1. Мар кароно агайёслы, соослэн зэмос христианъёс луэмзы потэ ке?

 АПОСТОЛ Павел Коринфысь христианъёсты ӧтиз: «Агай-вынъёс! Визьдыя пичи мурт кадь эн луэ... быдэ вуэмъёс кадесь луэ» (1 Кор. 14:20). Та визь-кенешлэсь кылзӥськыны кулэ вань агайёс, кудъёсыз зэмос христианъёс луыны тыршо. Со понна соослы кулэ Инмарлэн курон-косонъёсызлэсь кылзӥськыны но котьку Библиысь возетъёсъя улыны (Лука 2:52). Малы егит агайёслы но тыршоно зэмос христианъёс луыны?

2, 3. Малы егит агайёслы зэмос христианъёс луыны тыршоно?

² Пиосмуртъёс семьяын но кенешын трос ужъёс быдэсъяло. Егит агайёс, малпаськиды-а тӥ вуоно улонды сярысь? Оло нош, тӥляд ужпумды вань пионер луыса ужаны-тыршыны яке кенешлы юрттӥсь, нош берлогес тӧро луыны. Нош кинлэн ке потэ кышнояськемез но атай луэмез (Еф. 6:4; 1 Тим. 3:1). Мар юрттоз тӥледлы та ужпумъёстэс быдэстыны? Тӥледлы тыршоно зэмос христианъёс луыны b.

³ Мар юрттоз тӥледлы зэмос христианъёс луыны? Кыӵе сямъёс тӥледлы будэтоно но малы дышетсконо? Ойдолэ со сярысь вераськомы.

4. Кинъёслэсь тӥ адӟем карыны быгатӥськоды? (Озьы ик учке суредэз.)

⁴ Адӟем каре оскымон пиосмуртъёслэсь. Сыӵе пиосмуртъёс сярысь гожтэмын Библиын. Соос Иеговаез яратӥзы  но солэн калыкез сярысь сюлмаськизы. Озьы ик тӥ адӟем карыны быгатӥськоды семьяысьтыды но кенешысьтыды оскымон христианъёслэсь (Евр. 13:7). Нош самой умой адӟем карон милемлы кельтӥз Иисус Христос (1 Пётр 2:21). Малпаське, кыӵе умой сямъёссы вань та пиосмуртъёслэн, но соослэсь адӟем карыны тырше (Евр. 12:1, 2).

5. Кызьы дышетсконо Иегова сямен малпаськыны но малы со туж кулэ? (Псалтирь 118:9).

⁵ Дышетске ужъёстэс малпаськыса лэсьтыны (Мад. 3:21). Ужъёсты дыртыса лэсьтоно ӧвӧл. Нырысь умой малпаськоно но тыршоно валаны, мар малпа со сярысь Иегова. Со капчи ӧвӧл, малы ке шуоно та дуннеысь тросэз егитъёс ваньзэ ас мылпотэмзыя гинэ лэсьто (Мад. 7:7; 29:11). Со сяна, интернет но сыӵе ик мылкыд пыӵатэ. Кызьы дышетсконо ужъёсты малпаськыса лэсьтыны? Нырысь малпалэ, кыӵе визь-кенеш сётэ Иегова. Малпаське, малы та визь-кенеш тӥледлы пайда гинэ ваёз. Собере, та визь-кенешез лыдэ басьтыса, ужпум кутэ. Озьы тӥ Иеговаез шумпоттоды. (Лыдӟе Псалтирез 118:9.) Тӥ Иегова сямен малпаськыны дышетскиды ке, соку зэмос христианъёс луыны быгатоды (Мад. 2:11, 12; Евр. 5:14). Ойдолэ эскеромы, кызьы со юрттоз тӥледлы: 1) сузэръёсын асьтэды визьмо возьыны но 2) вылтус но дӥськут пумысен умой ужпумъёс кутыны.

6. Кызьы егит агай возьматоз, сузэръёсты гажа шуыса?

⁶ Агай, кудӥз Иегова сямен малпаськыны дышетскиз, кышномуртъёсты гажа. Иегова адямиосты кылдытӥз кузпалъяськыны мылпотонэн. Соин ик номыр уродэз ӧвӧл, егит агайлэн сыӵе мылпотонэз вань ке. Нош мае тодаз возёно агайлы, кудӥз кузпалъяськыны уг малпа? Агай Иегова сямен малпаськыны дышетскиз ке, со ноку но уз вера, уз гожты но уз лэсьты сое, мар понна сузэр малпаны быгатысал, та агай солы синмаськиз шуыса (1 Тим. 5:1, 2). Нош агай сузэрен пумиськылэ ке, со солэн ӟеч нимыз сярысь сюлмаськоз. Соос огназы уз кылелэ, котьку кин ке но соосын ӵош луоз (1 Кор. 6:18).

7. Мае лыдэ басьтоно егит агайлы, куке со быръе, кызьы дӥсяськоно но ӵышкиськоно?

 ⁷ Егит агай Иегова сямен малпаськыны дышетскиз ке, со адӟиськоз отысь, кызьы со дӥсяське но ӵышкиське. Ӵем дыръя выль дӥськут кылдыто адямиос, кудъёсыз Иеговаез уг гажало но солэн курон-косонъёсызъя уг уло. Соин ик соослэн кылдытэм дӥськутсы укыр сюбег луэ яке пиосмуртъёсты кышномуртъёслы укшатэ. Агай, кудӥз котьку но Иисус Христослэсь адӟем карыны тырше, дӥськут бырйыкуз, лыдэ басьтоз Библиысь возетъёсты но сое, кызьы дӥсясько кенешысьтыз адӟем карымон христианъёс. Со малпаськыны быгатэ: «Тупа-а та дӥськут христианъёслы? Возьматоз-а со, мон мукетъёссэ гажасько шуыса? Мон шоры учкыса, валалозы-а адямиос, мон Инмарлы ужасько-тыршисько шуыса?» (1 Кор. 10:31—33; Тит. 2:6). Егит агаез, кудӥз Иегова сямен малпаське, гажалозы вын-агайёс но сузэр-апайёс, озьы ик солэн инмысь Атаез но.

8. Кызьы егит агай оскиськымон адями луыны быгатэ?

⁸ Оскиськымон луэ. Оскиськымон агай солы сётэм ужъёсты тыршыса быдэсъя (Лука 16:10). Ойдолэ эскеромы Иисуслэсь примерзэ. Со ужъёссэ мылыз потытэк, суп-сап ӧз лэсьты. Иисус Иеговалэсь сётэм котькыӵе ужзэ быдэсъяз, со котьку но капчи ӧй вал ке но. Со яратӥз адямиосты, тужгес но аслэсьтыз дышетскисьёссэ, соин ик соос понна улонзэ сётӥз (Иоанн 13:1). Иисуслэсь адӟем карыса, тырше мылысь-кыдысь быдэстыны котькыӵе ужез, кудзэ тӥледлы сётӥзы. Нош тӥ уд ке тодӥське, кызьы сое лэсьтоно, куре юрттэт агайёслэсь, кудъёсыз тодо, кызьы сыӵе ужъёсты быдэстоно. Эн лэсьтэ сое гинэ, мае тӥлесьтыд куро, тырше тросгес лэсьтыны. Котькыӵе ужез пумозяз вуттэ (Рим. 12:11). Сое «адямиослы кадь эн, Кузё-Инмарлы кадь лэсьтэ» (Кол. 3:23). Веранэз ӧвӧл, ваньмы тырбыдэстэмесь но ваньмы янгышаськомы. Соин ик зӥбыт-востэмесь луэ но янгышъёстэс эн ватэ (Мад. 11:2).

9. Малы егит агайлы дышетсконо солы, мар котькуд нунал кулэ луоз?

⁹ Зэмос христианъёс луон понна, тӥледлы дышетсконо солы, мар котькуд нунал кулэ луоз. Со юрттоз тӥледлы кенешысь ужъёстэс быдэсъяны, адямиосын умой кусыпъёс возьыны но тупась уж шедьтыны. Ойдолэ тодомы, мар карыны тӥледлы дышетсконо.

10, 11. Малы егит агайлы дышетсконо умой лыдӟиськыны но гожъяськыны? (Псалтирь 1:1—3). (Озьы ик учке суредэз.)

¹⁰ Дышетске умой лыдӟиськыны но гожъяськыны. Библиын вераське, адями, кудӥз котькуд нунал Инмарлэсь Кылзэ лыдӟе но со вылын малпаське, шудо но азинлыко луоз шуыса. (Лыдӟе Псалтирез  1:1—3.) Тӥ Библиез нуналлы быдэ лыдӟиды ке, дышетскоды Иегова сямен малпаськыны но адӟоды, кызьы Библиысь возетъёсты улонады пыртоно (Мад. 1:3, 4). Сыӵе пиосмуртъёс кенешлы туж кулэ. Малы?

¹¹ Вын-агайёс но сузэр-апайёс, юрттэт курыса, вазисько агайёслы, кудъёсыз быгато дышетыны но Библия вылэ пыкиськем визь-кенешъёс сётъяны (Тит. 1:9). Тӥ умой лыдӟиськиськоды но гожъяськиськоды ке, тӥ быгатоды мукетъёсызлэсь осконзэс юнматыны, пумиськонъёсын умой малпам валэктонъёс сётъяса но пайдаё речьёс вераса. Озьы ик тӥ быгатоды пайдаё малпанъёсты гожтыны, кудъёссэ шедьтӥды, Библиез эскерыкуды яке конгрессъёсын но пумиськонъёсын речьёсты кылзыкуды. Со малпанъёс юрттозы тӥледлы асьтэлэсь оскондэс юнматыны но мукетъёсызлы юрттыны.

12. Кызьы дышетсконо адямиосын вераськыны?

¹² Дышетске адямиосын вераськыны. Со, кин адямиосын вераськыны быгатэ, соосты сак кылзэ но тырше соосты валаны (Мад. 20:5). Со понна дышетсконо валаны, мае возьматэ адямилэн куараез, ымныр тусыз но выросъёсыз. Но тӥ солы дышетскыны уд быгатэ, адямиосын дырдэс ӧд ке ортчытъялэ. Тӥ адямиосын мессенджеръёс пыр гинэ вераськиды ке, тӥледлы секыт луоз соосын пумиськыса вераськыны. Соин ик тырше тросгес адямиосын ваче ымныр вераськыны (2 Иоанн 12).

13. Малы эшшо дышетскыны кулэ на егит агайлы? (1 Тимофейлы 5:8). (Озьы ик учке суредэз.)

¹³ Кыӵе ке ужлы дышетске. Агайлы аслаз но семьяезлэн кулэяськонъёсыз сярысь сюлмаськоно. (Лыдӟе 1 Тимофейлы 5:8.) Куд-ог шаеръёсын егит агайёс кыӵе ке ужлы атайзылэсь яке ӵыжы-выжызылэсь дышетскыны быгато. Нош мукет шаеръёсын соос солы дышетскыны быгато, школаын дышетскыкузы ини. Тӥ егит дыръяды ик кыӵе ке ужлы дышетскиды ке, азьланяз со юрттоз тӥледлы тупась уж шедьтыны (Ап. уж. 18:2, 3; 20:34; Еф. 4:28). Тыршыса ужалэ но кутскем ужез котьку но пумозяз вуттэ. Соку мукетъёсыз адӟозы, тӥ умой ужаськоды шуыса, но тӥледлы капчигес луоз уж шедьтыны. Ми эскеримы ини, кыӵе сямъёсты будэтоно но малы дышетсконо егит агайёслы, вуоноезлы дасяськон понна. Нош али ойдолэ эскеромы, кыӵе ужъёссы соослэн луыны быгато.

14. Кызьы егит агай вань дырзэ сётыса ужан-тыршонлы дасяськыны быгатэ?

¹⁴ Вань дырзэ сётыса ужась-тыршись. Тросэз оскымон агайёс вань дырзэс сётыса ужаны-тыршыны кутскизы егит дырысенызы ик. Куке егит агай пионер луыса ужа-тырше, со дышетске пӧртэм адямиосын огкыл шедьтыны. Озьы ик со дышетске коньдонзэ визьмо кутыны (Флп. 4:11—13). Тросэз агайёс нырысь юрттӥсь пионеръёс луыса ужазы-тыршизы. Собере пионеръёс луизы. Нош дыр ортчыса, соос азьын мукет ӧсъёс но усьтӥськизы. Кылсярысь, куд-огъёссэ ӧтизы Вефильын ужаны-тыршыны яке пуктӥськон проектъёсын юрттӥськыны.

15, 16. Мар юрттоз агайлы кенешлы юрттӥсь яке тӧро луыны?

¹⁵ Кенешлы юрттӥсь яке тӧро. Вань агайёслы тыршоно тӧро луыны. Нош со понна соослы Библиысь куронъёслы тупано. Библиын вераське, кинлэн тӧро луэмез потэ, со «ӟеч уж лэсьтыны мылкыд каре» шуыса (1 Тим. 3:1). Тӧро луэмезлэсь азьло агай кӧня ке дыр ӵоже кенешлы юрттӥсь луыса ужаны-тыршыны кулэ. Кенешлы юрттӥсьёс тӧроослы юртто кенешысь агайёс но сузэръёс сярысь сюлмаськыны. Тӧроос но, кенешлы юрттӥсьёс но — зӥбыт-востэм агайёс, кудъёсыз Иеговалэн ужась-тыршисьёсызлы юртто но мылысь-кыдысь тодытон уже пырисько. Куд-ог егит агайёс 17 арескысен ини кенешлы юрттӥсьёс луыны быгато. Нош кенешлы юрттӥсь ужъёссэ умой быдэсъя ке, 20 арескын сое тӧро карыны быгато.

¹⁶ Мар кароно, кенешлы юрттӥсь яке тӧро луон понна? Тӥледлы тыршоно тупаны куронъёслы, кудъёсыз гожтэмын Библиын. Вакчияк вераса, яратоно Иеговаез, семьядэс но кенештэс (1 Тим. 3:1—13; Тит. 1:6—9; 1 Пётр 5:2, 3). Лыдӟе та абзацын сётэм кылбуръёсты но малпаське, кыӵе сямъёсты тӥледлы будэтыны кулэ на. Куре Иеговаез юрттыны тӥледлы та куронъёслы тупаны c.

17. Кызьы егит агайлы дасяськоно карт но семьялэн йырыз луыны?

¹⁷ Карт но семьялэн йырыз. Иисус пусйиз, куд-ог оскымон агайёс кышно басьтытэк уло шуыса (Матф. 19:12). Нош тӥ кышнояськыны малпады ке, тӥ карт но семьялэн йырыз луоды (1 Кор. 11:3). Иегова возьма, карт кышнозэ яратоз но солэн кулэяськонъёсыз сярысь сюлмаськоз шуыса.  Озьы ик со солэн матысь эшез луоз но юрттоз солы Иеговаен кусыпъёссэ юнматыны (Еф. 5:28, 29). Та статьяысь ми тодӥмы, тӥледлы Иегова сямен малпаськыны, кышномуртъёсты гажаны но оскиськымон луыны дышетсконо шуыса. Ваньмыз та юрттоз тӥледлы умой карт луыны.

18. Кызьы егит агайлы дышетсконо умой атай луыны?

¹⁸ Атай. Кышнояськемды бере тӥляд нылпиосты вордӥськыны быгато. Кызьы умой атай луоно? Тросэзлы Иеговалэсь дышетскыны луэ (Еф. 6:4). Иегова ваньмыз азьын Пиезлы, Иисуслы, вераз, сое яратэ шуыса (Матф. 3:17). Тӥ атай луиды ке, ӵемгес вералэ нылпиостылы, соосты яратӥськоды шуыса. Ушъялэ соосты пичи гинэ ӟеч ужъёссы понна но. Атайёс, кудъёсыз Иеговалэсь адӟем каро, нылпиоссылы юртто Инмарен кусыпъёссэс юнматыны. Егит агайёс, тырше сюлмаськыны семьяды сярысь но кенешысьтыды агайёс но сузэръёс сярысь. Вералэ соослы, тӥ соосты яратӥськоды но дунъяськоды шуыса (Иоанн 15:9). Озьы тӥ дышетскоды азьланяз умой карт но атай луыны, нош али ини Иеговаез шумпоттоды, озьы ик семьядылы но кенештылы юрттоды.

19, 20. Мар юрттоз егит агайёслы зэмос христианъёс луыны? (Учке вылбамысь суредэз.)

¹⁹ Егит агайёс, зэмос христианъёс луон понна, тӥледлы тыршоно луоз. Тӥледлы адӟем кароно оскымон пиосмуртъёслэсь, дышетсконо Иегова сямен малпаськыны но оскиськымон луыны. Озьы ик тӥледлы дышетсконо солы, мар котькуд нунал кулэ луоз, но вуоноезлы дасяськоно.

²⁰ Тӥ малпаны быгатоды, ноку но солы уд дышетске шуыса. Но эн кышкалэ, тӥляд ваньмыз пӧрмоз! Иегова котьку но тӥледын артэ (Ис. 41:10, 13). Озьы ик кенешысьтыды агайёс но сузэръёс тӥледлы юрттозы. Иеговалэн потэ, тӥ зэмос христианъёс мед луоды шуыса. Со тодэ, соку улонды трослы шудогес но тунсыкогес луоз шуыса. Егит агайёс, ми тӥледыз туж яратӥськомы! Тырше зэмос христианъёс луыны. Иегова тӥледыз одно ик бакель кароз! (Мад. 22:4).