1. Кызьы тросэз адямиос уж шоры учко?

 КЫЗЬЫ уж шоры учко тӥ палан улӥсь адямиос? Трос шаеръёсын адямиос тросгес ужаны кутскизы. Ӵем дыръя соос сокем жадемын, соослэн дырзы но уг кыльы ини семьязылы, шутэтсконлы но Инмар сярысь тодон-валан басьтонлы (Екк. 2:23). Мукет паласен учкыса, вань сыӵе адямиос, кудъёсыз ужаны уг ярато, но соос трос мугъёс шедьтыны тыршо валэктон понна, малы соос ужатэк уло (Мад. 26:13, 14).

2, 3. Кызьы Иегова но Иисус уж шоры учко?

² Иеговалэн но Иисуслэн уж шоры учкемзы чылкак мукет луэ солэсь, кызьы со шоры учко та дуннеысь адямиос. Ми тодӥськомы, Иегова ужаны яратэ шуыса. Иисус сое валаны юрттӥз, куке вераз: «Мынам Атае туннэ нуналозь ужа, Мон но ужасько» (Иоанн 5:17). Малпаське: макем трос ужано луиз, лыдъяны луонтэм духовной кылдытэмъёсты но быдэс Дуннеез кылдытон понна. Нош кӧня паймымон кылдытэмъёсты ми асьме Музъем вылысьтымы адӟиськомы! Псаломъёсты гожъясь вераз: «Туж паймымонэсь Тынад ужъёсыд, Кузё-Инмаре! Котьмае но Тон визьмын кылдытэмед; музъем тырмемын Тынад кылдытэм макеосыныд» (Пс. 103:24).

³ Иисус адӟем кариз Атаезлэсь. Куке Инмар «инъёсты кылдытыны» дасяськиз, Иисус солы юрттӥз. Иегова бордын со «кибашлы пуктӥськись-лэсьтӥськись вал» (Мад. 8:27—31). Берлогес, музъем вылэ лыктыса, Иисус нош ик туж умой быдэстӥз Иеговалэсь ужзэ. Кызьы сиён шумпотон вае, озьы ик та ужез быдэстон но Иисуслы шумпотон вайылӥз, но ваньмыз, мае со лэсьтӥз, музъем вылын ужакуз-тыршыкуз, возьматӥз,  сое Инмар ыстӥз шуыса (Иоанн 4:34; 5:36; 14:10).

4. Кызьы Иегова но Иисус шутэтскон шоры учко?

⁴ Иегова но Иисус дугдылытэк тыршо бере, возьматэ-а со, ми но шутэтскытэк улыны быгатӥськомы шуыса? Уг, уг возьматы. Иегова ноку но уг жадьы, соин ик солы шутэтсконо ӧвӧл. Зэм но, Библиын гожтэмын, инмез но музъемез кылдытыса, Иегова «шутэтскиз, ӧз ужа» шуыса (Пот. 31:17). Но со возьматэ, вылды: Иегова кылдытэмысь дугдӥз но, кылдытэмъёсыз шоры учкыса, шумпотыса улӥз. Иисуслы, музъем вылын ужакуз-тыршыкуз, трос лэсьтоно вал ке но, со ӧз вунэтылы эшъёсыныз сиськыны но шутэтскыны (Матф. 14:13; Лука 7:34).

5. Мар шоры тросэзлы шонер учкыны секыт?

⁵ Библия Инмарлэн ужась-тыршисьёсызлэсь мылкыдзэс ӝутэ тыршыса ужаны но азьтэмъяськытэк улыны (Мад. 15:19). Ми пӧлысь тросэз ужало, семьязэс сюдон-вордон понна. Со сяна, Христослэн вань дышетскисьёсыз тыршо ӟеч иворез вераны. Озьы ке но милемлы ваньмылы умой шутэтскыны кулэ. Луылэ-а тӥледлы секыт шонер учкыны уж, ужан-тыршон но шутэтскон шоры? Кызьы валано, кӧня дыр висъяны кулэ ужлы, нош кӧня — шутэтсконлы?

6. Кызьы учыр, кудӥз гожтэмын Марклэсь 6:30—34, возьматэ, Иисус уж но шутэтскон шоры шонер учкиз шуыса?

⁶ Милемлы уж шоры шонер учкыны кулэ. Соломон эксэй святой духлэн кивалтэмез улсын гожтӥз: «Котьмарлэн но аслаз дырыз вань... котькыӵе арберилэн но аслаз дырыз вань». Со вераз, мерттӥськонлэн, лэсьтӥськонлэн, бӧрдонлэн, серекъянлэн но эктонлэн аслаз дырыз вань шуыса (Екк. 3:1—8). Зэм но, уж но шутэтскон — улонмылэн кык тужгес но кулэ луись люкетъёсыз. Иисус уж но шутэтскон шоры шонер учкиз. Одӥг пол апостолъёс кема дыр ӵоже тодытӥзы, но соослэн сокем трос ужзы вал, соослы «сиськыны но маза» ӧй вал. Соку Иисус соослы шуиз: «Асьтэ понна, калыктэм интые мыныса, ӧжытак шутэтске». (Лыдӟе Марклэсь 6:30—34.) Иисуслэн но солэн дышетскисьёсызлэн котьку ик луонлыксы ӧй вал ке но шутэтскыны сомында, кӧня соослэн потэ вал, Иисус тодӥз, шутэтскыны кулэ шуыса.

7. Кыӵе пайда ваёз милемлы суббота сярысь законэз эскерон?

⁷ Милемлы ваньмылы куддыръя шутэтскыны яке мукет ужен вырыны кулэ. Ми сое адӟыны быгатӥськомы законысь, кудзэ Инмар вашкала дыръёсы аслаз калыкезлы сётӥз. Со вал котькуд арняе субботаез чаклан сярысь закон. Али ми Моисейлэн законэзъя ум улӥське. Озьы ке но ми пайда басьтомы, куке тодомы, мар отын вераськиз суббота сярысь. Со юрттоз милемлы эскерыны, кызьы ми учкиськомы уж но шутэтскон шоры.

8. Потонэз 31:12—15 лыдэ басьтыса, малы сӥземын вал суббота?

⁸ Кызьы гожтэмын Инмарлэн Кылаз, Иегова куать «нунал» куспын лэсьтоно ужъёссэ быдэстӥз, собере со музъем вылын номыре ӧз кылдыты ини (Ул.-выл. 2:2). Нош Иегова ужаны яратэ, но со «туннэ нуналозь ужа», мукет сямен ке но (Иоанн 5:17). Иеговалэн шутэтскон нуналыз, кудӥз сярысь Улон-вылон книгаын вераське, возьматӥз, кызьы израиль калыклы котькуд арняе субботаез чаклано. Суббота возьматӥз, израиль калыклэн Инмарен матысь кусыпъёсыз вал шуыса, но тодэ вайытылӥз, Иегова сое Египетысь мозмытӥз шуыса. Суббота со Инмарлы сӥзем «шутэтскон нунал» вал. (Лыдӟе  Потонэз 31:12—15.) Та нуналэ нокинлы но ужаны уг яра вал: нылпиослы, ляльчиослы, пудолы гинэ но (Пот. 20:10). Солы луыса израиль калык Иеговалы йыбырттонэн герӟаськем ужъёслы тросгес саклыксэ висъяны быгатӥз.

9. Суббота пумысен кыӵе шонертэм малпанъёс вӧлмемын вал Иисус Христос улон нуналъёсы?

⁹ Суббота сярысь закон Инмарлэн калыкезлы пайда вайиз. Нош тросэз религиозной кивалтӥсьёс, кудъёсыз Иисус Христос дыръя улӥзы, суббота пумысен туж чурыт курон-косонъёс пуктылӥзы. Соос веразы, та нуналэ ю шепъёсты чигылыны яке висисьёсты бурмытъяны но уг яра шуыса (Марк 2:23—27; 3:2—5). Нош со чылкак пумит мынӥз Инмарлэн малпамезлы, но Иисус валэктылӥз тае ваньмызлы, кинъёс сое кылзыны дась вал.

10. Кызьы Иисус суббота шоры учкиз, Матфейлэсь 12:9—12 лыдэ басьтыса?

¹⁰ Иисус но солэн иудейёс пӧлысь дышетскисьёсыз субботаез чаклазы, малы ке шуоно соос Моисейлэн законэзъя улӥзы b. Нош аслаз кылъёсыныз но ужъёсыныз Иисус возьматӥз, суббота шоры шонер учконо но со нуналэ мукетъёсызлы юрттыны луэ шуыса. Иисус пырак вераз: «Суббота нуналэ ӟеч уж лэсьтыны яра». (Лыдӟе Матфейлэсь 12:9—12.) Со ӧз малпа, суббота нуналэ ӟеч ужъёсты лэсьтыны шонертэм шуыса. Иисуслэн ужъёсысьтыз адӟиське, со вала вал шуыса валтӥсь мугез, малы Инмар калыксэ субботаез чакланы косӥз: огшоры ужъёслэсь  шутэтскыса, калык Иеговалы йыбырттонэн герӟаськем ужъёслы саклыксэ висъяны быгатӥз. Иисус будӥз семьяын, кудаз суббота нуналэз Иеговалы матэгес кариськон понна сӥзизы, вылды. Со адӟиське учырысь, кудӥз луиз Иисусэн вордӥськем караз, Назаретын. Лукалэсь ӟеч иворын Иисус сярысь гожтэмын: «Быдэ вуэм городаз, Назаретэ, лыктӥз. Со суббота нуналэ, огдышем сяменыз, сӥнагогае пыриз но лыдӟыны султӥз» (Лука 4:15—19).

11. Кин Иисуслы умой адӟем карон возьматӥз со пумысен, кызьы уж шоры учконо?

¹¹ Куке Иосиф Иисусэз тӥрен ужаны дышетӥз, со юрттӥз солы уж шоры Инмар сямен учкыны (Матф. 13:55, 56). Озьы ик Иисус адӟыны быгатӥз, кызьы Иосиф нуналысь нуналэ секыт ужаз, бадӟым семьязэ сюдон-вордон понна. Тунсыко, мае берлогес вераз Иисус аслаз дышетскисьёсызлы: «Ужась мурт ужамез понна кӧттыр басьтыны кулэ» (Лука 10:7). Адӟиське, Иисус ачиз но секыт ужъёсты быдэсъяз шуыса.

12. Библиысь кыӵе кылбуръёс возьмато сое, кызьы Павел уж шоры учкиз?

¹² Сое ик вераны луэ апостол Павел сярысь но. Со понна валтӥсез вал Иисуслэн нимыз но солэн иворез сярысь тодытон. Озьы ке но Павел ужаз, улыны коньдонэз мед луоз шуыса. Солэн верамезъя, Фессалоникаын улӥсьёс тодӥзы, со «уй но нунал» пӧсятозяз ужаз, «акылляськытэк улыны» тыршиз шуыса (2 Фес. 3:8; Ап. уж. 20:34, 35). Ужез сярысь веракуз, Павел палаткаосты лэсьтон сярысь вераз, вылды. Куке со Коринфын вал, со Акила но Прискилла дорын улӥз но соосын ӵош палаткаосты лэсьтӥз. Павел «уй но нунал» ужаз шуыса веран уг возьматы, со вань дырзэ та ужлы сӥзе вал шуыса. Кылсярысь, со суббота нуналъёсы ӧз ужа. Солы луыса со тодытыны быгатӥз иудей калыклы, кудӥз суббота нуналъёсы озьы ик ӧз ужа (Ап. уж. 13:14—16, 42—44; 16:13; 18:1—4).

13. Малы ми апостол Павеллэсь дышетскыны быгатӥськомы?

¹³ Апостол Павел милемлы умой адӟем карон возьматӥз. Солы ужано луиз ке но, со тыршиз ӟеч иворез ялан тодытыны (Рим. 15:16; 2 Кор. 11:23). Со мукетъёсызлэсь мылкыдзэс ӝутылӥз ялан тодытон уже пыриськыны. Кылсярысь, Коринфын улӥсьёсты со ӧтиз Инмарлы трос ужаны-тыршыны (1 Кор. 15:58; 2 Кор. 9:8). Озьы ик Павел Акилаез но Прискиллаез соин «ӵош Иисус Христослы ужанын» юрттӥськисьёс шуыса нимаз (Рим. 12:11; 16:3). Со сяна, Иегова Павеллэсь мылкыдзэ ӝутӥз гожтыны: «Кин уг ужа, со уг сиы» (2 Фес. 3:10). Та возетэз огшоры ужын но, тодытон ужын но кутыны луэ (2 Фес. 3:10).

14. Мае возьмато Иисуслэн кылъёсыз, кудъёсыз Иоаннлэсь 14:12 гожтэмын?

¹⁴ Тужгес но кулэ луись уж, кудзэ та берпум нуналъёсы быдэстоно — со тодытон но дышетскисьёсты дасян уж. Иисус азьло ик вераз, солэн дышетскисьёсыз, асэныз ӵошатыса, «бадӟымзэгес ужъёсты» лэсьтозы шуыса! (Лыдӟе Иоаннлэсь 14:12.) Мар сярысь со вераз? Со ӧз вера, ми со кадь паймымон ужъёсты лэсьтыны быгатомы шуыса. Со интые Иисуслэн верамез потэ вал: соин ӵошатыса, ми тодытомы но дышетомы тросгес интыосын, тросгес адямиослы но кемагес дыр ӵоже.

15. Кыӵе юанъёс аслыд сётоно но малы?

¹⁵ Тӥ ужаськоды ке, юалэ асьтэлэсь: «Адямиослэн малпамзыя, мон тыршись-а адями? Дырыз дыръя-а мон ужме быдэстӥсько но тыршисько-а мон сое умой лэсьтыны?» Та юанъёслы тӥ «бен» шуиды ке, соку уж дорысьтыды кузёды тӥледлы оскоз, вылды. Со сяна, ӟеч иворез веракуды, ӵош ужасьёсты  тӥледыз умойгес кылзозы, вылды. Нош табере асьтэлы таӵе юанъёс сётэ: «Адямиослэн малпамзыя, мон тыршыса-а тодытӥсько но дышетӥсько? Умой-а мон дасяськисько адямиосын вераськон азьын? Ӝегатскытэк-а мон лыктӥсько соос доры, кинъёс ӟеч иворез кылзӥзы? Ялан-а мон пӧртэм амалъёсын тодытыны тыршисько?» Тӥ «бен» шуиды ке, соку та уж тӥледлы шумпотон ваёз.

16. Кызьы Иисус но апостолъёс шутэтскон шоры учкизы, нош кызьы со шоры учко та дуннеысь адямиос?

¹⁶ Иисус вала вал, солы но дышетскисьёсызлы куддыръя шутэтсконо шуыса. Соку но, туннэ но тросэз адямиос возё асьсэды Иисуслэн мадёнысьтыз узыр адями кадь, кудӥз ачиз сярысь вераз: «Шутэтскы, си, ю, шулдыръяськы» (Лука 12:19; 2 Тим. 3:4). Та адямилэн шутэтскыса но улонлы шумпотыса гинэ улэмез потэ вал. Нош Иисус но апостолъёс шутэтскон шоры чылкак мукет сямен учкизы.

17. Мар ми кариськомы, куке милям дырмы вань?

¹⁷ Ми Иисуслэсь адӟем карыны тыршиськомы. Куке милям дырмы вань, ми шутэтскыса гинэ ум улӥське, озьы ик ми тодытӥськомы но христиан пумиськонъёсы ветлӥськомы. Ми понна дышетскисьёсты дасян но пумиськонъёсы ветлон туж кулэ луэ. Соин ик ми лэсьтӥськомы ваньзэ, мае быгатӥськомы, та ужъёсын Иеговаез шумпоттон понна (Евр. 10:24, 25). Отпускын дыръя но ми Инмарлы ужан-тыршонэн герӟаськем ужъёсты лэсьтэмысь ум дугдӥське: кытын гинэ ми медам луэ, ми пумиськонъёсы ветлӥськомы но адямиосын Библия сярысь вераськыны тыршиськомы (2 Тим. 4:2).

18. Мар возьма милесьтым Иисус Христос Эксэймы?

¹⁸ Ми туж шумпотӥськомы, Иисус Христос Эксэймы лэсьтыны луонтэмзэ милесьтым уг возьма но милемлы уж но шутэтскон шоры шонер учкыны юрттэ шуыса! (Евр. 4:15). Солэн потэ, ми тырмыт мед шутэтскомы шуыса. Но со дыре ик Иисуслэн потэ, ми мед тыршомы улон понна коньдон поттыны но дышетскисьёсты дасян уже пыриськыны. Вуоно статьяын ми эскеромы, мар кариз Иисус, милемыз сьӧлыклэсь мозмытон понна.