1, 2. Мае ми эскеромы та статьяын?

 КУДДЫРЪЯ ми малпаськиськомы со сярысь, макем вакчи адямилэн улонэз но со «куректон-кайгуосын тырмемын» шуыса (Иов 14:1). Соин ик дырын-дырын милям мылкыдмы куашка. Иеговалэн тросэз ужась-тыршисьёсыз но, кудъёсыз вашкала дыръёсы улӥзы, тае ик шӧдӥзы. Куд-огъёсызлэн улэмзы но уг поты вал (3 Экс. 19:2—4; Иов 3:1—3, 11; 7:15, 16). Нош Иегова Инмар котьку соосты буйгатылӥз но юнматылӥз. Со сярысь гожтэмын Библиын, милемыз буйгатон но дышетон понна (Рим. 15:4).

² Та статьяын ми вераськомы Иеговалэн куд-ог ужась-тыршисьёсыз сярысь, кудъёсыз шуг-секытъёсын пумиськылӥзы но соин сэрен сюлмынызы чигиськыса улӥзы. Вераськон мыноз Иосиф сярысь (Иаковлэн пиез сярысь), Ноеминь палкышно сярысь но солэн Руфь кенэз сярысь, левит сярысь, кудӥз 72-тӥ Псаломез гожтӥз, но апостол Пётр сярысь. Кызьы Иегова соосты юнматылӥз? Малы ми соослэсь дышетскыны быгатӥськомы? Та юанъёслы валэктонъёс оскытозы милемыз, Иегова «сюлмынызы чигиськыса улӥсьёслы... матын улэ» но соосты уте шуыса (Пс. 33:19).

3, 4. Кыӵе шуг-секытъёсын пумиськиз Иосиф егит дыръяз?

³ Куке Иосифлы 17 арес котыр вал, со Инмарлэсь кык уйвӧт адӟиз. Соос возьматӥзы, Иосиф бадӟым инты басьтоз но ӵыжы-выжыосыз сое гажалозы шуыса (Ул.-выл. 37:5—10). Ӝоген Иосифлэн улонэз чутрак воштӥськиз. Агайёсыз сое сокем адӟемпотостэм каризы, сое ляльчие но вузазы. Озьы со сюриз Египетэ но Потифарлэн ляльчиез луиз, кудӥз фараонлэн юртаз кузёйыр вал (Ул.-выл. 37:21—28). Али гинэ Иосиф  яратӥсь атаез вӧзын вал, нош табере со сюриз Египетэ но Иеговаез тодӥсьтэм адямилэн ляльчиез луиз (Ул.-выл. 39:1).

⁴ Со сяна, Иосиф мукет шуг-секытъёсын но пумиськиз на. Потифарлэн кышноез Иосифез янгыше уськытӥз, со сое эриктэманы турттэ вал шуыса. Потифар ӧз тыршы валаны, со зэм-а, ӧвӧл-а шуыса. Со ляльчизэ пытсэтэ куштӥз, кытын сое жильыяса возизы (Ул.-выл. 39:14—20; Пс. 104:17, 18). Пуктэ син азяды, мар шӧдӥз та пияш, куке сое янгыше уськытӥзы сыӵе кышкыт йыруж понна. Малпалэ гинэ, кӧня уродзэ веразы, дыр, адямиос Иосифлэн Инмарез сярысь, Иегова сярысь, та учырез тодыса. Ваньмыз таиз сэрен Иосиф туж сюлмаськиз, луоз.

5. Мар юрттӥз Иосифлы шонер мылкыдын улыны?

⁵ Куке Иосиф ляльчи вал но пытсэтын пукиз, со номыре воштыны ӧз быгаты. Мар юрттӥз солы шонер мылкыдын улыны? Со ӧз малпа со сярысь, мае карыны уг быгаты ни, нош малпаськиз со сярысь, мае карыны быгатэ, но солы сётэм ужез тыршыса быдэсъяз. Тужгес но валтӥсез, Иосиф тыршиз, Иегова солэн улоназ самой бадӟым инты мед басьтоз шуыса. Нош Иегова Иосифлэсь вань ужъёссэ бакель кариз (Ул.-выл. 39:21—23).

6. Кызьы Иосифез юнматыны быгатӥзы азьпалзэ ивортӥсь уйвӧтъёсыз?

⁶ Со сяна, Иосифез азьпалзэ ивортӥсь кык уйвӧтъёсыз юнматӥзы, дыр. Соос сярысь малпаськыса, со валаз, луоз, семьяеныз нош ик адӟиськоз но ваньмыз умой луоз шуыса. Озьы ик луиз. Куке Иосифлы 37 арес котыр вал, уйвӧтъёсыз туж паймымон амалэн быдэсмыны кутскизы (Ул.-выл. 37:7, 9, 10; 42:6, 9).

7. Мар юрттоз милемлы шуг-секытъёсты чиданы, 1 Пётрлэн 5:10 гожтэмъя?

⁷ Малы со милемыз дышетэ. Иосифлэн учырез тодамы вайытэ, та дуннеысь адямиос лекесь но милемын асьсэды шонерлыктэм возьыны быгато шуыса. Кенешысь вын-агайёс но, сузэр-апайёс но милемыз вӧсь  карыны быгато. Но ми Иегова дорысь юнматскон но утиськон утчаськомы ке, соку укыр трос ум сюлмаське но солы ужамысь-тыршемысь ум дугдэ (Пс. 61:7, 8; лыдӟе 1 Пётрлэсь 5:10). Озьы ик тодады вае, куке Иосифлы 17 арес котыр вал, со Иеговалэн эрикезъя азьпалзэ ивортӥсь уйвӧтъёс адӟиз. Та учыр возьматэ, Иегова егит ужась-тыршисьёсызлы оске шуыса. Туннэ но тросэз егитъёс, Иосиф сямен, Иеговалы оско. Куд-огъёсыз, Инмарлэсь кылзӥськемзы понна, пытсэтын но пуко (Пс. 109:3).

8. Кыӵе куректонэн пумиськизы Ноеминь но Руфь?

⁸ Туж сютэм дыр сэрен Ноеминь семьяеныз, Иудеяысь улон интызэ кельтыса, Моав музъеме улыны интыяськиз. Отын Ноеминьлэн картэз, Елимелех, кулӥз. Ноеминь кылиз кык пиосыныз, Махлонэн но Хилеонэн. Дыр ортчыса, соос Руфь но Орфа нимо моав нылъёсты кышно басьтӥзы. Ог дас ар ортчыса, Махлон но Хилеон кулӥзы, нош нылпиоссы соослэн ӧй вал (Руфь 1:1—5). Малпалэ гинэ, макем куректыса улӥзы та куинь кышномуртъёс! Руфь но Орфа выльысь бызьыны быгато вал. Нош кин соку сюлмаськысал арлыдо Ноеминь сярысь? Солэн сюлмыз сокем чигиськемын вал, со вераз: «Эн нималэ монэ Ноеминь шуыса, нималэ монэ Мара шуыса, уго Дунне Кутӥсь Инмар мон доры туж бадӟым куректон-кайгу лэзиз». Сыӵе югдуре сюрыса, Ноеминь ужпум кутӥз Вифлееме берытскыны, Руфь но соин ӵош мынӥз (Руфь 1:7, 18—20).

9. Кызьы Руфь сюлмаськиз Ноеминь сярысь, Руфь книгаын 1:16, 17, 22 гожтэмъя?

⁹ Мар юрттӥз Ноеминьлы? Руфь но Иегова сое туж яратӥзы. Кылсярысь, Руфь яратэмзэ возьматӥз, куке Ноеминез ӧз кельты. (Лыдӟе Руфь книгаез 1:16, 17, 22.) Вифлеемын Руфь туж тыршыса ужаз — аслыз но, Ноеминьлы но бусыысь кылем йыдыез бичаз. Солы луыса ваньзы тодӥзы, Руфь ӟеч сямо кышномурт шуыса (Руфь 3:11; 4:15).

10. Кызьы Иегова яратэмзэ возьматӥз куанер адямиослы, озьы ик Ноеминьлы но Руфьлы?

¹⁰ Иегова аслаз калыкезлы сётӥз закон, кудӥз возьматӥз, со Ноеминь но Руфь кадь куанер адямиосты гажа-жаля шуыса. Иегова израиль калыкез косӥз, аран дыръя бусызэс пумозяз ик медаз аралэ шуыса. Соку куанеръёс кылемзэ бичаны быгатӥзы (Лев. 19:9, 10). Соин ик Ноеминь но Руфь кураськыса ветлоно ӧз луэ. Соос сиён шедьтыны быгатӥзы но асьсэды номырлы ярасьтэмен ӧз шӧдэ.

11, 12. Мар Вооз кариз Ноеминь но Руфь понна?

¹¹ Руфь йыды бичаз бусыын, кудӥзлэн кузёез Вооз нимо узыр адями вал. Солэн сюлмаз ик пыриз, куке адӟиз, кызьы Руфь туж сюлмаське Ноеминь сярысь. Со Воозлэсь мылкыдзэ ӝутӥз та семьялэсь музъемзэс басьтыны. Озьы ик со Руфез кышно басьтӥз (Руфь 4:9—13). Руфьлэн но Воозлэн Овид нимо пизы вордӥськиз. Со Давид эксэйлэн песятаез луэ (Руфь 4:17).

¹² Малпалэ гинэ, макем шумпотӥз Ноеминь, куке пичи Овидэз кияз басьтӥз, но кызьы со вань сюлмысьтыз Иеговалы тау кариз. Нош азьланяз Ноеминь но Руфь эшшо но шумпотозы. Улӟемзы бере соос тодозы: Овид выжыысь вордӥськиз Иисус Христос, Мессия, кудӥз сярысь азьло ик верамын вал.

13. Малы дышето милемыз Руфьлэн но Ноеминьлэн учырзы?

¹³ Малы со милемыз дышетэ. Шуг-секытъёсын пумиськыса, милям мылкыдмы куашка яке сюлэммы но чигиське, дыр. Оло нош, ми ум валаське, кызьы та шуг-секытэз сэрттоно-пертчоно. Сыӵе дыръя милемлы быдэсак оскиськоно Инмысь Атаймылы но палэнсконо ӧвӧл вын-агайёсмылэсь но сузэр-апайёсмылэсь. Иегова шуг-секытэз котьку ик уг быдты. Кылсярысь, со ӧз улӟыты Ноеминьлэсь  картсэ но солэсь пиоссэ. Но со юрттэ милемлы, кылсярысь, вын-агайёс но сузэр-апайёс пыр, кудъёсыз яратэмзэс уж вылын возьмато (Мад. 17:17).

14. Малы одӥг левитлэн мылкыдыз куашказ?

¹⁴ Одӥг левит 72-тӥ Псаломез гожтӥз. Солы нимысьтыз дан сётэмын вал Иеговалы йыбыртъян интыын ужаны-тыршыны. Озьы ке но кыӵе ке дыре солэн мылкыдыз куашказ. Малы? Со вожъяськыны кутскиз ушъяськись но сьӧлыклэсь кышкасьтэм адямиослы. Солы уг кельшо вал соослэн лек ужъёссы, нош кельше вал соослэн майбыр улэмзы (Пс. 72:2—9, 11—14). Соослэн ваньмыз вал кадь. Соос узыр, каньыл, гань-гань улӥзы. Тае адӟыса, псаломъёсты гожъясьлэн сокем мылкыдыз куашказ, со вераз: «Мон юнме гинэ сюлэмме ӧй дунматылы-а, дун-шектэм луыса вылысь киосме юнме ӧй миськылы-а?» Соин сэрен псаломъёсты гожъясь Иеговалы ужамысь-тыршемысь ӧжыт гинэ ӧз дугды.

15. Мар юрттӥз левитлы куашкам мылкыдзэ вормыны, Псалтирез 72:16—19, 22—25 лыдэ басьтыса?

¹⁵ Лыдӟе Псалтирез 72:16—19, 22—25. Левит «Инмарлы вӧсяськон интые» пыриз. Отын, Инмарлэн мукет ужась-тыршисьёсыз пӧлын, со быгатӥз буйгатскыны, малпаськыны но Инмарлы аслаз сюлмаськонъёсыз сярысь вераны. Солы луыса со валаз, шонертэм малпаськиз но кышкыт сюрес вылэ султӥз шуыса, кудӥз сое Иеговалэсь палэнтысал. Озьы со валаз, сьӧлыклэсь кышкасьтэмъёс «гылыт сюрес» вылын сыло но азьланяз соосты бырон возьма шуыса. Вожъяськемысь но куашкам мылкыдын улэмысь дугдон понна, левитлы ваньмыз шоры Иеговалэн синмыныз учконо вал. Левит озьы ик лэсьтӥз. Солэн сюлмыз каньыл луиз но шумпотонэн пачылмиз. Со Иеговалы вераз: «Тонэ сяна, музъем вылысь но номыре кулэ уг кариськы».

16. Малы ми левитлэсь дышетскыны быгатӥськомы?

¹⁶ Малы со милемыз дышетэ. Ойдолэ ноку ум вожъяське сьӧлыклэсь кышкасьтэм адямиослы, кудъёсыз азинлыкоесь кадь адско. Зэмзэ вераса, соос шудоесь ӧвӧл, малы ке шуоно азьланяз соосты номыр умоез уг возьма  (Екк. 8:12, 13). Соослы вожъяськимы ке, милям мылкыдмы куашкалоз, оло нош, Иеговаен кусыпъёсмы но сӧриськозы. Соин ик, тӥ шӧдӥды ке, сьӧлыклэсь кышкасьтэм адямиослы вожъяськыны кутскиды шуыса, левитлэсь адӟем каре. Яратӥсь инмысь Атаймылэн визь-кенешъёсызлэсь кылзӥське. Эшъяське соосын, кинъёс Инмарлэсь эриксэ быдэсъяло. Тӥ Иеговаез котькинлэсь золгес яратӥськоды ке, соку зэмзэ ик шудоесь луоды но улонэ вуттӥсь сюрес вылысь уд коже (1 Тим. 6:19).

17. Маин сэрен Пётр куректыса улӥз, вылды?

¹⁷ Апостол Пётр туж шаплы адями вал. Куддыръя со, нырысь малпаськытэк, мае ке вералляз яке лэсьтылӥз, нош собере со понна туж сюлмаськыса улӥз. Кылсярысь, куке Иисус дышетскисьёсызлы вераз, солы курадӟоно луоз но сое виёзы шуыса, Пётр солы пумит шуиз: «Жаля Астэ! Та Тонэн медаз луы!» (Матф. 16:21—23). Иисус Пётрез тупатӥз. Берлогес, куке трос адямиос Иисусэз кутыны лыктӥзы, Пётр малпаськытэк мечез басьтӥз но быдӟым священниклэн ляльчиезлэсь пельзэ вандыса куштӥз (Иоанн 18:10, 11). Иисус нош ик апостолэз тупатӥз. Нош мукет дыръя Пётр Иисуслы ушъяськыса вераз: «Ваньзы но Тынэсьтыд куштӥськизы ке, мон ноку но Тынэсьтыд уг куштӥськы» (Матф. 26:33). Пётр малпаз, номырлэсь уз кышка шуыса. Но кӧня ке дыр ортчыса, адямиослэсь кышкаса, Иисуслэсь куинь пол куштӥськиз. Пётрлэн сюлмыз ик чигиськиз но, со «туж зол бӧрдӥз» (Матф. 26:69—75). Со туж сюлмаськиз но куректӥз, луоз, Иисус сое куке но простить кароз на-а шуыса.

18. Кызьы Иисус Пётрлэсь мылкыдзэ ӝутӥз?

¹⁸ Озьы ке но Пётр укыр трос сюлмаськыса ӧз улы но Иеговалы ужамысь-тыршемысь ӧз дугды. Со сьӧлыказ ке но, христиан сюрес вылысь ӧз кожы, нош азьланьтӥз мукет апостолъёсын ӵош ужаны-тыршыны (Иоанн 21:1—3; Ап. уж. 1:15, 16). Мар солы юрттӥз?  Пётр тодаз возиз Иисуслэсь кылъёссэ: «Мон тон понна вӧсяськи, тынад осконэд медаз начармы вал шуыса. Тон нош ик берыктӥськид ке, агай-вынъёстэ юнматы». Иегова Пиезлэн сюлмысь вӧсяськемезлы ответ сётӥз. Улӟемез бере Иисус Пётрлы возьматскиз, солэсь мылкыдзэ ӝутон понна, вылды (Лука 22:32; 24:33, 34; 1 Кор. 15:5). Берлогес Иисус возьматскиз куд-ог апостолъёслы. Соос уйбыт чорыгазы, но номыр ӧз кутэ. Соин сэрен соослэн мылкыдзы куашкамын вал. Таяз учырын Пётр Иисуслы вераны быгатӥз, макем зол со сое яратэ. Иисус дуно эшсэ простить кариз, озьы ик эшшо но трос уж сётӥз (Иоанн 21:15—17).

19. Кызьы Псалтирь 102:13, 14 юрттэ милемлы сьӧлыкъёсмы шоры Иегова сямен учкыны?

¹⁹ Малы со милемыз дышетэ. Иисус Пётрлы гажан-жалянзэ возьматӥз. Нош ми тодӥськомы, Иисус котьма ласянь Атаезлэсь адӟем кариз шуыса. Соин ик янгышамы ке, малпано ӧвӧл, Иегова милемыз ноку простить уз кары ни шуыса. Тодамы возёно: озьы малпамы ке, Шайтан шумпотоз. Ойдолэ вань кужмысьтымы тыршомы асьмеос шоры но милемлы пумит сьӧлыкам адямиос шоры учкыны озьы ик, кызьы учке гажась-жалясь но яратӥсь Атаймы. (Лыдӟе Псалтирез 102:13, 14.)

20. Мае ми эскеромы вуоно статьяын?

²⁰ Иосифлэн, Ноеминьлэн, Руфьлэн, левитлэн, кудӥз 72-тӥ Псаломез гожтӥз, но апостол Пётрлэн учыръёссы оскыто милемыз, Иегова «сюлмынызы чигиськыса улӥсьёслы... матын улэ» шуыса (Пс. 33:19). Инмар улонысьтымы шуг-секытъёсты котьку ик уг быдты. Соин сэрен куддыръя ми куректыса улӥськомы. Нош, Иеговалэн юрттэменыз, ми та шуг-секытъёс пыр потӥськомы ке, милям осконмы юнма (1 Пётр 1:6, 7). Вуонояз статьяын ми адӟомы, кызьы Иегова юрттэ мукет ужась-тыршисьёсызлы, кудъёсыз асьсэлэн янгышъёссы сэрен яке шуг-секытъёссы сэрен куректыса уло.