Сак лыдӟиды-а тӥ та арын поттэм «Возьмаськон башняез»? Быгатоды-а тӥ та юанъёслы валэктонъёс сётыны?

Малы милемыз буйгатэ, Иегова «ӟеч сюлэмо, ваньзэ гажась-жалясь» шуыса, кызьы со сярысь верамын Иаковлэн 5:11?

Гажан-жалян Иеговалэсь мылкыдзэ ӝутэ янгышъёсмес простить карыны. Иаковлэн 5:11 кылъёс милемыз оскыто, Иегова ӟеч сюлэмо шуыса, соин ик со милемлы юрттыны дась. Милемлы солэсь адӟем кароно (w21.01, 21 б.).

Малы Иегова йыр луон сярысь возет сётӥз?

Малы ке шуоно со яратэ аслэсьтыз нылпиоссэ. Йыр луон сярысь возетлы луыса Иеговалэн оскымон ужась-тыршисьёсыз тупаса но огкылысь уло. Семьяын котькудӥз та возетъя улэ ке, соослы ялан малпано уз луы: кинлы ужпум кутоно, нош кинлы та ужпумез быдэстоно (w21.02, 3 б.).

Малы христианъёслы сак луоно, мессенджеръёсты уже кутыкузы?

Милемлы сак быръёно, кинэн ми интернет пыр но ваче ымныр пумиськыса вераськиськомы. Куддыръя мессенджеръёсысь группаосы туж трос адямиос пыро. Соку секыт валаны, кыӵе адямиосын ми вераськиськомы (1 Тим. 5:13). Вань на эшшо одӥгез кышкытлык — мессенджеръёс пыр ӵем дыръя эскерымтэ иворъёсты вӧлмыто. Озьы ик куд-ог христианъёс мессенджеръёсты уже куто, мае ке вузан, басьтон яке ӵектон понна. Соослы вын-агайёс но сузэр-апайёс пыр коньдон поттыны тыршоно ӧвӧл (w21.03, 31 б.).

Малы Инмар лэзиз, Иисус курадӟыса мед кулоз шуыса?

Одӥгез муг: юбо бордын кулыса, Иисус еврейёсты карган улысь мозмытысал (Гал. 3:10, 13). Озьы ик Иегова дасяз Иисусэз милемлы Быдӟым священник луыны. Со сяна, ваньзэ чидаса, Иисус возьматӥз, бадӟым шуг-секытъёс дыръя но адямиос Инмарлы оскымон кыльыны быгато шуыса (Иов 1:9—11) (w21.04, 16—17 б.).

Мар карыны луоз, ужан-тыршон дыръя ӧжыт адямиосты шедьтӥськоды ке?

Тырше тодытыны соку, куке соос доразы луыны кулэ. Тодытон понна участокын сяна, тырше тодытыны мукет интыосын но. Эшшо одӥг визь-кенеш: тодытэ пӧртэм амалъёсын, кылсярысь, гожтэтъёс гожъялэ (w21.05, 15—16 б.).

Мар сярысь верамез потэ вал апостол Павеллэн таӵе кылъёсын: «Закон пыр мон законлы кулӥ»? (Гал. 2:19).

Моисейлэн законэз возьматӥз: сьӧлыко адямиос Инмарлэсь курон-косонъёссэ быдэсак быдэсъяны уг быгато. Озьы ик та закон израиль калыкез дасяз Христослэн лыктонэзлы (Гал. 3:19, 24). Тае валан Павеллы оскыны юрттӥз, Иисус — Мессия шуыса. Павеллэн кылъёсыз возьмато, со Моисейлэн законэзлэсь кылзӥськыса ӧз ни улы шуыса (w21.06, 31 б.).

Малы вераны луоз, Иегова тужгес но умой адӟем карон возьматэ шуыса, кызьы чидась луоно?

Иегова чида нимзэ саптанэз, вылӥ кивалтэтэзлы пумитъяськонэз, нылпиосызлэсь пумит султэмзэс, Шайтанлэсь пӧяськемзэ, ужась-тыршисьёсызлэсь курадӟемзэс, матысь эшъёсыныз люкиськонэз, дуннеын вӧлмем кужмысь каронъёсыз но Музъемлэсь бырон калэ вуэмзэ (w21.07, 9—12 б.).

Мае чидано луиз Иосифлы?

Аслаз агайёсыз сэрен со куректонэн пумиськоно луиз. Берлогес Египетын сое янгыше уськытӥзы, кузёезлэсь кышнозэ эриктэмаз шуыса, но кемалы пытсэтэ пуктӥзы (w21.08, 12 б.).

Аггейлэн 2:6—9, 20—22 верамъя, мае Иегова «зуркатэ» асьме нуналъёсы но мае со «зуркатоз» вуоно дыре?

Асьме нуналъёсы Иегова калыкъёсты «зуркатэ» Эксэйлык сярысь иворен. Тросэзлы та ивор уг кельшы. Нош вань соос но, кинъёслы со кельше. Ӝоген Иегова инэз но музъемез «зуркатоз», кивалтэтэзлы пумит мынӥсь адямиосты быдтыса (w21.09, 15—19 б.).

Малы милемлы, номыр шоры учкытэк, азьланяз но тодытоно?

Иегова шумпотэ, куке милесьтым тыршеммес адӟе. Ужан-тыршонын ми ӧм ке сётске, со милемлы пырак улон кузьмалоз (w21.10, 25—26 б.).

Кызьы Левитысь 19-тӥ люкет юрттоз милемлы уже кутыны «быдэс улон-вылонад дун-сьӧлыктэмесь луэлэ» визь-кенешез? (1 Пётр 1:15).

Пётр вераз, вылды, Левитысь 19:2 кылъёсты. Левит книгаысь та люкетэз эскерыса, ми адӟомы, улонмылэн кыӵе удысъёсаз 1 Пётрлэн 1:15 визь-кенешез уже кутыны луоз (w21.12, 3 б.).