1. Мае ми шӧдӥськомы, куке тодӥськомы, Иегова милемыз яратэ шуыса?

 «ИНМАР — со яратон»,— гожтӥз апостол Иоанн (1 Иоанн 4:8). Та огшоры кылъёсты лыдӟыса, валтӥсь зэмлыкез валаны луэ. Инмар улон гинэ уг сёты, со бордысь яратон потэ. Иегова милемыз яратэ! Солэн яратонэз юрттэ милемлы шумпотыса но кышкатэк улыны.

2. Матфейлэсь 22:37—40 гожтэмъя, кыӵе кык курон-косонъёс ваньмызлэсь бадӟым но малы куддыръя кыкетӥзэ быдэстыны секыт луэ?

² Кулэ-а христианъёс яратэмзэс возьматыны? Одно ик кулэ! Сое ас мылпотэммыя гинэ лэсьтоно ӧвӧл, со Инмарлэн курон-косонэз. (Лыдӟе Матфейлэсь 22:37—40.) Иеговаен матэгес тодматскыса, милемлы капчи быдэстыны нырысетӥ курон-косонэз — Инмарез яратыны. Малы ке шуоно Иеговалэн тырмымтэосыз ӧвӧл, озьы ик со милемыз яратэ. Нош быдэстыны кыкетӥ курон-косонэз — матысь адямиез яратыны — котьку ик капчи ӧвӧл. Малы? Малы ке шуоно вын-агайёс но сузэр-апайёс, кудъёсыз милемлы тужгес но матысь адямиос луо, тырбыдэстэмесь. Куддыръя соос асьсэды милемын чурыт возё яке кылъёсынызы но ужъёсынызы вӧсь каро. Иегова тодӥз, ми сыӵе шуг-секытъёсын пумиськомы шуыса. Соин ик куд-ог ужась-тыршисьёсызлэсь, кудъёсыз Библиез гожъязы, мылкыдзэс ӝутӥз вераны, малы но кызьы ог-огмылы яратонмес возьматоно. Одӥгез сыӵе ужась-тыршисьёс пӧлысь — апостол Иоанн (1 Иоанн 3:11, 12).

3. Мар вераз Иоанн яратон сярысь?

³ Иоанн трос пол вералляз, христиан мурт яратэмзэ возьматыны туж кулэ шуыса. Матфейлэсь, Марклэсь но Лукалэсь Ӟеч иворъёсын ӵошатыса, Иоаннлэсь Ӟеч иворын «яратон» но «яратыны» кылъёс ӵемгес пумиськыло. Куке Иоанн гожтӥз  Иисуслэн улонэз сярысь но куинь гожтэтъёссэ, солы ог сю арес вал. Библиысь та книгаос дышето милемыз, христиан муртлэн вань ужъёсысьтыз яратонэз адӟиськыны кулэ шуыса (1 Иоанн 4:10, 11). Нош ачиз Иоанн егит дыръяз котьку ик яратэмзэ ӧз возьматъя.

4. Котьку-а Иоанн мукетъёсызлы яратэмзэ возьматъяз?

⁴ Куке Иоанн егит вал, со яратэмзэ котьку ик ӧз возьматъя. Тодамы ваёмы улонысьтыз кык учыръёсты. Одӥг пол Иисус дышетскисьёсыныз ӵош Иерусалиме мынэ вал. Соос Самария пыр мынӥзы. Одӥг гуртысь адямиос соосты куно ӧз каре. Кызьы та учырын ассэ возиз Иоанн? Со Иисуслы шуиз: «Кулэ-а Тыныд, ми вералом, Инмысь тыл мед васькоз но соосты мед быдтоз шуыса?» (Лука 9:52—56). Нош тани мукетыз учыр, кудӥз возьматэ, Иоанн мукет апостолъёсты туж ик ӧз яраты шуыса. Солэн но Иаков агаезлэн Инмарлэн Эксэйлыказ бадӟым инты басьтэмзы потэ вал. Соин ик соос та сярысь Иисусэз куризы (анайзы пыр, вылды). Куронзы сярысь тодыса, мукет апостолъёслэн туж вожзы потӥз (Матф. 20:20, 21, 24). Иоаннлэн сомында тырмымтэосыз вал ке но, Иисус сое туж яратӥз (Иоанн 21:7).

5. Мае ми эскеромы та статьяын?

⁵ Та статьяын эскеромы, малы ми Иоаннлэсь дышетскыны быгатӥськомы но мае со яратон сярысь гожъяз. Та милемлы валаны юрттоз, кызьы вын-агайёсмылы но сузэр-апайёсмылы яратонмес возьматоно. Со сяна, та статьяысь ми тодомы, кызьы семьяослэн йыръёссы возьматыны быгато, семьязэс ярато шуыса.

6. Кызьы Иегова возьматӥз милемыз яратэмзэ?

⁶ Кызьы адями возьматыны быгатэ, со кинэ ке яратэ шуыса? Куд-огъёсызлэн малпамзыя, со сярысь вераны гинэ тырмыт. Нош зэмос яратон — со кылъёс гинэ ӧвӧл, сое ужъёсын возьматоно. (Ӵошатэ Иаковлэсь 2:17, 26.) Малпалэ Иегова сярысь. Со милемыз яратэ (1 Иоанн 4:19). Нош кызьы со аслэсьтыз яратэмзэ возьматэ? Со чебер кылъёс вера, кудъёссэ ми Библиысь лыдӟыны быгатӥськомы (Пс. 24:10; Рим. 8:38, 39). Иегова яратэмзэ кылъёсын гинэ уг возьматы, нош озьы ик ужъёсыныз но. Иоанн гожтӥз: «Инмар асьмемыз яратонзэ тазьы усьтӥз: Со Аслэсьтыз одӥг гинэ Пизэ дунне вылэ ыстӥз, Со пыр асьмеос улон мед басьтомы шуыса» (1 Иоанн 4:9). Иегова аслэсьтыз Пизэ музъем вылэ ыстӥз, со ми понна мед кулоз шуыса (Иоанн 3:16). Соин ик ми юн оскиськомы: Иегова милемыз туж яратэ.

7. Кызьы Иисус возьматӥз милемыз яратэмзэ?

⁷ Иисус аслэсьтыз дышетскисьёссэ оскытӥз,  соосты яратэ шуыса (Иоанн 13:1; 15:15). Со, макем зол Иисус яратэ аслэсьтыз дышетскисьёссэ, кылъёсысьтыз гинэ уг адӟиськы, ужъёсысьтыз но адӟиське. Иисус вераз: «Кин аслэсьтыз лулзэ аслаз эшъёсыз понна сётӥз ке, солэсь но бадӟымез яратон ӧвӧл ни» (Иоанн 15:13). Озьыен, Иегова но Иисус ми понна туж трос лэсьтӥзы. Мар карыны милям мылкыдмы ӝутӥське, тае тодыса?

8. Мар милемлы кароно, 1 Иоаннлэн 3:18 верамъя?

⁸ Ми Иеговаез но Иисусэз яратӥськомы ке, соку соослэсь кылзӥськыса уломы (Иоанн 14:15; 1 Иоанн 5:3). Нош Иисус милемыз косӥз ог-огмес яратыны (Иоанн 13:34, 35). Ми вын-агайёсмылы но сузэр-апайёсмылы вераны гинэ кулэ ӧвӧл, соосты яратӥськомы шуыса, нош яратонмес уж вылын но возьматоно. (Лыдӟе 1 Иоаннлэсь 3:18.) Кызьы сое лэсьтоно?

9. Мар карыны Иоаннлэсь мылкыдзэ ӝутӥз яратон?

⁹ Иоанн аслаз атаеныз кыльыны но семьяезлэсь чорыган ужзэ азьланьтыны быгатэ вал. Нош со трос дасо аръёс ӵоже мукет адямиослы Иегова но Иисус сярысь зэмлыкез тодыны юрттӥз. Иоаннлэн улонэз капчи ӧй вал. Сое осконэз понна уйылыса-улляса возизы. Нырысетӥ даурлэн пумаз, куке со туж пересь вал ини, сое пытсэтэ пуктӥзы (Ап. уж. 3:1; 4:1—3; 5:18; Усьт. 1:9). Нош Иисус сярысь тодытэмез понна пукыкуз но, Иоанн мукет адямиос сярысь малпаз. Кылсярысь, Патмос шормуӵын пытсэтын пукыкуз, со Усьтӥськон книгаез гожтӥз но сое вын-агайёслы но сузэр-апайёслы ыстӥз, соослы «ӝоген мар луоноез возьматон понна» (Усьт. 1:1). Пытсэтысь мозмытскемез бере Иоанн гожтӥз Иисуслэн улонэз но ужан-тыршонэз сярысь. Озьы ик со куинь гожтэтъёсты гожтӥз, вын-агайёслэсь но сузэр-апайёслэсь мылкыдзэс ӝутон понна но соосты юнматон понна. Малы ми дышетскыны быгатӥськомы Иоаннлэсь, кудӥз, ассэ жалятэк, ужаз-тыршиз?

10. Кызьы ми возьматыны быгатӥськомы адямиосты яратэммес?

¹⁰ Ми адямиосты яратӥськомы шуыса возьматэ со, малы ми улонмес сӥзиськомы. Шайтанлэн дуннеез милесьтым мылкыдмес уг ӝуты дырмес но кужыммес висъяны, мукетъёсызлы юрттон понна. Со интые, со мылкыдмес ӝутэ тросгес коньдон поттыны яке нимо-дано адями луыны. Нош Эксэйлыклэн быдэс дунне вылысь ивортӥсьёсыз мукет сямен уло: соос, дырзэс но кужымзэс жалятэк, ӟеч иворез тодыто но мукет адямиослы Иеговаен кусыпъёссэс тупатыны юртто. Нош куд-огез ивортӥсьёс вань дырзэс та ужлы висъяло.

11. Кызьы тросэз христианъёс возьмато Иеговаез, вын-агайёсты но сузэр-апайёсты яратэмзэс?

¹¹ Инмарлы оскымон тросэз христианъёс лумбыт ужано луо, асьсэлэн но семьязылэн ваньмыз кулэез мед луоз шуыса. Озьы ке но соос лэсьто ваньзэ, мае быгато, Инмарлэн организациезлы юрттон понна. Кин ке но инкуазь шимучыръёсы сюремъёслы юрттэ, кин ке но Иеговалы йыбыртъянэн герӟаськем юртъёсты пуктонэ пыриське. Ваньзэ тае соос лэсьто, Инмарез но матысь адямиоссэс яратэменызы. Озьы ик котькуд христиан муртлэн луонлыкез вань быдэс дунне вылысь тодытон ужлы коньдонэн юрттыны. Со сяна, ми котькуд арняе вын-агайёсмылы но сузэр-апайёсмылы яратонмес возьматӥськомы, кенешлэн пумиськонъёсаз ветлыса но эскеронъёсы пыриськыса. Жадеммы шоры учкытэк, ми Эксэйлык юртэ лыктӥськомы. Сюлмаськеммы шоры учкытэк, эскерон дыръя ми валэктонъёс сётъяськомы. Милям асьмелэн но сюлмаськонъёсмы трос ке но, ми пумиськонъёс азьын но соос бере ог-огмылэсь мылкыдмес ӝутӥськомы (Евр. 10:24, 25). Ми туж  тау кариськомы вын-агайёсмылы но сузэр-апайёсмылы тыршемзы понна.

12. Кызьы Иоанн эшшо возьматӥз на вын-агайёсты но сузэр-апайёсты яратэмзэ?

¹² Иоанн, вын-агайёсты но сузэр-апайёсты ушъям сяна, соосты алӥз но. Озьы со соосты яратэмзэ возьматӥз. Кылсярысь, аслаз гожтэтъёсаз со вын-агайёсты но сузэр-апайёсты осконзы но ӟеч ужъёссы понна ушъяз. Нош со дыре ик, Иоанн соослы шонерак вераз, кызьы сьӧлык шоры учконо (1 Иоанн 1:8—2:1, 13, 14). Озьы ик милемлы но вын-агайёсты но сузэр-апайёсты ушъяны кулэ. Но ми адӟиськомы ке, кинлэн ке но умойтэм мылкыдыз яке урод сямыз вань шуыса, солы лякытэн верано, кыӵе кышкытлыкъёс со вайыны быгатэ. Озьы ми сое яратэммес возьматомы. Зэм но, со понна кышкасьтэм луоно. Но кызьы гожтэмын Библиын, зэмос эшъёс ог-огзэс «лэчыт каро», яке ог-огзылы умойгес луыны юртто (Мад. 27:17).

13. Мае милемлы кароно ӧвӧл?

¹³ Куддыръя, вын-агайёсмылы но сузэр-апайёсмылы яратэммес возьматон понна, мае ке но кароно ӧвӧл. Кылсярысь, вӧсь карись кылъёслы вожмес поттоно ӧвӧл. Тодамы ваёмы, мар одӥг пол луиз, куке Иисус музъем вылын ужаз-тыршиз. Со аслаз дышетскисьёсызлы вераз: «Адями Пилэсь Мугорзэ ӧд ке сие, Солэсь Вирзэ ӧд ке юэ, тӥ пушкын улон уз луы» (Иоанн 6:53—57). Тросэзлы дышетскисьёсызлы солэн кылъёсыз валантэм потӥзы. Соин ик соос Иисусэз кельтӥзы. Нош зэмос эшъёсыз, озьы ик Иоанн но, солы оскымон кылизы. Соос ӧз валалэ, мар сярысь вераз Иисус. Солэн кылъёсыз соослы осконтэм потӥзы, дыр. Но та дышетскисьёс ӧз малпалэ, Иисус шонертэм вера яке лэсьтыны луонтэмзэ куре шуыса. Соос Иисуслы оскизы, малы ке шуоно тодӥзы, со зэмлыклы дышетэ шуыса (Иоанн 6:60, 66—69). Милемыз эшмылэн кылъёсыз вӧсь каризы ке, со сярысь урод малпаны дыртоно ӧвӧл. Со интые, солы ваньзэ валэктыны луонлык сётоно (Мад. 18:14; Екк. 7:9).

14. Малы ноку уг яра вын-агайёсмес но сузэр-апайёсмес адӟемпотостэм карыны?

¹⁴ Озьы ик Иоанн гожтӥз, милемлы вын-агайёсмес но сузэр-апайёсмес адӟемпотостэм карыны уг яра шуыса. Адӟемпотостэм каримы ке, ми Шайтан ки улэ сюромы (1 Иоанн 2:11; 3:15). Ӵапак озьы луиз нырысетӥ даурлэн пумаз улӥсь куд-ог христианъёсын. Шайтан туж тыршиз, Инмарлэн ужась-тыршисьёсыз ог-огзэс адӟемпотостэм мед карозы но керетыса мед улозы шуыса. Куке  апостол Иоанн гожтэтъёссэ гожтӥз вал ини, христиан кенеше пыризы адямиос, кудъёсыз асьсэды Шайтан сямен возизы. Одӥгез соос пӧлысь вал Диотреф, кудӥз сэрен вын-агайёс туж керетыса улӥзы (3 Иоанн 9, 10). Со ӧз гажа кивалтӥсь кенешысь агайёсты, кудъёсыз кенешъёсты юнматылӥзы. Со сяна, со кенешысь улляны тыршиз со адямиосты, кудъёсыз куно каризы солы ярасьтэм адямиосты. Макем возьыттэм ассэ возиз Диотреф! Туннэ но Шайтан туж тырше, Инмарлэн ужась-тыршисьёсыз ог-огзэс адӟемпотостэм мед карозы шуыса. Ойдолэ Шайтанлы ум сётске!

15. Мар сярысь вунэтоно ӧвӧл семьялэн йырызлы?

¹⁵ Кызьы семьялэн йырыз возьматыны быгатэ, со семьязэ яратэ шуыса? Солы сюлмаськоно, матысь адямиосызлэн улон понна ваньмыз кулэез мед луоз шуыса (1 Тим. 5:8). Озьы ик солы тодаз возёно: коньдон но ваньбур семьяезлы уз юрттэ Инмарен матысь кусыпъёс возьыны (Матф. 5:3, ВД). Висъялэ саклыктэс, кыӵе адӟем карон семьяослэн йыръёссылы возьматӥз Иисус. Иоаннлэсь Ӟеч иворын гожтэмъя, Иисус, сое кортӵогамзы бере но, семьяез сярысь сюлмаськиз. Отын ик сылӥзы Иоанн но Мария, Иисуслэн анаез. Туж зол курадӟемез шоры учкытэк но, Иисус куриз Иоаннэз Мария сярысь сюлмаськыны (Иоанн 19:26, 27). Иисуслэн вал вынъёсыз но сузэръёсыз. Соос анайзэс ӧз кельтысалзы но со сярысь сюлмаськысалзы. Но со дырлы, куке Иисусэз кортӵогазы, соос пӧлысь одӥгез но Иисуслэн дышетскисез ӧй вал, дыр. Нош Иисуслэн потэ вал, Мариялэн ваньмыз кулэез мед луоз шуыса но солы азьланяз но Иеговалы ужаны-тыршыны мед юрттозы шуыса.

16. Кыӵе ужъёсты быдэсъяз Иоанн?

¹⁶ Иоанн трос ужъёсты быдэсъяз. Со апостол вал, тодытон ужен кивалтӥз. Со сяна, Иоанн кышнояськемын вал, дыр. Озьы ке, солы сюлмаськоно вал, семьяезлэн улон понна ваньмыз кулэез мед луоз но Инмарен матысь кусыпъёсыз мед луозы шуыса (1 Кор. 9:5). Кызьы семьяослэн йыръёссы Иоаннлэсь адӟем карыны быгато?

17. Кызьы семьялэн йырыз возьматыны быгатэ, семьязэ яратэ шуыса?

¹⁷ Агайлы, кудӥзлэн семьяез вань, трос ужъёсты быдэсъяно. Кылсярысь, солы уж дораз мылысь-кыдысь ужано, Иеговаез данъян понна (Еф. 6:5, 6; Тит. 2:9, 10). Озьы ик солы кенешын но куд-ог ужъёсты сётыны  быгато: вын-агайёс но сузэр-апайёс сярысь сюлмаськоно, соослэсь мылкыдзэс ӝутоно, тодытон ужез радъяно. Нош со дыре ик семьялэн йырызлы кышноеныз но нылпиосыныз ялан Библиез дышетоно. Озьы со возьматоз соосты яратэмзэ. Со сяна, семьялэн йырыз сюлмаське, кышноезлэн но нылпиосызлэн ваньмыз кулэез мед луоз, соос шудоесь мед луозы но Иеговаен матысь кусыпъёссы мед луозы шуыса. Тыршемез понна семьяез солы туж тау кароз (Еф. 5:28, 29; 6:4).

18. Малы юн оскиз Иоанн?

¹⁸ Иоанн бадӟым арлыдын кулӥз. Со трос лэсьтӥз. Солэн трос шуг-секытъёсыз вал ке но, соос осконзэ лябӟытыны ӧз быгатэ. Со вань кужмысьтыз тыршиз Иисуслэсь кылзӥськыны, озьы ик вын-агайёсты но сузэр-апайёсты яратыны. Соин ик Иоанн юн оскиз: Иегова но Иисус сое ярато но солы кулэ луись кужым сётозы котькыӵе шуг-секытэз чиданы (Иоанн 14:15—17; 15:9, 10; 1 Иоанн 4:16). Шайтан но солэн дуннеез солы люкетыны тыршизы ке но, Иоанн вын-агайёссэ но сузэр-апайёссэ яратэмысь ӧз дугды но яратэмзэ кылъёсын но ужъёсын возьматъяз.

19. Мар карыны мылкыдмес ӝуто 1 Иоаннлэн 4:7 гожтэм кылъёс но малы милемлы та кылъёсъя улоно?

¹⁹ Иоанн улон нуналъёсы сямен, та дуннеен кивалтэ Шайтан, кудӥз туж лекъяське (1 Иоанн 3:1, 10). Солэн потэ, ми вын-агайёсмес но сузэр-апайёсмес яратэмысь мед дугдомы шуыса. Но ми солы ӧм ке сётске, солэн номыр уз пӧрмы. Ойдолэ яратомы вын-агайёсмес но сузэр-апайёсмес но яратэммес кылъёсын но ужъёсын возьматомы. Соку ми шӧдомы, Иеговалэн бадӟым семьяяз пыриськомы шуыса, но улонмы шумпотонэн пачылмоз. (Лыдӟе 1 Иоаннлэсь 4:7.)