ИЕГОВА милемлы трос кузьымъёс кузьмаз. Ми солы тау кариськомы, асьмеос бырйыны быгатӥськомы шуыса, кызьы соосты кутоно. Иеговалэн одӥгез кузьымез — вина. Библиын со сярысь гожтэмын: «Вина улонэз шулдыртэ» (Екк. 10:19; Пс. 103:15). Но тон пумитад, вылды, сыӵе адямиосты, кудъёсыз трос вина юо. Со сяна, пӧртэм шаеръёсысь но пӧртэм калыкъёсысь адямиос вина юон шоры пӧртэм сямен учко. Нош мар юрттоз христиан муртлы валаны, кӧня солы вина юоно?

Ужпум кутыкумы, ми Инмарлэсь кивалтэтсэ утчаськомы. Ми ум учкиське, мар со сярысь малпало котырысь адямиос. Соку ми шудо луомы.

Тӥ адӟиськоды, вылды, та дуннеысь тросэз адямиос трос но ӵем юо шуыса. Кин ке но озьы шутэтске, кин ке но сюлмаськонъёссэ вунэтыны турттэ. Нош куд-ог шаеръёсын трос юо, мукетъёсызлэн син азязы кужмо адӟиськон понна.

Нош христианъёс кылзӥсько визь-кенешъёслэсь, кудъёссэ сётэ яратӥсь Кылдытӥсь. Кылсярысь, со вера, кытчы вуттэ трос вина юон. Со сярысь умой гожтэмын Мадёнъёсын 23:29—35 a. Европаысь Дэ́ниел нимо тӧро вера, кызьы со улӥз Иеговаез тодэмезлэсь азьло: «Азьвыл мон трос вина юыса улӥ. Соин ик трос янгышъёс лэсьтӥ. Куд-огъёссэ тодам вайисько ке, сюлмы али ке но вӧсь луэ на».

Мар юрттоз христианъёслы валаны, кӧня соослы вина юыны яра? Со понна Инмарлэн Кылысьтыз визь-кенеш утчано.

Ойдолэ эскеромы, мар Библиын вераське вина сярысь но малы куд-огъёсыз сое юо.

Библия лэзе кӧня ке вина юыны. Отын вераське, вина шумпотон вайыны быгатэ шуыса. Библиын гожтэмын: «Шулдыръяськыса няньдэ си, сюлмыныд шумпотыса винадэ ю» (Екк. 9:7). Иисус но Иеговалэн мукет оскымон ужась-тыршисьёсыз куддыръя вина юизы (Матф. 26:27—29; Лука 7:34; 1 Тим. 5:23).

Инмарлэн Кылыз вина юыны лэзе ке но, со уг лэзьы трос юыны. Отын гожтэмын: «Винаез кудӟытозяды эн юэ» (Еф. 5:18). Со сяна, отын вераське: «Юисьёс... Инмар Эксэйлыке уз пыре» (1 Кор. 6:10). Озьыен, Иеговалы туж уг кельшы, куке адямиос трос вина юо, уката но, куке соос ялан кудӟытозязы юыса уло. Соин ик, вина юон сярысь верано ке, котырысьтымы адямиос сямен асьмеды возёно ӧвӧл. Кутоно сыӵе ужпум, кудӥз Иеговаез шумпоттоз.

Куд-ог адямиос трос юо, но уг кудӟо. Но та кышкыт, малы ке шуоно, Библия верамъя, трос юыса, адями бадӟым янгыш лэсьтыны но Иеговалы пумит сьӧлыканы быгатэ (Мад. 20:1; Тит. 2:3). Иисус азьло ик вераз, «мултэс... вина юыса», ми Инмарлэн выль дуннеяз пырыны ум быгатэ шуыса (Лука 21:34—36). Кызьы ми адӟимы, вина шуг-секытъёс вайыны быгатэ. Мар юрттоз христианъёслы соослэсь палэнскыны?

Пӧртэм калыкъёсын вина юон шоры пӧртэм сямен учко. Но куке христианъёс быръё, мае сиыны но юыны, соос Иеговаез шумпоттыны тыршо. Библия тодамы вайытэ: «Сииськоды-а, юиськоды-а яке мукет маке лэсьтӥськоды-а — ваньзэ Инмарез вылӥ-дано карон понна лэсьтэ» (1 Кор. 10:31). Тани куд-ог юанъёс но Библиысь возетъёс, кудъёсыз вылын малпаськыны кулэ.

Вина юыса, мынам мукетъёсыз кадь луэме потэ-а? Библия вера, тросэз сьӧры мыноно ӧвӧл шуыса (Пот. 23:2). Вашкала дыръя Иеговалэн потэ вал, израиль калык мукет калыкъёслэсь адӟем медаз кары шуыса. Тае ик Иегова милесьтым но возьма. Ми вина юон шоры котырысьтымы адямиос сямен учкимы ке, соку Иеговалэн курон-косонъёсызъя улэмысь дугдомы но соин кусыпъёсмес ыштомы, вылды (Рим. 12:2).

Вина юыса, мынам мукетъёсызлэн син азязы кужмо луэме потэ-а? Куд-ог калыкъёсын малпало, трос но ӵем вина юыны урод ӧвӧл шуыса (1 Пётр 4:3). Но учке, мар вераське 1 Коринфъёслы 16:13: «Сэзь улэ, осконын юн сылэ, кышкасьтэмесь, кужмоесь луэ». Нош вина адямиез кужмо карыны быгатэ-а? Уг. Вина юыса, адямилы секыт ини шонер малпаськыны но умой ужъёс лэсьтыны. Озьыен, трос юисьёс, мукетъёсызлэн син азязы кужмо адӟиськем интые, серемес адӟисько. Исаиялэн 28:7 сыӵе адямиос сярысь вераське, соос сюрес вылэ пограло, канжаськыло но визьзэс ышто шуыса.

Зэмос кужым Иегова сётэ (Пс. 17:33). Кужмо адями юн осконэн улэ. Сыӵе адями луон понна, палэнсконо ваньмызлэсь, мар Иеговаен кусыпъёсмес лябӟытыны быгатэ. Иисус кужмо адями вал, малы ке шуоно, номыр шоры учкытэк, Иеговалэсь кылзӥськиз но ассэ шонер возиз.

Вина юыса, мынам сюлмаськонъёсме вунэтэме потэ-а? Святой духлэн валтэмез улсын псаломъёсты гожъясь вераз: «Кӧтӝожъёс сюлэмам аляку, Тынад буйгатэмед  лулме каньыл каре» (Пс. 93:19). Тон али кыӵе ке шуг-секытъёсын пумиськид ке, вина юэм интые, Иеговалэсь юрттэтсэ утча. Со понна тон быгатӥськод Инмарлы ӵемгес вӧсяськыны, озьы ик кенешысь эшедлы сюлэмдэ усьтыны, со тыныд умой визь-кенеш сётоз, вылды. Нош шуг-секытъёсын пумиськыса, адями вина юэ ке, солэн шонер улыны мылкыдыз пуксьыны быгатэ (Ос. 4:11). Дэниел агай, кудӥз сярысь вераськиз ини, шуэ: «Мон ялан сюлмаськыса но асме янгыше уськытыса улӥ. Асме буйгатон понна, мон вина юыны кутски. Но шуг-секытъёс эшшо но трос луизы, мон эшъёсме ыштӥ но асме гажамысь дугдӥ». Мар кариз Дэниел? «Мон валай: шуг-секытъёсме сэрттон-пертчон понна, вина юэм интые, мыным Иеговаен кусыпъёсме тупатоно. Пичиен-пичиен, Инмарлэн юрттэменыз, мынам ваньмыз пӧрмиз». Ми малпаськомы ке но, милемлы номыр уз юртты ни шуыса, Иегова котьку дась милемлы юрттыны (1 Пётр 5:7; Флп. 4:6, 7).

Тон вина юиськод ке, астэ эскерыны кулэ, ӵем-а но трос-а тон юиськод. Тыныд юрттозы таӵе юанъёс. Сюлмаськытэ-а семьяме яке матысь эшъёсме со, кӧня но макем ӵем мон юисько? Та возьматыны быгатэ, ачид но валатэк, тон кышкыт сюрес вылэ султӥд шуыса. Мон али, азьвыл сярысь, тросгес юисько-а? Та возьматыны быгатэ, тынад урод сямыд будэ шуыса. Секыт-а мыным кӧня ке нунал яке кемагес вина юытэк улыны? Та возьматыны быгатэ, тынад мур пыӵам сямыд вань ини шуыса. Оло нош, та учырын тыныд эмъясьёслэн юрттэтсы кулэ луоз.

Вина юон трос шуг-секытъёс вайыны быгатэ бере, куд-огъёсыз ужпум кутӥзы воксё юытэк улыны. Нош мукетъёсыз уг юо, малы ке шуоно соослы шӧмыз уг кельшы. Мар кароно, тынад эшъёсыд та выллем ужпум кутӥзы ке? Соослэсь быръёнзэс гажа но соосты эн пыкылы.

Оло нош, тынад ужпум кутэмед потоз, кӧня но макем ӵем тон юод. Кин ке но малпаз  арняяз огпол яке сиськыкуз ӧжытак юыны. Мукетъёсыз бырйизы, мае соос юозы, нош мае — уз. Кылсярысь, соос вина яке сур ӧжыт юо, нош кужмо аракы уг юо. Адями ужпум кутӥз ке, мае со юоз, нош мае уз юы, соку солы чакласькыны капчигес луоз. Юн осконэн христиан муртлы сюлмаськоно ӧвӧл, мар солэн быръёнэз сярысь мукетъёсыз малпалозы.

Мае эшшо лыдэ басьтоно на? Мукетъёсызлэсь шӧдонъёссэс. Римъёслы 14:21 гожтэмын: «Тынад братэд медаз канжаськы яке визь сынаськонэ медаз сюры, яке медаз катьтэммы шуиськод ке, соку, эсьмаса, сӥль сиытэк, вина юытэк, номыр сыӵе-таӵезэ лэсьтытэк улод». Кызьы тон та визь-кенешез уже кутыны быгатӥськод? Вын-агайёстэ яраты. Тон тодӥськод ке, кин ке но кыӵе ке мугъёсын сэрен вина юон шоры уродэн учке шуыса, тон со азьын уд юы, дыр. Озьы тон солы яратондэ возьматод (1 Кор. 10:24).

Со сяна, христианъёс шаерзылэн катъёсызлэсь кылзӥсько. Кылсярысь, катъёсын гожтэмын луэ, кыӵе арескысен вина юыны яра. Озьы ик отын гожтэмын луэ, вина юэм бере руль сьӧры пуксьыны яке куд-ог ужъёсты быдэсъяны уг яра шуыса (Рим. 13:1—5).

Иегова милемлы луонлык сётӥз бырйыны, кызьы солэсь кузьымъёссэ кутоно. Кылсярысь, ми быгатӥськомы бырйыны, мае сиыны но мае юыны. Ойдолэ тыршомы, быръёнмы инмысь Атаймес шум мед поттоз шуыса.