1, 2. Мар карыны милесьтым мылкыдмес ӝутэ Ангелитолэн учырез?

 БУДЭТО-А тӥледыз анай-атайёс, кудъёсыз Иеговалэн Адӟись-Ивортӥсьёсыз луо? Озьы ке, тодады возьыны кулэ, Инмарен эшъяськон анай-атайлэсь ас понназ уг выжы шуыса. Ми пӧлысь котькудӥзлы Иеговаен кусыпъёссэ аслыз тупатыны кулэ.

² Тани Ангелито нимо агайлэн учырез. Солэн семьяяз ваньзы Иеговалэн Адӟись-Ивортӥсьёсыз луо. Нош быдэ вуэмезлэсь азьло со ӧз шӧды, солэн Инмарен матысь кусыпъёсыз вань шуыса. Со вера: «Мон Иеговалы ужай-тырши, малы ке шуоно мынам потэ вал лэсьтэме сое, мае семьяе лэсьтӥз». Нош кыӵе ке но дыре Ангелито ужпум кутӥз Библиез лыдӟонлы но со вылын малпаськонлы тросгес дыр висъяны, озьы ик ӵемгес вӧсяськыны кутскиз. Мар со солы сётӥз? Со вера: «Мон валай, мынам дуно Атаелы, Иеговалы, матынгес луон понна, аслыд сое умойгес тодоно». Ангелитолэн учырез милесьтым мылкыдмес ӝутэ малпаськыны кулэ луись юанъёс вылын: маин пӧртэм луэ Иегова сярысь тодон но Иеговаез тодон? Но кызьы солы матэгес кариськоно?

3. Маин пӧртэм луэ Иегова сярысь тодон но Иеговаез тодон?

³ Куке ми вераськомы, адями Иегова сярысь тодэ шуыса, ми валаськомы: со тодэ Инмарлэсь нимзэ яке солэсь кыӵе  ке курон-косонъёссэ но ужъёссэ. Нош Иеговаез умойгес тодон понна, со тырмыт уг луы. Кулэ дыр висъяны, Иеговаен но солэн умой сямъёсыныз тодматскон понна. Соку гинэ ми валаны быгатомы, малы со озьы вераз яке тазьы лэсьтӥз, нош мукет сямен ӧз. Со милемлы валаны юрттоз, умоен-а Инмар учке милям малпанъёсмы, ужпумъёсмы но ужъёсмы шоры. Нош куке ми валамы, мае милесьтым Иегова возьма, озьы ик лэсьтыны кулэ.

4. Кыӵе оскон сёто милемлы тырбыдэстэм адямиослэн примеръёссы, кудъёсыз сярысь Библиын гожтэмын?

⁴ Куд-ог адямиос милемыз серекъяны быгато, милям Иеговалы ужаммы-тыршеммы потэ шуыса. Соос эшшо но золгес милемлы пумитъяськыны быгато, куке ми кенешлэн пумиськонъёсаз ветлыны кутскиськомы. Нош ми Иеговалы оскиськомы ке, со ноку но милемыз уз кельты. Со Иеговаен эшъяськонмылы юн инъет луэ, кудӥз вань улонмы ӵоже кыстӥськоз. Быгато-а тырбыдэстэм адямиос Инмарлэн матысь эшъёсыз луыны? Быгато! Сое трос учыръёс возьмато. Эскеромы Моисейлэсь но Давидлэсь примеръёссэс но малпаськомы кык юанъёс вылын: кызьы соос Иеговаез тодӥзы? Но малы со милемыз дышетэ?

5. Мае бырйиз Моисей?

⁵ Моисей Инмарлы ужан-тыршонэз бырйиз. Ог 40 арес дыръяз Моисей «фараонлэн нылызлэн пиез луонлэсь куштӥськиз» но еврей калык пала, Инмарлэн калыкез пала, кариськыны ужпум кутӥз (Евр. 11:24). Со дано интызэ кельтӥз. Куке Моисей израиль калыклы юрттӥз, со тодӥз, фараонлэн туж вожез потоз шуыса. Фараон кужмо кивалтӥсь вал, но Египетын улӥсьёс сое инмарен лыдъязы. Та учыр возьматӥз, Моисейлэн юн осконэз вал шуыса. Со быдэсак Иеговалы оскиз. Та осконэзлы луыса Моисей Иеговаен юн эшъяськиз, но солэн эшъяськонэз вань улонэз ӵоже кыстӥськиз (Мад. 3:5).

6. Малы дышетэ милемыз Моисейлэн примерез?

⁶ Малы ми дышетскыны быгатӥськомы? Моисей сямен ик, милемлы ваньмылы ужпум кутыны кулэ: быръёмы-а ми Иеговалы ужан-тыршонэз но луомы-а солэн калыкез пӧлын? Со понна милемлы малэсь ке но дуноезлэсь куштӥськоно луоз, дыр. Озьы ик ми валаськомы, милемлы пумит ӝутскыны быгатозы шуыса соос, кинъёс Иеговаез уг тодо. Нош ми инмысь Атаймылы оскиськомы ке, со милемлы одно ик юрттоз.

7, 8. Мар сярысь Моисей азьланяз но тодон-валан басьтӥз?

⁷ Моисей азьланяз но Иеговалэн сямъёсыз сярысь тодон-валан басьтӥз но солэсь эриксэ быдэсъяз. Тодамы ваёмы, мар луиз, куке Иегова Моисеез израиль калыкез Египетысь поттыны куриз. Моисей уг оскы вал, кужымез тырмоз шуыса, но со кӧня ке пол Иеговалы вераз, та ужез быдэстыны уз быгаты шуыса. Иегова солы гажан-жалянзэ возьматӥз но юрттэт сётӥз (Пот. 4:10—16). Солы луыса Моисей фараонлы кышкыт иворъёсты вераны быгатӥз. Собере со адӟиз, кызьы Иегова аслэсьтыз кужымзэ кутӥз, израиль калыкез утён понна но фараонэз но солэсь ожгарчиоссэ Горд Кам зарезьын быдтон понна (Пот. 14:26—31; Пс. 135:15).

⁸ Иегова израиль калыкез Египетысь ляльчи луонлэсь мозмытэмез бере, соос ялан ӝожтӥськыса но ӟургетыса улӥзы. Нош соку но Иегова аслэсьтыз калыксэ туж  чидаса улӥз, но Моисей тае адӟиз (Пс. 77:40—43). Озьы ик Моисей Иеговалэсь паймымон зӥбыт-востэм луэмзэ адӟиз, куке со, Моисейлэн куремезъя, аслэсьтыз кутэм ужпумзэ воштӥз (Пот. 32:9—14).

9. Макем матысь кусыпъёссы вал Моисейлэн но Иеговалэн, кызьы гожтэмын Еврейёслы 11:27?

⁹ Израиль калыклэн Египетысь потэмез бере, Моисейлэн Иеговаен эшъяськонэз сокем юн вал, со аслэсьтыз инмысь Атайзэ адӟыса улӥз кадь. (Лыдӟе Еврейёслы 11:27.) Соослэн кусыпъёссы сярысь Библиын тазьы вераське: «Кузё-Инмар Моисеен ваче син сылыса вераськиз, аслаз эшеныз вераськисьёс музэн» (Пот. 33:11).

10. Мар милемлы кароно, Иеговаез умой тодон понна?

¹⁰ Малы ми дышетскыны быгатӥськомы? Иеговаез умой тодон понна, милемлы солэн сямъёсыз сярысь гинэ тодоно ӧвӧл, но озьы ик солэсь эриксэ но быдэсъяны кулэ. Нош туннэ Инмарлэн потэ «вань адямиосты утиськытэмез, зэмлыкез тодытэмез» (1 Тим. 2:3, 4). Инмарлэсь эриксэ быдэсъян понна одӥгез амал — со адямиосты Иегова сярысь дышетон.

11. Кызьы ми, мукетъёссэ дышетыкумы, Иеговаез умойгес тодыны быгатӥськомы?

¹¹ Ӵем дыръя, мукетъёссэ дышетыкумы, ми асьмеос но Иеговаез умойгес тодӥськомы. Кылсярысь, ми Иеговалэсь гажась-жалясь луэмзэ адӟиськомы, куке со милемыз нуэ соос доры, кинъёслэн Инмарен эшъяськемзы потэ (Иоанн 6:44). Ми адӟиськомы Инмарлэн Кылызлэсь кужымзэ, куке соос, кинъёс Библиез дышето, кельто урод сямъёссэс но «выль адями» луыны тыршо (Кол. 3:9, 10). Озьы ик ми адӟиськомы Инмарлэсь чидась луэмзэ, куке со кенешмылэн тодытон интыяз улӥсь адямиослы трос луонлыкъёс сётэ ачиз сярысь тодыны но утиськыны (Рим. 10:13—15).

12. Кызьы гожтэмын Потонын 33:13, мар сярысь Моисей куриз но малы?

¹² Моисей дунъяз Иеговаен эшъяськонзэ. Иегова Моисей пыр трос паймымон ужъёс лэсьтӥз, соин ик Моисей Инмарез умой тодӥз. Озьы ке но со Иеговаез куриз, ачиз сярысь тросгес тодыны мед юрттоз шуыса (Лыдӟе Потонэз 33:13.) Куке Моисей Инмарлы та куронэн вазиськиз, солы 80 ареслэсь тросгес вал ини, нош со валаз, солы яратӥсь Атаез сярысь трос тодыны кулэ на шуыса.

13. Кызьы возьматоно, ми Иеговаен эшъяськонмес дунъяськомы шуыса?

¹³ Малы ми дышетскыны быгатӥськомы? Кӧня гинэ аръёс ӵоже ми Иеговалы медам ужалэ-тырше, милемлы туж дунъяны кулэ соин эшъяськонмес. Одӥгез амал, кызьы ми возьматыны быгатӥськомы, Иеговаен эшъяськонмес дунъяськомы шуыса,— вӧсяськонын соин вераськон.

14. Малы вӧсяськытэк Инмарез умойгес тодыны уг луы?

¹⁴ Умой вераськонтэк эшъяськон юн луыны уг быгаты. Соин ик ӵемгес Инмарлы вӧсяське но ноку но эн кышкалэ солы сюлэм малпанъёстэс вераны (Еф. 6:18). Тани мар вера Турциын улӥсь Криста: «Котькуд вӧсяськонын Иегова мыным матынгес луэ. Куке мон солы аслам сюлмаськонъёсы сярысь верасько но адӟисько, кызьы со мыным юрттэ, солы яратонэ но осконэ юнма. Вӧсяськонъёсылы ответъёссэ адӟыса, мон шӧдӥсько, Иегова зэмос Атай но Эш луэ шуыса».

15. Кызьы Иегова Давид эксэез нимаз?

¹⁵ Куке Давид эксэй вордӥськиз, израиль калык, озьы ик солэн анай-атаез но, Иеговалы йыбыртъязы. Нош Давид та муген  гинэ Иеговалы ӧз йыбыртъя. Со ачиз Инмарен кусыпъёссэ будэтӥз, но Иегова сое туж яратӥз. Иегова сое сюлмызлы кельшись пиосмуртэн нимаз (Ап. уж. 13:22). Кызьы Давид Иеговалы матысь эш луыны быгатӥз?

16. Мае Давид Иегова сярысь тодӥз, солэсь кылдытэмъёссэ чакласа?

¹⁶ Давид Иеговаез тодӥз, солэсь кылдытэмъёссэ чакласа. Егит дыръяз Давид трос дырзэ кырын ортчытъяз, атаезлэсь ыжъёссэ возьмаса. Ӵапак та дыре ик со Иеговалэн кылдытэмъёсыз сярысь малпаськыны кутскиз, дыр. Кылсярысь, уйин инбам шоры учкыса, со отысь кизилиосты гинэ ӧз адӟы, нош озьы ик дано луэмзэ солэсь, кин соосты кылдытӥз. Давидлэн мылкыдыз ӝутскиз гожтыны: «Инъёс Инмарлэсь данлыксэ тодыто, Солэн киызлэн ужъёсыз сярысь инбам ивортэ» (Пс. 18:2, 3). Куке Давид малпаськиз со сярысь, кызьы адями кылдытэмын, со адӟиз Иеговалэсь паймымон визьлыксэ (Пс. 138:14). Иеговалэсь ужъёссэ валаны тыршыса, со зӥбыт-востэмен валаз, макем со пичи луэ (Пс. 138:6).

17. Малы дышетыны быгато милемыз Иеговалэн кылдытэмъёсыз?

¹⁷ Малы ми дышетскыны быгатӥськомы? Ойдолэ кылдытэмъёсты чакласа уломы. Эн учке Иеговаен кылдытэм паймымон дунне шоры, со ас понназ кылдӥз шуыса! Котькуд нунал малпаськыны тырше, малы дышето тӥледыз Иегова сярысь будосъёс, пӧйшуръёс но адямиос. Соку котькуд нунал тӥ маке но выльзэ тододы яратӥсь Атаймы сярысь (Рим. 1:20). Но котькуд нунал тӥ шӧдоды, сое яратонды будэ шуыса.

18. Мае валаз Давид, кызьы гожтэмын 17-тӥ Псалтирьын?

¹⁸ Давид валаз, солы Иегова юрттэ шуыса. Кылсярысь, куке Давид атаезлэсь ыжъёссэ гондырлэсь но левлэсь утьылӥз, со валаз, Иеговалэн юрттэменыз гинэ, та пӧйшуръёсты вормыны быгатӥз шуыса. Куке со Голиаф батырез вормиз, со умой адӟиз, кызьы Иегова та югдурын кивалтӥз (1 Экс. 17:37). Но куке со вожъяськись Саул эксэйлэсь утиськиз, со валаз, сое Иегова утиз шуыса (Пс. 17:1). Вылтӥяськись адями вань данэз аслыз карысал. Нош Давид озьы ӧз лэсьты: со зӥбыт-востэм адями вал но валаз, солы ваньзэ Иегова сётӥз шуыса (Пс. 137:6).

19. Малы дышетэ милемыз Давидлэн примерез?

¹⁹ Малы ми дышетскыны быгатӥськомы? Милемлы Иеговалэсь юрттэтсэ гинэ куроно ӧвӧл, нош озьы ик адӟыны тыршоно, ку но кызьы со милемлы юрттэ. Куке ми зӥбыт-востэмен валаськомы, ваньзэ лэсьтыны ум быгатӥське шуыса, соку ми умой адӟомы, кызьы Иегова сётэ милемлы сое, мар милемлы уг тырмы. Но котькуд учыре, куке ми адӟомы, кызьы Иегова милемлы юрттэ, ми шӧдомы, соин эшъяськонмы юнма шуыса. Тае ас вылаз шӧдӥз Фиджи шаерысь Исак нимо агай, кудӥз Иеговалы трос аръёс ужа-тырше ини. Со вера: «Аслам улонэ шоры учкыса, мон адӟисько, кызьы Иегова мыным юрттылӥз,— со дырысен, куке мон Библиез дышетыны кутски, но туннэ нуналозь. Солы луыса Иегова мон понна улэп Инмар луэ».

20. Малы луыса Давидлэн Иеговаен умой кусыпъёсыз вал но малы дышетэ милемыз солэн примерез?

²⁰ Давид Иеговалэн сямъёсызлэсь адӟем кариз. Иегова милемыз кылдытӥз сыӵе быгатонлыкен, ми солэн сямъёсызлэсь адӟем карыны мед быгатомы шуыса (Ул.-выл. 1:26). Макем умойгес ми Иеговалэн сямъёсыз сярысь тодӥськомы, сокем умойгес быгатомы  солэсь адӟем карыны. Давид умой тодӥз инмысь Атайзэ, соин ик со солэсь адӟем карыны быгатӥз, кызьы мукетъёсыныз ассэ возёно. Тодамы ваёмы солэн улонысьтыз одӥг учырез. Вирсавияен азон-калгон сьӧлыке пырыса но собере солэсь картсэ юри виыны косыса, Давид Инмарлы пумит сьӧлыказ ке но, Иегова солы гажан-жалянзэ возьматыны малпаз (2 Экс. 11:1—4, 15). Инмар озьы лэсьтӥз, малы ке шуоно Давид Иеговалэсь адӟем карылӥз но мукетъёслы гажан-жалянзэ возьматъяз. Давид эксэйлэн Иеговаен умой кусыпъёсыз вал бере, сое израиль калык туж яратӥз. Иегова Израильысь мукет эксэйёсты но солэсь адӟем карыны косӥз (3 Экс. 15:11; 4 Экс. 14:1—3).

21. Кыӵе пайда ваёз, ми «Инмарлэсь адӟем карыса» улӥськомы ке, Ефесъёслы 4:24 но 5:1 лыдэ басьтыса?

²¹ Малы ми дышетскыны быгатӥськомы? Милемлы «Инмарлэсь адӟем карыса» улоно. Со милемлы пайда ваёз, но озьы ик Иеговаез умойгес тодыны юрттоз. Инмарлэн сямъёсызлэсь адӟем карыса, ми возьматӥськомы, солэн нылпиосыз луиськомы шуыса. (Лыдӟе Ефесъёслы 4:24; 5:1.)

22, 23. Мар луоз, куке ми Иегова сярысь тодон-валан басьтӥськомы но солэсь адӟем кариськомы?

²² Кызьы ми адӟимы, Иеговаез тодыны луэ, солэсь кылдытэмъёссэ чакласа но солэсь Кылзэ, Библиез, эскерыса. Та паймымон книгаын Инмарлэн трос оскымон ужась-тыршисьёсыз сярысь гожъямын, кудъёсызлэсь ми адӟем карыны быгатӥськомы,— соос пӧлын озьы ик Моисей но Давид. Иегова лэсьтӥз ваньзэ, ми сое тодыны мед быгатомы шуыса. Нош милемлы кулэ сак кылзыны, чакланы но сюлэммес усьтыны.

²³ Ми ноку но ум дугдэ Иегова сярысь маке но выльзэ тодыны (Екк. 3:11). Кулэгес уг луы, кӧня ми со сярысь тодӥськомы, нош кулэгес луэ со, кызьы ми уже кутӥськомы та тодон-валанмес. Куке ми тодэммес улонамы пыртӥськомы но яратӥсь Атаймылэсь адӟем карыны тыршиськомы, соку милям соин эшъяськонмы азьланяз но юнмалоз (Иак. 4:8). Аслаз Кылыз пыр Иегова оскытэ милемыз: со ноку но уз кельты соосты, кинлэн солы матысь эш луэмез потэ.