1. Кызьы ми быгатӥськомы Иеговаен дырмес ортчытъяны?

 ВАНЬМЫЛЫ милемлы кельше матысь адямиосынымы дырмес ортчытъяны: картъёслы кышноосынызы, егитъёслы эшъёсынызы, милемлы вын-агайёсынымы но сузэр-апайёсынымы. Нош тужгес но милемлы кельше Инмарен дырмес ортчытъяны. Солы вӧсяськыса, солэсь Кылзэ лыдӟыса, солэн эрикез но умой сямъёсыз сярысь малпаськыса, ми быгатӥськомы соин дырмес ортчытъяны. Инмарен ортчытэм дыр туж дуно! (Пс. 138:17).

2. Кыӵе шуг-секытэн ми пумиськиськомы?

² Но вань одӥг шуг-секыт. Куддыръя трос ужъёсмы сэрен, Иеговаен кусыпъёсмес юнматон понна, дыр шедьтыны секыт. Милям трос дырмы кошке семьямылы яке мукет ужъёслы. Соин ик ми малпаны быгатомы, Иеговалы вӧсяськыны, солэсь Кылзэ лыдӟыны но со вылын малпаськыны милям дырмы ик ӧвӧл ини шуыса.

3. Мар эшшо милесьтым дырмес лушканы быгатэ?

³ Вань эшшо мар ке но, мар милесьтым дырмес лушканы быгатэ. Куд-огъёсыз малпаськытэк укыр трос дырзэс висъяло ужъёслы, кудъёсыз уродэсь ӧвӧл, кадь. Но со дырез соос висъяны быгатысалзы Иеговалы. Кылсярысь,  шутэтскон амалъёс. Валамон, ваньмылы милемлы шутэтскыны кулэ. Но шутэтсконлы укыр трос дыр висъяса, Иеговаен кусыпъёсмес юнматон понна, дырмы уз но кыльы ни, вылды. Соин ик юнме уг верало: «Котьмалы но аслаз дырыз: ужлы но, шутэтсконлы но» (Мад. 25:27; 1 Тим. 4:8).

4. Мае ми али эскеромы?

⁴ Та статьяын ми эскеромы: 1) малы валаны кулэ, мае улонамы нырысетӥ интые пуктоно, 2) кызьы тужгес но умой кутоно дырез, кудзэ ми висъяськомы Иеговалы, но 3) кыӵе со пайда ваёз.

5. Кызьы визь-кенеш, кудӥз гожтэмын Ефесъёслы 5:15—17, юрттоз егитъёслы тужгес но умой улон сюрес бырйыны?

⁵ Тужгес но умой улон сюрес быръе. Ӵем дыръя егитъёс уг тодо, малы улонзэс сӥзёно. Одӥг паласен, дышетӥсьёссы но ӵыжы-выжыоссы соослэсь мылкыдзэс ӝутыны быгато вылӥ образование басьтыны но умой уж шедьтыны. Но талы трос дыр кошкыны быгатэ. Мукет паласен, Адӟись-Ивортӥсь луись анай-атайёссы но эшъёссы соослэсь мылкыдзэс ӝуто Иеговалы ужаны-тыршыны. Мар юрттоз егитъёслы визьмо быръён лэсьтыны? Соослы юрттозы малпанъёс, кудъёсыз гожтэмын Ефесъёслы 5:15—17 (лыдӟе). Та кылбуръёсты лыдӟем бере егитъёс асьсэлэсь юаны быгато: «Кыӵе Иеговалэн эрикез? Кыӵе кутэм ужпум сое тужгес но шумпоттоз? Кыӵе улон сюрес юрттоз дырез тужгес но умой амалэн уже кутыны?» Эн вунэтэ: кескич нуналъёс вуэмын но Шайтанлэн дуннеезлы ӝоген пум вуоз. Соин ик визьмо луысал Иеговаез шумпоттыса улыны.

6. Кыӵе быръён лэсьтӥз Мария но малы солэн быръёнэз визьмо вал?

⁶ Валаны тырше, мае улонын нырысетӥ интые пуктоно. Куддыръя секыт самой умойзэ бырйыны, малы ке шуоно быръёно луэ умой ужъёс пӧлысь одӥгзэ. Та малпанэз валаны юрттэ учыр, куке Иисус куное лыктӥз Мария но Марфа доры. Марфа вань сюлмысьтыз тыршиз Иисусэз куно карыны. Нош Мария Иисуслэн пыд выжыяз пуксиз но сое кылзыны кутскиз. Марфа вань сюлмысьтыз куно карыны тыршиз ке но, «Мария ӟечсэ люкетэз бырйиз» (Лука 10:38—42). Оло нош, Мария вунэтӥз но, мае соос сиизы со нуналэ. Но со ноку ӧз вунэты, малы со дышетскиз Иисуслэсь. Со туж дунъяз дырез, кудзэ ортчытӥз Иисусэн. Милемлы но дунъяно дырез, кудзэ Иеговаен ортчытыны быгатӥськомы. Мар юрттоз милемлы дырмес визьмо кутыны?

7. Малы дыр висъяно вӧсяськонлы, эскеронлы но малпаськонлы?

⁷ Эн вунэтэ: вӧсяськон, эскерон но малпаськон Иеговалы йыбыртъян пӧлы пыро шуыса. Вӧсяськыкумы ми вераськиськомы инмысь Атаенымы, кудӥз милемыз туж яратэ (Пс. 5:8). Библиез эскерыкумы, ми «Инмар сярысь тодонэз» шедьтӥськомы, кудӥз котькинлэсь визьлыко луэ (Мад. 2:1—5). Нош малпаськыкумы ми эшшо но тросгес тодӥськомы Иеговалэн сямъёсыз сярысь но со сярысь, мар со кароз ми понна но вань адямиос понна. Та тужгес но умой амал, кызьы дырез  ортчытыны луэ. Милям дырмы ӧжыт ке но, мар ми карыны быгатӥськомы, со эшшо но тросгес пайда мед ваёз шуыса?

8. Малы ми дышетскыны быгатӥськомы отысь, кызьы Иисус кыр дуннеын дырзэ ортчытӥз?

⁸ Быгатӥськоды ке, шыпыт инты шедьтэ. Эскеромы Иисуслэсь учырзэ. Музъем вылын ужаны-тыршыны кутскемезлэсь азьло со 40 нунал ӵоже кыр дуннеын улӥз (Лука 4:1, 2). Та шыпыт интыын Иисус Иеговалы вӧсяськиз но солэн эрикез сярысь малпаськиз. Та юрттӥз солы вуоно шуг-секытъёслы дасяськыны. Малы ми дышетскыны быгатӥськомы Иисуслэн учырысьтыз? Тӥ бадӟым семьяын улӥськоды ке, дорады шыпыт инты шедьтыны капчи ӧвӧл, дыр. Соку тӥ быгатӥськоды кыре потыны. Кылсярысь, тани мар каре Франциысь Жюли нимо сузэр, куке солэн Иеговалы вӧсяськемез потэ. Соос картэныз уло квартираын. Бускельёссы соослы шыпыт улыны маза уг сёто. Соин ик, шыпыт интыын Иеговалы вӧяськон понна, Жюли котькуд нунал парке пота. Со вера: «Отын мон быгатӥсько огнам кыльыны, малпаськыны но Иеговаен вераськыны».

9. Кызьы Иисус возьматӥз, Иеговаен кусыпъёссэ дунъяз шуыса?

⁹ Иисуслэн туж трос ужъёсыз вал. Музъем вылын ужакуз-тыршыкуз, со сьӧры туж трос адямиос ветлӥзы. Соослы ваньзылы Иисуслэсь мар ке но кулэ вал. Огпол «быдэс город» ӧс выжые люкаськиз, сое адӟон понна. Сыӵе учырын но Иисус Иеговалы дырзэ висъяны быгатӥз. Со «ӵукна вазь ик султыса потӥз но, калыктэм интые кошкыса, отын вӧсяськыса улӥз» (Марк 1:32—35).

10, 11. Кыӵе визь-кенеш сётӥз Иисус апостолъёсызлы Гефсиман садын но мар собере луиз? (Матфей 26:40, 41).

¹⁰ Ужан-тыршонэзлэн берпуметӥ уяз но Иисус шыпыт инты шедьтӥз малпаськон но вӧсяськон понна. Со вал Гефсиман сад (Матф. 26:36). Соку Иисус апостолъёсызлы кулэ луись визь-кенеш сётӥз.

¹¹ Эскеромы, мар отын луиз. Соос Гефсиман садэ туж бер вуизы ини, уйшор бере, вылды. Иисус куриз апостолъёссэ сак улыны, нош ачиз вӧсяськыны кошкиз (Матф. 26:37—39). Нош апостолъёсыз доры берытскемез бере со адӟиз, соос умме усиллям шуыса. (Лыдӟе Матфейлэсь 26:40, 41.) Иисус валаз, соос туж жадемын шуыса. Соин ик лякытэн вераз соослы таӵе кылъёс: «Дух сэзь, нош лулмугор кужымтэм». Собере Иисус эшшо кык пол вӧсяськиз на. Нош апостолъёс, вӧсяськем интые, изё вал (Матф. 26:42—45).

12. Мар ми карыны быгатӥськомы, вӧсяськыны кужыммы уг тырмы ке?

 ¹² Тупась дыр быръе. Куд-огъёсыз сокем жадё, вӧсяськыны кужымзы но уг тырмы ни. Мар тӥ карыны быгатӥськоды сыӵе учыре? Тӥ изьыны выдон азяды вӧсяськыны дышемын ке, оло нош, тӥледлы капчигес луоз ӧжыт вазьгес вӧсяськыны, куке тӥ сокем жадемын ӧвӧл на. Куд-огъёсыз шӧдӥзы, соослы капчигес вань сюлмысьтызы вӧсяськыны, кылсярысь, пукыса яке пыдесъяськыса. Нош мар кароно, жадеменыды сэрен тӥ мар сярысь вӧсяськыны ик уд ке тодӥське? Вералэ та сярысь Иеговалы. Юн оске: гажась-жалясь Атаймы тӥледыз одно ик валалоз (Пс. 138:4).

13. Мар люкетыны быгатэ, куке ми вӧсяськиськомы, эскерон ортчытӥськомы но пумиськонъёсын дышетскиськомы?

¹³ Эскерон ортчытыкуды, номыр но медаз люкеты. Вӧсяськон сяна, Иеговаен кусыпъёсмес эшшо мар ке но юнматыны быгатэ на. Инмарлэсь Кылзэ эскерон но пумиськонъёсы ветлон озьы ик юрттэ милемлы Инмарлы матэ кариськыны. Мар кароно, дыр, кудзэ ми висъямы эскеронлы но пумиськонъёслы, эшшо но тросгес пайда мед ваёз шуыса? Юалэ асьтэлэсь: мар мыным люкетыны быгатэ пумиськонъёс дыръя яке ас поннам эскерон ортчытон дыръя? Кылсярысь, кин ке но гожтыны яке жингыртыны быгатэ. Туннэ трос миллиард адямиос электрон тӥрлыкъёсты уже куто. Но куд-ог эскеронъёс возьматӥзы, электрон тӥрлыкъёс люкетыны но быгато шуыса. Эскерисьёслэн верамзыя, электрон тӥрлыкмы син азямы ке, со гинэ но люкетыны быгатэ ини умой малпаськыны b. Пумиськонъёс яке конгрессъёс кутскемлэсь азьло ӵем дыръя милемыз куро электрон тӥрлыкъёсмылэсь куаразэс кысыны, соос мукетъёсызлы медаз люкетэ шуыса. Быгатӥськомы-а ми озьы ик карыны, куке Иеговалы дыр висъяськомы, электрон тӥрлыкъёсмы милемлы медаз люкетэ шуыса?

14. Филиппыослы 4:6, 7 лыдэ басьтыса, кызьы Иегова юрттоз люкетӥсь малпанъёсты палэнтыны?

¹⁴ Иеговалэсь юрттэт куре люкетӥсь  малпанъёсты палэнтыны. Тӥ шӧдӥськоды ке, мае ке эскерыкуды яке пумиськонъёс дыръя тӥляд мукет малпанъёсты кылдо шуыса, Иеговалэсь юрттэт куре. Кыӵе ке сюлмаськонды вань ке, Инмарлэн Кылыз вылын малпаськыны капчи ӧвӧл. Но со туж кулэ. Соин ик Инмарлэсь каньыллыксэ куре, кудӥз сюлэмдэс но, малпанъёстэс но утьыса возёз. (Лыдӟе Филиппыослы 4:6, 7.)

15. Кыӵе пайда ми басьтомы, Иеговаен дырмес ортчытъямы ке?

¹⁵ Иеговаен вераськон, сое кылзӥськон но со сярысь малпаськон туж бадӟым пайда вае. Нырысетӥез, со юрттэ шонер ужпумъёс кутыны. Библия оскытэ милемыз: «Визьмо муртэн кусып возись ачиз но визьмо луоз» (Мад. 13:21). Соин ик, тӥ дырдэс ортчытъяды ке Иеговаен, кудӥз котькинлэсь визьмо луэ, тӥ асьтэос но визьмогес луоды. Тӥ умойгес валалоды, мар кароно, сое шумпоттон понна, но мар кароно ӧвӧл, солэсь сюлэмзэ вӧсь медад каре шуыса.

16. Малы, Иеговаен дырмес ортчытъяса, ми эшшо но умойгес дышетӥсьёс луомы?

¹⁶ Кыкетӥез, тӥ эшшо но умойгес дышетӥсьёс луоды. Кинэн ке Библиез дышетыкумы, милям валтӥсь ужпуммы — юрттыны адямилы Иеговаен эшъяськыны. Инмысь Атаенымы тросгес дырмес ортчытъяса, ми сое эшшо но юнгес яратӥськомы. Нош соку ми быгатомы мукетъёссэ но дышетыны Иеговаез яратыны. Тае адӟыны луэ Иисуслэн примерысьтыз. Атаез сярысь веракуз, адӟиськиз, со сое яратэ шуыса. Та юрттӥз дышетскисьёсызлы но Иеговаез яратыны (Иоанн 17:25, 26).

17. Кызьы вӧсяськон но эскерон юртто милемлы осконмес юнматыны?

¹⁷ Куинетӥез, осконды эшшо но юнгес луоз. Куке тӥ Иеговалэсь кивалтэт, буйгатон но юрттэт куриськоды но со тӥледлы ответ сётэ, тӥляд осконды юнма (1 Иоанн 5:15). Мар эшшо юрттоз на оскондэс юнматыны? Ас поннад Библиез эскерон. Тодон-валан басьтыса, тӥляд осконды эшшо но юнгес луоз (Рим. 10:17). Но оскон юн мед луоз шуыса, тодон-валан басьтэм сяна, эшшо мар ке но кароно на.

18. Вералэ пример, кудӥз возьматэ, малы милемлы малпаськыны кулэ.

¹⁸ Милемлы басьтэм тодон-валанмы вылын малпаськыны кулэ. Эскеромы 76-тӥ Псаломез гожъясьлэсь примерзэ. Сое сюлмаськытӥз, со ачиз но израиль калык Иеговалы ярамон ӧвӧл ини шуыса. Таин сэрен со изьыны но ӧз быгаты (3—9-тӥ  кылбуръёс). Мар со кариз? Со Иеговалы вераз: «Тынэсьтыд вань ужъёстэ валаны тыршо, быдӟым ужъёсыд сярысь малпасько» (13-тӥ кылбур). Та Псаломез гожъясь тодӥз, мар Иегова лэсьтӥз аслаз калыкезлы азьвыл. Озьы ке но солэн таӵе юанэз вал: «Инмар жаляны вунэтӥз-а, оло? Шырыт сямзэ вожпоттон дыръяз ворсаз, оло?» (10-тӥ кылбур). Соин ик со малпаськыны кутскиз, кызьы Иегова гажан-жалянзэ азьло возьматъяз (12-тӥ кылбур). Кыӵе пайда со вайиз? Со валаз, Иегова аслэсьтыз калыксэ ноку уз кельты шуыса (16-тӥ кылбур). Ӵапак озьы ик тӥляд но осконды юнмалоз, тӥ малпаськиды ке, мар Иегова лэсьтӥз ини аслаз калыкезлы но мар лэсьтӥз тӥледлы.

19. Кыӵе эшшо пайда ми басьтомы на, Иеговаен дырмес ортчытъяса?

¹⁹ Ньылетӥез, тӥ Иеговаез эшшо но юнгес яратоды. Мукет сямъёсын ӵошатыса, яратон тужгес но зол мылкыдмес ӝутыны быгатэ Иеговалэсь кылзӥськыны, сое шумпоттыны но шуг-секытъёс дыръя солы оскымон кыльыны (Матф. 22:37—39; 1 Кор. 13:4, 7; 1 Иоанн 5:3). Иеговаен матысь кусыпъёс котьмалэсь дуно! (Пс. 62:2—9).

20. Мар тӥ карыны быгатӥськоды, Иеговаен дырдэс ортчытъян понна?

²⁰ Тодады возе: вӧсяськон, эскерон но малпаськон Иеговалы йыбыртъян пӧлы пыро. Иисус сямен, шыпыт инты шедьтэ, Иеговаен дырдэс ортчытон понна. Инмарлэсь юрттэт куре, солы йыбыртъян понна тӥледлы номыр медаз люкеты шуыса. Тӥ туннэ ик ини дырдэс тужгес но умой амалэн кутӥськоды ке, соку Иегова выль дуннеын тӥледлы пырак улон кузьмалоз! (Марк 4:24).