1, 2. а) Мар со юбилей? (Учке « Мае вашкала Израильын юбилей шуыса нимазы?» рамкаез.) б) Мар вераз Иисус, Лукалэсь 4:16—18 лыдэ басьтыса?

 КУД-ОГ шаеръёсын ӵем дыръя адямиос кулэ луись учыръёслэсь 50-тӥ арзэ пусъё. Сое юбилей шуыса нимало. Юбилеез пусъён быдэс нунал, арня но кемагес кыстӥськыны быгатэ. Озьы ке но сое пусъён куке но йылпумъяське, но соин герӟаськем шумпотон быре.

² Вашкала Израильын котькуд 50-тӥ ар юбилей ар шуыса лыдъяськиз. Та аре шумпотон понна нимысьтыз муг кылдылӥз: израиль калык эрико луэ вал. Малы та милемлы тунсыко потэ? Малы ке шуоно вашкала Израильысь юбилей ар тодамы вайытэ сое, мар лэсьтӥз Иегова, ми пыраклы эрико мед луомы шуыса, кызьы со сярысь Иисус Христос вераз. (Лыдӟе Лукалэсь 4:16—18.)

3. Кыӵе пайда вае вал израиль калыклы юбилей ар, Левитэз 25:8—12 лыдэ басьтыса?

³ Иисуслэсь эрико луон сярысь кылъёссэ умойгес валан понна, ойдолэ нырысь вераськомы юбилей сярысь, кудзэ Инмар ас калыксэ вашкала дыръя пусйыны косӥз. Иегова израиль калыклы вераз: «Витьтонэтӥ арез вӧсялэ, та музъемын улӥсь вань адямиослы эрик сётӥськомы шуыса ялэ: та тӥляд юбилейды мед луоз; котькудды но асьтэлэн люкет музъемады берытске, котькудды но асьтэлэн выжыды доры берытске». (Лыдӟе Левитэз 25:8—12.) Кылем статьяын ми эскеримы, малы израиль калыклы котькуд арняе субботаез чаклано вал. Нош кыӵе пайда вае вал соослы юбилей ар? Шуом, израиль калыкысь адями, пунэмъёссэ берыктон понна, музъемзэ вузано луэ вал. Юбилей аре та музъемез  солы ик берыктылӥзы. Озьыен, та адями быгатӥз аслаз люкет музъемаз берытскыны но сое нылпиосызлы сётыны. Яке, шуом, кинлэн ке но сокем бадӟым пунэмъёсыз вал, солы ассэ яке нылпиосыз пӧлысь кинэ ке но ляльчи луонэ но вузано луиз. Юбилей дыръя ляльчиез мозмытоно но семьяезлы берыктоно вал. Озьыен, нокин но быдэс улонэзлы, нокыӵе осконтэк, ляльчи уг луы вал! Зэм но, Иегова аслаз калыкез сярысь сюлмаськиз.

4, 5. Малы ми юбилей ар сярысь тодыны кулэ?

⁴ Кыӵе эшшо пайда вайылӥз на юбилей ар? Иегова валэктӥз: «Тӥляд пӧлады кураськисьты уз луы, уго Инмаредлэн Кузё-Инмарлэн тыныд люкетлы, пумтэм вапумъёс ӵожелы киулад басьтыны сётэм музъемаз Кузё-Инмар тонэ бакель кароз» (К. Зак. 15:4). Со туж пӧртэм луэ солэсь, мае ми туннэ адӟиськомы: узыръёс узырмо, нош куанеръёс куанергес луо!

⁵ Христианъёс Моисейлэн законэзъя уг уло. Соин ик ми ум быдэсъяське юбилей арен герӟаськем курон-косонъёсты, кылсярысь, ляльчиосты мозмытон сярысь, пунэмъёсты куштон сярысь но музъемез берыктон сярысь (Рим. 7:4; 10:4; Еф. 2:15). Озьы ке но малпано ӧвӧл, юбилей сярысь законлы ми саклыкмес висъяны кулэ ӧвӧл шуыса. Малы? Малы ке шуоно со тодамы вайытэ сое, мае Иегова лэсьтӥз ини, милемыз сьӧлыклэсь мозмытон понна.

6. Малэсь мозмытскыны кулэ адямиослы?

⁶ Милемлы ваньмылы мозмытскон кулэ, малы ке шуоно ми сьӧлыклэн ляльчиосыз луиськомы, нош сьӧлык — со туж лек кузё. Ми сьӧлыко адямиос бере, соин ик ми пересьмиськомы, висиськомы но кулӥськомы. Ми пӧлысь тросэз адӟо, со озьы ик вань шуыса, куке синучконэ учко яке эмъясь доры лыкто. Озьы ик милям мылкыдмы куашка, куке сьӧлыкаськомы. Апостол Павел вераз, мугор люкетъёсаз интыяськем сьӧлыклэн законэз сое «киулаз кутыса возе» шуыса. Озьы ик со ватсаз на: «Куанер мискинь адями мон! Кин монэ та кулоно мугорлэсь мозмытоз?» (Рим. 7:23, 24).

7. Мар азьло ик вераз Исаия мозмытскон сярысь?

 ⁷ Шумпотыса верано, Инмар сюлмаськиз, милемыз сьӧлыклэсь мозмытон понна. Иисуслы луыса милям мозмытскыны луонлыкмы вань. Иисуслэн вордӥськемезлэсь 700 арлы азьлогес Исаия пророк вераз, юбилей аре израиль калыклэн эрико луэменыз ӵошатыса, азьланяз адямиос тросгес эрик басьтозы шуыса. Исаия гожтӥз: «Инмарлэн Кузё-Инмарлэн Духез Мон вылын улэ: Кузё-Инмар Монэ вӧйын зырӟыса пуктӥз куанеръёслы ӟеч ивор вераны, сюлмынызы чигиськыса улӥсьёсты бурмытыны, тушмон киулэ сюремъёслы мозмытскон сярысь тодытыны, жильыетын пукисьёслы пытсэтэз усьтон сярысь ялыны Монэ ыстӥз» (Ис. 61:1). Кин сярысь та азьпалзэ ивортон?

8. Кин быдэстӥз мозмытскон сярысь Исаиялэсь азьпалзэ ивортонзэ?

⁸ Та кулэ луись азьпалзэ ивортон быдэсмыны кутскиз Иисус ужан-тыршонзэ кутскем бере. Куке Иисус лыктӥз Назаретысь, вордӥськем карысьтыз, сӥнагогае, лыктэм иудейёслы со лыдӟиз Исаиялэсь ӵапак та кылъёссэ. Иисус та кылъёсын ачиз сярысь вераз: «Кузё-Инмарлэн Духез Мон вылын улэ: Кузё-Инмар Монэ вӧйын зырӟыса пуктӥз; куанеръёслы Ӟеч Ивор вераны, сюлмынызы чигиськыса улӥсьёсты бурмытыны, тушмон киулэ сюремъёслы мозмытскон сярысь тодытыны, синтэмъёсты адӟись карыны, курадӟытэмъёсты эрике лэзьыны Монэ ыстӥз, Кузё-Инмарлэсь ӟечлыко арзэ тодытыны Со Монэ ыстӥз» (Лука 4:16—19). Кызьы Иисус та азьпалзэ ивортонэз быдэстӥз?

9. Кыӵе эрикез тросэз возьмазы Иисус улон дыръя?

⁹ Эрико луыны адямиос кутскизы нырысетӥ даурын. Та эрик сярысь вераз вал Исаия, но со сярысь ик лыдӟиз Иисус. Ми солы оскыны быгатӥськомы, малы ке шуоно Иисус вераз: «Та гожтэм, кудзэ тӥ кылӥды, туннэ быдэсмиз» (Лука 4:21). Тросэз соос пӧлысь, кинъёс кылзӥзы, кызьы Иисус Исаиялэсь азьпалзэ ивортонзэ лыдӟиз, политикаен герӟаськем воштӥськонъёсты возьмазы — Рим ки улысь мозмытсконэз. Христослэн дышетскисьёсыз но сое возьмазы, вылды, малы ке шуоно берлогес кыкез соос пӧлысь Иисус сярысь шуизы: «Ми оскиськиськомы вал, Со луэ Ачиз, Кудӥз Израилез мозмытыны кулэ» (Лука 24:13, 21). Но, кызьы ми тодӥськомы, Иисус дышетскисьёсызлэсь мылкыдзэс ӧз ӝуты Римлэн лек кивалтэмезлы пумит султыны. Со интые, со дышетӥз соосты «кесарьлэсьсэ кесарьлы» сётыны  (Матф. 22:21). Нош кызьы Иисус адямиосты эрико кариз?

10. Малэсь мозмытӥз Иисус адямиосты?

¹⁰ Инмарлэн Пиез музъем вылэ лыктӥз, адямиослы эрико луыны юрттон понна. Нырысетӥез, Иисус мозмытӥз зэмос луисьтэм дышетонъёслэсь, кудъёсызлы религиозной кивалтӥсьёс дышетӥзы. Тросэз адямиос со дыре сям-йылолъёсъя но зэмос луисьтэм дышетонъёсъя улӥзы (Матф. 5:31—37; 15:1—11). Адямиос, кудъёсыз веразы, мукетъёсызлы Инмарлы ужаны-тыршыны юртто шуыса, зэмзэ вераса, асьсэос Инмарлы ужатэк-тыршытэк улӥзы, соин ик соосты синтэм адямиосын ӵошатыны луэ. Соос палэнтӥзы Мессияез но сое, малы со дышетӥз. Соин ик соос Инмар сярысь тодон-валан ӧз басьтэ, но соослэн сьӧлыкъёссы простить каремын ӧй вал (Иоанн 9:1, 14—16, 35—41). Адямиосты зэмлыклы дышетыса но соослы адӟем карон возьматыса, Иисус зӥбыт-востэм адямиослы возьматӥз, кызьы соос зэмос луисьтэм дышетонъёслэсь мозмытскыны быгатӥзы (Марк 1:22; 2:23—3:5).

11. Кыӵе эшшо паймымон луонлык Иисус адямиослы сётӥз?

¹¹ Кыкетӥез, Иисус адямиослы луонлык сётӥз мозмытскыны сьӧлыклэсь, кудӥз милемлы Адамлэсь выжиз. Иисуслэн мозмытӥсь курбонэзлы луыса, Инмар сьӧлыкъёссэс простить карыны быгатӥз соослэсь, кинъёс дун тыронлы оскизы но осконзэс уж вылын возьматӥзы (Евр. 10:12—18). Иисус вераз: «Пи тӥледыз мозмытӥз ке, соку зэм ик эрико луоды» (Иоанн 8:36). Ӵошатоно ке эрикен, кудӥз вашкала израиль калыклэн вал, таиз эрик трослы бадӟымгес луэ. Кылсярысь, адями, кудӥз юбилей аре эрико луэ вал, нош ик ляльчи луыны быгатысал. Но кызьы гинэ медам луы, адями куке но кулысал. Нош Иисус пыраклы эрико луыны юрттэ.

12. Кинъёслы нырысь ик сётэмын вал эрик, кудӥз сярысь Иисус ялӥз?

¹² Витьтонэтӥ Нуналэ, кудӥз ортчиз асьме вакытысь 33-тӥ арын, Иегова апостолъёсты но мукет оскымон пиосмуртъёсты но кышномуртъёсты святой духен зырӟиз. Со соосты ас нылпиосыныз лыдъяны кутскиз, азьланяз соос улӟыны но инмын Иисусэн ӵош кивалтыны мед быгатозы шуыса (Рим. 8:2, 15—17). Та христианъёс вал нырысетӥосыз, кинъёслы сётэмын вал эрик, кудӥз сярысь Иисус ялӥз Назаретысь сӥнагогаын. Соос мозмытскизы Священной Гожтэмъёслы пумит мынӥсь сям-йылолъёслэсь но зэмос луисьтэм дышетонъёслэсь, кудъёсызлы иудейёслэн религиозной кивалтӥсьёссы  дышетӥзы. Инмарлэн син азяз соос кулонэ вуттӥсь сьӧлыклэсь мозмытскизы. Христианъёслэн юбилей арзы, кудӥз кутскиз асьме вакытысь 33-тӥ арын, куке Христослэн дышетскисьёсыз зырӟемын вал, быроз Христослэн сюрс ар ӵоже кивалтонэзлэн йылпумъяськемез бере. Мар эшшо каремын луоз на таиз юбилей ар дыръя?

13, 14. Кин эшшо, зырӟем христианъёс сяна, быгатэ эрик басьтыны, кудӥз сярысь Иисус ялӥз?

¹³ Туннэ пӧртэм калыкъёсысь трос миллион адямиос «мукет ыжъёс» пӧлы пыро (Иоанн 10:16). Инмар соосты ӧз бырйы, Христосэн ӵош инмын кивалтон понна. Соослэн осконзы вань пырак дауръёс ӵоже музъем вылын улыны, но та оскон Библия вылэ пыкиськемын.

¹⁴ Тӥ соос пӧлы пыриськоды ке, тӥ али ик ини быгатӥськоды басьтыны бакель каронъёсты, кудъёссэ басьтӥзы соос, кинъёс Инмарлэн инмысь Эксэйлыказ кивалтозы. Иисуслэн курбонэзлы луыса тӥ быгатӥськоды Иеговаез курыны сьӧлыкъёстэс простить карыны. Солы луыса ми быгатӥськомы Инмарлы ярамон луыны но со азьын чылкыт возьытлыкен улыны (Еф. 1:7; Усьт. 7:14, 15). Озьы ик малпаське, кыӵе пайда вае тӥледлы Библилы пумит мынӥсь дышетонъёслэсь мозмытскон. Иисус шуиз: «Зэмлыкез тододы, нош зэмлык тӥледыз эрико кароз» (Иоанн 8:32). Макем трос шумпотон вае милемлы сыӵе эрик!

15. Малэсь ми ӝоген мозмытэмын луомы но кыӵе улон милемыз возьма?

 ¹⁵ Азьланяз милям эшшо но тросгес эрикмы луоз. Ӝоген Иисус зэмос луисьтэм религиез но шонерлыктэм адями кивалтэтъёсты быдтоз. Инмар «туж-туж трос» ужась-тыршисьёссэ утёз но соосты бакель кароз, рай музъем вылын улыны луонлык сётыса (Усьт. 7:9, 14). Туж трос адямиос кулэмысь улӟытэмын луозы. Соос, кинъёс Инмарлы ужан-тыршонэз бырйизы, висьытэк, пересьмытэк но кулытэк улозы (Ап. уж. 24:15).

16. Кыӵе паймымон эрик адямиослы азьланяз сётэмын луоз?

¹⁶ Христослэн сюрс ар ӵоже кивалтэмез дыръя Иисус но соин ӵош кивалтӥсьёс вань адямиослы юрттозы ноку висьытэк улыны но Инмарен туж умой кусыпъёс возьыны. Кызьы израиль калык юбилей аре эрико луэ вал, озьы ик Иеговалэн музъем вылысь вань оскымон ужась-тыршисьёсыз сьӧлыклэсь мозмытскозы но быдэсак тырбыдэс луозы.

17. Кыӵе улон возьма Инмарлэсь калыксэ, Исаиялэсь 65:21—23 лыдэ басьтыса? (Учке вылбамысь суредэз.)

¹⁷ Со сярысь, кыӵе улон луоз азьланяз музъем вылын, гожтэмын Исаиялэн 65:21—23 (лыдӟе). Ми азьтэмъяськыса но номыр карытэк ум улэ. Нош кызьы гожтэмын Библиын, со дыре Инмарлэн калыкез шумпотон вайись пайдаё ужъёсын выроз. Оскыны луэ, сюрс ар ортчем бере «вань кылдытэм макеос сисьмонлэн зӥбет улысьтыз мозмытэмын луозы шуыса» (Рим. 8:21).

18. Малы ми оскиськомы, азьланяз милемыз шудо улон возьма шуыса?

¹⁸ Вашкала дыръя Иегова сюлмаськиз, израиль калык уж но шутэтскон шоры шонер мед учкоз шуыса. Озьы ик со сюлмаськоз калыкез сярысь Христослэн сюрс ар ӵоже кивалтэмез дыръя но. Туннэ но, выль дуннеын но шудо луон Инмарлы йыбырттонэн герӟаськемын. Пуктэ син азяды, макем трос шумпотон ваёз Христослэн сюрс ар ӵоже кивалтэмез но макем трос ӟеч ужъёс ми лэсьтыны быгатомы Иеговалы ужан-тыршонын!