Уг возьмато. Библия но, история но со сярысь уг верало.

Пӧртэм Библиосысь та кылбурез лыдӟыса, куд-огъёсыз малпало, Павел дыръя христианъёс кулэмъёс понна вуын пылатӥсько вал шуыса. Кылсярысь, тани кызьы та кылбур берыктэмын Удмурт Библиын: «Соку ма карозы кулэмъёс понна пылатӥськисьёс?»

Учке, мар верало Библиез эскерись кык тодосчиос. Грегори Локвудлэн верамезъя, Библия но, история но уг возьмато, кин ке но кулэмъёс понна пылатӥськиз шуыса. Сыӵе ик малпанэз вераз Гордон Фи: «История но, Библия но сыӵе учыръёс сярысь уг верало. Та пумысен Выль Сӥзёнын номыр уг вераськы; номыр уг возьматы, нырысетӥ христианъёс яке христианъёс, кудъёсыз апостолъёслэн кулэмзы бере кылдӥзы, кулэмъёс понна пылатӥськизы шуыса».

Библиын гожтэмъя, Иисус дышетскисьёсызлы вераз: «Мынэлэ, вань калыкъёсты дышетэлэ; соосты... пылатэ, ваньзэ, мае Мон тӥледлы косӥ, соосты быдэсъяны дышетэ» (Матф. 28:19, 20). Пылатӥськемезлэсь азьло адямилы кулэ вал Иегова сярысь но солэн Пиез сярысь тодон-валан басьтыны, соослы оскыны но соослэсь кылзӥськыны. Нош кулэм мурт та курон-косонъёсты быдэстыны уг быгаты вал ини, улэп христианъёс пӧлысь но кулэм мурт понна нокин сое быдэстыны уг быгаты вал (Екк. 9:5, 10; Иоанн 4:1; 1 Кор. 1:14—16).

Соку мар сярысь вераз Павел?

Коринфын куд-ог улӥсьёс ӧз оске, кулэмъёс улӟыны быгато шуыса (1 Кор. 15:12). Павел возьматӥз, сыӵе малпанъёс шонертэмесь шуыса. Со гожтӥз: «Нуналлы быдэ мон кулон азьын сылӥсько». Но вань шуг-секытъёсыз шоры учкытэк, Павел юн оскиз, кулэмез бере, Иисус сямен, инмын улыны улӟытэмын луоз шуыса (1 Кор. 15:30—32, 42—44).

Коринфын улӥсьёслы валано вал, зырӟем христианъёс луыса, соос котькуд нунал шуг-секытъёсын пумиськылозы но инме ӝутскемзылэсь азьло кулозы шуыса. Куке соос Иисус Христос бордын пылатӥськизы, соос солэн кулонэныз но пылатӥськизы (Рим. 6:3). Та возьматэ, зырӟем христианъёс, Иисус сямен, шуг-секытъёс пыр потозы, кулозы но инмын улыны улӟытэмын луозы шуыса.

Вуын пылатӥськемез бере кык арлэсь но тросгес ортчыса, Иисус кык апостолъёсызлы вераз: «Пылатонэн, кудӥныз Мон пылатӥськисько, пылатӥськоды» (Марк 10:38, 39). Со ӧз вера вуын пылатӥськон сярысь, нош кулонэныз пылатӥськон сярысь вераз. Иисус валэктӥз, музъем вылын Инмарлы оскымон ужан-тыршонэз йылпумъяськем бере со кулоз шуыса. Павел зырӟем христианъёслы гожтӥз, соос Христосэн курадӟозы шуыса, соин ӵош данэ потон понна (Рим. 8:16, 17; 2 Кор. 4:17). Соин ик зырӟем христианъёслы но, инмын улыны улӟон понна, нырысь кулоно вал.

Озьыен, Павеллэсь кылъёссэ шонергес луысал берыктыны тазьы: «Соку мар кароно соослы, кинъёс пылатӥсько, кулэм адями луон понна? Кулэмъёс чик улӟыса уг султо ке, соку малы соослы пылатӥськоно, кулэм адями луон понна?»