ИЕРУСАЛИМЫСЬ одӥг музейын возё изпулэз, кудӥз вылын кылъёс гожтэмын. Лыдъяло, со гожтэмын вал асьме вакытлэсь азьло 700—600-тӥ аръёсы. Со шедьтэмын вал Израильын, Хеврон палась пещераын, кудаз адямиосты ватылӥзы. Одӥг научной журналын верамъя, со вылын гожтэмын таӵе кылъёс: «Яхве Саваоф мед каргалоз Хагафез, Хагавлэсь пизэ». Кызьы та шедьтэм возьматэ, Библия зэм луэ шуыса? Вашкала еврей кылын Инмарлэсь нимзэ ньыль букваосын гожъязы. Удмурт кылын сое гожто ЙХВХ букваосын но «Иегова» яке «Яхве» шуыса верало. Та шедьтэм возьматэ, вашкала дыръёсы та ним тросэзлы тодмо вал но со огшоры улонын кутӥськиз шуыса. Инмарлэсь нимзэ, озьы ик мукет нимъёсты, кудъёсыз пӧлы Инмар нимлэн оглюкетэз пыре вал, шедьтыны луэ мукет гожтэмъёсысь но, кудъёсыз гожтэмын адямиосты ватон пещераослэн борддоръёсазы.

Тани мар вера та гожтэмъёс сярысь Джорджия университетысь (США) Рейчел Набулси, лингвистика удысысь тодосчи: «ЙХВХ нимез кутэмзы тросэз сярысь вера. [...] Гожтэмъёс но [Библиысь] кылъёс возьмато, макем бадӟым инты басьтӥз со, кин та нимез нуллӥз, Израильысь но Иудаысь адямиослэн улоназы». Зэм но, нырысь, куке Вуж Сӥзён вашкала еврей кылын гожтэмын вал, Инмарлэн нимыз трос сюрс пол пумиськылӥз, озьы ик адямиослэн нимъёссылэн оглюкетэз луыса но.

Изпул вылын гожтэм «Яхве Саваоф» кылъёс возьмато «Иегова ожгарчиослэн» шуэмез. Адӟиське, Инмарлэн нимыз гинэ ӧвӧл, озьы ик та кылъёс но, вашкала дыръя ӵем кутӥськизы. Та но возьматэ, Библия зэм луэ шуыса. Нырысь, куке Вуж Сӥзён вашкала еврей кылын гожтэмын вал, «Иегова ожгарчиослэн» но «Иегова, ожгарчиослэн Инмарзы» шуыса верамъёс 283 пол пумисько, тужгес но ӵем Исаиялэн, Иеремиялэн но Захариялэн книгаосазы.