1, 2. а) Мае адӟе Иегова, куке трос миллион адямиос Ӝытанэ лыкто? (Учке вылбамысь туспуктэмез.) б) Мае ми эскеромы та статьяын?

 КУКЕ быдэс дунне вылын трос миллион адямиос Христослэсь кулонзэ Тодэ ваён ӝытанэ лыкто, Иегова трос калыкез гинэ уг адӟы, нош котькуд адямиез адӟе. Со адӟе, кин арысь аре кельтылытэк та пумиськонэ ветлэ. Кин ке но соос пӧлысь лек уйылон-уллянъёсын пумиськылэ. Нош кин ке но мукет пумиськонъёсы шер ветлэ, но Ӝытанэ одно ик лыктыны тырше. Иегова синйылтэ соосты но, кинъёс та пумиськонэ нырысьсэ лыктӥзы, тунсыкъяськыса, вылды.

² Зэм но, Иегова шумпотэ адӟыны, Ӝытанэ сомында адямиос лыкто шуыса (Лука 22:19). Нош со саклыксэ уг висъя солы гинэ, кӧня адямиос лыктӥзы. Иегова понна кулэгес луэ, малы соос лыктӥзы. Та статьяын ми эскеромы кулэ луись юанэз: малы ми, котькуд аре ортчись Ӝытанэ сяна, котькуд арняе ортчись пумиськонъёсы но ветлӥськомы, кудъёсаз Иегова сое яратӥсьёс сярысь сюлмаське?

3. Малы ми пумиськонъёсы ветлӥськомы?

³ Ми христиан пумиськонъёсамы ветлӥськомы, малы ке шуоно соос Иеговалы йыбырттонмы пӧлы пыро. Со сяна, отын Иегова милемыз дышетэ. Вылтӥяськись адямиослэн малпамзы ик уг поты, соосты кин ке но дышетоз шуыса (3 Иоанн 9). Нош ми шумпотӥськомы, Иегова но  солэн организациез милемыз дышето шуыса (Ис. 48:17, 18; Иоанн 6:45).

4. а) Мар сярысь вера пумиськонъёсы ветлэммы? б) Малы милемлы Ӝытанэ котьку ветлоно, кызьы адӟиське 1 Коринфъёслы 11:23—26?

⁴ Пумиськонъёсы ветлэммы возьматэ, ми зӥбыт-востэмесь но дышетскыны дась шуыса. Ми Тодэ ваён ӝытанэ ветлӥськомы, малы ке шуоно тодӥськомы, со туж кулэ луись пумиськон шуыса. Озьы ик ми, зӥбыт-востэм луыса, кылзӥськиськомы Иисуслэн курон-косонэзлэсь: «Монэ буре вайыса, тазьы каре». (Лыдӟе 1 Коринфъёслы 11:23—26.) Та нимысьтыз пумиськон вуоноезлы осконмес юнматэ но тодамы вайытэ, макем юн Иегова милемыз яратэ. Но Инмар тодэ, мылкыдэз ӝутон но юнматон милемлы араз одӥг пол гинэ кулэ ӧвӧл шуыса. Соин со сюлмаськиз, милям котькуд арняе ортчись пумиськонъёсмы мед луозы шуыса, но со ӧте милемыз отчы ветлыны. Инмарлэсь кылзӥськон но пумиськонъёсы ветлон понна, зӥбыт-востэм сям кулэ. Котькуд арняе ми трос дыр висъяськомы, соослы дасяськон но отчы ветлон понна.

5. Малы зӥбыт-востэм адямиос Иеговалэн ӧтемезлы вазисько?

⁵ Иегова вань адямиосты ӧте солэсь дышетскыны, но котькуд аре трос зӥбыт-востэм адямиос та ӧтёнлы вазисько (Ис. 50:4). Ӝытанын соослы сокем кельше, соос мукет пумиськонъёсы но ветлыны кутско (Зах. 8:20—23). Ми шумпотӥськомы соосын ӵош дышетскыны Иеговалэсь, милям Юрттӥсьмылэсь но Мозмытӥсьмылэсь (Пс. 39:18). Быгатэ-а мар ке но мукетыз кулэгес луыны но тросгес шумпотон вайыны, Иеговалэсь но яратоно Пиезлэсь, Иисуслэсь, дышетскем сяна? (Матф. 17:5; 18:20; 28:20).

6. Кызьы зӥбыт-востэм сям одӥг пиосмуртлы Ӝытанэ лыктыны юрттӥз?

⁶ Котькуд аре ми тросгес адямиосты Ӝытанэ ӧтьыны тыршиськомы. Трос зӥбыт-востэм адямиос та ӧтёнлы вазисько но со сярысь уг жаляло. Тани одӥг учыр. Кӧня ке ар талэсь азьло одӥг агай пиосмуртлы Ӝытанэ ӧтён сётӥз. Со басьтӥз сое, но вераз, лыктэмез уз луы шуыса. Макем агай паймиз, куке адӟиз, пиосмурт Ӝытанэ лыктӥз ик шуыса! Пиосмуртлы туж яраз, сое шуныт пумитазы шуыса, но со Эксэйлык юртэ котькуд арняе ветлыны кутскиз. Быдэс ар куспын со куинь пумиськонъёсты гинэ кельтӥз. Мар юрттӥз солы пумиськонъёсты дунъяны? Зӥбыт-востэм луыса, со ужъёссэ кельтӥз но Ӝытанэ лыктӥз. Агай, кудӥз сое ӧтиз, берлогес вераз: «Со туж зӥбыт-востэм адями». Иегова та пиосмуртэз ас дораз вайиз, но табере со пылатӥськем христиан мурт (2 Экс. 22:28; Иоанн 6:44).

7. Кызьы тодон-валанъёс, кудъёссэ ми басьтӥськомы, пумиськонъёсы ветлыса но Библиез лыдӟыса, милемлы зӥбыт-востэм луыны юртто?

⁷ Тодон-валанъёс, кудъёссэ ми басьтӥськомы, пумиськонъёсы ветлыса но Библиез лыдӟыса, юртто милемлы зӥбыт-востэм луыны. Ӝытан азьын кӧня ке арня ӵоже валтӥсь саклык висъяське Иисуслэн примерезлы но зӥбыт-востэм луэмезлы, кудзэ со возьматӥз, ми понна улонзэ сётыса. Нош Ӝытан азьын кӧня ке нунал ӵоже ми тыршиськомы лыдӟыны Библиысь кылбуръёсты, кудъёсыз Иисуслэн кулонэныз но улӟонэныз герӟаськемын. Ваньмыз со милемлы Христослэсь курбонзэ эшшо но дунъяны юрттэ. Тау каронэн пачылмем сюлэммы мылкыдмес ӝутэ, Иисус сямен, зӥбыт-востэм луыны но Иеговалэсь эриксэ быдэсъяны, куддыръя со капчи ӧвӧл ке но (Лука 22:41, 42).

8. Кытысь адӟиськиз Иисуслэн кышкасьтэм луэмез?

⁸ Озьы ик, Иисус сямен, ми кышкасьтэм луыны тыршиськомы. Тодады вае, макем кышкатэк со ортчытӥз музъем вылын улонэзлэсь берпуметӥ нуналъёссэ. Со умой тодэ вал, ӝоген тушмонъёсыз сое сантэмалозы, жугозы но собере кортӵогалозы шуыса (Матф. 20:17—19). Озьы ке но, со ваньзэ чиданы дась вал. Куке дыр вуиз, со вераз оскымон апостолъёсызлы, кудъёсыз соин ӵош Гефсиман садын вал: «Султэлэ, мыноме: тани, Монэ вузась мурт матам лыктӥз ини» (Матф. 26:36, 46). Нош куке ожмаськон тӥрлыкен адямиос сое кутыны лыктӥзы, со азязы потӥз но вераз, со Иисус шуыса, кудзэ соос утчало, но ожгарчиосты куриз апостолъёссэ лэзьыны (Иоанн 18:3—8). Макем кышкасьтэм луэмзэ Иисус возьматӥз! Туннэ зырӟем христианъёс но мукет ыжъёс, Иисуслэсь адӟем карыса, кышкасьтэм луыны тыршо. Кызьы?

9. а) Малы куддыръя кышкасьтэм сям кулэ, кенешлэн пумиськонъёсаз ялан ветлон понна? б) Кызьы оскымон луэммы пытсэтын пукись вын-агайёс но сузэр-апайёс вылын шӧдӥське?

⁹ Пумиськонъёсы ялан ветлон понна, куддыръя кышкасьтэм сям кулэ. Ми пӧлысь куд-огъёсыз пумиськонъёсы ветло, куректонэн пумиськемзы, усем мылкыдзы яке ляб тазалыксы шоры учкытэк. Мукетъёсызлы семьязы яке кивалтӥсьёс люкето. Малпаське, кызьы милям оскымон луэммы шӧдӥське вын-агайёс но сузэр-апайёс вылын, кудъёсыз осконзы понна пытсэтын пуко (Евр. 13:3). Куке соос кыло, ми шуг-секытъёс шоры учкытэк, Иеговалы ужаськомы-тыршиськомы шуыса, со соослы кужым сётэ осконэн, кышкатэк но Иеговалы оскымон кыльыса улыны. Апостол Павел но со выллем учырын вал. Римын жильыетын пукыкуз, со шумпотэ вал кылыны, вын-агайёс Инмарлы оскымон ужало-тыршо шуыса (Флп. 1:3—5, 12—14). Мозмытэмзылэсь азьло яке со берегес ик Павел Еврейёслы гожтэтсэ гожтӥз. Отын со оскымон христианъёсты ӧтиз: «Куспады огдэс огды агай-вынъёс кадь яратыса улэ». Озьы ик Павел пумиськонъёсы кельтылытэк ветлыны мылкыдзэс ӝутӥз (Евр. 10:24, 25; 13:1).

10, 11. а) Кинэ милемлы Ӝытанэ ӧтёно? б) Малы ми сое лэсьтӥськомы, кызьы адӟиське Ефесъёслы 1:7?

¹⁰ Ӝытанэ ӵыжы-выжыосмес, ӵош ужасьёсмес но бускельёсмес ӧтён понна но, кышкасьтэм сям кулэ. Нош малы ми соосты ӧтиськомы? Милям туж потэ соосты Ӝытанэ ӧтеммы, малы ке шуоно ми туж дунъяськомы сое, мар лэсьтӥзы ми понна Иегова но Иисус. Милям потэ, мукетъёсыз но ас вылазы Инмарлэсь гажан-жалянзэ мед шӧдозы шуыса, кудзэ со дун сётон пыр возьматӥз. (Лыдӟе Ефесъёслы 1:7; Усьт. 22:17.)

¹¹ Пумиськонъёсы ветлыса, ми эшшо одӥг сямез возьматӥськомы, кудӥныз тодмо луэ Иегова но солэн Пиез.

12. а) Кызьы пумиськонъёсмы Иеговаез но Иисусэз яратэммес юнмато? б) Мар милемлы лэсьтоно, Христослэсь адӟем карыса, кызьы гожтэмын 2 Коринфъёслы 5:14, 15?

¹² Ми христиан пумиськонъёсы ветлӥськомы, малы ке шуоно Иеговаез но Иисусэз яратӥськомы. Но со, мае ми тодӥськомы пумиськонъёсын, яратонмес эшшо но юнматэ. Эксэйлык юртын ми ялан кылӥськомы со сярысь, мар ми понна Иегова но солэн Пиез лэсьтӥзы (Рим. 5:8). Нош Ӝытан эшшо но тодамы вайытэ, макем юн соос ярато адямиосты, сооссэ но, кин уг вала на дун сётонлэсь дуно луэмзэ. Дун сётон понна тау карон милесьтым мылкыдмес ӝутэ котькуд нунал Христослэсь адӟем карыса улыны. (Лыдӟе 2 Коринфъёслы 5:14, 15.) Со сяна, милям юн мылкыдмы вань Иеговаез данъяны паймымон кузьымез понна. Кызьы сое лэсьтыны луэ? Кылсярысь, ми Инмарлы яратэммес возьматыны быгатомы, кенешлэн пумиськонъёсаз вань сюлмысьтымы эскеронэ пыриськыса.

13. Кызьы возьматоно, ми Иеговаез но солэсь Пизэ юн яратӥськомы шуыса? Валэктэ.

¹³ Иеговаез но солэсь Пизэ юн яратэммес возьматыны луэ, соос понна малэсь ке но куштӥськыны дась луыса. Ӵем дыръя озьы лэсьтоно луэ, христиан пумиськонъёсы ветлон понна. Тросаз кенешъёсын одӥгез пумиськон ужан нуналэ ӝытазе ортчытӥське, куке ми жадемын, вылды. Мукетыз пумиськон ортчытӥське шутэтскон нуналэ, куке мукетъёсыз ял каро. Адӟе-а Иегова, макем милемлы тыршоно луэ, жадеммы шоры учкытэк пумиськонъёсы лыктон понна? Одно ик адӟе! Макем тросгес ми тыршиськомы, сокем золгес Иегова дунъя сое яратэммес (Марк 12:41—44).

14. Кызьы Иисус сюлмысь яратонзэ возьматӥз но кызьы солэсь адӟем кароно?

¹⁴ Иисус милемлы адӟем карон кельтӥз, кызьы сюлмысь яратоно. Со дась вал дышетскисьёсыз понна кулыны но котькуд нунал, ачиз интые, соос сярысь тросгес сюлмаськыны. Одӥг пол со туж жадемын вал, озьы ке но со дышетскисьёсызлы дыр висъяз (Лука 22:39—46). Иисус понна, басьтон сярысь, сётыны кулэгес вал (Матф. 20:28). Иеговаез но вын-агайёсмес Иисус кадь юн яратӥськомы ке, соку ми туж тыршомы Ӝытанэ но мукет пумиськонъёсы ветлыны.

15. Кинлы милям тужгес но юрттэммы потэ?

 ¹⁵ Кыӵе ми шумпотӥськомы, зэмос христианъёслэн вынлыксы пӧлы пыриськомы шуыса! Ми ум жаляське дырмес, мукетъёссэ но ми пӧлы кариськыны ӧтён понна. Но тужгес но милям юрттэммы потэ христианъёслы, кудъёсыз тодытон уже пыриськемысь яке кенеше ветлэмысь дугдӥзы (Гал. 6:10). Со вын-агайёсмес но сузэр-апайёсмес яратыса, ми ӧтиськомы соосты пумиськонъёсамы, тужгес но Ӝытанэ. Ми туж шумпотӥськомы, куке кин ке соос пӧлысь яратӥсь Атаймы но Возьмасьмы доры берытске. Сыӵе ик шӧдонъёссы Иеговалэн но Иисуслэн (Матф. 18:14).

16. а) Кызьы ми ог-огмылэсь мылкыдмес ӝутыны быгатӥськомы но малы милемлы вань пумиськонъёсы ветлоно? б) Малы али тупась дыр Иисуслэсь кылъёссэ тодамы вайыны, кудъёсыз гожтэмын Иоаннлэсь 3:16?

¹⁶ Вуоно арняосы ойдолэ тыршомы тросгес адямиосты Ӝытанэ ӧтьыны, кудӥз ортчытӥськоз 2019-тӥ арын 19-тӥ оштолэзе, удмуртарняе. (Учке « Ӧте ваньзэс!» рамкаез.) Нош ар ӵоже тыршомы ог-огмылэсь мылкыдмес ӝутыны, вань христиан пумиськонъёсы ветлыса. Шайтан дуннелэн пумыз матэктэмъя, пумиськонъёсы ветлыны эшшо но кулэгес луэ, малы ке шуоно соос юртто зӥбыт-востэм, кышкасьтэм но яратӥсь луыны (1 Фес. 5:8—11). Ойдолэ вань сюлмысьтымы Иеговалы но солэн Пиезлы тау каромы, милемыз юн яратэмзы понна! (Лыдӟе Иоаннлэсь 3:16.)