1. Мар кароно, зэмос христианъёс луон понна?

 НЫЛПИОС туж ӝог будо. Со понна номыр кароно но ӧвӧл, кадь. Но зэмос христианъёс луон понна, мар ке но карыны кулэ (1 Кор. 13:11; Евр. 6:1) b. Со понна Иеговаен матысь кусыпъёс возёно. Озьы ик милемлы святой дух кулэ. Со милемлы юрттоз христиан сямъёсты будэтыны, дышетскыны солы, мар котькуд нунал кулэ луоз, но вуоноезлы дасяськыны (Мад. 1:5).

2. Мар сярысь вераське Улон-вылонын 1:27 но мае ми эскеромы та статьяын?

² Иегова пиосмуртэз но кышномуртэз кылдытӥз. (Лыдӟе Улон-вылонэз 1:27.) Соос туж пӧртэмесь. Со сяна, Иегова соослы пӧртэм ужъёс сётӥз. Соосты быдэстон понна, пиосмуртъёслы но кышномуртъёслы пӧртэм сямъёс но быгатонлыкъёс кулэ (Ул.-выл. 2:18). Та статьяын ми эскеромы, мар кароно егит сузэръёслы, зэмос христианъёс луон понна. Вуонояз статьяын ми эскеромы, мар со понна кароно егит агайёслы.

3, 4. Кинлэсь егит сузэръёс адӟем карыны быгато? (Озьы ик учке суредэз.)

³ Библиын гожтэмын трос умой кышномуртъёс сярысь, кудъёсыз Иеговаез яратӥзы но солы ужазы-тыршизы.  Ми соослэсь дышетскыны быгатӥськомы. (Учке jw.org сайтысь «Женщины в Библии: чему учит их пример?» статьяез.) Соос ӟеч сямоесь но оскиськымонэсь вал. Со сяна, егит сузэръёс адӟем карыны быгато ас кенешысьтызы оскымон сузэръёслэсь.

⁴ Егит сузэръёс, тодӥськоды-а тӥ оскымон сузэръёсты, кудъёсызлэсь тӥ дышетскыны быгатӥськоды? Висъялэ саклыктэс умой сямъёссылы но малпаське, кызьы тӥ соослэсь адӟем карыны быгатӥськоды. Вуоно абзацъёсын ми эскеромы кык сямъёсты, кудъёсыз туж кулэ зэмос христианъёслы.

5. Малы зэмос христианъёслы зӥбыт-востэмесь луыны кулэ?

⁵ Зэмос христианъёс зӥбыт-востэмесь луыны кулэ. Зӥбыт-востэм сузэр Иеговаен но мукетъёсыныз умой кусыпъёс возе (Иак. 4:6). Кылсярысь, Иеговаез яратӥсь кышномурт кылзӥське йыр луон сярысь возетлэсь, кудзэ инмысь Атаез сётӥз (1 Кор. 11:3). Та возетэз кенешын но, семьяын но уже кутоно c.

6. Кызьы егит сузэръёс Ревеккалэсь адӟем карыны быгато?

⁶ Вераськомы Ревекка сярысь. Та кышномурт ассэ визьмо но кышкасьтэм возиз. Озьы ик со тодӥз, ку но мар кароно (Ул.-выл. 24:58; 27:5—17). Со дыре ик со мукетъёссэ гажаз но кылзӥськыны дась вал (Ул.-выл. 24:17, 18, 65). Тӥ но быгатӥськоды зӥбыт-востэмесь луыны но кылзӥськыны соослэсь, кинъёслы Иегова кивалтэт сётӥз. Соку тӥ семьядылы, озьы ик кенешысь агайёслы но сузэръёслы адӟем карымонэсь луоды.

7. Кызьы егит сузэръёс Есфирьлэсь адӟем карыны быгато?

⁷ Кыӵе эшшо пайда вае на зӥбыт-востэм луон? Библиын гожтэмын: «Зӥбыт-востэмъёсын ӵош визьлык лыктоз» (Мад. 11:2). Ойдолэ учкомы, кызьы Есфирь  зӥбыт-востэм луэмзэ возьматӥз. Эксэй кышно луэмез бере но со ачиз сярысь укыр трос ӧз малпаськы. Со кылзӥськиз Мардохейлэн визь-кенешъёсызлэсь (Есф. 2:10, 20, 22). Есфирь сямен, тӥ но быгатӥськоды мукетъёсызлэсь визь-кенеш курыны но сое улонады пыртыны (Тит. 2:3—5).

8. Кызьы возетъёс, кудъёсыз гожтэмын 1 Тимофейлы 2:9, 10, юрттозы сузэръёслы асьсэды зӥбыт-востэм возьыны но ӝикыт дӥсяськыны?

⁸ Кызьы эшшо Есфирь зӥбыт-востэм луэмзэ возьматӥз на? «Та нылмуртлэн ымнырыз чебер, мугорыз веськрес вал» ке но, со аслыз мултэс саклык ӧз висъя (Есф. 2:7, 15). Кызьы егит сузэръёс Есфирьлэсь адӟем карыны быгато? Ойдолэ учкомы, мар гожтэмын 1 Тимофейлы 2:9, 10 (лыдӟе). Апостол Павел кышномуртъёслы вера, соос «гольтрес медаз дӥсяське, асьсэды зӥбыт-востэм мед возёзы» шуыса. Грек кылъёс, кудъёсыз та кылбуръёсын кутӥсько, возьмато, сузэръёслы ӝикыт дӥсяськоно, озьы ик мукетъёсызлэсь шӧдонъёссэс но учконъёссэс гажано шуыса. Ми данъяськиськомы сузэръёсынымы, кудъёсыз та визь-кенешлэсь кылзӥсько.

9. Малы дышетскыны луэ Авигеялэсь?

⁹ Озьы ик егит сузэръёслы валасесь луоно. Валась адями умойзэ уродэзлэсь висъяны быгатэ но ассэ визьмо возе. Тодамы ваёмы Авигеяез. Солэн картэз урод ужпум кутӥз, кудӥныз сэрен быдэс семьязы бырыны быгатэ вал. Но Авигея кышкатэк но ӝегатскытэк югдурез тупатыны тыршиз. Солэн валась луэмез трос адямиосты утиз (1 Экс. 25:14—23, 32—35). Озьы ик та сям юрттоз валаны, ку вераськоно, нош ку шып улоно. Со сяна, валасесь луимы ке, ми адямиослэсь ум юалэ сое, мае милемлы тодыны уг яра яке маин сэрен соос асьсэды умойтэм шӧдысалзы (1 Фес. 4:11).

10, 11. Тӥ умой лыдӟиськыны но гожъяськыны дышетскиды ке, кыӵе пайда со ваёз тӥледлы но мукетъёсызлы? (Озьы ик учке суредэз.)

¹⁰ Со, малы дышетскоз нылаш пичи дыръяз, солы будэм бераз но пайда ваёз. Эскеромы куд-ог примеръёсты.

¹¹ Дышетске умой лыдӟиськыны но гожъяськыны. Куд-ог калыкъёсын малпало, кышномуртлы лыдӟиськыны но гожъяськыны одно ик кулэ ӧвӧл шуыса. Но талы вань христианъёслы дышетсконо (1 Тим. 4:13) d. Соин ик, тӥледлы капчи ӧвӧл ке но, дышетске умой лыдӟиськыны но гожъяськыны. Кызьы со тӥледлы улонын юрттоз? Тӥледлы капчигес луоз уж шедьтыны. Тӥ быгатоды пыр-почгес Инмарлэсь Кылзэ  эскерыны но мукетъёссэ умойгес дышетыны. Нош валтӥсез, Библиез лыдӟыса но со вылын мур малпаськыса, тӥ Иеговаен кусыпъёстэс юнматоды (Иис. Н. 1:8; 1 Тим. 4:15).

12. Малы тонэ дышето кылъёс, кудъёсыз гожтэмын Мадёнъёсын 31:26?

¹² Дышетске адямиосын вераськыны. Вань христианъёслы дышетсконо адямиосын вераськыны. Тани кыӵе визь-кенеш гожтэмын Иаковлэн гожтэтаз: «Котькудӥз адями кылзӥськись мед луоз, кыл вераны дыртӥсьтэм» (Иак. 1:19). Мукетъёссэ сак кылзыса, тӥ соослы яратэмдэс возьматӥськоды (1 Пётр 3:8). Тӥ адямилэсь верамзэ яке солэсь шӧдонъёссэ пумозяз уд ке валаське, юанъёс сётъялэ. Нош куке тӥледлы мар ке но верано луоз, верамдылэсь азьло малпаське (Мад. 15:28). Юалэ асьтэлэсь: «Зэм-а со, мае мынам вераме потэ? Со адямиез юнматоз-а? Возьматозы-а мынам кылъёсы, мон адямиез гажасько шуыса?» Дышетске сузэръёслэсь, кудъёсыз адямиосын вераськыны быгато. (Лыдӟе Мадёнъёсты 31:26.) Саклыктэс висъялэ, кызьы но мае соос верало. Тӥ тыршиды ке эшшо но умой вераськыны, соку мукетъёсыныз кусыпъёсты умойгес луозы.

13. Мар юрттоз тӥледлы юртъер котырысь ужъёсты умой быдэсъяны? (Озьы ик учке суредэз.)

¹³ Дышетске юртъер котырысь ужъёсты быдэсъяны. Трос шаеръёсын юртъер сярысь кышномурт сюлмаське. Тӥ тросэзлы дышетскыны быгатӥськоды анайдылэсь яке кенешысь мукет сузэръёслэсь. Тани мар вера Си́нди: «Мынам анае дышетӥз монэ, котькыӵе уж шумпотон вайыны быгатэ шуыса. Соин ик мон быгатӥсько пӧраськыны, утялскыны, вуриськыны но коньдонэз ӝикыт кутыны. Та мыным юрттэ улонын но, Иеговалы ужан-тыршонын но. Со сяна, семьямы котьку дась вал куноосты пумитаны. Анае сямен, мон но тыршисько куно карись луыны. Талы луыса мон тодматски трос умой агайёсын но сузэръёсын» (Мад. 31:15, 21, 22). Ужась но куно карись кышномурт, кудӥз юртъерез сярысь умой сюлмаське,— семьяез но кенешез понна зэмос кузьым (Мад. 31:13, 17, 27; Ап. уж. 16:15).

14. Малы тӥледыз дышетэ Кристал сузэрлэн учырез но мае улонын нырысетӥ интые пуктоно?

¹⁴ Дышетске асьтэ сярысь сюлмаськыны. Вань христианъёслы талы дышетскыны кулэ (2 Фес. 3:7, 8). Кри́стал сузэр вера: «Бадӟым классъёсын дышетскыкум, анае но атае мыным юрттӥзы бырйыны предметъёсты, кудъёсыз мыным улонын юрттысалзы. Атае мыным ӵектӥз саклыкме висъяны математикалы. Та мыным туж бадӟым пайда вайиз». Но коньдон поттэм сяна, быгатыны кулэ на сое шонер кутыны, со ваньмызлы кулэезлы мед тырмоз шуыса (Мад. 31:16, 18). Иеговалы ужан-тыршонэз  улонады нырысетӥ интые пуктэ. Нош со понна пунэмаськытэк но кулэтэм арбериосты басьтытэк улэ (1 Тим. 6:8).

15, 16. Малы бызьымтэ сузэръёсты кенешын туж дунъяло? (Марк 10:29, 30).

¹⁵ Тӥ Инмарлы ярамон сямъёсты будэтӥды ке но кулэ луись ужъёсты быдэсъяны дышетскиды ке, со юрттоз тӥледлы вуоноезлы дасяськыны. Нош мар возьма тӥледыз азьланяз? Со герӟаськемын соин, кыӵе улон сюресэз тӥ быръёды. Эскеромы куд-огъёссэ.

¹⁶ Тӥ быгатӥськоды кӧня ке дыр ӵоже бызьытэк улыны. Иисуслэн верамезъя, куд-ог сузэръёс бызьытэк уло, соослэн калыказы нылмуртъёсты бызьыны косо ке но (Матф. 19:10—12). Мукетъёсызлэн семья кылдытэмзы потэ, но пӧртэм югдуръёсын сэрен соос бызьытэк уло. Озьы ке но Иегова но Иисус соосты туж дунъяло. Быдэс дунне вылысь кенешъёсын бызьымтэ сузэръёс трос умойзэ лэсьто. Мукетъёсызлы яратонзэс возьматыса но мукетъёсыз сярысь сюлмаськыса, соос соослы сузэр-апайёс но анайёс кадь луизы (лыдӟе Марклэсь 10:29, 30; 1 Тим. 5:2).

17. Мар карыны быгато егит сузэръёс, вань дырзэс сётыса ужаны-тыршыны кутскон понна?

¹⁷ Тӥ быгатӥськоды вань дырдэс сётыса ужаны-тыршыны. Сузэръёс тодытон ужын туж трос лэсьто (Пс. 68:11, ВД [67:12, УБ]). Быгатӥськоды-а тӥ али ик ини малпаны, ку кутскемды луоз вань дырдэс сётыса ужаны-тыршыны? Тӥ быгатӥськоды пионер луыны, пуктӥськон ужъёсы пыриськыны яке Вефильын ужаны-тыршыны. Вӧсяське пуктэм ужпумды сярысь. Вераське соосын, кинъёс та выллем ужпумзэс быдэстыны быгатӥзы ини, но соослэсь визь-кенеш куре. Собере малпалэ, кыӵе вамышъёс тӥ лэсьтыны быгатӥськоды. Вань дырдэс сётыса ужаны-тыршыны кутскиды ке, тӥ со сярысь ноку уд жалялэ. Тӥ азьын Иеговалы ужан-тыршон понна трос луонлыкъёс усьтӥськозы.

18. Малы сузэръёслы, кузпал бырйыкузы, туж мур малпаськыны кулэ? (Озьы ик учке суредэз.)

¹⁸ Оло нош, тӥ бызьыны малпалоды. Сямъёс но быгатонлыкъёс, кудъёсыз сярысь ми вераськимы ини, юрттозы тӥледлы умой кышно луыны. Веранэз ӧвӧл, кузпалэз туж малпаськыса бырйыны кулэ, малы ке шуоно тӥ сое быдэс улонлы бырйиськоды. Тодады возе, со, кинэ тӥ  быръёды, тӥледлы йыр луоз но тӥледлы солэсь кылзӥськоно луоз шуыса (Рим. 7:2; Еф. 5:23, 33). Соин ик малпаське: «Тырше-а со Христослэсь адӟем карыны? Адӟиське-а солэн ужъёсысьтыз, со Иеговаез нырысетӥ интые пуктэ шуыса? Со визьмо ужпумъёс кутэ-а? Вала-а со аслэсьтыз янгышъёссэ? Гажа-а со кышномуртъёсты? Быгатоз-а со мыным юрттыны азьланяз но Иеговаен кусыпъёсме юнматыны? Быгатоз-а со мон сярысь сюлмаськыны но мыным умой эш луыны? Оскымон-а со адями? Кылсярысь, кыӵе ужъёсты со кенешын быдэсъя но пӧрме-а солэн?» (Лука 16:10; 1 Тим. 5:8). Но умой карт шедьтэм сяна, тӥледлы асьтэлы но умой кышно луыны тыршоно.

19. Малы юрттӥськись луыны туж дано?

¹⁹ Библиын вераське, умой кышно картэзлы юрттӥськись луэ шуыса (Ул.-выл. 2:18). Та кышномуртъёсты ултӥя-а? Уг! Юрттӥськись луыны туж дано. Библиын ачиз Иегова но юрттӥсь шуыса нимаське (Пот. 18:4). Кышно картэзлы зэмос юрттӥськись луоз, со солы юрттӥз ке кутэм ужпумъёссэ быдэстыны. Иеговаез яратэменыз, кышно мукетъёсыз азьын картэз сярысь умойзэ гинэ вера (Мад. 31:11, 12; 1 Тим. 3:11). Сыӵе кышно луон понна, тӥ быгатӥськоды али ик ини Иеговаез яратондэс юнматыны, озьы ик семьядылы но агайёслы но сузэръёслы юрттӥськыны.

20. Мар карыны быгатэ анай, семьяез шудо мед луоз шуыса?

²⁰ Оло нош, тӥ анай луоды. Быземды бере тӥляд нылпиосты вордӥськыны быгато (Пс. 126:3). Со, мае ми эскеримы та статьяын, юрттоз тӥледлы умой кышно но анай луыны. Тӥ яратӥсь, лякыт но чидась луиды ке, семьяды шудо луоз, нылпиосты номырлэсь кышкатэк будозы но шӧдозы, соосты ярато шуыса (Мад. 24:3).

21. Вералэ, мар понна тӥ егит сузэръёсты дунъяськоды. (Учке вылбамысь суредэз.)

²¹ Егит сузэръёс, тӥ туж трос лэсьтӥськоды Иеговалы но солэн калыкезлы! (Евр. 6:10). Тӥ тыршиськоды умой сямъёсты будэтыны, дышетскиськоды быдэсъяны ужъёсты, кудъёсыз тӥледыз но котырысьтыды адямиосты шудогес карыны быгато, озьы ик вуоноезлы дасяськиськоды. Ми тӥледыз туж-туж яратӥськомы!