Иегова израиль калыкез дун-чылкыт луыны косӥз. Соин ик со соослы таӵе курон-косон сётӥз: «Ас калыкед пӧлтӥ кыл нуллыса эн ветлы, матыседлэсь улонзэ быдтыны эн малпа. Мон Кузё-Инмар» (Лев. 19:2, 16).

«Матыседлэсь улонзэ быдтыны эн малпа» кылъёсын берыктӥзы еврей кылысь «матыседлэн вирыз вылын эн сылы» шуыса верамез. Та веранэз валаны туж ик капчи ӧвӧл.

Куд-ог тодосчиос лыдъяло, та веран со люкетысь ик азьвыл кылбурен герӟаськемын шуыса. Отын верамын: «Судын ужъёсты сэрттыкуды-пертчыкуды, шонертэм эн лэсьтэ; куанер адями азьын эн чеберъяськы, сӥё-дано муртлы кельшыны эн тыршы; матысьтэ судить кариськод ке, шонер судить кар» (Лев. 19:15). Соослэн малпамзыя, «матыседлэсь улонзэ быдтыны эн малпа» курон-косон возьматэ: Инмарлэн ужась-тыршисьёсыз кулэ ӧвӧл асьсэды шонертэм возьыны судын, ужен герӟаськем юанъёсын но семьяын, озьы ик асьсэлы пайда поттон понна шонертэмзэ вераны кулэ ӧвӧл. Веранэз ӧвӧл, озьы лэсьтыны уг яра. Нош со дыре ик Левитысь 19:16 кылъёсты мукет сямен но валэктыны луэ.

Саклыкмес висъяломы кылбурлэн нырысетӥ люкетэзлы. Иегова вера: «Ас калыкед пӧлтӥ кыл нуллыса эн ветлы». Супыльтон гинэ но мукет адямилы шуг-секытъёс вайыны быгатэ. Нош кыл нуллон супыльтонлэсь эшшо но уродгес луэ (Мад. 10:19; Екк. 10:12—14; 1 Тим. 5:13—15; Иак. 3:6). Кыл нуллӥсь мукет адями сярысь ӧвӧлтэмзэ вера, солэсь ӟеч нимзэ саптаны тыршыса. Со дась шонертэмзэ но вераны, суд та адямиез виыны мед сётоз шуыса. Озьы вал Навуфейлэн учыраз но: йӧнтэм адямиос со сярысь ӧвӧлтэмзэ веразы, соин ик сое нокыӵе мугтэк виизы (3 Экс. 21:8—13). Кызьы ми адӟимы, кыл нуллӥсь матысезлэсь улонзэ быдтыны быгатэ.

Со сяна, кин ке но мукет адями сярысь кыл нуллыны быгатэ, малы ке шуоно со сое адӟемпотостэм каре. Нош 1 Иоаннлэн 3:15 верамын: «Агай-вынъёссэ адӟемпотостэм карись мурт адями виись луэ; нош тӥ тодӥськоды, адями виись мурт бордын бырисьтэм улон ӧвӧл». Соин ик паймонэз ӧвӧл, Левитысь 19:16 курон-косон бере таӵе кылъёс верамын: «Сюлмыныд агай-выныныд тушмонъяськыса эн улы» (Лев. 19:17).

Озьыен, «матыседлэсь улонзэ быдтыны эн малпа» курон-косонлэсь христианъёс но кылзӥськыны кулэ. Милемлы матысьёсмы сярысь уродэн малпано ӧвӧл, озьы ик соос сярысь кыл нуллыса ветлоно ӧвӧл. Куке кин ке мукет адями сярысь кыл нуллэ, солы вожъяськеменыз яке со сярысь умойтэм малпаменыз, со возьматэ, со сое адӟемпотостэм каре шуыса. Соин ик вераны луоз, кыл нуллӥсь матысезлэсь улонзэ быдтыны малпа шуыса. Христианъёслы нокинэ адӟемпотостэм кароно ӧвӧл (Матф. 12:36, 37).