ЛЫДЪЯСЬКОДЫ-А тӥ асьтэды тау карись адямиен? Та юан вылын малпаськыны кулэ. Библиын азьло ик гожтэмын вал, асьме нуналъёсы тросэз адямиос тау карисьтэмесь луозы шуыса (2 Тим. 3:2). Тӥляд вань, дыр, пумитамды сыӵе адямиосты, кудъёсыз малпало, мукетъёсыз соос понна мар ке но карыны кулэ но соос асьсэос нокинэ но тау карыны кулэ ӧвӧл шуыса. Кельше-а тӥледлы сыӵе адямиен кусып возьыны?

Иеговалэн ужась-тыршисьёсызлы верамын: «Ваньмыз понна тӥ тау карыса улэ» но «Ваньмыз понна Инмарлы тау каре» (Кол. 3:15; 1 Фес. 5:18). Тау карись луон милемлы асьмелы пайда вае. Со понна кӧня ке мугъёс вань.

Одӥгез кулэ луись муг, малы тау карись луыны дышетсконо: тау карон астэ гажаны юрттэ. Мукетъёссэ тау карись адями ассэ умойгес шӧдэ, озьы ик со адями но, кинэ тау каро. Малы тау карон милемыз но, мукетъёссэ но шудогес каре? Малпаське ай: куке адями тӥ понна мар ке но каре, уг возьматы-а со, тӥ та адямилы дуно потӥськоды шуыса? Со тӥ сярысь сюлмаське. Тӥ сое шӧдӥськоды, но тае валан юрттэ тӥледлы асьтэды гажаны. Ӵапак озьы ик вал, дыр, Руфьлэн учыраз но. Вооз солы шырыт сямзэ возьматӥз. Но Руфь туж шумпотӥз, луоз, со сярысь кин ке но сюлмаське шуыса (Руфь 2:10—13).

Тужгес но кулэ Инмарлы тау карыны. Тӥ трос пол малпады, вылды, макем трос кузьымъёс сётӥз милемлы Иегова но эшшо сётэ на (К. Зак. 8:17, 18; Ап. уж. 14:17). Умой луысал Иеговалэн ӟечлыкез сярысь малпаськон понна дыр висъяны. Кылдытӥсьмылэн шырыт луэмез сярысь малпаськон солы тау карыны мылкыддэс будэтоз но эшшо золгес оскытоз, со тӥледыз яратэ но дунъя шуыса (1 Иоанн 4:9).

Нош Иеговалэн шырыт луэмез но ӟечлыкез сярысь малпаськыны гинэ ӧжыт луэ. Со сяна, ӟеч ужъёсыз понна сое тау кароно (Пс. 99:4, 5). Кызьы гожтэмын психологияя одӥг книгаын, «мукетъёссэ тау карон адямиез шудогес каре».

Мукетыз муг, малы тау карон пайда вае: со эшъяськонэз юнматэ. Котькудӥзлэн потэ, сое мед дунъялозы шуыса. Куке тӥ сюлмысьтыды кинэ ке но ӟеч ужез понна тау кариськоды, тӥляд соин кусыпъёсты юнмало (Рим. 16:3, 4). Со сяна, тау карись адямиос ӵемгес дась луо мукетъёсызлы юрттыны. Соос адӟо, кызьы соослы ӟеч ужъёс лэсьто, но та соослэсь мылкыдзэс ӝутэ озьы ик лэсьтыны. Зэм, мукетъёсызлы юрттыса, ми шудогес луиськомы. Иисус юнме ӧз вера: «Басьтон сярысь, сётыны умойгес» (Ап. уж. 20:35).

Роберт Эммонс, Калифорниысь университетын ужась профессор но одӥгез соос пӧлысь, кин тау каронэз эскеронъя ужез нуэ, вера: «Тау карись луон понна, милемлы валаны кулэ, ми ог-огенымы герӟаськемын шуыса. Куддыръя ми сётӥськомы, нош куддыръя милемлы сёто». Зэм но, милям улонмы но шудбурмы ӵем дыръя мукетъёсыныз герӟаськемын. Кылсярысь, мукет адямиостэк милям сиён-юонмы но эмъяськыны луонлыкмы ӧй луысал (1 Кор. 12:21). Тау карись адями дунъя сое, мае солы мукетъёсыз лэсьто. Вань-а тӥляд мукетъёссэ тау карон сямды?

Тау карись луон понна, вань на эшшо одӥг муг: со юрттэ улон шоры умоен учкыны. Вераны луоз, милям визьмы фильтрлы укша: ми быгатӥськомы одӥгезлы саклыкмес висъяны, нош мукетсэ палэнтыны. Тау карись адями тросгес саклыксэ висъя умоезлы, но ӧжытгес — уродэзлы. Куке ми мукетъёссэ тау кариськомы, ми тросгес умойзэ адӟиськомы, нош со мылкыдмес ӝутэ эшшо но тау карисесь луыны. Ми саклыкмес висъяськомы ке солы, мар понна тау карыны луэ, милемлы капчигес луоз вазиськыны апостол Павеллэн ӧтемезлы: «Котьку но Кузё-Инмар бордын шумпотыса улэ» (Флп. 4:4).

Тау карон мылкыд урод малпанъёсын нюръяськыны юрттэ. Секыт огдыре ик тау карись луыны, но со дыре ик вожъяськись, куректӥсь но йыркуръяськись луыны. Со сяна, тау карись адямиос коньдон сярысь сокем трос уг сюлмасько. Соос дунъяло сое, марзы соослэн вань, но, вань кужымзэс поныса, эшшо но тросгес люканы уг тыршо (Флп. 4:12).

Ми валаськомы: Шайтанлэн потэ, шуг-секытъёс, кудъёсыныз ми та берпум нуналъёсы пумиськиськомы, мылкыдмес мед куашкатозы шуыса. Со шумпотысал, ми урод мылкыдын но ӝожтӥськыса улысалмы ке. Ми асьмеды озьы возимы ке, адямиослы ӟеч ивор вераммес кылзыны секыт луоз. Тау карон туж герӟаськемын Инмарлэн духезлэн емышеныз, кытчы пыро шумпотон но оскон. Кылсярысь, ми шумпотӥськомы, малы ке шуоно адӟиськомы сое, мае милемлы Инмар сётэ, но ми оскиськомы, азьпал улон пумысен солэн кыл сётонъёсыз быдэсмозы шуыса (Гал. 5:22, 23).

Иеговалэн Адӟись-Ивортӥсез луыса, тӥ соглаш луоды, дыр, соин, мар вераське та статьяын тау карон сярысь. Озьы ке но тӥ валаськоды, тау карись луон но ваньмыз шоры умоен учкон ас понназ уг лыкты шуыса. Но мылкыдды медаз куашка — тӥ сое будэтыны быгатӥськоды. Кызьы? Котькуд нунал дыр висъялэ малпаськыны со сярысь, мар понна тӥляд тау каремды потэ. Макем ӵемгес тӥ озьы кароды, сокем умойгес быгатоды тау карондэс возьматыны. Тӥ трослы шудогес луоды соослэсь, кинъёс улонысь шуг-секытъёсты гинэ адӟо. Малпаське ваньмыз умоез сярысь, мае тӥ понна Иегова но мукет адямиос лэсьто. Кылсярысь, котькуд нунал гожъяны луэ одӥг-кык учыр сярысь, кудӥз понна тӥляд тау каремды потэ.

Куд-ог тодосчиослэн эскеронзы возьматӥз, «куке ми ялан мукетъёсты тау кариськомы, милям йырвизьмы мукет сямен ужаны кутске, но милемлы капчигес улонысь умойзэ адӟыны». Тау карись адямиос шудогес луо. Дунъялэ ваньзэ умойзэ, марды тӥляд вань. Улонысьтыды котькуд умой учырез тодады возе. Котьку тау карись луэ! Эн малпалэ, ваньмыз ас понназ сётӥське шуыса,— «Кузё-Инмарез данъялэ, Со ӟеч». Озьыен, «ваньмыз понна тӥ тау карыса улэ» (1 Пар. 16:34; Кол. 3:15).