Тани мар вераз Апостол Павел Тимофейлы, кудӥз со кадь ик тӧро вал: «Инмар азьын, Кузё-Инмармы Иисус Христос азьын тонэ тэльмырыса курисько: та куронэз быдэсъяса ул, номыре но ас тодэмъяд, нокинэ но улӥ-вылӥ карыса эн лэсьты» (1 Тим. 5:21).

Нырысь малпаломы, кинъёс «быръем Кылчинъёс» пӧлы уг пыро. Кылсярысь, со 144 000 зырӟем христианъёс. Куке Павел та кылъёсты Тимофейлы гожъяз, зырӟем христианъёс инмын улон понна улӟытъяны кутскемын ӧй вал на. Апостолъёс но мукет зырӟем христианъёс духовной кылдытэмъёс луэмын ӧй вал на, соин ик соос «быръем Кылчинъёс» луыны уг быгато вал (1 Иоанн 3:2; 1 Кор. 15:50—54; 1 Фес. 4:13—17).

Озьы ик «быръем Кылчинъёс» пӧлы уг пыро со кылчинъёс, кудъёсыз Вутудӟон азьын Инмарлэсь кылзӥськемысь дугдӥзы. Соос Шайтан пала султӥзы но периос, Иисуслэн тушмонъёсыз, луизы (Ул.-выл. 6:2; Лука 8:30, 31; 2 Пётр 2:4). Азьланяз соос 1 000 арлы пыдэстэм дуннее пытсамын луозы. Нош собере Шайтанэн ӵош быдтэмын луозы (Иуда 6; Усьт. 20:1—3, 10).

Озьыен, «быръем Кылчинъёс» — со инмысь кылчинъёс, кудъёсыз Инмарлы но Иисус Христослы оскымон луо.

Инмарлы оскымон кылчинъёс туж трос — «сюрс-сюрс Кылчинъёс» (Евр. 12:22, 23). Пӧртэм кылчинъёс пӧртэм ужъёсты быдэсъяло, луоз (Усьт. 14:17, 18). Кылсярысь, одӥг кылчинэз Иегова косӥз 185 000 Ассириялэсь ожгарчиоссэ быдтыны (4 Экс. 19:35). Нош куд-ог кылчинъёслы верамын вал Иисуслэн «Эксэйлыкысьтыз сьӧлыке пыртӥсь вань пӧяськетъёсты, законлы пумит улӥсьёсты» люканы но соосты быдтыны (Матф. 13:39—41). Куд-ог кылчинъёс зырӟем христианъёсты люкало (Матф. 24:31). Нош куд-огъёсыз милемыз утё (Пс. 90:11; Матф. 18:10; ӵошатэ Матфейлэсь 4:11; Лукалэсь 22:43).

«Быръем Кылчинъёс», кудъёсыз сярысь вераське 1 Тимофейлы 5:21,— со кылчинъёс, вылды, кудъёсызлэн ужъёссы христиан кенешен герӟаськемын. Та люкетын Павел гожъя, кызьы тӧроослы ужъёссэс быдэсъяно, агайёс но сузэръёс соосты мед гажалозы шуыса. Соослы вылтӥяськоно ӧвӧл, «нокинэ но улӥ-вылӥ» кароно ӧвӧл но ужпумъёс дыртыса кутоно ӧвӧл. Тӧроослы Павеллэн кылъёсызлэсь кылзӥськыны кулэ, малы ке шуоно соос «Инмар азьын... Иисус Христос азьын, быръем Кылчинъёс азьын» ужало-тыршо. Озьыен, куд-ог кылчинъёслы уж сётэмын кенешъёслы юрттыны. Соос Инмарлэсь ужась-тыршисьёссэ утё, соослы тодытон ужын юрттӥсько но ужан-тыршонзы сярысь Инмарлы верало (Матф. 18:10; Усьт. 14:6).