1. Вералэ, кыӵе семьяын улӥз Иаков.

 ИАКОВ, Иисуслэн выныз b, Инмарлы оскымон ужась-тыршисьёслэн семьяязы будӥз. Солэн Иосиф атаез но Мария анаез туж юн яратӥзы Иеговаез. Со сяна, Иаковлэн агаез луыны кулэ вал Мессия, кудӥз сярысь азьло ик тодытыса верамын вал. Малпалэ гинэ, кыӵе семьяын вордӥськыны Иаковлы шуд усиз!

2. Малы Иаков агаеныз данъяськыны быгатэ вал?

² Иаковлэн трос мугъёсыз вал данъяськыны аслаз агаеныз (Матф. 13:55). Кылсярысь, Иисус 12 арес дыръяз ини сокем умой тодӥз Гожтэмъёсты, со законэз тодӥсь дышетӥсьёсты но паймытъяз (Лука 2:46, 47). Иаков Иисусэн ӵош тӥрен ужаз, вылды. Со озьы ке, соослэн ӵош ужамзы юрттӥз солы эшшо но умойгес тодыны аслэсьтыз агайзэ. Кызьы вераны яратэ вал Нейтан Норр c, «адямиез умойгес тодэмед потэ ке, соин ӵош ужа». Лукалэсь 2:52 верамъя, Иисус «визьмын но, арлыдын но будӥз», озьы ик «Инмарлы но, адямиослы но Со яратыны ярамон вал». Иаков ваньзэ тае адӟиз. Малпаны луэ вал, со Иисуслэн дышетскисьёсыз пӧлын нырысетӥез луоз шуыса. Но жаляса верано луэ, со озьы ӧз луы.

3. Кызьы Иаков учкиз Иисус шоры, куке со музъем вылын ужаз-тыршиз?

 ³ Иисус музъем вылын ужакуз-тыршыкуз, Иаков солы ӧз оскы (Иоанн 7:3—5). Со вал, дыр, ӵыжы-выжыосыз пӧлын, кудъёсыз малпазы, Иисус визьзэ ыштӥз шуыса (Марк 3:21). Нокытын но гожтэмын ӧвӧл, Иаков Мария анаеныз вал шуыса, куке Иисусэз юбо борды кортӵогазы (Иоанн 19:25—27).

4. Мае ми тодомы та статьяысь?

⁴ Берлогес Иаков Иисуслы оскиз но христиан кенешын гажамон тӧро луиз. Та статьяын Иаковлэн примерез вылын ми эскеромы: 1) малы милемлы зӥбыт-востэмесь луоно но 2) кызьы быгатыса дышетоно.

5. Кызьы Иаковлэн улонэз воштӥськиз улӟем Иисусэн пумиськемез бере?

⁵ Ку Иаков Иисуслэн дышетскисез луиз? Иисус улӟемез бере «возьматскиз Иаковлы, озьы ик вань апостолъёслы» (1 Кор. 15:7). Та пумиськон Иаковлэсь улонзэ чылкак мукет пала воштӥз. Куке апостолъёс Иерусалимын вылӥ комнатаын люкаськизы но возьмазы, соос вылэ святой дух кисьтэмын луоз шуыса, Иаков соосын ӵош вал (Ап. уж. 1:13, 14). Берлогес со кивалтӥсь кенешын ужаз-тыршиз (Ап. уж. 15:6, 13—22; Гал. 2:9). Нош асьме вакытысь 62-тӥ арлэсь азьлогес святой дух солэсь мылкыдзэ ӝутӥз зырӟем христианъёслы гожтэт гожтыны. Та гожтэт милемлы но пайдаё луэ, кыӵе гинэ милям осконмы медам луы: инмын яке музъем вылын улыны (Иак. 1:1). Иосиф Флавийлэн верамезъя, Иаковез казнить каризы Иудеяысь Анания быдӟым священниклэн косэмезъя. Улонэзлэн берпуметӥ нуналозяз Иаков Иеговалы оскымон вал.

6. Маин Иаков пӧртэм вал нырысетӥ даурысь религиозной кивалтӥсьёслэсь?

⁶ Иаков зӥбыт-востэм вал. Малы озьы вераны луэ? Иаков но, со дыре улӥсь религиозной кивалтӥсьёс но адӟизы, Иисус Инмарлэн Пиез луэ шуыса. Нош кызьы ассэ возиз Иаков? Со зӥбыт-востэмен валаз, янгыш вал шуыса, но Иисуслы оскыны кутскиз. Таин со пӧртэм вал священникъёслэсь. Кылсярысь, священникъёс умой тодӥзы, Иисус Лазарез улӟытӥз шуыса. Соос лыдэ ӧз басьтэ, Иисусэз Иегова ыстӥз шуыса. Со интые, священникъёс вераськизы Иисусэз но, Лазарез но виыны (Иоанн 11:53; 12:9—11). Нош берлогес, куке Иисус улӟиз, соос вань кужмысьтызы  адямиослэсь тае ватыны тыршизы (Матф. 28:11—15). Вылтӥяськеменызы сэрен та религиозной кивалтӥсьёс Мессияез палэнтӥзы.

7. Малы милемлы вылтӥяськисесь луоно ӧвӧл?

⁷ Малы дышетскыны луэ: вылтӥяськисесь эн луэ, дась луэ Иеговалэсь дышетскыны. Куд-ог сюлэм висёнъёс дыръя вирсэръёс чурытомо. Соин сэрен сюлэм ужамысь дугдыны быгатэ. Ӵапак озьы ик вылтӥяськон сэрен ми «измыны» быгатомы но Инмарлэсь кивалтэтсэ ум кылзэ ни. Иегова фарисейёслы трос пол возьматъяз, Иисус Мессия луэ шуыса. Нош ваменэс луэмзы сэрен соослэн сюлэмъёссы чурытомизы но, соос талы ӧз оске (Иоанн 12:37—40). Вылтӥяськеменызы сэрен соос асьсэлы пырак улонэ нуись сюресэз пытсазы (Матф. 23:13, 33). Асьсэды урод воземзы возьматэ, макем кулэ Инмарлэн Кылызлы но солэн духезлы лэзьыны милемыз тупатыны, озьы ик малпанъёсмес но ужпумъёсмес воштыны (Иак. 3:17). Зӥбыт-востэм луэмез Иаковлы юрттӥз Иеговалэсь дышетскыны но умой дышетӥсь луыны.

8. Мар юрттоз милемлы умой дышетӥсьёс луыны?

⁸ Вераны уг луы, Иаков нимысьтыз дышетскемын вал шуыса. Со нуналъёсы улӥсь религиозной кивалтӥсьёс Иаков шоры учкизы, вылды, озьы ик, кызьы учкизы Пётр но Иоанн апостолъёс шоры,— дышетскымтэ но огшоры адями шоры кадь (Ап. уж. 4:13). Нош солэсь гожтэтсэ лыдӟыса, паймиськод, кыӵе со умой дышетӥсь вал. Иаков сямен, ми но нимысьтыз дышетскемын ӧвӧл ке но, ми быгатӥськомы умой дышетӥсьёс луыны. Милемлы юрттоз Иеговалэн духез но дышетон, кудзэ со сётэ организациез пыр. Ойдолэ тодомы, кызьы Иаковлэн примерез юрттэ милемлы умой дышетӥсьёс луыны.

9. Вералэ, кыӵе дышетӥсь вал Иаков.

⁹ Иаков секыт но валантэм кылъёсты ӧз куты. Соос, кинъёс солэсь гожтэтсэ лыдӟо, умой валало, мар соослы карыны кулэ но кызьы. Кылсярысь, Иаков дышетӥз, христианъёс, шонерлыктэм ужъёсын пумиськыкузы, лекъяськыны кулэ ӧвӧл шуыса. Висъялэ саклыктэс, кыӵе огшоры  кылъёсын со та малпанэз вераз: «Тани, кинъёс трос чидазы, соосты ми шудоесь шуыса лыдъяськомы. Тӥ кылӥды Иовлэн чиданэз сярысь. Кузё-Инмарлэсь солы сётэм ӟечлыксэ но адӟиды. Уго Кузё-Инмар ӟеч сюлэмо, ваньзэ гажась-жалясь» (Иак. 5:11). Учке: аслэсьтыз кылъёссэ юнматон понна, Иаков Священной Гожтэмъёс вылэ пыкиське. Иов сярысь учырез вераса, со возьматӥз: Иегова котьку но бакель каре соосты, кинъёс солы оскымон кылё. Нош со дыре ик аслэсьтыз малпанъёссэ Иаков огшоры но валамон кылъёсын вераз. Озьы со лыдӟисьёсызлэсь саклыксэс аслыз ӧз висъя, нош Иеговалы висъяз.

10. Кызьы ми дышетыкумы Иаковлэсь адӟем карыны быгатӥськомы?

¹⁰ Малы дышетскыны луэ: огшоры кылъёсын вераське но дышетыкуды Инмарлэсь Кылзэ уже кутэ. Милям ӧвӧл ужпуммы адямиосты тодон-валанъёсынымы паймытыны. Милям соослы возьматэммы потэ, макем визьлыко Иегова но макем со сюлмаське соос сярысь (Рим. 11:33). Ми сое лэсьтыны быгатомы, адямиосын котьку но Библия вылэ пыкиськыса вераськимы ке. Шуом, дышетскись тӥлесьтыд визь-кенеш куре. Эн тырше солы асьтэлэсь малпандэс вераны. Юрттэ солы аслыз малпаськыны Библиысь примеръёс вылын но валаны, мае шӧдоз Иегова, со озьы яке тазьы лэсьтӥз ке. Та дышетскисьлэсь мылкыдзэ ӝутоз, ми интые, Иеговаез шумпоттыны.

11. Кыӵе шуг-секытъёссы вал нырысетӥ даурын куд-ог христианъёслэн но кыӵе визь-кенеш сётӥз соослы Иаков? (Иаков 5:13—15).

¹¹ Иаков шуг-секытъёс шоры чиньы пыр ӧз учкы. Солэн гожтэтысьтыз адӟиське, со вын-агайёслэн но сузэр-апайёслэн ляб палъёссы сярысь тодэ вал шуыса. Озьы ке но со ватытэк вераз, мар бордын соослы ужаны кулэ. Кылсярысь, куд-ог христианъёс ӧз дыртэ лэсьтыны сое, мае тодӥзы (Иак. 1:22). Мукетъёсыз эшъяськизы узыръёсын гинэ (Иак. 2:1—3). Нош кинлы ке но капчи ӧй вал кылзэ пинь сьӧраз возьыны (Иак. 3:8—10). Вань та шуг-секытъёс пичиесь ӧй вал. Нош Иаков вын-агайёсты но сузэр-апайёсты номырлы ярасьтэмен ӧз лыдъя. Со лякытэн но шонерак соослы визь-кенеш сётӥз. Озьы ик соослэсь, кинъёслы юрттэт кулэ вал, мылкыдзэс ӝутӥз тӧроослы вазиськыны. (Лыдӟе Иаковлэсь 5:13—15.)

12. Кызьы возьматоно, дышетскисьлы оскиськомы шуыса?

¹² Малы дышетскыны луэ: укыр троссэ эн возьмалэ но со дыре ик умоезлы оске. Тросэзлы дышетскисьёслы капчи ӧвӧл улоназы пыртыны сое, мае соос тодо (Иак. 4:1—4). Туж секыт вакчи дыр куспын урод сямъёслэсь куштӥськыны но христиан сямъёсты будэтыны. Адямилы визь-кенеш сётыны кулэ ке, Иаков сямен, милемлы кышкасьтэм луоно. Нош со дыре ик дышетскисьлэсь умой пала воштӥськемзэ возьмано. Ойдолэ Иеговалы оскомы, со ас дораз зӥбыт-востэм адямиосты ӧтёз но соослы умой пала воштӥськыны кужым сётоз шуыса (Иак. 4:10).

13. Мае лыдэ басьтӥз Иаков? (Иаков 3:2).

¹³ Иаков ачиз сярысь укыр трос ӧз малпаськы. Со ӧз лыдъя, Иисусэн ӵыжы-выжы луэмез но кенешын дано ужъёсты быдэсъямез сэрен, со мукет христианъёс шоры вылтӥяськыса учкыны быгатэ шуыса. Со интые, Иаков лякытэн соослы «гажано агай-вынъёсы» шуыса вазиськылӥз (Иак. 1:16, 19; 2:5). Озьы ик Иаков ӧз тыршы мукетъёсызлы возьматыны, со ноку  уг янгыша шуыса. «Ваньмы асьмеос трос сьӧлыкаськомы» шуыса веракуз, со ачиз сярысь но вераз. (Лыдӟе Иаковлэсь 3:2.)

14. Малы туж кулэ янгышъёсмы сярысь вераны?

¹⁴ Малы дышетскыны луэ: ми ваньмы сьӧлыкаськомы. Милемлы малпано ӧвӧл, ми дышетскисьмылэсь маин ке умойгес луиськомы шуыса. Малы? Малпаське: дышетскисьлэн малпанэз кылдӥз ке, ми ноку но ум янгышаське шуыса, кытчы со вуттоз? Дышетскись малпаны быгатоз, со ачиз ноку но Инмарлэн куронъёсызлы тупаны уз быгаты шуыса. Соин ик дышетскисьтылы ватытэк вералэ, тӥледлы но Библиысь возетъёсъя улыны котьку ик капчи ӧвӧл шуыса. Озьы ик вералэ со сярысь, кызьы Иегова тӥледлы тырмымтэосыныды нюръяськыны юрттэ. Соку дышетскисьты валалоз, со но Иеговалэн ужась-тыршисез луыны быгатоз шуыса.

15. Маин умой луо примеръёс, кудъёссэ вераз Иаков? (Иаков 3:2—6, 10—12).

¹⁵ Иаков дышетыкуз тупась примеръёсты уже кутӥз. Зэм но, солы юрттӥз святой дух. Но озьы ик со тросэзлы дышетскиз, вылды, аслаз агаезлэсь, кудӥз туж быгатыса кутӥз та дышетон амалэз. Иаковлэн гожтэтысьтыз примеръёс огшорыесь вал. Соин ик капчи валаны, кызьы соосты улонэ пыртоно. (Лыдӟе Иаковлэсь 3:2—6, 10—12.)

16. Малы туж кулэ умой примеръёс бырйыны?

¹⁶ Малы дышетскыны луэ: умой примеръёс быръе. Тӥ тупась примеръёс бырйиды ке, тӥляд кылзӥсьёсты син азязы пуктыны быгатозы сое, мар сярысь тӥ вераськоды. Сыӵе примеръёслы луыса Библиысь кулэ луись зэмлыкъёс соослэн сюлмазы пыӵалозы. Зэм, Иисус примеръёсты туж быгатыса уже кутӥз. Солэн Иаков выныз но солэсь адӟем кариз. Ойдолэ пыр-почгес эскеромы Иаковлэн гожтэтысьтыз одӥг примерез.

17. Малы Иаковлэсь примерзэ туж тупамон шуыны луоз? (Иаков 1:22—25).

¹⁷ Лыдӟе Иаковлэсь 1:22—25. Синучконэн примерез туж тупась шуыны луоз кӧня ке мугъёсъя. Иаков умой валаз, кыӵе малпанэз солэн верамез потэ вал лыдӟисьёсызлы. Инмарлэн Кылыз милемлы пайда мед ваёз шуыса, сое лыдӟыны гинэ тырмыт ӧвӧл. Со понна уже кутыны кулэ  сое, мае ми тодӥськомы. Иаковлэн примерез ваньмызлы туж тодмо вал: синучконэ котькудӥз учкылӥз. Соку мае возьматэ солэн примерез? Визьмо ӧй луысал синучконэ учкыны, тугаськем йырсиез адӟыны но сынаськытэк кошкыны. Ӵапак озьы ик, Инмарлэн Кылызлы луыса ми тырмымтэосмес адӟимы ке, соосты тупатытэк кельтыны визьмо ӧй луысал.

18. Мае лыдэ басьтоно, примеръёсты веракумы?

¹⁸ Кызьы ми адӟимы, умой пример быръён понна, лыдэ басьтыны кулэ куинь малпанъёсты: 1) пример тупаны кулэ малпанлы, кудзэ ми валэктӥськомы; 2) со кылзӥсьёслы валамон луыны кулэ; 3) со кулэ валэктыны, кызьы сое уже кутоно. Умой примеръёс бырйыны тӥледлы капчи ӧвӧл ке, учке «Возьмаськон Башнялэн публикациосызлэн индексысьтызы» (ӟуч) «Наглядные примеры» заголовокез но быръе асьтэлы тупась примеръёс. Примеръёсты ӵошатыны луэ микрофонэн. Малпанъёс, кудъёссэ тӥ со пыр вералоды, золгес кылӥськозы. Соин ик примеръёсын пусйыны кулэ валтӥсь малпанъёсты гинэ. Зэм но, ми ум тыршиське чеберъяськон понна умой примеръёс вераны, нош милям тросгес адямиослы юрттэммы потэ Иеговалэн шудо семьяяз пырыны.

19. Кызьы ми яратэммес возьматыны быгатӥськомы вын-агайёсмылы но сузэр-апайёсмылы?

¹⁹ Иаковен ӵошатыса, ми пӧлысь нокинлэн тырбыдэс агаез ӧвӧл. Но ми шумпотӥськомы Иеговалы ужаны-тыршыны бадӟым христиан семьяын. Ми яратӥськомы вын-агайёсмес но сузэр-апайёсмес. Соин ик ми соосын дырмес ортчытъяськомы, соослэсь дышетскиськомы но соосын ӵош ужаськомы-тыршиськомы. Ойдолэ тыршомы асьмеос шоры но мукетъёсыз шоры Иаков сямен учкыны, со кадь асьмеды возьыны но мукетъёссэ дышетыны. Соку ми Иеговаез данъяломы но трос зӥбыт-востэм адямиослы юрттомы яратӥсь инмысь Атаенымы эшъяськыны.