1. Малы вераны луоз, Авраам юнме ӧз оскиськы шуыса?

 ИЕГОВА Авраам эшезлы кылзэ сётӥз, солэн выжыез пыр дунне вылысь вань калыкъёс бакель каремын луозы шуыса (Ул.-выл. 15:5; 22:18). Авраам Инмарлы юн оскиз. Соин ик, номыр шоры учкытэк, со возьмаз, Инмар сётэм кылзэ одно ик быдэстоз шуыса. Озьы ке но, куке Авраамлы 100 арес вал ини, нош Сарралы — 90, соослэн пизы вордӥськемын ӧй вал на (Ул.-выл. 21:1—7). Но Авраам оскиськиз, трос калыкъёслы атай луоз шуыса (Рим. 4:18, ВД). Кызьы тӥ тодӥськоды, Авраам юнме ӧз оскиськы — солэн кема витем Исаак пиез вордӥськиз. Нош малы Авраам оскиськиз, Иегова сётэм кылзэ быдэстоз шуыса?

2. Малы Авраам юн оскиз, Иегова сётэм кылзэ быдэстоз шуыса?

² Авраам Иеговаез умой тодӥз, соин ик со юн оскиз, Инмар сётэм кылзэ быдэстоз шуыса (Рим. 4:21). Осконэз понна Иегова Авраамез аслыз ярамон но шонерлыко адямиен лыдъяз (Иак. 2:23). Кызьы ми адӟимы, Авраам Иеговалы юн оскиз, озьы ик оскиськиз, Инмарлэн кылсётонъёсыз быдэсмозы шуыса (Рим. 4:18, ВД). Ойдолэ эскеромы, мар вераз апостол Павел оскиськон сярысь Римъёслы гожтэтысь 5-тӥ люкетын.

3. Мае тодыны луэ оскиськон сярысь, Павеллэсь кылъёссэ эскерыса?

³ Павел валэктэ, малы оскиськонмы «возьытэ уг вутты» (Рим. 5:5). Озьы ик со возьматэ, оскиськон юнманы быгатэ  шуыса. Нош кызьы со юнма, гожтэмын Римъёслы 5:1—5. Та кылбуръёсты эскерыкуды, малпаське, кызьы христиан сюрес вылтӥ мынэмдыя оскиськонды юнгес но юнгес луиз. Озьы тӥ валалоды, азьланяз со эшшо но юн луыны быгатэ шуыса. Но нырысь ойдолэ эскеромы, кыӵе оскиськон сярысь вераз Павел.

4. Мар сярысь вераське Римъёслы 5:1, 2?

⁴ Лыдӟе Римъёслы 5:1, 2. Павел та кылъёсты вераз Римын улӥсь вын-агайёслы но сузэр-апайёслы. Куке но соос Иегова но Иисус сярысь тодӥзы, соослы оскизы но христианъёс луизы. Осконзы понна Инмар соосты шонерлыко адямиосын лыдъяз но святой духеныз зырӟиз. Соин ик соос юн оско, азьланяз Инмар соосты бакель кароз шуыса.

5. Кыӵе оскиськонзы вань зырӟем христианъёслэн?

⁵ Берлогес Павел Ефес карысь зырӟем христианъёслы гожъяз оскиськон сярысь, кудзэ соослы Инмар сётӥз. Павел вераз, соослы «вӧсяськись калыклэн басьтоно люкетэз» сётэмын луоз шуыса (Еф. 1:18). Нош Колоссы карысь христианъёслы со гожъяз, та люкет соослы инмын дасямын шуыса (Кол. 1:4, 5). Соку кыӵе оскиськонзы вань зырӟем христианъёслэн? Соос инмын пырак улон понна улӟытэмын луозы но отын Христосэн ӵош кивалтозы (1 Фес. 4:13—17; Усьт. 20:6).

6. Мар вераз оскиськонэз сярысь одӥг зырӟем агай?

⁶ Зырӟем христианъёслы оскиськонзы туж дуно потэ. Тани мар со сярысь вераз Фредерик Френц зырӟем агай: «Ми юнме оскиськыса ум улӥське. 144000 пӧлысь котькудмылэн оскиськонмы одно ик быдэсмоз. Со быдэсмоз озьы, кызьы ми ӧм но малпалэ». Та кылъёсты Френц агай вераз 1991-тӥ арын. Со дырозь со трос дасо аръёс ӵоже ини Инмарлы оскымон ужаз-тыршиз. Со ватсаз: «Ми ӧм вунэтэ, макем дуно оскиськонмы. [...] Возьмаммыя со милемлы эшшо но дуно потэ. Миллион  ар возьмано луиз ке но, возьманы кулэ. Азьвыл дырен ӵошатыса, али оскиськонэ мыным эшшо но дуно потэ».

7, 8. Кыӵе оскиськонзы вань ми пӧлысь тросэзлэн? (Римъёслы 8:20, 21).

⁷ Туннэ Иеговалэн тросэзлэн ужась-тыршисьёсызлэн мукет оскиськонзы вань. Авраам кадь ик, соос возьмало, Инмарлэн Эксэйлыкезлэн кивалтэмез улсын пырак дауръёс ӵоже музъем вылын улозы шуыса (Евр. 11:8—10, 13). Павел та оскиськон сярысь но вераз. (Лыдӟе Римъёслы 8:20, 21.) Мар тӥледлы тужгес но кельшиз, куке тӥ нырысьсэ кылӥды, кыӵе улон возьма милемыз азьланяз? Оло нош, тӥледлы кельшиз, тӥ висьытэк, пересьмытэк улоды но ноку уд кулэ шуыса. Оло нош, тӥледлы кельшиз, тӥ кулэм матысь адямиосыныды пумиськоды но соосын ӵош рай музъем вылын улоды шуыса. Инмарлэн паймымон кылсётонэз сярысь тодыса, тӥ валады: номыр шоры учкытэк, сыӵе улонэз возьманы кулэ.

⁸ Кытын гинэ пырак улыны ми медам оске — инмын яке музъем вылын,— ми шумпотыса азьпал улонэз возьмаськомы. Но милям оскиськонмы эшшо но юн луыны быгатэ. Павел валэктӥз, кызьы со юнма. Соин ик ойдолэ эскеромы солэсь кылъёссэ.

9, 10. Кызьы Павеллэн улонэз возьматэ, маин пумиськоз котькуд христиан мурт? (Римъёслы 5:3). (Озьы ик учке суредъёсты.)

⁹ Лыдӟе Римъёслы 5:3. Павеллэн верамезъя, куректон-кайгуосын пумиськыса, оскиськон юнма. Нырысь та малпан валантэм потэ. Озьы ке но котькуд христиан мурт шуг-секытъёсын пумиськылэ. Эскеромы Павеллэсь учырзэ. Фессалоникаысь христианъёслы со шуиз: «Тӥ доры вуылыкумы, азьвыл ик тӥледлы вераллямы, курадӟонъёс адӟылоно луомы шуыса. Кызьы тӥ тодӥськоды, озьы ик луиз но» (1 Фес. 3:4). Нош Коринфысь христианъёслы со гожтӥз: «Ми туж зол, чиданы луонтэм  куректон-кайгу адӟоно луимы. Ум но малпаське ни вал, улэп кылёмы шуыса» (2 Кор. 1:8; 11:23—27).

¹⁰ Туннэ но христианъёс пӧртэм шуг-секытъёсын пумиськыло (2 Тим. 3:12). Нош маин тӥ пумиськиды, куке Христослэн дышетскисез луиды? Оло нош, эшъёсты но ӵыжы-выжыосты тӥледыз серем карыны яке асьсэды лек возьыны кутскизы. Оло нош, пӧяськытэк улэменыды сэрен, ужан интыяды шуг-секытъёс кылдӥзы (Евр. 13:18). Оло нош, оскиськонды сярысь мукетъёсызлы вераменыды сэрен, кивалтӥсьёс тӥледлы пумитъяськыны кутскизы. Павеллэн верамезъя, маин гинэ ми медам пумиське, шумпотыны кулэ. Малы?

11. Малы, шуг-секытъёсын пумиськыку, кимес лэзёно ӧвӧл?

¹¹ Ми быгатӥськомы шумпотыны, малы ке шуоно шуг-секытъёс туж умой сям будэтыны юртто. Римъёслы 5:3 гожтэмын: «Куректон-кайгу бордысь чидан потэ». Котькуд христиан мурт шуг-секытъёсын пумиськоз, соин ик котькудмылы чидан кулэ. Сотэк ми ум быгатэ шуг-секытъёс пыр потыны но адӟыны, кызьы Инмар кылсётонъёссэ быдэстоз. Милям уг поты луэммы адямиос кадесь, кудъёсыз сярысь вераз Иисус. Аслаз мадёназ со вераз кидысъёс сярысь, кудъёсыз изо музъем вылэ усизы. Сыӵе адямиос ӟеч иворез нырысь шумпотыса кылзо, нош, «куректон вуэ ке яке кыл понна улляны кутско ке», осконзэс соку ик ышто (Матф. 13:5, 6, 20, 21). Пумитъяськонъёс но уйылон-уллянъёс шумпотон уг ваё. Но, куке ми соосты чидаськомы но Инмарлы ужамысь-тыршемысь ум дугдӥське, соос милемлы пайда ваё. Кыӵе?

12. Кыӵе пайда вае шуг-секытъёсты чидан?

¹² Иаков вераз, кыӵе пайда вае шуг-секытъёсты чидан. Со гожтӥз: «Тӥ быдэсак дун-шектэмесь, номырлы но ёрмисьтэмесь мед луоды шуыса, тӥляд чиданды быдэс улонды ӵоже юн мед луоз» (Иак. 1:2—4). Иаковлэн кылъёсысьтыз адӟиське, чидан умой сямъёсмес юнматэ шуыса. Кылсярысь, со Инмарлы осконмес юнгес каре. Но чидан мукет но пайда вае на.

13, 14. Кызьы чидан оскиськонмес юнматэ? (Римъёслы 5:4).

¹³ Павел гожтӥз: «Чидан юрттэ Инмарлы ярамон луыны, Инмарлы ярамон луон оскиськон сётэ» (Рим. 5:4, ВД). Возьматэ-а та, Иеговалы кельше шуыса, куке тӥ шуг-секытъёсын пумиськылӥськоды? Уг. Но со шумпотэ, шуг-секытъёс дыръя тӥ солы оскымонэсь кылиськоды шуыса. Талы луыса тӥ Инмарлы ярамонэсь луиськоды. Ми туж шумпотӥськомы, шуг-секытъёсты чидаммес адӟыса, Иегова милемын данъяське шуыса! (Пс. 5:13).

¹⁴ Тодады вае Авраамлэсь учырзэ. Бадӟым шуг-секытъёсын пумиськыса но, со ваньзэ чидаз. Соин ик Иегова сое аслаз эшеныз но шонерлыко адямиен лыдъяз (Ул.-выл. 15:6; Рим. 4:13, 22). Тӥ но быгатӥськоды Инмарлы ярамонэсь луыны. Инмар уг учкы, кыӵе ужъёс ми быдэсъяськомы яке кытын ужаськомы-тыршиськомы. Со шумпотэ, шуг-секытъёс дыръя ми солы оскымонэсь луыны тыршиськомы ке. Кыӵе гинэ арлыдмы, югдурмы яке быгатонлыкъёсмы медам луэ, котькудмы чидасесь луыны быгатӥськомы. Тӥ али кыӵе ке шуг-секытэн пумиськиды ке, эн вунэтэ: оскымон луэмдэс адӟыса, Иегова шумпотэ. Ми Иеговалы ярамонэсь бере, со милемыз  одно ик бакель кароз. Нош та оскиськонмес эшшо но юнматэ.

15. Мар вера Павел Римъёслы 5:4, 5 но кыӵе юан кылдэ таин сэрен?

¹⁵ Павел валэктӥз, шуг-секытъёс дыръя Иеговалы оскымон кыльыса, ми солы ярамонэсь луиськомы шуыса. Учке, мар Павел вера собере: «Инмарлы ярамон луон оскиськон сётэ, нош оскиськон возьытэ уг вутты» (Рим. 5:4, 5, ВД). Азьлогес Павел вераз вал ини, Римысь христианъёслэн оскиськонзы вань шуыса. Соос «Инмарлэн данлыказ» пырыны оскисько (Рим. 5:2). Соку малы Павел нош ик вера оскиськон сярысь?

16. Вералэ, кызьы юнма оскиськон. (Озьы ик учке суредъёсты.)

¹⁶ Кызьы ми тодӥмы, дыр ортчемъя оскиськон юнгес луыны быгатэ. Та малпанэз лыдэ басьтыса, Павеллэсь кылъёссэ валаны капчигес. Тодады вае, кызьы тӥ нырысьсэ кылӥды, музъем райлы пӧрмоз но тӥ пырак улоды шуыса. Та тӥледлы кельшиз ке но, оскыны секыт вал, дыр. Нош куке тӥ Иегова сярысь но солэн кылсётонъёсыз сярысь тодӥды, оскиськонды юнмаз.

17. Мар юрттӥз тӥледлы пылатӥськемды бере оскиськондэс юнматыны?

¹⁷ Инмарлы сӥзиськемды но пылатӥськемды бере тӥ Иегова сярысь эшшо но тросгес тодӥды но сое эшшо но золгес яратӥды. Талы луыса оскиськонды эшшо но юн луиз (Евр. 5:13—6:1). Тӥ ас вылады шӧдӥды, луоз, мар вераз Павел Римъёслы гожтэтысь 5-тӥ люкетлэн кутсконаз. Тӥляд пӧртэм шуг-секытъёсты вал. Но соосты чидаса, тӥ валады, Инмарлы ярамонэсь луиськоды шуыса. Тӥ тодӥськоды, Инмар тӥледыз яратэ шуыса. Соин ик оскиськоды, со вань кылсётонъёссэ быдэстоз шуыса. Ӵошатоно ке со дырен, куке тӥ Библиез дышетыны кутскиды, али оскиськонды тӥледлы эшшо но дуно потэ. Со быдэс улонды вылын шӧдӥське. Кылсярысь, со  вылын, кызьы тӥ асьтэды ӵыжы-выжыосыныды возиськоды, кыӵе ужпумъёс кутӥськоды но малы дырдэс висъяськоды.

18. Мар карыны кылзэ сётэ Иегова?

¹⁸ Кызьы ми тодӥмы, Инмарлы ярамон луон юрттэ оскиськонмес юнматыны. Собере Павел вера, оскиськыса улэммы юнме ӧвӧл шуыса. Со гожтэ: «Оскиськон возьытэ уг вутты, малы ке шуоно Инмар Аслэсьтыз яратонзэ асьмелы сётэм святой дух пыр сюлэмъёсамы кисьтӥз» (Рим. 5:5). Иегова кылзэ сётэ, тӥледыз возьытэ уз вутты шуыса. Тӥ адӟоды ваньзэ, малы оскиськыса улӥськоды.

19. Кыӵе бакель каронъёс ми басьтомы, оскиськыса улӥмы ке?

¹⁹ Малпаське Авраам сярысь. Инмар сое аслыз ярамон адямиен но аслаз эшеныз лыдъяз. Авраам возьмаз, ку Инмар солы сётэм кылзэ быдэстоз. Со юнме ӧз возьма. Библиын гожтэмын: «Кема чидаса улэмез понна Авраам Инмарлэсь сӥзиськонзэ басьтӥз» (Евр. 6:15; 11:9, 18; Рим. 4:20—22). Инмар солы сётэм кылзэ быдэстӥз. Тӥ но Иеговалы оскымонэсь кылиды ке, со тӥледыз бакель кароз. Тӥ трос шумпотон басьтоды! (Рим. 12:12). Павел гожтӥз: «Оскиськонлэн Инмарез тӥледыз котькыӵе но шумпотонэн, осконды пыр каньыллыкен тыр мед кароз, Святой Духлэн кужыменыз тӥлесьтыд оскиськондэс мед узырмытоз» (Рим. 15:13).