1. Кыӵе юан кылдыны быгатэ, Авраамлэн осконэз сярысь малпаськыкумы?

 ТРОСЭЗ адямиос Авраам сярысь кылӥзы ке но, соос сое умой уг тодо. Нош тӥ со сярысь трос тодӥськоды ини. Кылсярысь, тӥ тодӥськоды, Авраам «ваньмызлы Инмарлы оскисьёслы атай луиз» шуыса (Рим. 4:11). Со дыре ик тӥляд юанды кылдэ, вылды: «Мынам но Авраамлэн кадь ик юн осконэ луыны быгатэ-а?» Бен, быгатэ.

2. Малы кулэ Авраам сярысь тросгес тодыны но солэсь адӟем карыны? (Иаков 2:22, 23).

² Авраам сярысь тросгес тодыса но солэсь адӟем карыса, милям но солэн кадь ик юн осконмы луоз. Инмарлэсь кылзӥськыса, Авраам кыдёкысь шаере улыны кошкиз, дасо аръёс ӵоже балаганъёсын улӥз но яратоно Исаак пизэ курбонлы сётыны дась вал. Таӵе ужъёсыныз Авраам юн осконзэ возьматӥз. Авраамлэн осконэз но ужъёсыз Инмарез шумпоттӥзы. Со сяна, Авраам Иеговалэн эшез луиз. (Лыдӟе Иаковлэсь 2:22, 23.) Иеговалэн милемын но эшъяськемез потэ. Соин ик со Павеллэсь но Иаковлэсь мылкыдзэс ӝутӥз Авраам сярысь гожтыны. Ойдолэ учкомы, мар вераське Римъёслы гожтэтысь 4-тӥ люкетын но Иаковлэн гожтэтысьтыз 2-тӥ люкетын. Отысь ми Авраам сярысь туж кулэзэ тодомы.

3. Кытын гожтэмын кылъёс, кудъёссэ веразы Павел но, Иаков но?

³ Павел но, Иаков но веразы кылъёсты, кудъёсыз гожтэмын  Улон-вылонын 15:6. Отын вераське: «Аврам Кузё-Инмарлэн верам кылызлы оскиз, солэсь осконзэ Кузё-Инмар шонерлык шуыса гожтӥз». Кызьы валано «шонерлык» кылэз? Шонерлыко адями Иеговалы ярамон луэ. Со сяна, Инмар сое шектэм адямиен лыдъя. Малпалэ гинэ: тырбыдэстэм, сьӧлыко адямиос Инмарлэн син азяз шектэмесь луыны быгато! Тӥляд потэ, дыр, Иегова тӥ шоры но озьы ик мед учкоз шуыса. Ойдолэ тодомы, малы Иегова Авраамез шонерлыко адямиен лыдъяз но мар кароно милемлы, шонерлыкоесь луон понна.

4. Малы адямиослы секыт шонерлыкоесь луыны?

⁴ Римъёслы гожтэтаз Павел вераз, вань адямиос сьӧлыкоесь шуыса (Рим. 3:23). Соку кызьы Инмар быгатэ милемыз аслыз ярамон, шонерлыкоесь но шектэмесь адямиосын лыдъяны? Иеговалэн ужась-тыршисьёсыз та юанлы валэктон шедьтыны мед быгатозы шуыса, Павел Авраам сярысь вераз.

5. Малы Иегова Авраамез шонерлыко адямиен лыдъяз? (Римъёслы 4:2—4).

⁵ Иегова Авраамез шонерлыко адямиен нимаз, куке Авраам Ханаанын улӥз. Иегова сое сыӵе адямиен лыдъяз, Моисейлэсь законзэ туж умой быдэсъямез понна-а? Ӧз, со понна ӧз (Рим. 4:13). Малы ке шуоно Закон, 400 ар ортчыса гинэ, сётэмын вал. Иегова Авраамез шонерлыко адямиен лыдъяз солэн осконэз понна. (Лыдӟе Римъёслы 4:2—4.)

6. Малы луыса Иегова сьӧлыко адямиез шонерлыкоен лыдъя?

⁶ Павеллэн верамезъя, куке адями Инмарлы оске, «со муртлы осконэз шонерлык шуыса гожтӥське» (Рим. 4:5). Собере апостол гожтӥз: «Давид но шудо шуыса нима сыӵе адямиез, кудзэ Инмар, ужез шоры учкытэк, шонер улӥсь шуыса лыдъя: „Шудоесь, кинъёслэн законлы пумит улэмъёссы куштэмын, кинъёслэн сьӧлыкъёссы ӵушемын. Шудо со мурт, кинлы Кузё-Инмар сьӧлык уг гожты“» (Рим. 4:6—8; Пс. 31:1, 2). Куке адями Инмарлы оске, Инмар сое быдэсак простить каре но солэсь сьӧлыкъёссэ тодаз уг ни вайы. Инмар сыӵе адямиез шонерлыкоен лыдъя солэн осконэзлы луыса.

7. Малы вераны луоз, вашкала дыръя улӥсь Инмарлэн оскымон ужась-тыршисьёсыз шонерлыкоесь вал шуыса?

⁷ Авраамез, Давидэз но мукет оскымон ужась-тыршисьёссэ Инмар шонерлыко адямиосын лыдъяз ке но, соос азьло сямен ик тырбыдэстэмесь но сьӧлыкоесь вал. Но Инмар аслэсьтыз ужась-тыршисьёссэ шектэм адямиосын лыдъяз, малы ке шуоно соослэн осконзы вал (Еф. 2:12). Павеллэн кылъёсыз умой возьмато: Инмарлэн эшез луон понна, оскон кулэ. Авраам но Давид быгатӥзы Инмарен эшъяськыны, малы ке шуоно соослэн осконзы вал. Милям но осконмы луиз ке, ми но быгатомы Инмарлэн эшъёсыз луыны.

8, 9. Кыӵе шонертэм малпанэ вуизы куд-огъёсыз но малы?

⁸ Трос дауръёс ӵоже религиозной кивалтӥсьёс споръясько, мар кулэгес шуыса — оскон яке ужъёс? Куд-огъёсыз дышето, утиськон понна, Иисуслы гинэ оскыны кулэ шуыса. Соос верало: «Иисуслы оскид ке, утиськод». Соос шонерезлы дышето шуыса возьматон понна, куддыръя соос  Павеллэсь кылъёссэ верало: «Инмар, ужез шоры учкытэк, [адямиез] шонер улӥсь шуыса лыдъя» (Рим. 4:6). Нош мукетъёсыз верало, святой интыосы ветлытэк но сям-йылолъёсты быдэсъятэк, утиськыны уг луы шуыса. Соослэн дышетэмзы зэм луэ шуыса возьматон понна, соос Иаковлэсь кылъёссэ верало: «Адями ужъёсыныз шонере потэ, осконэн гинэ уг» (Иак. 2:24).

⁹ Таин сэрен Библиез куд-ог эскерисьёс шонертэм малпанэ вуизы, Павел но Иаков пӧртэм сямен малпасько шуыса, мар кулэ Инмарлы ярамон луон понна. Куд-ог религиозной кивалтӥсьёслэн верамзыя, Павел малпаз, адями осконэз понна шонерлыко луэ шуыса, нош Иаков дышетӥз, ужъёстэк Инмарлы ярамон луыны уг луы шуыса. Одӥг профессор та сярысь тазьы шуиз: «Иаков уг вала вал, малы Павел дышетӥз, шонерлыко луон понна, адямилы ужъёс кулэ ӧвӧл, нош оскон гинэ кулэ шуыса». Озьы ке но Павел но, Иаков но асьсэлэсь гожтэтъёссэс святой духлэн валтэмез улсын гожъязы — соосты гожтыны Иегова мылкыдзэс ӝутӥз (2 Тим. 3:16). Озьыен, соослэн малпанъёссы ог-огзылы пумит мыныны кулэ ӧвӧл. Тае валан понна, эскероно, мар гожтэмын соослэн верамъёссылэсь азьлогес но берлогес.

10. Кыӵе ужъёс сярысь вераз Павел? (Римъёслы 3:21, 28). (Озьы ик учке суредэз.)

¹⁰ Кыӵе ужъёс сярысь вераз Павел Римъёслы гожтэтысьтыз 3-тӥ но 4-тӥ люкетъёсын? Со вераз ужъёс сярысь, кудъёссэ лэсьтыны кулэ вал Моисейлэн законэзъя. (Лыдӟе Римъёслы 3:21, 28.) Павел улон нуналъёсы еврей луись куд-ог христианъёс малпазы, вылды, соослы азьло сямен ик Моисейлэн законэзъя улоно шуыса. Соин ик Павел, Авраам сярысь вераса, возьматӥз,  шонерлыко луон понна, Законъя улоно ӧвӧл ини шуыса. Та малпан милемыз туж буйгатэ, малы ке шуоно со возьматэ, Инмарлы но Христослы оскыса, ми Иеговалы ярамонэсь луомы шуыса.

11. Кыӵе ужъёс сярысь вераз Иаков?

¹¹ Нош Иаков аслаз гожтэтысьтыз 2-тӥ люкетын Моисейлэн законэзъя лэсьтоно ужъёс сярысь уг вера. Со вера ӟеч ужъёс сярысь, кудъёссэ христиан мурт котькуд нунал лэсьтэ. Соосъя валаны луэ, адями Инмарлы вань сюлмысьтыз оске-а, уг-а. Эскеромы кык учыръёсты, кудъёсыз сярысь вераз Иаков.

12. Кыӵе учыръёс вылын Иаков валэктӥз, кызьы герӟаськемын оскон но ужъёс? (Озьы ик учке суредэз.)

¹² Нырысетӥ учырын Иаков вера, христианъёс вань адямиос шоры одӥг кадь учкыны кулэ шуыса. Тае валэктон понна понна, Иаков вера адями сярысь, кудӥз узыр муртлы ярамон луыны тырше, нош куанер муртэ ултӥя. Сыӵе адями вера ке но, солэн осконэз вань шуыса, солэн ужъёсыз сое уг возьмато (Иак. 2:1—5, 9). Кыкетӥ учырын Иаков вера адями сярысь, кудӥз адӟе, огъя оскисьёсызлэн дӥськутсы но сиёнзы ӧвӧл шуыса. Озьы ке но со соослы уг юртты. Сыӵе адями вера ке но, солэн осконэз вань шуыса, ужъёсыныз со сое уг возьматы. Кызьы гожтӥз Иаков, «ӟеч ужъёсыз ӧвӧл ке... [оскон] кулэмын» (Иак. 2:14—17).

13. Кин сярысь вера Иаков, возьматон понна, макем кулэ оскон но, ужъёс но? (Иаков 2:25, 26).

¹³ Осконэз ужъёсын возьматоно шуыса валэктон понна, Иаков вера Раав сярысь. (Лыдӟе Иаковлэсь 2:25, 26.) Та кышномурт Иегова сярысь кылӥз но валаз, со израиль калыклы юрттэ шуыса (Иис. Н. 2:9—11). Раав осконзэ уж вылын возьматӥз: со израиль калыкысь кык  чакласькись-утчаськисьёсты утиз, куке соосты виыны малпало вал. Талы луыса та сьӧлыко, еврей луисьтэм кышномурт, Авраам сямен, шонерлыко адямиен лыдъяськыны кутскиз. Раавлэн учырез возьматэ, осконэз ужъёсын возьматоно шуыса.

14. Малы вераны луэ, Павеллэн но Иаковлэн кылъёссы, ог-огзылы пумит уг луо шуыса?

¹⁴ Кызьы ми адӟимы, Павел но Иаков оскон но ужъёс сярысь, пӧртэм паласен учкыса, веразы. Павел еврей луись христианъёслы вераз, Моисейлэсь законзэ быдэсъяса гинэ, соос Инмарез шумпоттыны уз быгатэ шуыса. Нош Иаков вераз, вань христианъёслы осконзэс возьматоно шуыса, мукетъёсызлы ӟеч ужъёс лэсьтыса.

15. Кызьы осконмес уж вылын возьматыны луэ? (Озьы ик учке суредъёсты.)

¹⁵ Авраам, кудзэ Иегова шонерлыкоен лыдъяз, вордӥськем шаерзэ кельтӥз, балаганъёсын улӥз но яратоно пизэ курбонлы вайыны дась вал. Но та уг возьматы, Инмар милесьтым но тае ик возьма шуыса. Вань трос мукет амалъёс, кызьы осконмес уж вылын возьматыны улэ. Кылсярысь, ми кенеше лыктэм выль адямиосты шумпотыса пумитаськомы, вын-агайёсмылы но сузэр-апайёсмылы юрттӥськиськомы но семьямы сярысь сюлмаськиськомы (Рим. 15:7; 1 Иоанн 3:18; 1 Тим. 5:4, 8). Эшшо одӥг туж кулэ уж, кудӥз возьматоз милям осконмы вань шуыса,— со тодытон уже ӟырдыт мылкыдын пыриськон (1 Тим. 4:16). Ми оскиськомы, Иегова кылсётонъёссэ одно ик быдэстоз но со котьку самой умой кивалтэт сётэ шуыса. Ваньмы ми талы оскеммес ужъёсынымы возьматыны быгатӥськомы. Соку Инмар милемыз шонерлыко адямиосын но аслаз эшъёсыныз лыдъялоз.

16. Кыӵе оскиськонэз вал Авраамлэн но малы со оскиз?

¹⁶ Римъёслы гожтэтысь 4-тӥ люкетэз лыдӟыса, валаны луэ, малы эшшо Авраамлэсь дышетскыны быгатӥськомы на. Та люкетысь ми тодомы, макем кулэ оскиськон. Иегова кылзэ сётӥз, Авраам пыр «вань калык выжыос бакель каремын луозы» шуыса. Малпалэ гинэ, макем Авраам возьмаз та кылъёслэсь быдэсмемзэс! (Ул.-выл. 12:3; 15:5; 17:4; Рим. 4:17). Но куке Авраамлы 100 арес вал, нош Сарралы — 90, соослэн пизы вордӥськемын ӧй вал на. Адями синмын учкыса, осконтэм кадь вал, соослэн пиналзы вордӥськоз на шуыса. Та учыр Авраамлэсь осконзэ эскериз. Но со оскиськиз, трос калыкъёслы атай луоз шуыса. Со Авраамлэсь осконзэ юнматӥз (Рим. 4:18, 19, ВД). Кызьы ми тодӥськомы, солэн кема витем Исаак пиез вордӥськиз (Рим. 4:20—22).

17. Кытысь ми тодӥськомы, Инмар милемыз шонерлыко адямиосын но аслаз эшъёсыныз лыдъяны быгатэ шуыса?

¹⁷ Авраамлэн учырез возьматэ: ми быгатӥськомы Инмарлы ярамон луыны но соин эшъяськыны. Та сярысь гожъяз Павел: «Нош Гожтэмысь та кылъёс: „Шонерлык шуыса гожтӥз”, солы [Авраамлы] огназлы гинэ верамын ӧй вал, асьмелы но верамын вал. Асьмелэн осконмы шонерлык шуыса гожтӥськоз,— асьмелы, Солы оскисьёслы, Кин Кузё-Инмармес Иисус Христосэз кулэмысь улӟытыса султытӥз» (Рим. 4:23, 24). Авраамлы кадь ик, милемлы но Иеговалы осконо, ӟеч ужъёс лэсьтоно но, номыр шоры учкытэк, возьмано Иеговалэн кылсётонъёсызлэсь быдэсмемзэс. Оскиськон сярысь Павел вера Римъёслы гожтэтысьтыз 5-тӥ люкетын но. Та сярысь ми вуоно статьяын вераськомы.