ДАЙАНАЛЫ 80 ареслэсь тросгес ини. Солэн картэз Альцгеймерлэн висёнэныз курадӟе вал, но кӧня ке ар ӵоже, кулытозяз, со пересьёслы юртын улӥз. Со сяна, Дайана кык пиоссэ ыштӥз но рак висёнэн нюръяськиз. Озьы ке но, кызьы верало вын-агайёс но сузэр-апайёс, кытын гинэ сое эн пумита — кенешлэн пумиськоназ яке ужан-тыршонын,— со котьку пальпотэ.

Джон 43 ар ӵоже мынӥсь-ветлӥсь чаклась луыса ужаз-тыршиз. Со уж солы туж кельше вал — со солэн улонэз вал! Но Джонлы, висись ӵыжы-выжыез сярысь сюлмаськон понна, ужан-тыршонзэ кельтоно луиз. Куке азьвыл тодмоосыз Джонэз конгрессысен пумитало, соос адӟо, со нокӧня но ӧз воштӥськы шуыса: солэн ымныраз азьвыл сямен ик шумпотон адӟиське.

Мар юрттэ Дайаналы но Джонлы шумпотонэн улыны? Мар кароно, шуг-секытъёсын пумиськыса но, шумпотонмес медам ыштэ шуыса? Кызьы адями шудо луыны быгатэ, солы яратоно ужезлэсь куштӥськоно луиз ке но? Библия таӵе валэктон сётэ: «Шонер улӥсь Кузё-Инмар бордын шумпотоз» (Пс. 63:11). Та кылъёсты умойгес валан понна, ойдолэ вераськомы со сярысь, мар зэмос шумпотон вае но маин со герӟаськемын ӧвӧл.

Веранэз ӧвӧл, тӥ соглаш луоды: улонын вань со, мар котьку сямен шумпотон вае. Малпалэ, кыӵе шӧдонъёссы ог-огзэс яратӥсь адямиослэн сюан нуналазы, кузпалъёслэн, кудъёсызлэн пиналзы вордӥськиз, яке христиан муртлэн, кудӥзлы кенешын выль уж оско. Со зэмзэ ик туж бадӟым шумпотон вае, малы ке шуоно Иегова озьы кылдытӥз, адямиос кузпалъяськыны, пинал вайыны мед быгатозы шуыса, озьы ик со аслаз ужась-тыршисьёсызлы христиан кенешын уж сётӥз (Ул.-выл. 2:18, 22; Пс. 126:3; 1 Тим. 3:1).

Но сыӵе шумпотон кема уг кыстӥськы. Жаляса верано луэ, кузпал кулыны яке азон-калгон сьӧлыке пырыны быгатэ (Иез. 24:18; Ос. 3:1). Нылпиос куддыръя анай-атайзылэсь но Инмарлэсь уг кылзӥсько, соосты кенешысь гинэ но поттыны быгато. Кылсярысь, Самуиллэн пиосыз Иеговалэсь законъёссэ тӥяллязы, нош Давидлэн семьяяз бадӟым шуг-секытъёс кылдӥзы, малы ке шуоно со сьӧлыказ (1 Экс. 8:1—3;  2 Экс. 12:11). Милям улонамы со выллем югдуръёс кылдо ке, милям шумпотонмы ыше.

Озьы ик, тазалыкмы уродмемен, семьяямы югдур воштӥськемен яке организациын воштӥськонъёс ортчемен, куддыръя Инмарлы ужан-тыршонын оскем ужмес кельтоно луэ. Тросэз соос пӧлысь, кинъёс со пыр потӥзы, верало, азьвыл ужзылэсь мӧзмо шуыса.

Кызьы адӟиське, шумпотон куддыръя бырыны быгатэ. Нош луэ-а сое утьыны, улонын секыт дыръёс вуо ке? Луэ. Со адӟиське Самуиллэн, Давидлэн но Иеговалэн мукет ужась-тыршисьёсызлэн улонысьтызы, кудъёсыз, шуг-секытъёсын пумиськыса но, шумпотонзэс ӧз ыштэ.

Иисус тодэ вал, мар со сыӵе зэмос шумпотон. Иеговаен инмын улыкуз, со ялан «Солэн азяз» шумпотыса улӥз (Мад. 8:30). Нош музъем вылын солы бадӟым шуг-секытъёсын пумиськылоно луиз. Озьы ке но Иисус Атаезлэсь эриксэ шумпотыса быдэсъяз (Иоанн 4:34). Нош мар вераны луоз улонэзлэн берпум часъёсыз сярысь, куке солы курадӟонэз чидано луиз? Библиын гожтэмын, азьланяз сое возьмась шумпотон понна, Иисус, ултӥянлэсь кышкатэк, юбо вылын курадӟонэз чидаз шуыса (Евр. 12:2, ВД). Соин ик, мар со сыӵе зэмос шумпотон шуыса тодон понна, луоз малпаськыны, мар со сярысь вераз Иисус.

Одӥг пол Иисус 70 дышетскисьёсты ӟеч иворез вераны ыстӥз. Солэсь сётэм ужзэ быдэстыса, соос шумпотыса берытскизы но веразы солы, кызьы соос паймымон ужъёс лэсьтӥзы но периосты гинэ но улляса поттазы. Иисус шуиз соослы: «Периос тӥлесьтыд кылзӥсько шуыса, шум эн потэ,— шумпотэлэ, тӥляд нимъёсты Инмын гожтӥськемын шуыса» (Лука 10:1—9, 17, 20). Зэм, Иеговалы ярамон луон трослы кулэгес луэ котькыӵе нимысьтыз сётэм ужлэсь но тросгес шумпотон вае.

Мукетаз учыре, куке Иисус калыклы ӟеч иворез вераз, одӥг иудей кышномурт бадӟым куараен вераз, сыӵе быдӟым дышетӥсьлэн анаез туж шудо, вылды, шуыса. Нош Иисус, сое тупатыса, шуиз: «Шудоесь Инмарлэсь кылзэ кылзӥсьёс, сое быдэсъясьёс» (Лука 11:27, 28). Пиеныд яке нылыныд данъяськон — со бадӟым шумпотон, но сое уд ӵошаты со шумпотонэн, кудзэ басьтӥськод Иеговалэсь кылзӥськыса но со доры матэ кариськыса.

 Зэм, Иеговалы ярамон луиськод шуыса тодон туж бадӟым шумпотон вае. Ми шуг-секытъёслы шум ум потӥське, но ми оскиськомы, ми азьвыл сямен ик Иеговалы ярамон луиськомы шуыса. Шуг-секытъёсын юнэсь кыльыса но соосты чидаса, ми вормисе потӥськомы, но милям сюлэммы шумпотонэн пачылме (Рим. 5:3—5). Со сяна, Иегова аслэсьтыз духсэ сётэ соослы, кинъёс солы оско, нош шумпотон солэн духезлэн емышез пӧлы пыре (Гал. 5:22). Со умойгес валаны юрттэ Псалтирьысь 63:11 кылъёсты: «Шонер улӥсь Кузё-Инмар бордын шумпотоз».

Табере валамон, малы Дайана но Джон секыт дыръёсы шумпотонзэс утьыны быгатӥзы. Дайана вера: «Иегова вӧзын мон номырлэсь но уг кышкаськы, озьы ик, кызьы нылпи атаез вӧзын номырлэсь уг кышка». Малы Дайана малпа, со Иеговалы ярамон шуыса? Со валэктэ: «Мон Иеговалэсь бакель каремзэ адӟисько, малы ке шуоно со мыным кужым сётэ ялан пальпотыса тодытон уже пыриськыны». Джон но, кудӥзлы мынӥсь-ветлӥсь луыса яратоно ужан-тыршонзэ кельтоно луиз, азьвыл сямен ик ӟырдыт мылкыдын тодытон уже пыриське. Мар солы юрттэ? Со вера: «1998-тӥ арысен, куке монэ Ужан-тыршонэз умоятон школаын дышетыны куризы, мон ас поннам Библиез дышетонлы тросгес дырме висъяны кутски». Тани мар со вера ачиз сярысь но кышноез сярысь: «Иеговалы ужан-тыршонын мылкыдмы, вань та аръёс ӵоже кыӵе гинэ уж милемлы медаз сётэ, юрттӥз милемлы выль югдуръёслы дышыны. Ми чик ум жаляське, озьы улӥмы шуыса».

Мукетъёсыз но вын-агайёс но сузэр-апайёс ас вылазы шӧдӥзы, Псалтирьын 63:11 гожтэм кылъёс шонер луо шуыса. Тани одӥг кузпалъёслэн учырзы. Соос 30 арлэсь кемагес США-ысь Вефильын ужазы-тыршизы, нош собере соосты нимысьтыз пионеръёс луыса ужаны-тыршыны куризы. Кузпалъёс верало: «Куке ыштӥськод сое, мае яратӥськод, сюлэм туж вӧсь луэ, но со паймымон ӧвӧл. Озьы ке но вӧсь луон весяк уг кыстӥськы». Та кузпалъёс ӝоген кенешысьтызы ивортӥсьёсын ӵош тодытон уже пыриськыны кутскизы. Соос верало: «Ми Иеговалы вӧсяськимы но шонерак верамы, мар милемлы кулэ. Иеговалэсь вӧсяськонъёсмылы ответ сётэмзэ адӟыса, ми туж шумпотӥмы, но со милемыз туж юнматӥз. Та кенеше лыктэммы бере куд-ог вын-агайёс но сузэр-апайёс пионер луыса ужаны-тыршыны кутскизы, нош ми кык умой Библия дышетон шедьтӥмы».

Веранэз ӧвӧл, куддыръя шумпотонэз утьыны секыт: улонын шуг-секытъёс пумисько. Озьы ке но Иеговалэн эрикезъя Библиын гожтэмын вал кыл сётон, кудзэ ми шедьтӥськомы Псалтирьысь 63:11. Куддыръя милемлы ӝож луэ ке но, ми оскыны быгатӥськомы, шонер улӥсь, Инмарлы котькыӵе югдуръёсын оскымон кыльыса, «Кузё-Инмар бордын шумпотоз» шуыса. Со сяна, ми быгатӥськомы малпаськыны со дыр сярысь, ку быдэсмоз Иеговалэн «выль ин, выль музъем» сярысь сётэм кылыз. Соку вань адямиос тырбыдэс луозы. Инмарлэн вань ужась-тыршисьёсыз, солэсь бакель каремзэ адӟыса, шулдыръяськыса, шумпотыса улозы (Ис. 65:17, 18).

Малпалэ гинэ: ми быдэсак тазалыко луомы но котькуд ӵукна трос кужымен сайкаломы. Кайгыронъёс сюлэммес уз шугъяськытэ ни — вань ӝож тодэ ваёнъёс ортчозы-бырозы. Ми тодӥськомы, со дыре «азьвылъёссэ-вужъёссэ буре уз ни вае, тодазы уз ни вае» шуыса. Нош улӟытонлы луыса, ми нош ик матысь адямиосынымы но ӵыжы-выжыосынымы пумиськомы. Трос миллион адямиослэн сыӵе ик шӧдонъёссы луозы, кыӵе шӧдонъёссы вал 12 аресъем нылашлэн анай-атаезлэн, кудъёсыз туж шумпотӥзы, куке Иисус нылзэс улӟытӥз (Марк 5:42). Вань адямиос котьмар ласянь шонерлыко луозы но пырак дауръёс ӵоже «Кузё-Инмар бордын» шумпотыса улозы.