1, 2. Мар малпало адямиос, мар со сыӵе рай?

 СЕУЛЫН (Лымшор Корея) конгресс йылпумъяськем бере но мукет шаеръёсысь лыктэм вын-агайёс но сузэр-апайёс стадионысь кошкыку, Кореяысь Адӟись-Ивортӥсьёс соосты келяны потӥзы. Тросэз келякузы киынызы шоназы но веразы: «Райын пумиськытозь!» Макем сюлэмез бугыртӥсь учыр вал со! Кызьы тӥ малпаськоды, кыӵе рай сярысь соос веразы?

² Пӧртэм адямиос пӧртэм сямен малпало, мар со сыӵе рай. Одӥгъёсыз понна рай — со быдэсмонтэм малпан. Мукетъёсыз понна рай — со инты, кытын соослы умой. Сютэм адями ассэ райын кадь шӧдысал, пукыса ӝӧк сьӧрын, кудаз туж трос сиён-юон пуктылэмын. Сяськаяськись возь вылэз адӟыса, тросэз верасалзы: «Татын райын кадь!» Нош тӥ кызьы малпаськоды, мар со сыӵе рай? Оскиськоды-а тӥ, со луоз шуыса?

3. Кытын Библиын нырысетӥзэ рай сярысь верамын?

³ Библиын верамын азьвыл рай сярысь но, вуоно рай сярысь но. Нырысетӥзэ рай сярысь верамын Библилэн нырысетӥ книгаяз, Улон-вылонын 2:8. Нырысетӥяз  еврей кылын гожтэм текстын верамын Едем сад сярысь. «Едем» кыл «куанон, шумпотон» шуэм луэ. Со сад зэмзэ но шумпотон вайись инты вал. Отын туж чебер инкуазь вал, трос сиён, но адямиос пудо-животъёсын тупаса улӥзы (Ул.-выл. 1:29—31).

4. Малы Едем садэз рай шуыны луэ вал?

⁴ «Сад» еврей кыл грек кылэ пара́дейсос шуыса берыктӥське, со «рай» шуэм луэ. Энциклопедиын, кудӥз бордын ужазы Макклинток но Стронг, верамын, куке грек адями пара́дейсос кылэз кылэ, солэн син азяз кылдытэм дыръяз кадь ик чебер, вӧлмыт парк пуксе шуыса, кытын пӧртэм емыш сётӥсь бадӟым писпуос будо но чылкыт шуръёс бызё, кудъёсызлэн вож турыно ярдуръёсазы кыркечъёс яке ыжъёс бичаськыса ветло. (Ӵошатэ Улон-вылонэз 2:15, 16).

5, 6. Кызьы адямиос раез ыштӥзы но кыӵе юан кылдэ соин сэрен?

⁵ Инмар Адамез но Еваез чебер садэ улыны интыяз, но соос сое ыштӥзы. Малы? Соос Инмарлэсь ӧз кылзӥське, но отын улыны правозы соослэн ӧй вал ни. Озьы рай соос понна но, нылпиоссы понна но ыштэмын вал (Ул.-выл. 3:23, 24). Со садын адямиос пӧлысь нокин но ӧз улы ни ке но, со сад Ной нуналъёсы луэм Ву тудӟонозь вал, дыр.

⁶ Кин ке но юаны быгатоз: «Улозы на-а куке адямиос рай музъем вылын?» Вань-а мугъёс солы оскыны? Тӥ оскиськоды-а, яратоно адямиосыныды райын улоды шуыса? Мар тӥледыз оскытэ? Быгатӥськоды-а тӥ валэктыны, малы музъем вылын одно ик рай луоз?

7, 8. а) Мар карыны Инмар Авраамлы кылзэ сётӥз? б) Мар сярысь малпаз, вылды, Авраам, Инмарлэсь сётэм кылзэ кылыса?

⁷ Визьмо луоз раен герӟаськем юанъёслы валэктонъёс Библиысь утчаны, малы ке шуоно сое сётӥз Иегова — раез кылдытӥсь. Тодамы ваёмы, мар со вераз аслаз эшезлы, Авраамлы. Инмар кылзэ сётӥз солэсь выжызэ «зарезь дурысь луо мында» карыны. Тани солэн кылъёсыз: «Тынад кидысэд-выжыед пыр дунне вылысь вань калыкъёс бакель каремын луозы Мынэсьтым верам кылъёсме кабыл басьтэмед понна» (Ул.-выл. 22:17, 18). Аслэсьтыз сётэм кылзэ Инмар Авраамлэн пиезлы но пиезлэн пиезлы вераз на. (Лыдӟе Улон-вылонэз 26:4; 28:14.)

⁸ Библиын нокытыназ но верамын ӧвӧл, Авраам малпаз, адямиослы инмысь райын улыны мед-кузьым сётэмын луоз шуыса. Куке Инмар вераз: «Дунне вылысь вань калыкъёс бакель каремын луозы», Авраам валаз, Инмар бакель каронъёс сярысь вераз шуыса, кудъёссэ адямиос музъем вылын басьтозы. Библиысь кыӵе эшшо кылбуръёс малпанэ вуыны юртто на, рай музъем вылын луоз шуыса?

9, 10. Кыӵе эшшо кыл сётонъёс милемлы муг луо оскыны, музъем вылын рай луоз шуыса?

⁹ Давид, кудӥз Авраам выжыысь вал, гожтӥз, вуоз шуыса дыр, куке музъем вылын «сьӧлыклэсь кышкасьтэм уз кыльы ни» (Пс. 36:1, 2, 10). Озьы ик, Инмарлэн святой духезлэн кивалтэмез улсын Давид азьпалзэ ивортыса гожтӥз, «зӥбыт-востэм улӥсьёс музъем  басьтозы, каньыллыклэн трос луэменыз эзылозы» но «шонер улӥсьёс музъем басьтозы но со вылын пумтэм вапумъёс улозы» шуыса (Пс. 36:11, 29; 2 Экс. 23:2). Тӥ малпамъя, кызьы та кыл сётонъёс шӧдӥськизы Инмарлэсь эриксэ быдэсъяны мылкыд карись адямиос вылын? Соослэн мугъёссы вал оскыны, музъем вылын шонер улӥсь адямиос гинэ луизы ке, пумен соос выльысь рай кылдытыны быгатозы шуыса, кудӥз азьвыл Едемын вал.

¹⁰ Дыр ортчемъя израиль калык пӧлысь тросэз верало вал ке но, Иеговалы йыбыртъяло шуыса, палэнскизы солэсь но солы йыбыртъямысь дугдӥзы. Соин Инмар вавилон ожгарчиослы лэзиз соосты киултыны, музъемзэс тарканы но троссэ пленэ нуыны (2 Пар. 36:15—21; Иер. 4:22—27). Но Инмарлэн пророкъёсыз, азьпалзэ ивортыса, веразы, 70 ар ортчем бере израиль калык вордӥськем музъемаз берытскоз шуыса. Со азьпалзэ ивортонъёс быдэсмизы, но соос милемын но герӟаськемын. Ойдолэ эскеромы соос пӧлысь куд-огъёссэ но малпаломы, кызьы соос музъем вылысь вуоно раен герӟаськемын.

11. Кызьы Исаиялэн 11:6—9 кылъёс быдэсмизы? Кыӵе юан кылдэ соин сэрен?

¹¹ Лыдӟе Исаиялэсь 11:6—9. Исаия пророк пыр Инмар азьло ик вераз, вордскем палъёсаз берытскем израиль калыклы номыр кышкытлык уз вайы шуыса но солы пӧйшуръёслэсь но лек адямиослэсь кышкано уз луы шуыса. Ваньзы — егитъёс но, арлыдоос но — кышкатэк улозы. Дыр ортчыса, со азьпалзэ ивортон быдэсмиз. Тодады уг вайыты-а со Едем садын улонэз? (Ис. 51:3). Озьы ик, та азьпалзэ ивортонын Исаия вераз, Инмарез израиль калык гинэ уз тоды шуыса. Со гожтӥз: «Зарезьёслэн вуэн пачылмыса улэмзы кадь, музъем выл Кузё-Инмарез тодонэн пачылмыса улоз». Ку со луоз?

12. а) Кыӵе бакель каронъёсты ас вылаз шӧдӥз вавилон пленысь берытскем израиль калык? б) Малы вераны луоз, Исаиялэн 35:5—10 кылъёс азьланяз быдэсмозы на шуыса?

¹² Лыдӟе Исаиялэсь 35:5—10. Исаия пророк эшшо одӥг пол пусъе на, берытскем израиль калыклы пӧйшуръёслэсь яке адямиослэсь кышкано уз луы шуыса. Едем сад выллем, соослэн музъемзы умой мускытатэмын луоз но трос емыш сётоз (Ул.-выл. 2:10—14; Иер. 31:12). Та азьпалзэ ивортон со вакытэ гинэ быдэсмиз-а? Нокытын но верамын ӧвӧл, пленысь бертэм израиль пиос паймымон амалэн бурмытэмын вал шуыса. Кылсярысь, синтэмъёс адӟыны ӧз кутске. Озьыен, Инмарлэн возьматэмез потэ вал, со дыр, куке со адямиосты вань висёнъёслэсь бурмытоз, азьпалан на шуыса.

13, 14. Кызьы израиль калык вылын Исаиялэн 65:21—23 кылъёс быдэсмизы? Та азьпалзэ ивортонысь кыӵе люкетэз азьланяз быдэсмоз? (Учке статья кутсконысь суредэз.)

¹³ Лыдӟе Исаиялэсь 65:21—23. Вордскем музъемазы бертыса, еврейёс ӧз шедьтэ отысь улоно кадь коркаосты, утялтэм бусыосты но виноград бакчаосты. Но Инмар соосты бакель кариз но, дыр ортчыса, соослэн югдурзы умой пала воштӥськиз. Макем шумпотыса соос асьсэлы коркаос пуктылӥзы но емыш будэтӥзы!

 ¹⁴ Висъялэ саклыктэс азьпалзэ ивортонысь одӥг тунсыко малпанлы: вуоз дыр, куке милям улон нуналъёсмы «писпулэн нуналъёсыз кадесь луозы». Куд-ог писпуос сюрс аръёс уло. Сокема улон понна, адямиослэн тазалыксы юн луыны кулэ. Адямиос улысалзы ке сыӵе умой интыын, кудӥз сярысь вераз Исаия, со зэмзэ но паймымон луысал — музъем вылын рай! Со кыл сётон одно ик быдэсмоз.

15. Вералэ куд-ог бакель каронъёсты, кудъёсыз сярысь Исаия пророклэн книгаяз гожтэмын.

¹⁵ Малпалэ, кызьы кыл сётонъёс, кудъёссэ ми эскеримы, вуоно раен герӟаськемын. Инмар музъем вылысь вань адямиосты бакель кароз. Пӧйшуръёс но лек адямиос нокинлы но кышкытлык уз вае. Синтэмъёс, пельтэмъёс но чутъёс висёнъёссылэсь бурмытэмын луозы. Адямиос асьсэлы коркаос пуктылыны но пайдаё сиён будэтыны быгатозы. Соос писпуослэсь кемагес улозы. Библия оскытэ, ваньмыз со асьмемыз азьланяз возьма шуыса. Но кин ке но милемлы вера, вылды, со азьпалзэ ивортонъёсысь ми ӧвӧлтэмзэ адӟиськомы шуыса. Мар вераны луоз сыӵе адямиослэн пумитазы? Малы ми оскыны быгатӥськомы, рай зэмзэ ик музъем вылын луоз шуыса? Милемыз оскыто Иисуслэн, вань дауръёсысь самой быдӟым адямилэн, кылъёсыз.

16, 17. Кыӵе югдуръёсын Иисус рай сярысь вераз?

¹⁶ Иисус янгыш ӧй вал ке но, сое виыны судъязы но юбо борды кортӵогазы. Солэн мыд-мыд палаз йыружъёссы понна судъям кык еврейёс кортӵогамын вал. Одӥгез соос пӧлысь кулон азяз валаз, Иисус эксэй шуыса, но куриз: «Аслад Эксэйлыкад вуид ке, монэ буре вай» (Лука 23:39—42). Иисуслэн ответ сётыса верам кылъёсыз, кудъёсыз гожтэмын Лукалэсь 23:43, азьпал улонэнымы герӟаськемын. Трос малпанъёс вань, кызьы та кылбурез берыктоно. Удмурт Библиын со тазьы берыктэмын: «Зэм ик тыныд верасько, туннэ ик Монэн огазьын райын тон луод». Нош мар верамез потэ вал Иисуслэн «туннэ ик» кылъёсын?

¹⁷ Тросаз туала кылъёсын запятойёсты уже куто, предложенилэсь пуштроссэ валаны юрттон понна. Но тужгес но вашкала грек кигожтэмъёсын, кудъёсыз асьме дырозь вуизы, куд-ог интыосын запятойёс пуктэмын ӧвӧл. Соин юан кылдэ, кызьы Иисуслэсь кылъёссэ шонер берыктоно: «Тыныд верасько, туннэ ик Монэн огазьын райын тон луод» яке «Тыныд верасько туннэ ик, Монэн огазьын райын тон луод»? Пӧртэм берыктӥсьёс Иисуслэсь кылъёссэ пӧртэм сямен валало. Соин ик та предложениын соос запятой пукто яке «туннэ ик» кылъёс азьын, яке соос бере. Озьы пӧртэм Библиосын та кылбур пӧртэм сямен берыктэмын.

18, 19. Мар юрттэ милемлы Иисуслэсь кылъёссэ шонер валаны?

¹⁸ Тодамы ваёмы, Иисус аслаз дышетскисьёсызлы азьлогес вераз вал: «Адями Пи но музъемлэн сюлмаз куинь нунал но куинь уй улоз». Со сяна, со вераз на: «Адями Пи адямиослэн ки улазы сётэмын луоз, Сое виёзы,  но куинетӥ нуналаз Со улӟыса султоз» (Матф. 12:40; 16:21; 17:22, 23; Марк 10:34). Апостол Пётр гожтӥз, ваньмыз озьы ик вал шуыса (Ап. уж. 10:39, 40). Соин йылпумъян лэсьтыны луоз: Иисус рае сюрыны уг быгаты вал со нуналэ ик, куке со но йыруж лэсьтӥсь кулӥзы. Инмар Иисусэз улӟытытозь, Иисус куинь нунал мында «адын» (яке шайгуын) вал (Ап. уж. 2:31, 32) a.

¹⁹ Соин ик Иисуслэн кылъёсыз, кудъёсыныз со йыруж лэсьтӥсьлы вазиськиз, тазьы гожтэмын луыны кулэ: «Зэм ик тыныд верасько туннэ ик». Моисей улон нуналъёсы адямиос асьсэлэсь малпанъёссэс озьы вераны дышемын вал. Одӥг пол Моисей вераз: «Туннэ тыныд сӥзьыса сётэм та кылъёсы тынад сюлмад мед улозы» (К. Зак. 6:6; 7:11; 8:1, 19; 30:15).

20. Мар возьматэ, ми Иисуслэсь кылъёссэ шонер валаськомы шуыса?

²⁰ Библиез берыктӥсь, кудӥз улӥз отын, кытын улӥз Иисус, Иисуслэн йыруж лэсьтӥсьлы верам кылъёсыз сярысь вераз: «Татын нимысьтыз висъямын „туннэ ик“ кылъёс, соин ик со предложениез лыдӟоно тазьы: „Зэм ик тыныд верасько туннэ ик, Монэн огазьын райын тон луод“. Иисус кылзэ  сётӥз со нуналэ, нош быдэсмыны со кулэ вал берлогес». Берыктӥсь озьы ик вераз на, со палъёсын улӥсь адямиос ӵем дыръя пусъё вал, кыл сётэмын шуыса сыӵе нуналэ но со одно ик быдэстэмын луоз. Соин ик Сири кылэ берыктэм Библиын, кудӥз берыктэмын вал V даурын, Иисуслэн кылъёсыз тазьы гожтэмын: «Аминь, мон верасько тыныд туннэ, монэн ӵош Едем садын тон луод шуыса». Та кыл сётон милесьтым мылкыдмес туж лӧпкытэ.

21. Малы вераны луоз, йыруж лэсьтӥсь ин Эксэйлыкын кивалтыны Инмарен быръемын ӧй вал шуыса?

²¹ Юбо борды кортӵогам йыруж лэсьтӥсь уг тоды вал, Иисус аслаз оскымон апостолъёсыныз ӵош ин Эксэйлыкын кивалтыны тупанкыл кутӥз шуыса (Лука 22:29). Со сяна, йыруж лэсьтӥсь пылатӥськемын но ӧй вал (Иоанн 3:3—6, 12). Соин ик ми вераны быгатӥськомы, солэн инмын улыны осконэз ӧй вал шуыса, нош Иисус кылзэ сётыкуз, музъем вылысь рай сярысь вераз шуыса. Аръёс ортчыса, апостол Павел гожтӥз адӟонзэ, кудаз одӥг адями «рае ӝутэмын вал» (2 Кор. 12:1—4). Юбо вылын кулӥсь йыруж лэсьтӥсь Иисусэн ӵош кивалтыны быръемын ӧй вал, нош Павел но мукет оскымон апостолъёс Иисусэн ӵош ин Эксэйлыкын кивалтыны быръемын вал. Нош луоз-а вераны, вуоно рай сярысь веракуз, Павел музъем вылысь рай сярысь но вераз шуыса? b Луоды-а тӥ со райын?

22, 23. Мар асьмемыз азьланяз возьма?

²² Кызьы верамын вал ини, Давид азьпалзэ ивортыса вераз, вуоз шуыса дыр, куке «шонер улӥсьёс музъем басьтозы» (Пс. 36:29; 2 Пётр 3:13). Давид вераз со дыр сярысь, куке музъем вылын вань адямиос Инмарлэн шонерлыко эсэпъёсызъя улозы. Исаиялэн 65:22 верамын: «Мынам калыкелэн нуналъёсыз писпулэн нуналъёсыз кадесь луозы». Со возьматэ, адямиос трос сюрс аръёс улозы шуыса. Быгатӥськоды-а тӥ но оскыны, сыӵе улон луоз шуыса? Быгатӥськоды, малы ке шуоно, Усьтӥськонын 21:1—4 верамъя, Инмар адямиосты трос бакель кароз. Одӥгез солэн бакель каронъёсыз пӧлысь — «кулон уз ни луы».

²³ Озьыен, йылпумъян лэсьтомы. Адам но Ева Едемысь раез ыштӥзы, но со пыраклы ыштэмын ӧвӧл. Инмар адямиосты музъем вылын бакель карыны кылзэ сётэ. Инмарлэн святой духезлэн кивалтэмез улсын Давид гожтӥз, зӥбыт-востэм но шонер улӥсь адямиос музъем басьтозы но со вылын пырак дауръёс ӵоже улозы шуыса. Исаиялэн книгаяз гожтэм азьпалзэ ивортонъёс эшшо но юнгес милесьтым мылкыдмес пуромыто Инмарен сӥзем паймымон югдуръёсын улыны. Ку меда со дыр вуоз? Ку быдэсмоз Иисуслэн йыруж лэсьтӥсьлы сётэм кылыз? Тӥляд но луонлыкты вань со райын улыны. Соку Лымшор Кореяын конгрессын Адӟись-Ивортӥсьёслэн вын-агайёсты но сузэр-апайёсты келякузы «Райын пумиськытозь!» верам кылъёссы быдэсмозы.