1—3. а) Малы Иегова Соломонэз яратӥз но кызьы со сое бакель кариз? б) Кыӵе юанъёсты ми та статьяын эскеромы?

 СОЛОМОН Израильлэн эксэез луиз, куке со егит на вал. Кивалтонэзлэн кутсконаз солы уйвӧтаз Иегова возьматскиз но вераз: «Кур, мар тыныд сётоно». Соломон шуиз: «Мон, пинал пи... [...] Ас ляльчиедлы визьнодо сюлэм сёт, калыкеныд кивалтыны мед быгатоз» (3 Экс. 3:5—10). Макем зӥбыт-востэм курон! Соин ик паймонэз ӧвӧл, Иегова Соломонэз яратӥз шуыса (2 Экс. 12:24). Инмарлы туж кельшиз сыӵе куронэз кылыны, но со эксэйлы «визьлыко, визьнодо сюлэм» сётӥз (3 Экс. 3:12).

² Куке Соломон Иеговалы оскымон ужаз-тыршиз, Иегова сое бакель карылӥз. Соломонлы дано уж оскемын вал «Израильлэн Инмарезлэн Кузё-Инмарлэн нимызлы сӥзем храм» пуктыны (3 Экс. 8:20). Со тодмо вал визьлыко луэменыз, кудзэ солы Инмар сётӥз. Но солэн кылъёсыз Инмарлэн духезлэн кивалтэмез улсын Библилэн куинь книгаосаз гожтэмын вал. Одӥгез соос пӧлысь — Мадёнъёсын книга.

³ Та книгаын «сюлэм» кыл ог 50 пол пумиське. Кылсярысь, Мадёнъёсын 4:23 гожтэмын: «Вань утёноос пӧлысь тужгес но сюлэмдэ уть» (Мад. 4:23). Кызьы валано «сюлэм» кылэз та кылбурысь? Валэктон ми шедьтомы та статьяысь. Озьы ик ми эскеромы та юанъёсты: кызьы Шайтан сюлэммес ас палаз берыктыны тырше но кызьы милемлы утиськоно? Инмарлы оскымон кылеммы потэ ке, соку милемлы та юанъёслы валэктонъёс шедьтыны кулэ.

4, 5. а) Мае возьматэ «сюлэм» кыл Мадёнъёсын 4:23? б) Кыӵе пример вылын адӟиське, символической сюлэммы сярысь сюлмаськоно шуыса?

⁴ Мадёнъёсын 4:23 «сюлэм» кыл возьматэ адямилэсь пуш дуннезэ. Мукет сямен вераса, «сюлэм» — со пушкысьтымы малпанъёсмы, шӧдонъёсмы но мылпотонъёсмы. Со возьматэ, кыӵеесь ми пушкамы луиськомы, нош уг возьматы сое, кыӵеесь ми адямиослэн син азязы адскиськомы.

⁵ Ойдолэ эскеромы одӥг примерез, кудӥз валаны юрттоз, малы туж кулэ символической сюлэммы сярысь сюлмаськыны. Мугормы тазалыко мед луоз шуыса, пайдаё сиён сиёно но ялан спортэн выроно. Озьы ик духовной тазалыкмы умой мед луоз шуыса, умой но пайдаё духовной сиён сиёно но котькуд нунал Инмарлы осконмес ужъёсын возьматоно — Библиысь басьтэм тодон-валанъёсмес улонамы пыртоно но мукетъёсызлы осконмы сярысь верано (Иак. 2:26; Рим. 10:8—10). Нош куддыръя куд-ог висёнъёсты шӧдыны уг луы, но адями малпаны быгатэ, со уг висьы шуыса, нош зэмзэ вераса, со висе. Озьы ик луыны быгатэ духовной тазалыкенымы но. Ми малпаськомы, вылды: «Инмарлы ужан-тыршонэн герӟаськем ужъёсы умой радъямын, озьыен, мынам осконэ юн». Но сюлмамы шонертэм мылпотонъёс каръяськыны быгато (Иак. 1:14, 15; 1 Кор. 10:12). Тодамы возёно, Шайтан милемлы аслэсьтыз малпанъёссэ пыӵатыны тырше шуыса. Кызьы со сое лэсьтэ? Но кызьы милемлы асьмеды утёно?

6. Кыӵе ужпумез Шайтанлэн но кызьы со сое быдэстыны тырше?

⁶ Шайтанлэн потэ, ми со кадесь ик мед луомы шуыса — асьсэды гинэ яратӥсесь, пумитъяськисесь но Иеговалэн куронъёсызлэсь кылзӥськисьтэмесь. Шайтан уг быгаты кужмысь косыны милемыз малпаськыны но лэсьтыны ачиз сямен. Соин ик со ужпумзэ мукет амалэн быдэстыны тырше. Кылсярысь, Шайтан ми котыре сыӵе адямиосты лэзе, кудъёсыз солэн ки улаз возисько ини (1 Иоан. 5:19). Ми тодӥськомы ке но, сыӵе адямиосын эшъяськон малпанъёсмы но ужъёсмы вылын урод сямен  шӧдӥськоз шуыса, Шайтан оске, ми соосын дырмес ортчытъяломы шуыса (1 Кор. 15:33). Та сьӧлтэтэ сюриз Соломон эксэй. Солэн мукет калыкъёсысь кышноосыз трос вал, но соос «солэсь сюлэмзэ... сӧризы» (3 Экс. 11:3).

7. Кызьы эшшо Шайтан малпанъёссэ милемлы пыӵатыны тырше но малы милемлы сак луоно?

⁷ Шайтан аслэсьтыз малпанъёссэ фильмъёс но телепередачаос пыр вӧлмытэ. Со вала, тунсыко учыръёс милемыз шулдыртэм сяна, озьы ик шӧдӥсько со вылын, кызьы ми малпаськиськомы, мае шӧдӥськомы но кызьы ми асьмеды возиськомы. Иисус та дышетон амалэз туж умой кутӥз. Кылсярысь, тодады вае ӟеч сямо Самария мурт сярысь яке йыромем пи сярысь мадёнъёсты (Матф. 13:34; Лука 10:29—37; 15:11—32). Нош фильмъёс но телепердачаос пыр Шайтанлэн малпанъёсыз милемлы пыӵаны быгатозы соослэсь, кинъёслы соос пыӵазы ини. Зэм но, куд-ог фильмъёс но телепередачаос номыр уродзэ уг ваё. Соосты учкыку, шутэтскыны но малы ке дышетскыны луэ. Озьы ке но, сак луыны кулэ. Куке тӥ бырйиськоды, мае учкыны, юалэ асьтэлэсь: «Дышетэ-а та фильм яке телепередача, лулмугорлэн кулэяськонъёсызъя улонын номыр кышкытэз ӧвӧл шуыса?» (Гал. 5:19—21; Еф. 2:1—3). Озьы ке, учке соос шоры паласькись висён шоры кадь, малы ке шуоно соос пыр Шайтанлэн малпанъёсыз милемлы пыӵаны быгато.

8. Кызьы нылпиослы сюлэмзэс утьыны юрттоно?

⁸ Анай-атайёс, тӥледлы нимысьтыз уж сётэмын — нылпиостэс Шайтанлэсь утьыны, кудӥз тырше соослэсь сюлэмзэс ас палаз берыктыны, аслэсьтыз малпанъёссэ пыӵатыса. Веранэз ӧвӧл, тӥ лэсьтӥськоды ваньзэ, мае быгатӥськоды, нылпиостэс висёнъёслэсь утён понна. Тӥ коркадэс чылкыт возьыны тыршиськоды но куштӥськоды ваньзэ, мар семьядылэн тазалыкезлы  кышкытлык вайыны быгатэ. Озьы ик тӥледлы нылпиостэс утёно фильмъёслэсь, телепередачаослэсь, электрон шудонъёслэсь но сайтъёслэсь, кудъёсыз пыр Шайтан аслэсьтыз малпанъёссэ пыӵатыны быгатэ. Нылпиостылэн духовной тазалыксы сярысь сюлмаськыны тӥледыз ачиз Иегова косӥз (Мад. 1:8; Еф. 6:1, 4). Соин ик эн кышкалэ семьяяды куронъёс пуктылыны, Библиысь возетъёс вылэ пыкиськыса. Нылпиосты пичиесь ке, вералэ соослы, мае учкыны яра, нош мае уг яра, но валэктэ, малы озьы кароно (Матф. 5:37). Нош соос сокем пичиесь ӧвӧл ни ке, дышетэ соосты «ӟечез но, уродэз но висъяны», Иеговалэсь куронъёссэ лыдэ басьтыса (Евр. 5:14). Тодады возе: нылпиос тросэзлы дышетскыны быгато кылзыса сое, мае тӥ вераськоды, но эшшо тросгес — адӟыса сое, мае тӥ лэсьтӥськоды (К. Зак. 6:6, 7; Рим. 2:21).

9. Кыӵе малпан Шайтан пыӵатыны тырше но маин со кышкыт?

⁹ Кызьы эшшо Шайтан сюлэммес ас палаз берыктыны тырше? Со милемлы малпан пыӵатэ, Инмарлэн визьлыкез интые, адямиослэн визьлыксылы оскиськыса улыны умойгес луоз шуыса (Кол. 2:8). Кылсярысь, Шайтан малпан вӧлмытэ, улонын валтӥсь ужпум — со узырмон шуыса. Соос, кинъёс та ужпумен уло, куддыръя быгато узырмыны, нош куддыръя уг быгато. Но кызьы гинэ медам луы, соос кышкыт сюрес вылтӥ мыно. Малы? Узырмыны тыршыса, соос вунэтыны быгато тазалыксы, семьязы но Инмарен эшъяськонзы сярысь (1 Тим. 6:10). Ми туж тау кариськомы визьлыко инмысь Атаймылы, со милемлы коньдон шоры шонер учкыны юрттэ шуыса! (Екк. 7:12; Лука 12:15).

10, 11. а) Мар милемлы кароно, сюлэммес утён понна? б) Мар каре вал возьмаськись вашкала дыръя но малы соин возьытлыкез ӵошатыны луэ?

¹⁰ Аслэсьтыд сюлэмдэ утён понна, дышетскыны кулэ кышкытлыкез адӟыны но ӝог маке но карыны. Со тупа солы, мар вашкала дыръя возьмаськись лэсьтэ вал. Со карлэн борддор вылаз эскерыса-чакласа сылӥз но, кышкытлык кылдыку, со сярысь вералляз. Та ӵошатон валаны юрттэ, мар кароно, Шайтан сюлэммес ас палаз медаз берыкты шуыса.

¹¹ Возьмаськисьёс капка возьмасьёсын ӵош ужало вал (2 Экс. 18:24—26). Ӵошен соос чаклало вал, тушмон матэктыку, карысь капкаос ворсамын мед луозы шуыса (Неем. 7:1—3). Возьмаськись выллем, Библияя дышетэм возьытлыкмы b алэ милемыз, куке Шайтан тырше сюлэммес ас палаз берыктыны, яке малпанъёсмес, шӧдонъёсмес но мылпотонъёсмес воштыны. Котькуд учыре, куке возьытлыкмы кышкытлык сярысь ивортэ, милемлы сое кылзоно но капкаез сямен ворсано.

12, 13. Кыӵе шонертэм мылкыдмы кылдыны быгатэ но мар милемлы соин сэрен кароно?

¹² Малпаськомы, мар кароно, Шайтан аслэсьтыз малпанъёссэ милемлы пыӵатыны медаз быгаты шуыса. Тани одӥг пример. Инмарлэн Кылаз гожтэмын: «Азыса-калгыса улон, пӧртэм юрӟым-кырсь ужъёс... сярысь тӥ пӧлын вераськон ик медаз потылы» (Еф. 5:3). Мар ми каромы, ӵош ужасьёсмы яке огъя дышетскисьёсмы азон-калгон  сярысь вераськыны кутскизы ке? Ми тодӥськомы, милемлы «сьӧлыклэсь кышкатэк улонлэсь, та дуннелэн куронъёсызлы тэрытскыса улонлэсь куштӥськыны» кулэ шуыса (Тит. 2:12). Возьытлык, милям возьмаськисьмы, кышкытлык сярысь ивортыны быгатэ (Рим. 2:15). Нош лыдэ басьтомы-а ми сое? Кылсярысь, милям мылкыдмы кылдоз кылзыны, мар сярысь верасько ӵош ужасьёсмы яке огъя дышетскисьёсмы, яке учкыны туспуктэмъёсты, кудъёссэ соос возьмато. Ӵапак со дыре милемлы «капкамес ворсано». Со возьматэ, вераськонэз воштыны яке кошкыны кулэ шуыса.

¹³ Милемлы кышкасьтэм луыны кулэ, куке котырысьтымы адямиос ми вылэ зӥбо, шонертэм малпаськыны но урод ужъёс лэсьтыны мылкыдмес ӝутыса. Оске: Иегова адӟе, макем милемлы тыршоно луэ. Со милемлы кужым но визьлык сётоз, ми Шайтанлэн зӥбемезлы медам сётске шуыса (2 Пар. 16:9; Ис. 40:29; Иак. 1:5). Мар эшшо милемлы кароно на, сюлэммес утён понна?

14, 15. а) Малы сюлэммес усьтоно но кызьы сое лэсьтоно? б) Кызьы Мадёнъёс 4:20—22 Библия лыдӟонэз пайдаёгес карыны юртто? (Озьы ик учке « Кызьы малпаськоно, Библиез лыдӟыку» рамкаез.)

¹⁴ Сюлэммес утён понна, сое уродэзлэсь гинэ пытсано ӧвӧл, нош маке умоезлы но пырыны лэзёно. Тодамы ваёмы карысь борддорен примерез. Куке кар доры тушмон матэктылӥз, капка возьмась капкаез ворса вал, нош куке каре сиён-юон но мукет арбериос вайылӥзы, со соосты усьтэ вал. Капка котьку тунгонамын луысал ке, карын адямиос сютэм улысалзы. Озьы ик милемлы но сюлэммес усьтоно, сое Инмарлэн малпанъёсыныз тырмытыса.

¹⁵ Библиын Инмарлэн малпанъёсыз гожтэмын, соин ик, куке ми сое лыдӟиськомы, соос шӧдӥсько малпанъёсмы, шӧдонъёсмы но ужъёсмы вылын. Кызьы Библия лыдӟонэз пайдаёгес кароно? Со понна туж кулэ вӧсяськыны. Одӥг сузэр вераз: «Библиез лыдӟемлэсь азьло мон Иеговалы вӧсяськисько но солэсь юрттэтсэ курисько солэн Кылысьтыз „паймымон ужъёссэ“ адӟыны» (Пс. 118:18). Озьы ик милемлы лыдӟеммы вылын малпаськоно. Куке ми вӧсяськиськомы, Инмарлэсь Кылзэ лыдӟиськомы но со вылын малпаськиськомы, Иеговалэн малпанъёсыз сюлмамы мур пыӵало, но ми соосты яратыны кутскиськомы. (Лыдӟе Мадёнъёсты 4:20—22; Пс. 118:97.)

16. Кызьы милемлы интернет-телевиденимы юрттэ? Вералэ пример.

¹⁶ Инмарлэн малпанъёсыз сюлмамы пыӵало, интернет-телевиденимес учкыкумы но. Тани мар верало одӥг кузпалъёс: «Котькуд толэзе потӥсь программаос — со вӧсяськонъёсмылы ответ! Соос милемыз юнмато но милесьтым мылкыдмес ӝуто, куке мылкыдмы куашкамын но милемлы мӧзмыт. Ми ялан кылзӥськомы телевидениысьтымы кырӟанъёсты: сиён дасяку, коркамес сузяку яке чай юыку». Со программаослы луыса ми сюлэммес утиськомы. Соос дышето милемыз Иегова сямен малпаськыны но Шайтанлы сётскытэк улыны.

17, 18. а) Мае ми возьматӥськомы, улонамы Инмарлэн Кылысьтыз тодон-валанъёсты кутӥськомы ке, кызьы со адӟиське 1 Паралипоменонысь 28:9? б) Малы дышетэ Езекия эксэйлэн примерез? в) Мар сярысь ми вӧсяськыны быгатӥськомы, Давидлэсь кылъёссэ лыдэ басьтыса, кудъёсыз гожтэмын Псалтирьын 138:23, 24?

¹⁷ Котькуд дыръя, куке ми шонер ужъёсмылэсь пайдазэ адӟиськомы, милям осконмы юнма (Иак. 1:2, 3). Ми шумпотӥськомы,  малы ке шуоно Иегова данъяське милемын, милемыз ас нылпиосыныз нимаса, но милям солы ярамонзэ лэсьтыны мылкыдмы эшшо но юнма (Мад. 27:11). Котькуд визь сынаськон луонлык сётэ возьматыны, ми сюлмаськись Атаймес яратӥськомы но вань сюлмысьтымы солы ужаськомы-тыршиськомы шуыса. Но милям сюлэммы солэсь кылзӥськон но эриксэ быдэсъян мылкыдын тырмемын. (Лыдӟе 1 Паралипоменонэз 28:9.)

¹⁸ Янгышъёс лэсьтомы-а ми? Лэсьтомы, малы ке шуоно ми тырбыдэстэмесь. Но янгышакуды Езекия эксэез тодады вае. Со янгышъёс лэсьтылӥз, нош озьы ке но ӧпкелиз, но азьланяз со Иеговалы «оскиськымон вал», яке вань сюлмыныз солы ужаз-тыршиз (Ис. 38:3—6; 2 Пар. 29:1, 2; 32:25, 26). Ойдолэ пумит луоме Шайтанлэн милемлы ас малпанъёссэ пыӵатыны тыршемезлы. Ойдолэ вӧсяськомы, «визьнодо сюлэм» курыса (3 Экс. 3:9; лыдӟе Псалтирез 138:23, 24). Иеговалы оскымон кылён понна, туж кулэ сюлэммес утьыны.