1. Малы тросэз малпало, пырак улыны уг луы шуыса?

 ТРОСЭЗ адямиос тыршо пайдаё сиён сиыны но мугорзэс кыдатыны, малы ке шуоно соослэн висьытэк но кема улэмзы потэ. Со дыре ик адямиос уг малпало, соос пырак улозы шуыса. Соос малпамъя, пырак улыны уг луы, озьы ик соослэн висьыса, пересьмыса пырак улэмзы уг поты. Но Иисус вераз шумпотыса пырак улон сярысь. Кылсярысь, солэсь кылъёссэ шедьтыны луэ Иоаннлэсь 3:16 но 5:24.

 2. Мар вераське Иоаннлэсь 6-тӥ люкетын пырак улон сярысь? (Иоанн 6:39, 40).

² Огпол Иисус паймымон амалэн кӧня ке сюрс адямиосты нянен но чорыген сюдӥз a. Со туж паймымон вал. Но Иисуслэн мукет нуналаз верам кылъёсыз адямиосты эшшо но паймытӥзы. Адямиос лыктӥзы Иисус доры Капернауме, кудӥз Галилей зарезьлэн ярдураз интыяськемын вал. Иисус соослы вераз, кулэмъёс улӟытэмын  луозы но соос пырак улозы шуыса. (Лыдӟе Иоаннлэсь 6:39, 40.) Малпаське ӵыжы-выжыосты но эшъёсты сярысь, кудъёсыз кулӥзы ини. Иисуслэн кылъёсыз возьмато, соос улӟыны но тӥледын ӵош пырак шумпотыса улыны быгатозы шуыса. Но Иисуслэн собере верам кылъёсыз, кудъёсыз гожтэмын Иоаннлэсь 6-тӥ люкетын, тросэзлы валантэм потӥзы. Туннэ но тросэз соосты уг валало. Мар вераз Иисус?

 3. Мар вераз Иисус ачиз сярысь Иоаннлэсь 6:51?

³ Куке Иисус паймымон амалэн адямиосты сюдӥз, соослэн тодазы лыктӥз манна, кудӥныз Иегова атайёссэс луоё кыр дуннеын сюдӥз. Еврейёс тодо вал, Гожтэмъёсын манна «инмысь нянен» нимаське шуыса (Пс. 104:40; Иоанн 6:31). Со сярысь тодэмзэс лыдэ басьтыса, Иисус соосты туж кулэ луисезлы дышетӥз. Маннаез паймымон амалэн Инмар сётэ вал ке но, сое сиисьёс куке но кулӥзы (Иоанн 6:49). Нош ассэ Иисус нимаз «Инмысь... зэмос нянь», «Инмар нянь» но «улонлэн нянез» шуыса (Иоанн 6:32, 33, 35). Иисуслэн но манналэн одӥг пӧртэмлыксы вань. Иисус шуиз: «Мон — Инмысь васькем улэп нянь: та нянез сиись мурт бырытэк улоз». (Лыдӟе Иоаннлэсь 6:51.) Иисусэз кылзӥсь еврейёс уг валало вал, малы Иисус — «Инмысь васькем улэп нянь» шуыса. Тае валаны юрттон понна, Иисус шуиз: «Мынам сётэм няне, со луэ Мынам Мугоры». Мар сярысь вераз Иисус? Милемлы та юанэз валаны кулэ, малы ке шуоно солы валэктон возьматэ, мар кароно милемлы но матысь адямиосмылы, пырак улон понна. Ойдолэ учкомы, кызьы валано Иисуслэсь кылъёссэ.

«ИНМЫСЬ ВАСЬКЕМ УЛЭП НЯНЬ» НО «МЫНАМ СЁТЭМ НЯНЕ, СО ЛУЭ МЫНАМ МУГОРЫ»

 4. Малы куд-ог адямиосты Иисуслэн кылъёсыз туж паймытӥзы?

⁴ Иисус адямиослы вераз, нянь, кудзэ соос сиыны кулэ,— со солэн мугорыз шуыса, озьы ик со сое «дуннелэн улонэз понна» сётоз шуыса. Та кылъёс адямиосты туж паймытӥзы. Соос малпазы, вылды, Иисус зэм но аслэсьтыз мугорзэ сиыны куре шуыса (Иоанн 6:52). Но Иисуслэн берло верам кылъёсыз соосты эшшо но паймытӥзы: «Адями Пилэсь Мугорзэ ӧд ке сие, Солэсь Вирзэ ӧд ке юэ, тӥ пушкын улон уз луы» (Иоанн 6:53).

 5. Кытысь ми тодӥськомы, Иисус зэмзэ ик аслэсьтыз вирзэ юыны адямиосты ӧз куры шуыса?

⁵ Ной улон нуналъёсы Инмар адямиослы ӧз лэзьы вир сиыны (Ул.-выл. 9:3, 4). Израиль калыклы Закон сётыкуз, Иегова нош ик со сярысь вераз. Сое, кин та курон-косонэз тӥяз, виыны кулэ вал (Лев. 7:27). Иисус еврейёсты дышетӥз Моисейлэн законэзлэсь кылзӥськыны (Матф. 5:17—19). Соин ик со уг быгаты вал адямиосты курыны, зэмзэ ик солэсь мугорзэ сиыны но вирзэ юыны. Иисуслэн кылъёсыз паймымон потыны быгато вал ке но, соос возьмато, мар кароно, «быронтэм улонэз» басьтон понна (Иоанн 6:54).

 6. Кытысь ми тодӥськомы, Иисус зэмос мугорыз но вирыз сярысь ӧз вера шуыса (Иоанн 6:53)?

⁶ Иисус зэмос мугорыз но вирыз сярысь ӧз вера. Таӵе ӵошатон амалэз со азьвыл но кутылӥз ини. Кылсярысь, Самарияысь кышномуртлы Иисус вераз: «Кин Мынэсьтым сётэм вуме юиз ке, солэн ноку но сюэз уз ни куасьмы; Мынам солы сётэм вуэ со пушкын ошмеслы пӧрмоз, солэн  вуэз быронтэм улонэ бызе» (Иоанн 4:7, 14) b. Иисус ӧз вера, кыӵе ке колодчаысь ву Самарияысь кышномуртлы быронтэм улон сётоз шуыса. Ӵапак озьы ик Иисус Капернаумысь адямиосты ӧз дышеты, соос зэмзэ ик солэсь мугорзэ сиизы ке но вирзэ юизы ке, соос пырак улозы шуыса.

КУ ЭШШО ИИСУС ВЕРАЗ МУГОР НО ВИР СЯРЫСЬ

 7. Кызьы куд-огъёсыз валэкто Иисуслэсь кылъёссэ, кудъёсыз гожтэмын Иоаннлэсь 6:53?

⁷ Куд-ог религиос дышетэмъя, Иоаннлэсь 6:53 Иисус вераз со сярысь, мар кароно Ӝытан дыръя. Малы ке шуоно, сое пусйыны дышетыкуз но, Иисус вераз мугор но вир сярысь (Матф. 26:26—28). Соин ик куд-огъёсыз верало, Ӝытан дыръя ваньзылы нянь сиёно но вина юоно. Но шонер-а со? Та юанэз валаны кулэ, малы ке шуоно арлы быдэ Ӝытанэз милемын ӵош кӧня ке миллион адямиос пусъё. Ми адӟомы, учыр, кудӥз сярысь вераське Иоаннлэсь 6-тӥ люкетын, Ӝытанлэсь туж пӧртэм шуыса.

 8. Маин пӧртэм учыр, кудӥз сярысь вераське Иоаннлэсь 6-тӥ люкетын, но Ӝытан? (Озьы ик учке суредъёсты.)

⁸ Нырысь эскеромы кык пӧртэмлыкез. Нырысетӥез, кытын но ку Иисус вераз  кылъёсты, кудъёсыз гожтэмын Иоаннлэсь 6:53—56? Со вал Галилеяын асьме вакытысь 32-тӥ арын. Нош Ӝытанэз Иисус пусйыны косӥз Иерусалимын, ар пала ортчыса. Кыкетӥез, кинлы Иисус вераз та кылъёсты? Галилеяысь адямиос тросгес сюлмасько вал сиён сярысь, нош Иегова сярысь но солэн Эксэйлыкез сярысь тодэмзы уг поты вал (Иоанн 6:26). Куке Иисуслэн кылъёсыз соослы валантэм потӥзы, соос сое кылзэмысь дугдӥзы. Куд-ог дышетскисьёс сое кельтӥзы но (Иоанн 6:14, 36, 42, 60, 64, 66). Ӵошатэ тае нырысетӥ Ӝытанэн, кудӥз ортчиз, ар пала ортчыса, асьме вакытысь 33-тӥ арын. Отын Иисусэн ӵош 11 оскымон апостолъёсыз вал. Соос но Иисуслэсь вань кылъёссэ ӧз валалэ ке но, соос сое ӧз кельтэ. Соос юн оско вал, Иисус – со Инмарлэн Пиез шуыса, кудӥз инмысь васькиз (Матф. 16:16). Иисус дышетскисьёссэ ушъяз: «Визь сынаськыса улон дыръёсы тӥ Монэн огазьын вал» (Лука 22:28). Та кык пӧртэмлыкъёсъя гинэ но валаны луэ, Иоаннлэсь 6:53 Ӝытан сярысь уг вераськы шуыса. Эскеромы, маин эшшо пӧртэм луо та кык учыръёс.

КЫЗЬЫ ГЕРӞАСЬКЕМЫН ИИСУСЛЭН КЫЛЪЁСЫЗ ТӤЛЕДЫН

 9. Кинлы вазиськиз Иисус Ӝытан дыръя?

⁹ Ӝытан дыръя Иисус апостолъёсызлы юмал нянь сётӥз но вераз, со солэсь мугорзэ возьматэ шуыса. Собере Иисус соослы вина сётӥз но вераз, со «Выль Сӥзён Вирыз» луэ шуыса (Марк 14:22—25; Лука 22:20; 1 Кор. 11:24). Озьыен, тани кулэ луись малпан: Иисус выль сӥзён сярысь вераз. Выль сӥзёнэз Иегова кутӥз духовной Израилен. Иегова ӧз куты сое вань адямиосын, нош соосын гинэ, кинъёс Иисусэн ӵош «Инмар Эксэйлыкын» кивалтозы (Евр. 8:6, 10; 9:15). Соку апостолъёс ваньзэ ӧз валалэ ке но, ӝоген соос святой духен зырӟемын вал но соосын выль тупан кыл кутэмын вал, Иисусэн ӵош инмын луон понна (Иоанн 14:2, 3).

10. Маин эшшо пӧртэм луэ Ӝытан но Галилеяын луэм учыр? (Озьы ик учке суредэз.)

¹⁰ Висъялэ саклыктэс, Ӝытанын Иисус «пичи уллёлы» вазиськиз шуыса (Лука 12:32). Нырысь ик отчы пыризы оскымон апостолъёс, кудъёсыз со ӝытэ Иисусэн ӵош вал. Соос но мукетъёсыз, кинъёс берлогес пичи уллёе пыризы, Ӝытанын нянь сиё но вина юо. Соос Иисусэн ӵош инмын луозы. Та эшшо одӥг пӧртэмлык. Ӝытанын Иисус вазиськиз пичи уллёлы гинэ, нош Галилеяын — туж трос адямиослы.

11. Кытысь ми тодӥськомы, бакель каронъёсты, кудъёсыз сярысь Иисус Галилеяын вераз, вань адямиос басьтыны быгато шуыса?

¹¹ Тросэз адямиос, кудъёсыз Иисусэз асьме вакытысь 32-тӥ арын Галилеяын кылзӥзы, Иисуслэсь нянь гинэ возьмазы. Но Иисус соослэсь саклыксэс висъяз солы, мар пырак улон сётыны быгатэ. Иисус вераз, кулэмъёс берпум нуналэ улӟыны но пырак улыны быгатозы шуыса. Ӵошатоно ке соин, мае Иисус берлогес вераз Ӝытанын, та кылъёс быръем адямиослы гинэ верамын ӧй вал. Бакель каронъёсты, кудъёсыз сярысь Иисус Галилеяын вераз, вань адямиос басьтыны быгато вал. Соин ик Иисус шуиз: «Мынам сётэм няне, со луэ Мынам Мугоры, сое Мон дуннелэн улонэз понна сёто» (Иоанн 6:51).

12. Мар кароно адямилы, пырак улон понна?

 ¹² Возьмато-а Галилеяын верам Иисуслэн кылъёсыз, котькуд адями, кудӥз куке но музъем вылын улӥз, пырак улон басьтоз шуыса? Уг. «Та нянез сиись мурт» гинэ «бырытэк улоз», яке со гинэ, кин уж вылын Иисуслы осконзэ возьматэ. Христиан религиосысь адямиос малпало, Иисуслы оскыны но сое аслад Утисеныд ниманы тырмыт шуыса (Иоанн 6:29). Но малпаське. Галилеяысь тросэз адямиос, кудъёсыз Иисусэз нырысь кылзӥзы, берлогес сое кельтӥзы. Малы?

13. Мар кароно, Иисуслэн зэмос дышетскисез луон понна?

¹³ Тросэз адямиос, кудъёссэ Иисус сюдӥз, дась вал со сьӧры мыныны соку гинэ, куке со соосты бурмытъяз, сюдылӥз но ӟеч кылъёс вералляз. Но Иисус музъем вылэ ӧз лыкты, адямиослэсь мылпотонъёссэс быдэсъян понна. Иисус музъем вылэ лыктӥз, адямиосты зэмос дышетскисьёсыз луыны дышетон понна. Иисус соосты ӧтиз со доры лыктыны. Со понна Иисус вӧзын луыны гинэ тырмыт ӧй вал, нош сое сак кылзоно но кылэмзэс улоназы пыртоно вал (Иоанн 5:40; 6:44).

14. Мар кароно, пырак улон понна?

¹⁴ Куке Иоаннлэсь 6:53 Иисус вераз мугор но вир сярысь, со вераз курбон сярысь, кудзэ вайыны дасяське вал. Сое кылзӥсь еврейёслы солы оскыны кулэ вал. Малы? Малы ке шуоно со курбонлы луыса гинэ адямиос пырак улыны быгато. Ӵапак озьы ик туннэ но (Иоанн 6:40). Адямилэн потэ ке пырак улэмез, солы  Христослэн мозмытӥсь курбонэзлы осконо. Сыӵе луонлыксы туж трос адямиослэн вань (Еф. 1:7).

15, 16. Малы милемыз дышетэ Иоаннлэсь 6-тӥ люкет?

¹⁵ Иоаннлэсь 6-тӥ люкетэз эскерон туж бадӟым пайда вайиз! Ми тодӥмы, Иисус адямиосты яратэ но соос сярысь сюлмаське шуыса. Галилеяын со висисьёсты бурмытъяз, адямиослы Эксэйлык сярысь вералляз но соосты кӧт тырымон сюдӥз (Лука 9:11; Иоанн 6:2, 11, 12). Нош валтӥсез — Иисус дышетӥз, со «улонлэн нянез» шуыса (Иоанн 6:35, 48).

¹⁶ Соос, кинъёсты Иисус «мукет ыжъёс» шуыса нимаз, Ӝытанын нянь сиыны но вина юыны кулэ ӧвӧл (Иоанн 10:16). Но куке соос Христослэн мозмытӥсь курбонэзлы осконзэс возьмато, вераны луоз, «улонлэсь няньзэ» сиё шуыса (Иоанн 6:53). Соос, кинъёс Ӝытанын нянь сиё но вина юо, возьмато, соосын выль сӥзён кутэмын но азьланяз соос инмысь Эксэйлыкын эксэйёс луозы шуыса. Кызьы ми адӟимы, Иоаннлэсь 6-тӥ люкет зырӟем христианъёслы но, мукет ыжъёслы но бадӟым пайда вайыны быгатэ. Со милемыз дышетэ, ваньмылы мозмытӥсь курбонлы осконмес возьматоно шуыса. Соку гинэ ми быгатомы пырак улыны.