Исаиялэн 60:1 гожтэмын: «Султы, пишты, Иерусалим; тынад югытэд пиштыны кутскиз, Кузё-Инмарлэн пиштӥсь данлыкез тон вылэ ӝутскиз». Иерусалим, яке Сӥон (кудӥз со дыре Иудалэн шоркарез вал), быдэс израиль калыкез возьматэ (Ис. 60:14; 62:1, 2). Та кылбурез лыдӟыса, кык юан кылдэ. Нырысетӥез, ку но кызьы Иерусалим «султӥз» но «пиштыны» кутскиз? Кыкетӥез, вань-а та азьпалзэ ивортонлэн кыкетӥ быдэсмонэз?

Ку но кызьы Иерусалим «султӥз» но «пиштыны» кутскиз? 70 ар ӵоже еврей калык вавилон пленын вал. Со дыр ӵоже Иерусалим но храм куашкамын вал. Нош куке мидян но перс калыкъёс Вавилонэз киултӥзы, соос лэзизы израиль калыклы Иерусалиме бертыны но чылкыт йыбырттонэз тупатыны (Езд. 1:1—4). Асьме вакытлэсь азьло 537-тӥ арын 12 выжыосысь Инмарлэн оскымон ужась-тыршисьёсыз Иерусалиме вуизы (Ис. 60:4). Соос кутскизы Иеговалы курбонъёс вайылыны, праздникъёс пусйылыны но храмез тупатыны (Езд. 3:1—4, 7—11; 6:16—22). Озьы Иеговалэн данлыкез нош ик пиштыны кутскиз Иерусалим вылэ, яке Инмарлэн калыкез вылэ. Нош Инмарлэн калыкез пиштыны кутскиз артысь калыкъёс вылэ, кудъёсыз Иеговаез уг тодо вал.

Но вашкала Иерусалим вылын Исаиялэн азьпалзэ ивортонэз быдэсак ӧз быдэсмы. Израиль калык пӧлысь тросэз Инмарлэсь кылзӥськемысь дугдӥзы (Неем. 13:27; Мал. 1:6—8; 2:13, 14; Матф. 15:7—9). Берлогес соос Мессияез, Иисус Христосэз, палэнтӥзы (Матф. 27:1, 2). Нош асьме вакытысь 70-тӥ арын Иерусалим но храм кыкетӥзэ куашкатэмын вал.

Иегова азьло ик вераз, озьы луоз шуыса (Дан. 9:24—27). Озьыен, со ӧз малпа вал, Исаиялэн книгаысьтыз 60-тӥ люкетысь чылкыт йыбырттонэз тупатон сярысь азьпалзэ ивортон музъем вылысь Иерусалим вылын быдэсак быдэсмоз шуыса.

Вань-а та азьпалзэ ивортонлэн кыкетӥ быдэсмонэз? Вань, со герӟаськемын «Инмысез Иерусалимен». Апостол Павел со сярысь вераз: «Со — ваньмылы асьмелы анай луэ» (Гал. 4:26). «Инмысез Иерусалим» — со Инмарлэн организациезлэн инмысь люкетэз, кудаз пыро солы оскымон духовной кылдытэмъёс. «Инмысез Иерусалимлэн» нылпиосыз — со Иисус но 144 000 зырӟем христианъёс, кудъёсыз, Павел сямен, инмын улозы. Зырӟем христианъёс — со «святой калык», «Инмарлэн израиль калыкез» (1 Пётр 2:9; Гал. 6:16).

Кызьы «Инмысез Иерусалим» «султӥз» но «пиштыны» кутскиз? «Султӥзы» но «пиштыны» кутскизы солэн нылпиосыз — музъем вылын улӥсь зырӟем христианъёс. Ойдолэ ӵошатомы сое, мар гожтэмын Исаиялэн книгаысьтыз 60-тӥ люкетын, соин, мар луиз зырӟем христианъёсын музъем вылын.

Малы зырӟем христианъёслы «султыны» кулэ вал? Асьме вакытысь II даурын зэмос йыбырттонлэсь палэнскемъёс туж трос луизы (Матф. 13:37—43). Озьы зырӟем христианъёс сюризы Быдӟым Вавилонлэн пленаз. Отын соос улӥзы со дырозь, кудӥз нимаське «та дуннелэн бырон дырыз» шуыса (Матф. 13:39, 40). Та вакыт кутскиз 1914-тӥ арын. Нош 1919-тӥ арын зырӟем христианъёс мозмытскизы но соку ик кутскизы «пиштыны» — Эксэйлык сярысь  иворез ӟырдыт мылкыдын тодытыны a. Со дырысен духовной югытлык пала вань калыкъёсысь адямиос лыкто. Соос пӧлын «Инмарлэн израиль калыкез» пӧлы пырисьёс но — «эксэйёс», кудъёсыз сярысь вераське Исаиялэн 60:3 (Усьт. 5:9, 10).

Азьланяз зырӟем христианъёс эшшо но зол пиштозы. Куке вань зырӟем христианъёслэн музъем вылын улонзы йылпумъяськоз но соос инмын улон понна улӟозы, соос луозы «выль Иерусалим», яке Христослэн вылькенэз, кудӥз пӧлы пыро 144 000 эксэйёс но священникъёс (Усьт. 14:1; 21:1, 2, 24; 22:3—5).

Исаиялэн книгаысьтыз азьпалзэ ивортонлэн бадӟымез люкетэз быдэсме Выль Иерусалим вылын. (Ӵошатэ Исаиялэсь 60:1, 3, 5, 11, 19, 20 но Усьтӥськонэз 21:2, 9—11, 22—26.) Музъем вылысь Иерусалимын кивалтӥзы вашкала Израильлэн эксэйёсыз. Нош Выль Иерусалим но Христос выль дуннеен кивалтозы. Кызьы валано, Выль Иерусалим «Инмысь, Инмар дорысь» ваське шуыса? Со возьматэ, зырӟем христианъёс музъем вылысь адямиос сярысь сюлмаськозы шуыса. Адямиос, кудъёсыз Инмарез гажало, Выль Иерусалимлэн «югытаз» улозы. Соос сьӧлыклэсь но кулонлэсь мозмытскозы (Усьт. 21:3, 4, 24). Кызьы азьло ик вераз Исаия но мукет пророкъёс, ваньмыз тупатэмын луоз (Ап. уж. 3:21, ВД). Тупатон вакыт кутскиз, куке Иисус эксэй луиз. Нош йылпумъяськоз Сюрс ар ӵоже кивалтонэзлэн пумаз.