1, 2. а) Малы паймонэз ӧвӧл, Иисус кулонзэ тодэ ваён пумысен огшоры куронъёс сётӥз шуыса? б) Иисуслэсь кыӵе сямъёссэ ми эскеромы?

 БЫГАТӤСЬКОДЫ-А тӥ вераны, кызьы ортчытӥське Иисус Христослэсь кулонзэ Тодэ ваён ӝытан? Тросэз ми пӧлысь быгатозы, малы ке шуоно со туж огшоры ортчытӥське. Озьы ке но, Ӝытан — со туж кулэ луись пумиськон. Нош малы со сокем огшоры ортчытӥське?

² Музъем вылын улыкуз, Иисус тодмо вал кулэ луись зэмлыкъёсты огшоры но валамон валэктэменыз (Матф. 7:28, 29). Озьы ик, куке со дышетскисьёсызлы валэктӥз, кызьы кулон нуналзэ пусъёно b, со огшоры, но со дыре ик мур пуштросэн куронъёсты сётӥз. Ойдолэ пыр-поч вераськомы Тодэ ваён ӝытан сярысь но со сярысь, мар Иисус соку вераз но лэсьтӥз. Ми умойгес валаломы, макем Иисус зӥбыт-востэм, кышкасьтэм но яратӥсь луэ, но малпаськомы со сярысь, кызьы солэсь эшшо но умойгес адӟем кароно.

3. Макем огшоры вал Ӝытан, кызьы адӟиське Матфейлэсь 26:26—28? Мае возьмато вал нянь но вина?

³ Куке Иисус Тодэ ваён ӝытанэз пусйыны косӥз, соин ӵош 11 оскымон апостолъёсыз вал. Со кутӥз сое, мар пасха бере кылиз, но та нуналэз огшоры амалэн пусйыны косӥз. (Лыдӟе Матфейлэсь 26:26—28.) Иисус ӝӧк вылысь  юмал нянез но винаез гинэ басьтӥз. Со апостолъёсызлы вераз, та огшоры символъёс тырбыдэс мугорзэ но вирзэ возьмато шуыса, кудъёссэ солы ӝоген соос понна сётоно вал. Апостолъёс чик ӧз пайме, вылды, макем огшоры вал та кулэ луись выль пумиськон. Малы?

4. Кызьы Иисуслэн кылъёсыз, кудъёссэ со Марфалы вераз, валаны юртто, малы Ӝытанэз пусъён сокем огшоры вал шуыса?

⁴ Ойдолэ тодамы ваёмы, мар луиз Иисуслэн ужан-тыршонэзлэн куинетӥ араз, ог ӝыны ар кулэмезлэсь азьло, куке со куноын вал матысь эшъёсыз дорын — Лазарь, Марфа но Мария дорын. Шутэтскыса пукыкузы, Иисус дышетыны кутскиз. Нош Марфа дуно кунолы пӧртэм сиёнъёс пӧран пӧлы выемын вал. Сое адӟыса, Иисус солы лякытэн валэктӥз, ӝӧк выл тыр сиён-юон котьку ик дасяны кулэ ӧвӧл шуыса (Лука 10:40—42). Дыр ортчыса, улонзэ курбонлы сётон азяз, Иисус аслаз визь-кенешезъя ик лэсьтӥз. Со возьматӥз, Ӝытанэз огшоры амалэн пусъёно шуыса. Мар со вера Иисус сярысь?

5. Иисуслэн кыӵе сямыз сярысь вера Ӝытанэз огшоры амалэн пусъён но кызьы со адӟиське Филиппыослы 2:5—8?

⁵ Иисуслэн вань кылъёсысьтыз но ужъёсысьтыз зӥбыт-востэм луэмез адӟиськиз. Музъем вылын улонэзлэн берпуметӥ уяз но со туж зӥбыт-востэм луэмзэ возьматӥз (Матф. 11:29). Иисус тодӥз, ӝоген со адямиослэн историязы тужгес но бадӟым курбон ваёз шуыса но Иегова сое улӟытоз но инмын Эксэе пуктоз шуыса. Озьы ке но, солэн аслыз трос саклык висъямез ӧз поты но со ӧз возьма, дышетскисьёсыз кулон нуналзэ аспӧртэмлыко амалэн пусъёзы шуыса. Со интые, Иисус вераз, соослы араз одӥг пол, огшоры пумиськонэз ортчытыса, сое буре вайыны кулэ луоз шуыса (Иоанн 13:15; 1 Кор. 11:23—25). Ӝытанэз огшоры, но со дыре ик тупамон амалэн пусйыны косэмез возьматэ, Иисус вылтӥяськись ӧй вал шуыса. Макем ми шумпотӥськомы, инмысь Эксэймы туж зӥбыт-востэм шуыса! (Лыдӟе Филиппыослы 2:5—8.)

6. Кызьы, шуг-секытъёсын пумиськыса, ми Иисуслэсь адӟем карыны быгатӥськомы?

⁶ Кызьы ми, Иисуслэсь адӟем карыса, зӥбыт-востэмесь луыны быгатӥськомы? Кылсярысь, асьмеос интые, нырысь ик мукетъёсыз сярысь малпаськыса (Флп. 2:3, 4). Тодамы ваёмы Иисуслэн улонысьтыз берпуметӥ уйзэ. Со  тодӥз, ӝоген курадӟыса кулоз шуыса, озьы ке но со туж сюлмаськиз оскымон апостолъёсыз понна, кудъёсыз со сярысь куректыса улозы. Соин ик быдэс уйзэ со соосты дышетыса, юнматыса но буйгатыса улӥз (Иоанн 14:25—31). Зӥбыт-востэм луыса, Иисус ачиз сярысь ӧз, нош дышетскисьёсыз сярысь сюлмаськиз. Макем умой адӟем карон со милемлы кельтӥз!

7. Кызьы Иисус кышкасьтэм луэмзэ возьматӥз, Ӝытанэз пусйыны косэмез бере кӧня ке дыр ортчыса?

⁷ Ӝытанэз пусйыны косэмез бере кӧня ке дыр ортчыса, Иисус туж кышкасьтэм луэмзэ возьматӥз. Со Атаезлэсь эриксэ быдэстыны дась вал, тодӥз ке но, маин со йылпумъяськоз: со виемын луоз кышкыт йыруж понна — Инмарез сантэман понна (Матф. 26:65, 66; Лука 22:41, 42). Иисус Инмарлы оскымон кылиз, солэсь нимзэ данъян понна, Инмарлэн кивалтыны правоез вань шуыса возьматон понна но ӧпкелись адямиослы быронтэм улонэ сюрес усьтон понна. Со дыре ик со дышетскисьёссэ вуоно шуг-секытъёслы дасяз.

8. а) Мар вераз Иисус оскымон апостолъёсызлы? б) Кызьы Христослэн кулэмез бере солэн дышетскисьёсыз трос аръёс ӵоже со кадь кышкасьтэмесь вал?

⁸ Кытысь адӟиськиз на Иисуслэн кышкасьтэм луэмез? Со ӧз малпаськы сюлмаськонъёсыз сярысь гинэ, кудъёсыз солэн вал, дыр, нош тыршиз оскымон апостолъёссэ юнматыны. Иуда кошкем бере Иисус огшоры пумиськонэз ортчытъяны косӥз. Зырӟем христианъёслы со тодазы вайытыны кулэ вал, кыӵе пайда ваёз солэн кисьтӥськем вирыз но выль тупанкыл (1 Кор. 10:16, 17). Дышетскисьёсыз оскымон кыльыны но Иисусэн ӵош инмын кивалтыны мед быгатозы шуыса, Иисус валэктӥз соослы, мае со но солэн Атаез  соослэсь возьмало (Иоанн 15:12—15). Озьы ик Иисус соослы вуоно шуг-секытъёс сярысь вераз. Собере со соослэсь мылкыдзэс ӝутӥз аслэсьтыз адӟем карыны но вераз: «Юнматске» (Иоанн 16:1—4а, 33). Трос аръёс ортчыса но, Иисуслэн дышетскисьёсыз, асьсэды жалятэк, солэсь адӟем каризы но кышкасьтэм луэмзэс возьматӥзы. Соос пӧртэм югдуръёсын ог-огзылы юрттылӥзы, соин сэрен шуг-секытъёсын пумиськыны быгато вал ке но (Евр. 10:33, 34).

9. Кызьы ми кышкасьтэм луыны быгатӥськомы, Иисуслэсь адӟем карыса?

⁹ Туннэ но, Иисуслэсь адӟем карыса, ми кышкасьтэм сяммес возьматӥськомы. Кылсярысь, со кулэ вын-агайёслы юрттон понна, кудъёссэ осконзы понна уйыло-улляло. Куд-ог шаеръёсын соосты янгыштэк пытсэтэ пукто. Сыӵе учыръёс кылдыку, милемлы лэсьтоно ваньзэ, мае быгатӥськомы, соослы юрттон понна, кылсярысь, соос понна вӧсяськоно, кивалтӥсьёслы вазиськоно но судъёсын соослы дурбасьтоно (Флп. 1:14; Евр. 13:19). Со сяна, ми кышкасьтэм сяммес возьматӥськомы, ӟеч иворез «кышкатэк вераса» (Ап. уж. 14:3). Христос сямен, ми котьку дась мукетъёсызлы Эксэйлык сярысь иворез вераны, со понна милемыз уйылозы-уллялозы ке но. Но кышкасьтэм луыны котьку ик уг пӧрмы. Мар милемлы юрттоз?

10. Мар милемлы кароно Ӝытан азьын кӧня ке арня ӵоже но малы со кулэ?

¹⁰ Кышкасьтэм луон понна, малпаськоно оскиськонмы сярысь, кудӥз милям вань Христослэн мозмытӥсь курбонэзлы луыса (Иоанн 3:16; Еф. 1:7). Ӝытан азьын кӧня ке арня ӵоже ми дун сётон понна тау карон мылкыдмес юнматыны быгатӥськомы. Кылсярысь, лыдӟе Библиез графикъя, кудӥз эскерыны юрттэ Иисуслэн кулон  азяз луэм учыръёсты, но вӧсяськыса соос вылын малпаське. Соку Ӝытанын ми умойгес валаломы, макем дуно луо нянь но вина, озьы ик Иисуслэн номырин ӵошатонтэм курбонэз, кудзэ та символъёс возьмато. Куке ми валаськомы, мар каризы ми понна Иегова но Иисус но кыӵе пайда со ваёз милемлы но матысьёсмылы, соку вуоноезлы оскиськонмы юнмалоз, но ми котькыӵе шуг-секытъёс пыр кышкатэк потыны дась луомы (Евр. 12:3).

11, 12. Мар сярысь тодамы вайытэ Ӝытан?

¹¹ Кызьы ми адӟимы, Ӝытан Христослэн туж дуно курбонэз сярысь гинэ уг, озьы ик солэн зӥбыт-востэм но кышкасьтэм луэмез сярысь тодамы вайытэ. Со сямъёсты Иисус али но возьматэ, инмын Быдӟым священник луыса но ми понна дурбасьтыса. Макем ми солы шумпотӥськомы! (Евр. 7:24, 25). Тау каронмес возьматон понна, милемлы Иисус Христослэсь кулонзэ Тодэ ваён ӝытанэз пусйыны кулэ, кызьы со дышетскисьёссэ косӥз (Лука 22:19, 20). Ми лэсьтӥськомы сое 14-тӥ нисанлы тупась нуналэ, кудӥз ар куспын тужгес но кулэ луись нунал луэ.

¹² Ӝытанлэн огшоры ортчытӥськемез Иисуслэн эшшо одӥг сямыз сярысь вера. Со сям Иисуслэсь мылкыдзэ ӝутӥз ми понна улонзэ сётыны. Музъем вылын улыкуз, со тодмо вал сыӵе сямо луэменыз. Кыӵе сям со?

13. Кызьы Иоаннлэсь 15:9 но 1 Иоаннлэн 4:8—10 возьмато, Иегова но Иисус милемыз ярато шуыса, но кин сое ас вылаз шӧдыны быгатэ?

¹³ Атаез сямен, Иисус адямиосты юн яратӥз. (Лыдӟе Иоаннлэсь 15:9; 1 Иоаннлэсь 4:8—10.) Со дась луыса ми понна улонзэ сётӥз. Та курбон Иеговалэсь но Христослэсь юн яратэмзэс возьматэ. Сое ас вылазы шӧдыны быгато кызьы зырӟем христианъёс, озьы ик «мукет ыжъёс» но (Иоанн 10:16; 1 Иоанн 2:2). Со сяна, малпаське символъёс сярысь, кудъёсыз Ӝытанын кутӥсько. Соос возьмато, Иисус дышетскисьёссэ яратэ но соос сярысь сюлмаське шуыса.

14. Кызьы Иисус возьматӥз, дышетскисьёссэ яратэ шуыса?

¹⁴ Иисус Ӝытанэз аспӧртэмлыко амалэн ортчытыны ӧз косы, нош огшоры символъёсты уже кутыса пусйыны косӥз. Озьы со возьматӥз, зырӟем христианъёсты яратэ шуыса. Соослы Ӝытанэз котькуд аре пусъёно вал, куддыръя пӧртэм югдуръёсын — пытсэтын гинэ но (Усьт. 2:10). Быгатӥзы-а соос Иисуслэсь кылзӥськыны? Быгатӥзы!

15, 16. Вералэ, кызьы куд-ог христианъёс туж секыт югдуръёсы но Ӝытанэз пусйылӥзы.

¹⁵ Нырысетӥ даурысен асьме нуналозь зэмос христианъёс котьку, секыт югдуръёсы но, тыршизы Ӝытанэз пусйыны озьы, кызьы Иисус возьматӥз. Эскеромы куд-ог учыръёсты. Харольд Кинг агайлы, кудӥз Китайын пытсэтын одӥгназ пукиз, Ӝытанэз ортчытон понна, кыӵе ке амал шедьтоно вал. Со лушкемен символъёсты дасяз солэсь, маиз солэн вал, но Ӝытанэз пусъён нуналэз лыдъяны тыршиз. Куке дыр вуиз, со кырӟанэз кырӟаз, вӧсяськиз но речь вераз.

¹⁶ Тани мукет учыр. Кыкетӥ дунневыл ож дыръя концлагерьын пукись сузэръёс, Ӝытанэз ортчытон понна, улонзэс но сётыны дась вал. Символъёс огшорыесь вал бере, пусъемзэс нокин но ӧз адӟы. Соос веразы: «Ми султӥмы тӧдьы басмаен шобыртэм пукон котыре, кудӥз вылэ нянь но вина пуктэмын вал. Электротыл сэрен милемыз  медаз адӟе шуыса, ми сюсьтыл ӝуатӥмы. [...] Ми нош ик вань сюлмысьтымы Атаймылы кыл сётӥмы, солэсь нимзэ данъян понна, вань кужыммес пономы шуыса». Кыӵе юн оскон! Ӝытанэз туж секыт югдуръёсы но пусйыны луэ, малы ке шуоно Иисус, милемыз яратыса, сое огшоры амалэн ортчытыны косӥз.

17. Кыӵе юанъёс вылын милемлы малпаськыны умой луысал?

¹⁷ Куке Ӝытан матэктэ, аслэсьтыд юаны луоз: «Кызьы мон, Иисуслэсь адӟем карыса, мукетъёссэ эшшо но юнгес яратыны быгатӥсько? Мар сярысь мон тросгес сюлмаськисько: аслам кулэяськонъёсы яке мукетъёсызлэн кулэяськонъёссы сярысь? Возьмасько-а мон укыр троссэ вын-агайёслэсь но сузэр-апайёслэсь яке валасько-а, соос ваньзэ лэсьтыны уг быгато шуыса?» Ойдолэ котьку Иисуслэсь адӟем каромы но мукетъёсызлы гажан-жалянмес возьматомы (1 Пётр 3:8).

18, 19. а) Малы ми оскыны быгатӥськомы? б) Мар милемлы кароно али ик ини?

¹⁸ Ӝоген Христослэсь кулонзэ Тодэ ваён ӝытанэз ми ум пусъе ини. Куке Иисус быдӟым куректон дыръя лыктоз, со люкалоз берпуметӥ «быръем адямиоссэ», кудъёсыз соин ӵош инмын кивалтозы. Собере Ӝытанэз уз пусъе ини (Матф. 24:31; 1 Кор. 11:26).

¹⁹ Соку но Иеговалэн калыкез шуныт мылкыдын тодаз вайылоз Господьлэсь Ӝытанзэ — огшоры пумиськонэз, кудӥз Иисуслэн зӥбыт-востэм, кышкасьтэм но яратӥсь луэмез сярысь вера. Со дыре Инмарлэн ужась-тыршисьёсыз, кудъёсыз Ӝытанэз пусйылӥзы, со сярысь мукетъёсызлы одно ик вералозы. Нош али ойдолэ Иисуслэсь адӟем каромы, зӥбыт-востэм, кышкасьтэм но яратӥсь луэммес возьматыса. Соку оскыны луоз, Иегова милемыз бакель кароз шуыса (2 Пётр 1:10, 11).