен чакласа уло шуыса!

10. Кызьы Садок но солэн эшъёсыз Давидлы улэп кыльыны юрттӥзы?

¹⁰ Давид малпаз, мар карыны луэ утиськон понна. Соин ик со юрттэт куриз Садоклэсь но Хусий нимо мукет оскымон эшезлэсь (2 Экс. 15:32—37). Давидлэн куремезъя, Хусий Авессалом пала кариськиз но солы вераз, кызьы Давидэз кутыны луэ. Со дыр куспын Давид вуысал дасяськыны тушмонъёсыз вылэ урдскыны. Собере Хусий Садоклы но Авиафарлы вераз, кыӵе визь-кенеш со Авессаломлы сётӥз (2 Экс. 17:8—16). Нош Садок но Авиафар со сярысь Давидлы веразы (2 Экс. 17:17). Озьы Иеговалэн юрттэменыз Садок но мукет священникъёс Давидлы улэп кыльыны юрттӥзы (2 Экс. 17:21, 22).

11. Кызьы тӥ быгатӥськоды Садоклэсь адӟем карыны, агайёслы но сузэръёслы юрттыкуды?

¹¹ Тӥледыз куризы ке юрттыны агайёслы но сузэръёслы, кудъёсыз секыт югдуре  сюризы, кызьы тӥ, Садок сямен, кышкасьтэм луэмдэс возьматыны быгатӥськоды? 1) Сётэм кивалтэтлэсь кылзӥське. Секыт дыръя туж кулэ огкылысь улыны. Кылзӥське кивалтэтлэсь, кудзэ филиалысь агайёс сёто (Евр. 13:17). Тӧроос сётэм кивалтэтэз ялан эскерыны кулэ, кенеш шӧдтэк шорысь кылдэм секыт югдурлы дась мед луоз но мар карыны мед тодоз шуыса (1 Кор. 14:33, 40). 2) Кышкасьтэмесь луэ, но со дыре ик чаклаське (Мад. 22:3). Мае ке лэсьтэмлэсь азьло малпаське. 3) Иегова вылэ оскиське. Агайёслы но сузэръёслы юрттыкуды, тодады возе, Иеговалэн туж потэ, соосын но, тӥледын но ваньмыз умой мед луоз шуыса. Соин ик Инмар юрттоз тӥледлы валаны, кызьы умойгес луоз агайёслы но сузэръёслы юрттыны.

12, 13. Малы тӥледыз дышетэ Викторлэн но Виталийлэн верамзы? (Озьы ик учке суредэз.)

¹² Кык тӧроос, Виктор но Виталий, Украинае агайёслы но сузэръёслы сиён но ву нуллӥзы. Виктор вера: «Ми котькытысь, кытысь гинэ быгатӥмы, сиён утчамы, ӵем дыръя ыбылон улсын. Огпол одӥг агай трос сиён-юон сётӥз. Со трос ивортӥсьёслы кӧня ке дырлы тырмиз. Со сиён-юонэз машинаямы тырыкумы, ми дорысь ог 20 метр кемын ракета усиз. Мон быдэс нунал Иеговалэсь кышкасьтэм сям туж кури, азьланяз но агайёслы но сузэръёслы юрттӥськыны мед быгатом шуыса».

¹³ Виталий вера: «Туж кулэ вал кышкасьтэм луыны. Нырысетӥзэ агайёслы но сузэръёслы юрттэт нуыкум, мон 12 час мынӥ. Быдэс сюрес кузя мон Иеговаен вераськи». Виталий кышкасьтэм вал, но со дыре ик со туж чакласькиз. Со азьланьтэ: «Мон котьку вӧсяськи, шонер ужпум кутыны мед быгатом но ас вылам медам оскиськы шуыса. Мон ветлӥ со сюресъёстӥ гинэ, кытӥ кивалтӥсьёс ветлыны лэзё вал. Мынам осконэ туж юнмаз, куке мон адӟи, агайёс но сузэръёс огкылысь ужало шуыса. Кин ке но милемлы маршрут дася вал, кин ке но гуманитарной юрттэт люка но машинаямы тыре вал, нош кин ке но милемыз Викторен сюдэ но шутэтскон инты дася вал».

ИЕГОВАЛЫ ОСКЫМОНЭСЬ КЫЛЕ

14. Кыӵе шӧдонъёсмы милям кылдыны быгато, матысь адямимы Иеговаез кельтэ ке?

¹⁴ Куке эшмы яке ӵыжы-выжымы Иеговаез кельтэ, ми туж куректӥськомы (Пс. 77:40; Мад. 24:10). Со адямиен кусыпъёсмы матынэсь вал ке, милемлы эшшо но вӧсь луэ. Тӥ но сыӵе ик учырен пумиськиды ке, Садоклэн оскымон луэмез тӥледыз юнматыны быгатоз.

15. Малы, Иеговалы оскымон луон понна, Садоклы кышкасьтэм луоно вал? (3 Эксэйлыкъёслэн 1:5—8).

¹⁵ Садок Иеговалы оскымон вал, куке Авиафар матысь эшез сое кельтӥз. Со луиз Давид эксэйлэн кивалтон вакытэзлэн пумаз. Куке Давид туж пересь вал ини, Адония пиез со интые эксэй луыны малпаз. Нош Иегова кылзэ сётӥз, Давид интые Соломон эксэй луоз шуыса (1 Пар. 22:9, 10). Авиафар кариськиз Адония пала. (Лыдӟе 3 Эксэйлыкъёслэсь 1:5—8.) Озьы со Давидэз гинэ ӧз кельты, нош Инмарез но кельтӥз. Малпалэ гинэ, макем секыт соку Садоклы вал! 40 арлэсь кемагес со но Авиафар священникъёс луыса ӵош ужазы-тыршизы но «Инмарлэн ковчегез» сярысь сюлмаськизы (2 Экс. 8:17; 15:29). Соос кыназы но Давидлы юрттӥськизы но трос мукетсэ Иегова понна лэсьтӥзы (2 Экс. 19:11—14).

16. Мар юрттэ вал Садоклы Иеговалы оскымон кыльыны?

¹⁶ Авиафар ассэ шонертэм возиз ке но, Садок Иеговалы оскымон кылиз. Давид котьку тодӥз, Садок сое уз кельты шуыса. Куке Адониялэн кескич малпанэз шарае потӥз, Давид  куриз Садокез, Нафанэз но Ванеяез Соломонэз эксэе пуктыны (3 Экс. 1:32—34). Сыӵе адямиос Садокез юнмато вал но Иеговалы оскымон кыльыны юртто вал (3 Экс. 1:38, 39). Куке Соломон эксэй луиз, Авиафар быдӟым священник интые со Садокез пуктӥз (3 Экс. 2:35).

17. Кызьы тӥ Садоклэсь адӟем карыны быгатӥськоды, эшты яке ӵыжы-выжыды Иеговаез кельтӥз ке?

¹⁷ Кызьы тӥ Садоклэсь адӟем карыны быгатӥськоды? Эшты яке ӵыжы-выжыды зэмлыкез кельтӥз ке, вань сюлмысьтыды тырше азьланяз но Иеговалы оскымон луыны (Иис. Н. 24:15). Асьтэды шонер возён понна, Инмар тӥледлы кужым сётоз но кышкасьтэм луыны юрттоз. Иегова вылэ оскиськыса улэ. Солы вӧсяське но солэн ужась-тыршисьёсыныз эшъяське. Иегова дунъя солы оскымон луыны тыршемдэс но одно ик тӥледыз бакель кароз (2 Экс. 22:26).

18. Малы тӥледыз дышетэ Марко но Сидсе кузпалъёслэн учырзы?

¹⁸ Тани Ма́рко но Си́дсе кузпалъёслэн учырзы. Кыкез ик быдэ вуэм нылъёссы зэмлыкез кельтӥзы. Марко вера: «Куке пиналдэ нырысьсэ кияд басьтӥськод, сюлэм яратонэн пачылме. Сое утён понна, тон ваньзэ лэсьтыны дась. Соин ик, куке нылъёсмы Иеговаез кельтӥзы, милям сюлэммы ик чигиськиз». Марко азьланьтэ: «Но Иегова ноку милемыз уг кельты. Куке мынам кужыме ӧвӧл, кышноелэн кужымез вань. Нош куке со катьтэммемын, мон сое юнматыны быгатӥсько». Сидсе ватса: «Иеговатэк ми ӧм чидасалмы. Одӥг вакытэ мон ялан малпаськи, ваньмыз понна мон янгыш шуыса. Та сярысь мон Иеговалы верай. Кӧня ке нунал ортчыса, Эксэйлык юртын мон доры сузэр лыктӥз, кудӥныз ми трос аръёс ӧм адӟиське вал ини. Со монэ ӟыгыртӥз, шорам учкиз но шуиз: „Сидсе, дуное, тон янгыш ӧвӧл“. Иегова монэ уг кельты но шумпотыса солы ужаны-тыршыны юрттэ».

19. Кыӵе ужпумъёс тӥ ас азяды пуктӥды, та статьяез эскерыса?

¹⁹ Иеговалэн потэ, вань ужась-тыршисьёсыз, Садок сямен, кышкасьтэмесь мед луозы шуыса (2 Тим. 1:7). Но та уг возьматы, милемлы ас выламы оскиськыса улоно шуыса. Инмарлэн потэ: ми со вылэ мед оскиськомы. Тӥледлы кышкасьтэм сям уг тырмы ке, куре сое Иеговалэсь. Со тӥледлы юрттоз, Садок кадь, кышкасьтэмесь луыны! (1 Пётр 5:10).