1. Кыӵе шуг-секытъёсын ми пумиськиськомы но малы Иегова шумпотэ, куке ужась-тыршисьёсыз солы оскымон кылё? (Учке статья кутсконысь туспуктэмъёсты.)

 ВАНЬМЫЗЛЫ тодмо, та дуннеын улон туж секыт шуыса. Тӥляд котькуддылэн, дуно вын-агайёс но сузэр-апайёс, асьтэлэн шуг-секытъёсты вань. Тросэз секыт висёнъёсын нюръясько. Куд-огъёсызлы, соос асьсэос но егитэсь ӧвӧл ни ке но, арлыдо ӵыжы-выжыоссэс утялтоно луэ. Вань сыӵеосыз но, кудъёсызлы трос но секыт ужано луэ, семьязылэн самой кулэез ке но мед луоз шуыса. Тросэзлэн та выллем шуг-секытъёссы одӥг гинэ ӧвӧл! Со шуг-секытъёсыз сэрттон-пертчон понна, трос дыр, кужым но коньдон кошке. Но, номыр шоры учкытэк, тӥ юн оскиськоды Инмарлэн кыл сётонъёсызлы но оскиськоды, азьланяз умой улон возьма шуыса. Макем со шумпоттэ Иеговаез!

2. Кызьы милемыз юнмато Исаиялэн 40:29 кылъёс но кыӵе шонертэм малпанлэсь милемлы палэнсконо?

² Куддыръя тӥледлы потэ ке, улонысь шуг-секытъёсын сэрен, тӥляд кужымды быриз ини шуыса, тӥ огнады ӧвӧл. Библиысь ми тодӥськомы, вашкала дыръёсы тросэзлэн Инмарлы оскымон ужась-тыршисьёслэн но,  шуг-секытъёсын пумиськеменызы сэрен, куддыръя киоссы лэзисько вал шуыса (3 Экс. 19:4; Иов 7:7). Но соос ӧз сётске. Соос Иеговалэсь юрттэтсэ куризы но ӧз жалялэ, малы ке шуоно «жадем муртлы Со кужым сётэ» (Ис. 40:29). Жаляса верано луэ, но асьме дыръёсы куд-огъёсыз Инмарлэн ужась-тыршисьёсыз малпазы, шуг-секытъёсты вормон понна самой умой амал — со ӝамдэлы Иеговалы ужамысь-тыршемысь дугдыны. Соос малпазы, Иеговалы ужан-тыршон со бакель карон ӧвӧл, нош секыт зӥбет шуыса. Со вын-агайёс но сузэр-апайёс Библиез лыдӟемысь, пумиськонъёсы ветлэмысь но ӟеч иворез верамысь дугдӥзы. Соос лэсьтӥзы ӵапак сое, мае возьма Шайтан!

3. а) Мар кароно, Шайтан милемыз кужымтэк медаз кельты шуыса? б) Мае ми эскеромы та статьяын?

³ Ми вань дырмес Инмарлы ужаны-тыршыны сӥзиськомы ке, со милемлы кужым сётэ. Шайтан сое тодэ, но солэн уг поты, ми кужмоесь мед луомы шуыса. Соин ик, кужыммы бырыку но чигем мылкыдын улыкумы, Иегова дорысь палэнтӥськыны уг яра. Милемлы со доры матэ кариськоно, но со милемыз «кужмоятоз, чигиськисьтэм-куасаськисьтэм кароз» (1 Пётр 5:10; Иак. 4:8). Та статьяын ми эскеромы кык шуг-секытъёсты, кудъёсыныз сэрен Инмарлы ужаны-тыршыны ӟырдыт мылкыдмы сӥяны быгатоз, но адӟомы, Библиысь кыӵе возетъёс юрттозы соосты вормыны. Нош нырысь ойдолэ учкомы, мар верамын Исаиялэн 40:26—31 со сярысь, кызьы Иегова милемлы кужым сётыны быгатэ.

4. Малы дышето милемыз Исаиялэн 40:26 гожтэм кылъёс?

⁴ Лыдӟе Исаиялэсь 40:26. Быдэс Дуннеысь вань кизилиосты нокин лыдъяны уг быгаты. Тодосчиос малпамъя, милям галактикаямы гинэ 400 миллиард пала кизилиос. Иегова котькуд кизилилы ним понӥз. Малы со милемыз дышетэ? Со котькуд кизилилы нимысьтыз саклык висъя бере, малпалэ ай, макем со саклыксэ висъя тӥледлы! Тӥледыз нокин кужмысь уг косы солы ужаны-тыршыны. Тӥ сое яратӥськоды, соин ик солы ужаськоды-тыршиськоды (Пс. 18:2, 4, 15). Милям инмысь Атаймы милемыз туж умой тодэ. Матфейлэсь 10:30 верамын, йырысьтымы йырсиосмы но ваньмыз лыдъямын шуыса. Нош Псалтирьысь 36:18 ми лыдӟиськомы: «Кузё-Инмар дун-шектэмъёслэсь нуналъёссэс тодэ». Со оскытэ милемыз: Инмар адӟе, кыӵе шуг-секытъёсын милемлы нюръяськоно луэ, но кужым сётыны быгатэ соосты вормыны.

5. Малы ми оскиськомы, Иегова милемлы кужым сётыны быгатэ шуыса?

⁵ Лыдӟе Исаиялэсь 40:28. Иеговалэн туж бадӟым кужымез. Малпалэ, кылсярысь, мар быдӟа энергия потэ Шунды бордысь. Наукая книгаос гожъясь Дэвид Боданис гожтӥз, секундлы быдэ Шундыысь сомында ик энергия потэ шуыса, кӧня энергия потэ, трос миллиард атомной бомбаос пуштыку. Нош мукет тодосчилэн лыдъямезъя, «секундскын Шунды бордысь сомында энергия потэ, кӧняез адямиослы 200 000 ар ӵоже улыны  тырмысал»! Веранэз ӧвӧл, со, кин Шундыез «ӝуатӥз», милемлы но котькыӵе шуг-секытэз вормыны кужым сётыны быгатэ.

6. Малы вераны луоз, Иисуслэн зӥбетэз ӟеч шуыса, но кызьы со ми вылын шӧдӥськыны кулэ?

⁶ Лыдӟе Исаиялэсь 40:29. Иеговалы ужаса-тыршыса, ми шумпотон басьтӥськомы. Аслаз дышетскисьёсызлы вазиськыса, Иисус вераз: «Мынэсьтым зӥбетме вылады басьтэлэ... соку лулдылы каньылан шедьтоды. Мынам зӥбетэ ӟеч, ныпъетэ капчи» (Матф. 11:28—30). Со зэмзэ но озьы! Куддыръя, кенешлэн пумиськоназ яке тодытон уже мыныкумы, милям кужыммы уг луы. Нош кыӵеесь ми дорамы бертӥськомы? Ӝутскем мылкыдын но азьланяз шуг-секытъёсын нюръяськыны выль кужымен. Зэмзэ ик, Иисуслэн зӥбетэз ӟеч!

7. Вералэ учырез, кудӥз возьматэ, Матфейлэсь 11:28—30 гожтэм Иисуслэн кылъёсыз зэм луо шуыса.

⁷ Одӥг сузэрмы, нималомы сое Кейла, сыӵе висёнэн висе, куке адями ассэ котьку жадемен шӧдэ, шутэтскыса но жадемез уг быры. Со сяна, солэн депрессия, но сое йыркыль курадӟытэ. Валамон, малы куддыръя солы христиан пумиськонэ мыныны туж секыт. Но тани мар со гожтӥз, куке нош ик, вань кужымзэ поныса, Эксэйлык юртэ мынӥз: «Речь куашкам мылкыд сярысь верамын вал. Вын-агай сокем лякыт но небытэн вераз, мынам пушкы ик тыриз. Мон нош ик валай: христиан пумиськонъёстэк мынам улэме уг луы». Макем шумпотэмын вал Кейла, отчы ветлыны кужым шедьтӥз шуыса!

8, 9. Мае возьмато Павеллэн кылъёсыз: «Куке мон лябӟемын, соку мон кужмо»?

⁸ Лыдӟе Исаиялэсь 40:30. Ваньмылы асьмелы валано: кыӵе гинэ быгатонлыкъёсмы медаз луэ, асьме кужыменымы гинэ ми ваньзэ лэсьтыны ум быгатэ. Сое ас вылаз шӧдӥз апостол Павел, кудӥз туж быгатӥсь адями вал ке но, ӧз быгаты лэсьтыны сомында, кӧня солэн потэ вал. Со аслэсьтыз сюлэмшугъяськонъёссэ Инмарлы вераз но, Инмар солы шуиз: «Тон лябӟыса улон дыръя Мынам кужыме юнгес шарае потэ». Павел сое туж умой валаз. Со вераз: «Куке мон лябӟемын, соку мон кужмо» (2 Кор. 12:7—10). Мае возьмато вал со кылъёс?

⁹ Павел вала вал, аслаз кужыменыз гинэ со трос лэсьтыны уз быгаты шуыса. Троссэгес лэсьтон понна, солы вылӥысь юрттэт кулэ вал. Куке Павел ассэ жадемен шӧдӥз, солы Инмарлэн святой духез кужым сётылӥз. Со кужымлы луыса, Павел быгатӥз лэсьтыны сое, мае со аслаз кужыменыз гинэ лэсьтыны ӧй быгатысал. Озьы ик милемын но. Ми зэмзэ ик кужмоесь соку гинэ, куке милемлы Инмар аслэсьтыз святой духсэ сётэ!

10. Кызьы Иегова Давидлы шуг-секытъёссэ вормыны юрттылӥз?

¹⁰ Псаломъёсты гожъясь Давид трос пол ас вылаз шӧдылӥз, Инмарлэн святой духез — со туж бадӟым кужым шуыса. Давид гожъяз: «Тонэн валче мон войскоез пазьгисько, Инмаре юрттэмен, из борддорез тэтчыса потӥсько» (Пс. 17:30). Милям улонамы вань сыӵе «из борддоръёс», яке шуг-секытъёс, кудъёсыз вылэ ми асьмеос тубыны ум быгатӥське. Сыӵе учыръёсы  милемлы одно ик Иеговалэн юрттэтэз кулэ.

11. Кызьы святой дух шуг-секытъёсмес вормыны юрттэ?

¹¹ Лыдӟе Исаиялэсь 40:31. Ӧрӟиос, бурдъёссы вылын поръяса, трос иськемъёс ортчо. Но асьсэ кужыменызы гинэ соос сомында ортчыны уг быгато. Соос ӝутскись шуныт омырен вылӥе ӝутско. Озьы ӧрӟиослэн кужымзы ӧжытгес быре. Соин ик, куке тӥледлы секыт уж сёто, тодады вае ӧрӟиосты. Куре Иеговалэсь, со тӥледлы юрттӥсез — аслэсьтыз святой духсэ,— мед сётоз но тӥледыз «вылӥе мед ӝутоз» шуыса (Иоанн 14:26). Шумпотоно, малы ке шуоно ми солэсь святой духсэ котькыӵе дыре курыны быгатӥськомы — уй но, нунал но. Тужгес но милемлы Инмарлэн юрттэтэз кулэ, куке милям кенешысь кинэн ке но валамтэосмы кылдо. Малы сыӵе валамтэос кылдо?

12, 13. а) Малы куддыръя кенешын валамтэос кылдо? б) Мае ми тодӥськомы Иегова сярысь Иосифен луэм учырысь?

¹² Ми ваньмы тырбыдэстэм адямиос бере, ми куспын валамтэос кылдыло. Куддыръя вын-агайёсмылэн но сузэр-апайёсмылэн кылъёссы яке ужъёссы милесьтым вожмес поттыны быгато озьы ик, кызьы милям но асьмеды воземмы мукетъёсызлэсь йырзэс кур карыны быгатэ. Сыӵе югдуръёсы милям осконмы зэмзэ ик эскериське. Но соку ми Иеговалы оскымон луэммес возьматыны быгатӥськомы. Кызьы? Ми дышетскиськомы огъя улыны мукет христианъёсын, кудъёссэ Инмар яратэ, соослэн тырмымтэоссы шоры учкытэк.

¹³ Иегова аслэсьтыз ужась-тыршисьёссэ шуг-секытъёслэсь уг утьы шуыса, умой адӟиське Иосифлэн примерысьтыз. Куке со туж егит на вал, солэн агайёсыз сое Египетэ ляльчие вузазы (Ул.-выл. 37:28). Веранэз ӧвӧл, Иеговалы туж секыт вал адӟыны, макем урод но шонертэм уж лэсьтӥзы солэн эшезлы, шонерлыко Иосифлы. Озьы ке но, Инмар со уже ӧз пыриськы. Иегова ӧз пыриськы соку но, куке Иосифез, со Потифарлэсь кышнозэ сантэманы малпа вал шуыса, шонертэм  янгыше уськытӥзы но тюрьмае пытсазы. Луоз-а вераны, Инмар Иосифез вунэтӥз шуыса? Уз. Библиын верамын: «Мар гинэ со ӧз лэсьтылы, Кузё-Инмар солы азинлык сётылӥз» (Ул.-выл. 39:21—23).

14. Малы вожмес поттыса улоно ӧвӧл?

¹⁴ Эшшо одӥг пример — со Давид. Солы пумит туж шонертэм уж лэсьтэмын вал. Туж ӧжыт адями со выллем шугадӟонъёс пыр потӥз. Давидлэн туж матысь кусыпъёсыз вал Инмарен, но со ӧз лэзьы, солэн сюлмаз лек малпанъёс мед каръяськозы шуыса. Со гожтӥз: «Дугды вождэ поттэмысь, йыркуръяськондэ но кельты; кӧт пӧсен улыса, урод уж лэсьтоно медад лу» (Пс. 36:8). Милям адӟем кареммы потэ Иеговалэсь, кудӥз милемлы сьӧлыкъёсмы понна пунэмзэ уг берыкты (Пс. 102:10). Соин ик милемлы вожмес поттыса улоно ӧвӧл. Со сяна, лякыт сям мукетыз ласянь но пайда вае. Вожмес поттыса улӥмы ке, тазалыкмы лябӟыны быгатоз, кылсярысь, вирзӥбетмы ӝутскоз яке шокан органъёсмы висёзы. Сыӵе мылкыд урод каре муслы но ӝушул безлы, нош со мугормылы сием сиён-юонэз сылмытыны люкетэ. Вожмес поттыкумы, ми умой малпаськыны ум быгатӥське. Пӧсекъянлы сётскыса, ми кема дыр ӵоже куашкам мылкыдын уломы. Нош Библиын верамын, «бугыръяськисьтэм сюлэм мугорлэсь улонзэ кузятэ» шуыса (Мад. 14:30). Мар кароно, куке милемыз вӧсь каризы? Мар юрттоз тупаны соин, кин милемыз вӧсь кариз? Таӵе учыре самой умой визь-кенеш сётэ Библия.

15, 16. Мар карыны луоз, куке кенешысь кин ке милемыз вӧсь кариз?

¹⁵ Лыдӟе Ефесъёслы 4:26. Ми ум паймиське, куке милемыз та дуннеысь адямиос туж вӧсь каро. Нош матысь адямимы яке кенешысь кин ке милемыз кылъёсыныз яке ужъёсыныз ӝоже уськытэ ке, милям сюлэм ярамы кематэк уг бурмы. Кылсярысь, милемлы секыт вунэтыны сое, мар луиз. Уломы-а ми йыркуръяськыса кема аръёс ӵоже? Яке Библиысь визь-кенешлэсь кылзӥськомы но ӝоггес ваньзэ тупатыны тыршомы? Макем кемагес ми кылдэм шуг-секытэз сэрттытэк-пертчытэк уломы, сокем секытгес луоз кусыпъёсмес тупатыны.

¹⁶ Кылсярысь, тӥледыз кенешысь вын-агай ӝоже уськытӥз, но тӥ нокызьы сое вунэтыны уд быгатӥське. Мар карыны луоз, кусыпъёстэс тупатон понна? Нырысь ик, Иеговалы ӟырдыт вӧсяське но вералэ, мар тӥледыз сюлэмшугъяськытэ. Солэсь юрттэтсэ куре, тӥ со вын-агаен лякытэн вераськыны мед быгатоды шуыса. Тодады возе, со вын-агай — Иеговалэн эшез (Мад. 3:32). Инмар сое яратэ. Иегова аслаз эшъёсыныз ассэ туж лякытэн возе, асьмелэсь но со возьма сое ик (Мад. 15:23; Матф. 7:12; Кол. 4:6). Собере малпаське, мар тӥ вералоды. Эн малпалэ, вын-агайды юри тӥледыз вӧсь кариз шуыса. Оло нош, со янгышен озьы пӧрмиз яке тӥ югдурез шонертэм валады. Тодады возе, отын тӥляд но янгышты луыны быгатэ шуыса. Вераськондэс, кылсярысь, тазьы кутскыса утчалэ: «Мон шонертэм валай,  вылды, но толон вераськыкумы мыным потӥз...» Соку ик кылды ӧз тупа ке, киостэс эн лэзе. Вӧсяське со вын-агай понна но куре, Иегова сое бакель мед кароз но тӥледлы солэсь умой сямъёссэ адӟыны мед юрттоз шуыса. Кыӵе гинэ емышъёс медаз вайы тӥляд тыршемды, тодэ, Иегова туж шумпотэ, куке адӟе, тӥ солэн эшеныз но тӥляд вын-агаеныды сюлмысь тупаны тыршиськоды шуыса.

17. Кызьы Иегова секыт сьӧлыкамъёслы юрттэ но малы солэн юрттэтэзлэсь палэнсконо ӧвӧл?

¹⁷ Куд-ог христианъёс, кудъёсыз секыт сьӧлыказы, малпало, соос Иеговалы ужаны-тыршыны ноку но уз яралэ ни шуыса. Соос асьсэды янгышен шӧдо но возьдасько. Соин сэрен шумпотонзэс ышто, лябӟо но нокызьы буйгатскыны уг быгато. Давид эксэй аслаз сюлэмшугъяськонъёсыз сярысь тазьы вераз: «Чалмыт улыкум, нуналлы быдэ сюлворыса, пӧсьтӥзы мынам лыосы, уго уй но нунал Тынад киыд монэ зӥбыса возиз». Но Давид быгатӥз лэсьтыны сое, мае Иегова возьма аслаз ужась-тыршисезлэсь. Давид гожтӥз: «Мон Тыныд сьӧлыкме усьтӥ... соку Тон мынэсьтым вань сьӧлыкъёсме куштӥд» (Пс. 31:3—5). Тӥ секыт сьӧлыкады ке, тодэ: Иегова котьку дась тӥледыз простить карыны, но солэн тӥледлы юрттэмез потэ. Но юрттэтэзлэсь, кудзэ со кенешез пыр сётэ, тӥледлы палэнсконо ӧвӧл (Мад. 24:16; Иак. 5:13—15). Ӝегатскыны уг яра, малы ке шуоно соин тӥляд азьпал улонды герӟаськемын! Нош, Иегова тӥледыз простить карыса но, тӥ асьтэды янгышен шӧдӥськоды ке?

18. Кызьы Павеллэн примерез юрттыны быгатоз соослы, кинъёс асьсэды Иеговалы ужаны-тыршыны уг ярало шуыса малпало?

¹⁸ Куддыръя Павел азьвыл лэсьтэм янгышъёсыз понна туж сюлмаське вал, шӧдске. Со гожтӥз: «Мон уго апостолъёс пӧлысь ваньмызлэсь пичиез, апостол шуыса лыдъяны но сылӥсьтэм, малы ке шуоно Инмарлэсь Черксэ улляса ветлӥ». Но собере со вераз: «Нош Инмарлэн сётэм дэлетэныз-ӟечлыкеныз мон луи сыӵе, кыӵе али вань» (1 Кор. 15:9, 10). Иегова тодэ вал, Павел огшоры, тырбыдэстэм адями шуыса. Озьы ке но, со сое апостол луыны ярамон шуыса лыдъяз, но солэн потэ вал, Павел сое мед валалоз шуыса. Тӥ лэсьтэм сьӧлыкъёсты понна сюлмысь ӧпкелиды но соос сярысь верады ке Иеговалы, нош кулэ ке, тӧроослы но, соку Иегова тӥледыз гажалоз-жалялоз. Оске, Иегова тӥледыз простить кариз шуыса! (Ис. 55:6, 7).

19. Кыӵе кылбур, 2018-тӥ арлэн кылбурез карыса, быръемын но малы со дырыз дыръя луэ?

¹⁹ Та лек дунне быронэ вуэ ини. Соин ми валаськомы, милям улонмы секытгес но секытгес луоз шуыса. Но эн вунэтэ: «Жадем муртлы Со [Инмар] кужым сётэ, катьтэммемлы юнлык кузьма». Озьыен, со асьмемыз но юнматыны быгатоз (Ис. 40:29; Пс. 54:23; 67:20). Сое ми, 2018-тӥ арын Эксэйлык юртэ пумиськонъёсы лыктыкумы, котьку тодамы ваёмы, малы ке шуоно милям син азямы луозы арлы кылбурысь кылъёс: «Иеговалы оскиськыса улӥсьёс кужым басьтыса выльдӥськозы» (Ис. 40:31).