1, 2. а) Кыӵе косон сётӥз Иегова Иисуслэн куинь апостолъёсызлы но кылзӥськизы-а соос та косонлэсь? б) Мае ми эскеромы та статьяын?

 АСЬМЕ вакытысь 32-тӥ арын, Пасха бере, Пётр, Иаков но Иоанн апостолъёс Иисусэн ӵош ӝужыт гурезь йылэ тубизы (Ермон гурезьлэн одӥгаз вырйылаз, вылды). Отын соос туж паймымон адӟонэз адӟизы! «Соос азьын... [Иисус] воштӥськиз: ымнырыз шунды кадь пиштыны кутскиз, нош дӥсянэз лымы кадь тӧдьы луиз» (Матф. 17:1—4). Адӟонлэн пумаз апостолъёс Инмарлэсь куаразэ кылӥзы: «Та Мынам Яратоно Пие, Со бордын Мынам ӟеч эрике, Солэсь кылзӥське» (Матф. 17:5). Та куинь апостолъёслэн улонзы возьматӥз, соос Иисуслэсь зэмзэ ик кылзӥськизы шуыса. Милям соослэсь адӟем кареммы потэ.

² Таяз но кылем статьяосын эскериське, мае возьматэ Иисуслэсь кылзӥськон. Кылем статьяысь ми тодӥмы, мар милемлы кароно ӧвӧл. Таяз статьяын ми эскеромы Иисуслэсь кык косонзэ со сярысь, мар милемлы карыны кулэ.

3. Кыӵе косон сётӥз Иисус, кудӥз гожтэмын Матфейлэсь 7:13, 14?

³ Лыдӟе Матфейлэсь 7:13, 14. Висъялэ саклыктэс, Иисус вераз, кык гинэ сюрес вань шуыса: паськыт капкатӥ пырыса, эркын сюрес вылэ потыны луэ, нош ӟоскыт капкатӥ — сюбег сюрес вылэ. Куинетӥез ӧвӧл. Милемлы асьмелы быръёно, кыӵе сюрес вылтӥ ми мыномы. Талэсь но  кулэгес ужпум ӧвӧл ни: соин герӟаськемын, ми пырак уломы-а яке ум-а.

4. Кызьы тӥ валэктысалды, кыӵе со эркын сюрес?

⁴ Валаны кулэ, маин пӧртэм луо та кык сюресъёс. Эркын сюрес вылтӥ трос адямиос мыно, малы ке шуоно со вылтӥ мыныны секыт ӧвӧл. Куке адямиос адӟо, та сюрес вылтӥ тросэз мыно шуыса, жаляса верано луэ, соос но ужпум куто со вылтӥ мыныны. Адямиос уг ик малпало, та сюрес вылтӥ Шайтан нуэ но со кулонэ вуттэ шуыса (1 Кор. 6:9, 10; 1 Иоанн 5:19).

5. Мар кароно луиз куд-ог адямиослы, сюбег сюресэз шедьтон но со вылтӥ мынон понна?

⁵ Мукетыз сюрес сюбег. Иисус вераз, ӧжытэз сое шедьто шуыса. Нош малы? Тунсыко, мукетаз кылбурын Иисус дышетскисьёссэ косэ ӧрекчи пророкъёслэсь утиськыны (Матф. 7:15). Куд-ог эскеронъёсъя туннэ трос сюрс религиос вань. Соос пӧлысь тросэз верало, зэмлыклы дышето шуыса. Таин сэрен трос миллион адямиос йыромемын но улонэ нуись сюресэз шедьтыны уг ик туртто ини. Но та сюресэз шедьтыны луэ. Иисус вераз: «Мынам кылыя улӥды ке, тӥ зэмзэ но Мынам дышетскисьёсы луоды, зэмлыкез тододы, нош зэмлык тӥледыз эрико кароз» (Иоанн 8:31, 32). Тӥледыз ушъяны луэ, тросэз сьӧры ӧд мынэ шуыса. Тӥ зэмлыкез утчады. Тӥ ужпум кутӥды Инмарлэсь Кылзэ пыр-поч эскерыны, солэсь курон-косонъёссэ тодон понна, но Иисуслэн дышетонъёсызлэсь кылзӥськиды. Тӥ тодӥды Иеговалэсь одӥгзэ курон-косонзэ — палэнскыны дышетонъёслэсь но праздникъёслэсь, кудъёсыз зэмос луисьтэм религиен герӟаськемын. Тӥ ас вылады шӧдӥды, куддыръя со капчи ӧвӧл шуыса (Матф. 10:34—36). Куд-ог воштӥськонъёсты лэсьтыны тӥледлы секыт вал. Но тӥ быгатӥды сое лэсьтыны, малы ке шуоно инмысь Атайдэс яратӥськоды но тӥляд сое шумпоттэмды потэ. Иегова тӥледын туж данъяське! (Мад. 27:11).

6. Мар юрттоз милемлы сюбег сюрес вылтӥ мыныны? (Псалтирь 118:9, 10, 133).

⁶ Мар юрттоз милемлы улонэ нуись сюбег сюрес вылтӥ мыныны? Эскеромы таӵе примерез. Водительёсты утён понна, меӵ гурезьёсын сюрес кузя бордъёс лэсьто. Солы луыса машина сюрес вылысь уг кожы но уг усьы. Озьыен, бордъёс улонэз утё — нокин уг но малпа, соос люкето шуыса. Иеговалэн курон-косонъёсыз, кудъёсыз Библиын гожтэмын, та бордъёс выллем. Соос юртто милемлы сюбег сюрес вылтӥ мыныны. (Лыдӟе Псалтирез 118:9, 10, 133.)

7. Люкето-а Иеговалэн курон-косонъёсыз егит агайёслы но сузэръёслы? Валэктэ.

⁷ Егит агайёс но сузэръёс, малпаськоды-а тӥ, Иеговалэн курон-косонъёсыз тӥледлы люкето шуыса? Шайтанлэн потэ, тӥ ӵапак озьы мед малпалоды шуыса. Со умоен возьматэ ужъёсты, кудъёсыныз выро эркын сюрес вылтӥ мынӥсь адямиос. Ӵош дышетскисьёсты яке интернет пыр Шайтан тӥледыз оскытыны тырше, соос дырзэс умой ортчыто, нош тӥ уд шуыса. Шайтанлэн потэ, тӥ мед малпалоды, Иеговалэн курон-косонъёсыз тӥледлы шумпотыса улыны люкето шуыса b. Но тодады возе: Шайтан эркын сюрес вылтӥ мынӥсьёслы  уг вера, кытчы со вуттэ. Нош Иегова валамон вера, мар со дасяз соослы, кинъёс улонэ нуись сюрес вылтӥ мыно (Пс. 36:29; Ис. 35:5, 6; 65:21—23).

8. Кызьы егитъёс Олаф агайлэсь адӟем карыны быгато?

⁸ Туж умой адӟем карон возьматэ Олаф c нимо егит агай. Соин ӵош дышетскись нылъёс кужмысь ӵектӥзы солы сексэн вырыны. Олаф соглаш ӧз кариськылы но вералляз, солэн Библиысь вылӥ эсэпъёсъя улэмез потэ шуыса. Та шоры учкытэк но, классысьтыз куд-ог нылъёс Олаф вылэ эшшо но золгес зӥбыны кутскизы. Но со ӧз сётскы. Со сяна, Олаф вылэ дышетӥсьёсыз но зӥбизы. «Соос косӥзы монэ школаме йылпумъяме бере институтын дышетскыны. Дышетӥсьёсы веразы, соку мон гажамон адями луо, нош отын дышетскытэк, умой уж уг шедьты но шудо уг луы шуыса». Мар юрттӥз Олафлы сётскытэк улыны? Со валэктэ: «Мон кенешысь матысь эшъёс шедьтӥ. Соос мыным семья кадь луизы. Со сяна, мон Библиез пыр-почгес эскерыны  кутски. Сое мургес эскерыса, мынам осконэ юнмаз, та зэмлык шуыса. Соин ик мон ужпум кутӥ пылатӥськыны но Иеговалэн Адӟись-Ивортӥсез луыны».

9. Мар кароно, сюбег сюрес вылтӥ мынон понна?

⁹ Шайтанлэн потэ, тӥ улонэ нуись сюрес вылысь мед кожоды но, трос адямиос сямен, кулонэ нуись эркын сюрес вылтӥ мед мыноды шуыса (Матф. 7:13). Ми Иисусэз кылзӥськомы ке но валаськомы ке, сюбег сюрес милемыз трос кышкытлыкъёслэсь уте шуыса, соку сюбег сюрес вылысь ум коже. Нош табере ойдолэ эскеромы Иисуслэсь эшшо одӥг косонзэ со сярысь, мар милемлы карыны кулэ.

10. Мар милемлы карыны кулэ Иисуслэн кылъёсызъя, кудъёсыз гожтэмын Матфейлэсь 5:23, 24?

¹⁰ Лыдӟе Матфейлэсь 5:23, 24. Иисус вера учыр сярысь, кудӥз сое кылзӥсь иудейёс пӧлысь тросэзлы тодмо вал. Пуктэ син азяды: еврей пиосмурт храме пудо-животэз вайиз но тани-тани сое священниклы курбонлы сётоз. Ӵапак соку пиосмуртлэн тодаз лыктэ, бускелезлэн солы кӧтӝожез вань шуыса. Табере солы пудо-животсэ кельтоно но кошконо. Но малы озьы? Иеговалы курбон ваемлэсь мар ке но кулэезгес вань-а? Вань. Иисус со сярысь шонерак вераз: «Мын, нырысь ик тупа братэныд».

11. Мар кариз Иаков, Исавен кусыпъёссэ тупатон понна?

¹¹ Иаков патриархлэн улонысьтыз одӥг учыр возьматэ, кызьы мукетъёсыныз кусыпъёсты тупатоно. Мурт музъемын ог 20 ар ӵоже улэмез бере Инмар кылчинэз пыр сое берытскыны косӥз (Ул.-выл. 31:11, 13, 38). Но берытскыны капчи ӧй вал. Куке но Исав агаезлэн сое виемез потэ вал (Ул.-выл. 27:41). Соос ӝоген пумиськозы шуыса тодэмез бере, «Иаков туж кышкатскиз, куалектӥз» (Ул.-выл. 32:7). Со кышказ, агаез али ке но солы вожзэ поттэ на шуыса. Мар кариз Иаков, агаеныз кусыпъёссэ тупатон понна? Нырысь со Иеговалы ӟырдыт вӧсяськиз. Собере со Исавлы трос кузьымъёс лэзиз (Ул.-выл. 32:9—15). Нош куке агайёс пумиськизы, Иаков Исавлы бадӟым гажанзэ возьматӥз. Со Исавлы йыбырттӥз — одӥг пол гинэ ӧз, нош сизьым пол йыбырттӥз! Зӥбыт-востэм луон но гажан юрттӥзы Иаковлы агаеныз кусыпъёссэ тупатыны (Ул.-выл. 33:3, 4).

12. Малы дышетэ милемыз Иаковлэн учырез?

¹² Ми тросэзлы дышетскыны быгатӥськомы отысь, кызьы Иаков агаеныз пумиськыны дасяськиз но кызьы со ассэ возиз, куке сое адӟиз. Нырысь ик Иаков зӥбыт-востэмен Иеговалэсь юрттэт куриз. Собере со вӧсяськемезъя лэсьтӥз но агаезлэсь сюлэмзэ небӟытыны тыршиз, ас азяз солы кузьымъёс ыстыса. Куке соос пумиськизы, Иаков ӧз тыршы валаны, кин — янгыш, нош кин — ӧвӧл. Солэн мукет ужпумез вал — солэн агаеныз кусыпъёссэ тупатэмез потэ вал. Кызьы ми Иаковлэсь адӟем карыны быгатӥськомы?

13, 14. Мар кароно, ми агаез яке сузэрез вӧсь каримы ке?

¹³ Улонэ нуись сюрес вылысь медам коже шуыса, милемлы тупаса улоно соосын, кинъёс милемын ӵош та сюрес вылтӥ мыно (Рим. 12:18). Нош мар кароно, ми кыӵе ке агаез яке сузэрез вӧсь каримы ке? Нырысь ик, Иаков сямен, вань сюлмысьтымы Иеговалы вӧсяськоно но солэсь юрттэт куроно, агаен яке сузэрен кусыпъёсмес тупатон понна.

 ¹⁴ Озьы ик дыр висъяно, аслэсьтыд юан понна: «Дась-а мон вераны, мон янгыш вал шуыса, зӥбыт-востэмен курыны монэ простить карыны но кусыпъёсмес тупатыны? Мар шӧдозы Иегова но Иисус, агаен яке сузэрен кусыпъёсмес тупатон понна, нырысетӥ вамыш мон лэсьтӥ ке?» Та выллем юанъёс вылын малпаськон милесьтым мылкыдмес ӝутоз Иисуслэсь кылзӥськыны но зӥбыт-востэмен агаен яке сузэрен кусыпъёсмес тупатыны. Та пумысен Иаков милемлы нош ик умой адӟем карон возьматэ.

15. Кызьы возет, кудӥз гожтэмын Ефесъёслы 4:2, 3, юрттоз милемлы агаен кусыпъёсмес тупатыны?

¹⁵ Малпаське: мар луысал, Иаков Исавен споръяськыны кутскысал ке, кин янгыш, нош кин ӧвӧл шуыса? Пумиськонзы чылкак мукет сямен йылпумъяськысал. Малы та милемыз дышетэ? Агаен кусыпъёсмес тупатон понна, милемлы зӥбыт-востэмесь луоно. (Лыдӟе Ефесъёслы 4:2, 3.) Мадёнъёсын 18:20 гожтэмын: «Йыркурен пурӟем агай-вын юнматэм городлэсь но вормыны луонтэм луэ, керетонъёс-даллашонъёс изкарлэсь капказэ пытсась тунгонъёслы укшало». Ми зӥбыт-востэмен куримы ке милемыз простить карыны, вераны луоз, ми изкарлэсь пытсам капказэ усьтыны быгатомы шуыса.

16. Мар сярысь милемлы малпаськоно но малы?

¹⁶ Со сяна, умой малпаськоно, мар верано но кызьы. Собере гинэ мыноно милемлы кӧтӝожен улӥсь агаен вераськыны. Кыӵе ужпумен мыноно? Милям солы юрттэммы потэ, сюлмыз куректыса медаз улы ини шуыса. Со вераны быгатэ сое, маин тӥ соглаш уд луэ, вылды. Тӥ йыркуръяськиды ке яке асьтэды шонере поттыны кутскиды ке, юрттоз-а со агаеныды кусыпъёстэс тупатыны? Ойдолэ тодамы возёмы: янгыш адямиосты утчам интые, кулэгес агаен кусыпъёсты тупатыны (1 Кор. 6:7).

17. Малы дышетскыны луэ Жильбер агайлэсь?

¹⁷ Жильбер нимо агай туж тырше мукетъёсыныз тупаса улыны. Тани мар со вера: «Нылыным кусыпъёсы туж ик умоесь ӧй вал. Соин кусыпъёсме тупатон понна, мон кык арлэсь но кемагес тырши соин номыре ватытэк но керетытэк вераськыны». Мар эшшо кариз на Жильбер? «Нылыным вераськон азьын мон котьку но вӧсяськи но дась вал солэсь вӧсь карись кылъёссэ кылыны. Мыным дышетсконо вал простить  карыны. Мон валай, мыным асме шонере поттоно ӧвӧл но семьяеным тупаса улыны тыршоно шуыса». Кыӵе пайда со вайиз? Жильбер вера: «Али мон каньыл сюлмын улӥсько, малы ке шуоно табере ӵыжы-выжыосыным мынам умой кусыпъёсы».

18, 19. Мар милемлы кароно, кинэ ке вӧсь каримы ке, но малы?

¹⁸ Та статьяез эскерем бере мар тӥ кароды, шӧдӥды ке, кыӵе ке агаез вӧсь кариды шуыса? Кылзӥське Иисуслэн косонэзлэсь: «Тупа братэныд». Иеговалы вӧсяське но юн оске, солэн святой духез юрттоз тӥледлы мукетъёсыныз тупаса улыны. Соку тӥ зэмзэ ик шудо луоды но возьматоды, Иисуслэсь кылзӥськиськоды шуыса (Матф. 5:9).

¹⁹ Ми Иеговалы тау кариськомы, со милемын Иисус Христос пыр, кенешлэн йырыз пыр, яратыса валтэ шуыса (Еф. 5:23). Пётр, Иаков но Иоанн апостолъёс сямен, ойдолэ котьку но Иисуслэсь кылзӥськомы (Матф. 17:5). Та статья милемлы тодамы вайытӥз: соосын, кинъёсты ми вӧсь каримы, кусыпъёсмес тупатыны тыршоно. Ми улонэ нуись сюбег сюрес вылтӥ мынӥськомы ке но вын-агайёсын но сузэр-апайёсын тупаса улӥськомы ке, соку али но, азьланяз но шудо луомы!