1. Кыӵе юанмы милям кылдыны быгатэ?

 КОТЬКИНЛЭН каньыл сюлмын улэмез потэ. Нокинлэн но сюлмаськыса улэмез уг поты. Но туннэ сюлмаськонъёстэк уг луы. Соин ик паймонэз ӧвӧл, Иеговалэн куд-ог ужась-тыршисьёсыз, Давид сямен, Инмарлэсь юазы: «Кема-а мыным сюлмаськыса улоно на? Уй но нунал сюлэмам куректон-кайгу улэ» (Пс. 12:3).

2. Мае ми эскеромы та статьяын?

² Чик сюлмаськытэк улыны уг луы. Но ми быгатӥськомы укыр трос сюлмаськытэк улыны. Та статьяын нырысь ми эскеромы, малы сюлмаськонъёс кылдо, собере эскеромы куать пайдаё визь-кенешъёсты, кудъёсыз юрттозы милемлы шуг-секытъёс дыръя но каньыл сюлмын улыны.

3. Кыӵе мугъёсын сэрен сюлмаськонъёс кылдо но быгатӥськомы-а ми мар ке но карыны, сыӵе мугъёс ӧжытгес мед луозы шуыса?

³ Сюлмаськонъёс трос мугъёсын сэрен кылдыны быгато. Куддыръя ми номыр карыны ум быгатӥське, сыӵе мугъёс ӧжытгес мед луозы шуыса. Кылсярысь, сиён-юон, дӥськут но улон инты арысь аре дуногес но дуногес луо, ӵош ужасьёсмы яке ӵош дышетскисьёсмы мылкыдмес ӝутыны быгато урод ужъёс лэсьтыны яке азон-калгон сьӧлыке пырыны. Озьы ик ми номыр карыны ум быгатӥське, улосамы йыружъёс ӧжытгес мед луозы шуыса. Ми шуг-секытъёсын пумиськылӥськомы, малы ке шуоно  улӥськомы дуннеын, кудаз тросэз адямиос Библиысь возетъёсъя уг уло. Шайтан, та дуннелэн Инмарез, тодэ, «таизлэн дуннелэн сюлмаськонэз» куд-ог адямиослы Иеговалы ужаны-тыршыны люкетэ шуыса (Матф. 13:22; 1 Иоанн 5:19). Соин ик валамон, малы адямиос сокем сюлмаськыса уло.

4. Маин сэрен ми сюлмаськыны быгатӥськомы?

⁴ Шуг-секытъёсын пумиськыса, ӵем дыръя ми сюлмаськыны кутскиськомы. Кылсярысь, кин ке но сюлмаське, уждунэз самой кулэезлы но уз тырмы шуыса. Кин ке но сюлмаське, висемез сэрен ужаны уз быгаты яке ужзэ ыштоз шуыса. Нош кин ке но сюлмаське, визь сынаськонэз уз вормы но Инмарлэсь кылзӥськыны уз быгаты шуыса. Ӝоген Шайтан солэн ки улаз возиськись адямиослэсь мылкыдзэс ӝутоз Инмарлэн калыкез вылэ урдскыны. Соин ик ми сюлмаськыны быгатӥськомы, кызьы со дыре асьмеды возёмы шуыса. Оло нош, милям юанмы кылдэ: «Умойтэм-а, мон та сярысь сюлмаськисько шуыса?»

5. Мар сярысь вераз Иисус, куке шуиз: «Эн сюлмаське»?

⁵ Ми тодӥськомы, мар вераз Иисус аслаз дышетскисьёсызлы: «Эн сюлмаське» (Матф. 6:25). Возьматэ-а со, милемлы чик но сюлмаськоно ӧвӧл шуыса? Уг, уг возьматы. Ми тодӥськомы, вашкала дыръя Инмарлэн куд-ог оскымон ужась-тыршисьёсыз но туж сюлмаськыса улӥзы шуыса. Но Иегова соосты ӧз палэнты (3 Экс. 19:4; Пс. 6:4) b. Иисуслэн кылъёсыз милемыз буйгато. Солэн уг поты, сиён-юон, дӥськут но улон инты сярысь сюлмаськонъёс сэрен ми Инмарлы ӧжытгес ужаны-тыршыны мед кутскомы шуыса. Мар юрттоз милемлы укыр трос сюлмаськытэк улыны? (Учке « Мар кароно со понна» рамкаез.)

6. Филиппыослы 4:6, 7 верамъя, мар юрттоз милемлы сюлмаськонъёсмес вормыны?

⁶ 1. Ӵем вӧсяське. Тӥ мар ке но понна сюлмаськиськоды ке, вӧсяське Иеговалы, юрттэт курыса (1 Пётр 5:7). Вӧсяськемдылы Инмар ответ сётоз но, тӥ шӧдоды, «Инмарлэн каньыллыкез котькыӵе визьлэсь но вылӥын» шуыса. (Лыдӟе Филиппыослы 4:6, 7.) Сюлмаськонъёстэс вормон понна, Иегова сётоз тӥледлы кужмо святой духсэ (Гал. 5:22).

7. Мар сярысь тодамы возёно, Иеговалы вӧсяськыкумы?

⁷ Вӧсяськыкуды Иеговалы сюлэмдэс усьтэ. Пыр-поч вералэ солы, кыӵе тӥляд шуг-секытъёсты вань но мар сярысь тӥ сюлмаськиськоды. Тӥ шуг-секыттэс сэрттыны-пертчыны быгатӥськоды ке, соку Иеговалэсь визьлык куре, валан понна, кызьы сое лэсьтоно. Озьы ик солэсь кужым куре, та шуг-секыттэс сэрттон-пертчон понна. Нош шуг-секытэныды номыр карыны уд ке быгатӥське, Иеговалэсь юрттэт куре, со сярысь укыр трос медад сюлмаське шуыса. Пыр-поч вӧсяськыса, тӥ умойгес адӟоды, кызьы Иегова вӧсяськемдылы ответ сётэ. Нош Инмар соку ик ответ уг сёты ке, киостэс эн лэзе. Солэн потэ, пыр-поч вӧсяськем сяна, тӥ юн мылкыдын мед куроды шуыса (Лука 11:8—10).

8. Мар сярысь вӧсяськоно?

 ⁸ Вӧсяськыкуды, сюлмаськонъёстэс верам сяна но мае ке курем сяна, Иеговалы тау карон кылъёс но вералэ. Туж секыт дыръя но адӟыны тыршоно, кызьы Иегова милемыз бакель каре. Куддыръя тупась кылъёс шедьтыны секыт. Соку тодады возе: Иегова ответ сётоз, тӥ солы «Юртты мыным!» шуыса гинэ верады ке но (2 Пар. 18:31; Рим. 8:26).

9. Мар кароно, куке ми малэсь ке кышкаськомы?

⁹ 2. Иеговалэн визьлыкезлы оскиське, нош асьтэлэн валамдылы эн оскиське. Асьме вакытлэсь азьло VIII даурын Иуда вылэ Ассирия урдскыны малпа вал. Ассирия ки улэ медаз сюре шуыса, соос Египетлы юрттэт курыса вазиськизы (Ис. 30:1, 2). Иегова Иуда калыклы шуиз, Египет соосты уз утьы шуыса (Ис. 30:7, 12, 13). Исаия пророк пыр Иегова соослы вераз, мар кароно утиськон понна. Пророк гожтӥз: «Каньыл сюлмын но оскиськыса улон бордын тӥляд кужымды» (Ис. 30:15, ВД).

10. Кыӵе учыръёсын милям возьматэммы потэ, ми Иеговалэн визьлыкезлы оскиськомы шуыса?

¹⁰ Кызьы возьматоно, ми Иеговалэн визьлыкезлы оскиськомы шуыса? Эскеромы куд-ог учыръёсты. Шуом, тӥледлы бадӟым уждунэн уж ӵекто. Соглаш кариськиды ке, тӥледлы кемагес ужано луоз но тӥ уд быгатэ ини Иеговалы ужаны-тыршыны сомында, кӧня али быгатӥськоды. Яке ӵош ужасьты тӥледлы синмаськемзэ возьматэ, нош со Иеговалэн Адӟись-Ивортӥсез ӧвӧл. Оло нош, семьяысьтыды кин ке но бырйыны косэ: «Яке мон, яке Инмаред!» Вань та учыръёсын быръён лэсьтыны секыт. Но Иегова юрттоз тӥледлы шонер ужпум кутыны (Матф. 6:33; 10:37; 1 Кор. 7:39). Нош тӥ Иегова вылэ оскиськоды-а но солэсь кылзӥськоды-а?

11. Библиысь кыӵе примеръёс юртто каньыл сюлмын улыны, уйылон-уллянъёсын пумиськыкумы но?

¹¹ 3. Дышетске умой но урод примеръёс вылын. Библиын гожтэмын трос учыръёс, кудъёсыз возьмато, макем кулэ каньыл сюлмын улыны но Иеговалы оскиськыны. Та учыръёс сярысь малпаськыкуды, валаны тырше, мар юрттӥз Инмарлэн ужась-тыршисьёсызлы лек уйылон-уллянъёс дыръя но каньыл сюлмын улыны. Кылсярысь, куке Сӥнедрион апостолъёсыз тодытыны ӧз лэзьы, соос кышканлы ӧз сётске. Соос юн мылкыдын веразы: «Адямиослы сярысь, Инмарлы золгес тэрытскыны кулэ» (Ап. уж. 5:29). Соосты жугем бере но соос ӧз кышкалэ. Малы? Малы ке шуоно апостолъёс тодӥзы, Иегова соослы юрттэ шуыса. Соин ик соос азьланяз но ӟеч иворез тодытӥзы (Ап. уж. 5:40—42). Озьы ик, куке Стефанэз виыны малпазы, со каньыл сюлмын улӥз, «солэн ымнырыз Кылчинлэн ымнырызлы укшась луиз» (Ап. уж. 6:12—15). Малы? Малы ке шуоно со юн оскиз, со Иеговалы ярамон луэ шуыса.

12. Малы ми шудо луыны быгатӥськомы, куке милемыз уйыло-улляло, 1 Пётрлэн 3:14 но 4:14 гожтэмъя?

¹² Иегова апостолъёслы быгатонлык сётӥз паймымон ужъёс лэсьтыны. Та возьматӥз, Иегова соосын шуыса (Ап. уж. 5:12—16; 6:8). Туннэ христианъёс паймымон ужъёс лэсьтыны уг быгато. Но Иегова аслаз Кылыз пыр оскытэ милемыз, шонерлык понна курадӟиськомы ке, ми шудоесь шуыса, малы ке шуоно ми солэсь сюлэмзэ шумпоттӥськомы но солэн духез ми вылын улэ. (Лыдӟе 1 Пётрлэсь 3:14; 4:14.) Соин ик сюлмаськоно ӧвӧл,  вуоно лек уйылон-уллянъёсты чиданы быгатомы-а, ум-а шуыса. Со интые, али ик ини осконмес юнмато, Иегова милемлы юрттоз но милемыз утёз шуыса. Нырысетӥ христианъёс сямен, милемлы осконо Иисуслы, кудӥз вераз: «Мон тӥледлы кыл но, визь но сёто, тӥляд пумитъяськисьёсты пӧлысь талы пумит кыл вераны, пумит султыны одӥгез но уз быгатэ». Озьы ик со вера: «Чидан пыр лулъёстэс утелэ». Мукет сямен вераса, чидан юрттоз милемлы утиськыны (Лука 21:12—19). Со сяна, тодамы возёно: Иегова уг вунэты ужась-тыршисьёссэ, кудъёсыз кулытозязы солы оскымон ужазы-тыршизы, но соосты улӟытоз.

13. Кыӵе пайда ваёз, ми малпаськимы ке соос сярысь, кинъёс каньыл сюлмын но Иеговалы оскиськыса ӧз улэ?

¹³ Ойдолэ малпаськомы соос сярысь, кинъёс каньыл сюлмын но Иеговалы оскиськыса ӧз улэ. Со юрттоз милемлы соослэн кадь янгышъёс лэсьтытэк улыны. Тодамы ваёмы Аса эксэез. Куке Иуда вылэ туж трос эфиоп ожгарчиос урдскизы, со Иеговалы оскиськиз но, Инмар солы вормыны юрттӥз (2 Пар. 14:9—12). Нош берлогес, куке Иудалы пумит Ваасалэн, израиль эксэйлэн, трослы ӧжытгес ожгарчиосыз урдскизы, Аса Иеговалэсь юрттэтсэ ӧз утча. Со интые, Иуда Сириялэн эксэезлы коньдон ыстӥз, со солы утиськыны мед юрттоз шуыса (2 Пар. 16:1—3). Кулон азяз Аса секыт висьыны усиз, нош со соку но Иеговалэсь юрттэтсэ ӧз утча (2 Пар. 16:12).

14. Малы ми дышетскыны быгатӥськомы, Асалэн янгышъёсыз сярысь малпаськыса?

¹⁴ Секыт дыръёсы Аса Иеговалэсь юрттэтсэ нырысь утчаз. Нош берлогес шуг-секытъёссэ со ачиз сэрттыны-пертчыны кутскиз. Малпаны луоз, куке Аса Сириялэн эксэезлы вазиськиз, со визьмо вал шуыса. Но со ӧз юртты Иудалы Израилен кема дыр ӵоже тупаса улыны. Аслаз пророкез пыр Иегова Асалы вераз, малы озьы луиз: «Тон Сириялэн эксэез вылэ оскиськид, аслад Инмаред Кузё-Инмар вылэ ӧд оскиськы» (2 Пар. 16:7). Милемлы но малпано ӧвӧл, Инмарлэн Кылысьтыз кивалтэт утчатэк, ми асьмеос шуг-секытъёсмес сэрттыны-пертчыны быгатомы шуыса. Милемлы туж ӝог ужпум кутоно ке но, каньыл сюлмын улыны но Иеговалы оскиськыны кулэ. Соку Инмар юрттоз милемлы шонер ужпум кутыны.

15. Мар карыны умой луысал, Библиез лыдӟыкумы?

¹⁵ 4. Дышетэ Библиысь кылбуръёсты. Библиез лыдӟыкуды, тӥ шедьтӥськоды кылбуръёсты со сярысь, макем кулэ каньыл сюлмын но Иеговалы оскиськыса улыны, тырше соосты дышетыны. Мар со понна кароно? Соосты шара лыдӟе яке кытчы ке гожтэ, соос син азяды мед луозы шуыса. Иегова косӥз Иисус Навинэз уй но, нунал но законэн книгаез лыдӟыны. Со юрттысал солы визьмо ужпумъёс кутыны, кышкасьтэм луыны но юн мылкыдын Инмарлэсь калыксэ нуыны (Ис. Н. 1:8, 9). Инмарлэн Кылаз вань кылбуръёс, кудъёсыз юрттозы милемлы буйгатскыны, куке милемыз мар ке но сюлмаськытэ яке кышкатэ (Пс. 26:1—3; Мад. 3:25, 26).

16. Кызьы кенеш пыр Иегова юрттэ милемлы каньыл сюлмын но солы оскиськыса улыны?

¹⁶ 5. Дырдэс ортчытэ Инмарлэн калыкеныз. Иеговалэн потэ, ми каньыл сюлмын но солы оскиськыса мед уломы шуыса. Озьы улыны милемлы юртто вын-агайёс  но сузэр-апайёс. Кылсярысь, трос пайда ваё кенешлэн пумиськонъёсыз: милемыз юнмато Библия вылэ пыкиськыса дасям речьёс, агайёсмылэн но сузэръёсмылэн сётэм валэктонъёссы но соосын вераськон (Евр. 10:24, 25). Со сяна, ми быгатӥськомы кенешысь матысь эшъёсмылы сюлмаськонъёсмы сярысь вераны. Эшмылэн «ӟеч кылыз» милемыз буйгатыны быгатэ (Мад. 12:25).

17. Еврейёслы 6:19 лыдэ басьтоно ке, кызьы Эксэйлыклы оскон юрттэ милемлы каньыл сюлмын улыны шуг-секытъёс дыръя но?

¹⁷ 6. Юнматэ вуоноезлы оскондэс. Эксэйлыклы оскон «лул понна якорь» выллем. Со юрттэ милемлы, шуг-секытъёс шоры учкытэк но, каньыл сюлмын улыны. (Лыдӟе Еврейёслы 6:19.) Малпаське вуоноез сярысь, куке, Иеговалэн верамезъя, милесьтым сюлэммес номыр вӧсь уз кары ни (Ис. 65:17). Малпаське выль дунне сярысь, куке милемыз номыр уз кышкаты ини (Мих. 4:4). Озьы ик осконмес юнматыны луэ, со сярысь мукетъёсызлы вераса. Вань кужмысьтыды тырше тодытон но дышетскисьёсты дасян уже пыриськыны. Соку вуоноезлы осконмы юн луоз (Евр. 6:11).

18. Кыӵе шуг-секытъёсын ми вуонояз пумиськомы но мар юрттоз милемлы соос пыр потыны?

¹⁸ Та лек дуннелэн пумыз матэктэмъя, милям эшшо но тросгес шуг-секытъёсмы но сюлмаськонъёсмы луозы. 2021-тӥ арлы кылбур юрттоз милемлы шуг-секытъёс дыръя, ас кужыммылы оскиськем интые, каньыл сюлмын но Иеговалы оскиськыса улыны. Вань та ар ӵоже ойдолэ ужъёсынымы возьматомы, ми оскиськомы шуыса Иеговалэн кылъёсызлы: «Каньыл сюлмын но оскиськыса улон бордын тӥляд кужымды» (Ис. 30:15, ВД).