1—3. Малы Иеговалэн ужась-тыршисьёсыз бӧрдо?

 КУ ТӤ берпуметӥзэ бӧрдӥды? Зэм но, куддыръя ми шумпотэменымы бӧрдӥськомы. Но жаляса верано луэ, ӵем дыръя ми куректэменымы бӧрдӥськомы. Куке матысь адямимы кулэ, ми бӧрдытэк ум чидаське. Лора b, Огазеяськем Штатъёсысь сузэр, гожтӥз: «Куддыръя, нылы кулэмен, мыным сокем вӧсь луэ вал, мон нокытысь но буйгатскон ӧй шедьтылы. Сыӵе дыръёсы мон уг валаськы вал, кызьы мон азьланяз уло».

² Куддыръя бӧрдон понна милям мукет мугъёсмы но вань. Хироми, Япониысь пионер луыса ужась-тыршись сузэр, вера: «Куддыръя, тодытон понна участокысь адямиослэн кылзымтэзы сэрен, мон куректӥсько. Соку мон бӧрдыса ик Иеговалэсь курисько юрттыны мыным шедьтыны кинэ ке но, кинлэн мылкыдыз луоз зэмлыкез кылзыны».

³ Ми пӧлысь тросэз ас вылазы шӧдӥзы сое, мар сярысь веразы та сузэръёс (1 Пётр 5:9). Зэм но, милям Иеговалы шумпотыса ужаммы-тыршеммы потэ. Но ӵем дыръя ми пумиськиськомы куректонъёсын, возьманъёсмы уг быдэсмо яке кылдо учыръёс, куке Иеговалы оскымон луэммы эскериське (Пс. 6:7; 99:2). Мар кароно, куке милям сыӵе шӧдонъёсмы кылдо?

4. Мае ми эскеромы та статьяын?

⁴ Ми Иисуслэсь адӟем карыны быгатӥськомы. Куддыръя солэн но сюлэмшугъяськонъёсыз вал. Солэн синкылиосыз ик потылӥзы (Лука 19:41; 22:44; Иоанн 11:35; Евр. 5:7). Ойдолэ тодамы ваёмы куинь сыӵе учыръёсты. Соос юрттозы милемлы эшшо но золгес яратыны Иисусэз но солэсь Иегова Атайзэ. Озьы ик та эскерон возьматоз  милемлы, мар карыны быгатӥськомы, куке сюлэмшугъяськонъёс сэрен синкылиосмы ик пото.

5. Мае ми тодӥськомы Иисус сярысь, Иоаннлэсь 11:32—36 лыдӟыса?

⁵ Асьме вакытысь 32-тӥ арын толалтэ Иисуслэн матысь эшез, Лазарь, секыт висьыны усиз но кулӥз (Иоанн 11:3, 14). Солэн вал кык апайёсыз: Марфа но Мария. Ваньзы соос Иисуслы туж дуно пото вал. Лазарьлэн кулэмез сэрен, та кык сузэръёс куректыса улӥзы. Ӝоген Иисус Вифание лыктӥз, кытын улӥзы Марфа но Мария. Та сярысь тодыса, Марфа Иисуслэн азяз бызьыса потӥз. Малпалэ гинэ, кыӵе солэн шӧдонъёсыз вал, куке со синкылиос пыр Иисуслы вераз: «Кузё-Инмаре! Тон татын луысалыд ке, мынам братэ ӧй кулысал» (Иоанн 11:21). Куке Иисус адӟиз, кызьы та сузэръёс но соос доры лыктэмъёс бӧрдо, солэн но синкылиосыз потӥзы. (Лыдӟе Иоаннлэсь 11:32—36.)

6. Малы Иисус Лазарьлэн кулэмез сэрен бӧрдӥз?

⁶ Малы Иисуслэн синкылиосыз потӥзы? «Гожтэмъёсты валан» книгаын (ӟуч) со тазьы валэктӥське: «Лазарь эшезлэн кулэмез но солэн кык апайёсызлэн куректэмзы Иисуслэсь сюлэмзэ сокем бугыртӥз, со бӧрдыны ик кутскиз» c. Иисус син азяз пуктӥз, дыр, макем секыт ортчизы дуно эшезлэн берпуметӥ нуналъёсыз но макем секыт вал Лазарьлы, куке со валаз, ӝоген кулоз шуыса. Зэм но, Иисуслы туж вӧсь вал адӟыны, кызьы кык сузэръёс Лазарьлэн кулэмез сэрен куректо. Соослы, кинъёс матысь адямиоссэс ыштӥзы, таӵе шӧдонъёс тодмо. Та учыр дышетэ милемыз куинь кулэ луись зэмлыкъёслы.

7. Малы дышетэ милемыз Иисуслэн бӧрдэмез Иегова сярысь?

⁷ Иегова вала, мае тӥ шӧдӥськоды. Иисус — Атаезлэн «улонэзлэн образэз» (Евр. 1:3). Вераны луоз, Иисуслэн бӧрдэмез  возьматэ, Иегова но бӧрдӥз шуыса (Иоанн 14:9). Тӥ матысь адямиостэс ыштӥды ке, юн оске, Иегова куректэмдэс гинэ уг адӟы. Со вала, макем тӥледлы секыт. Инмар но сое ик шӧдэ. Со тодэ, тӥляд сюлэмды чигиськемын шуыса, но солэн тӥледыз бурмытэмез потэ (Пс. 33:19; 146:3).

8. Малы ми юн оскыны быгатӥськомы, Иисус милемлы дуно луись адямиосты улӟытоз шуыса?

⁸ Иисуслэн улӟытэмез потэ тӥледлы дуно луись адямиосты. Тодӥськоды на-а, мар луиз Иисуслэн синкылиосыз потон азьын? Иисус Марфаез буйгатӥз: «Тынад братэд улӟыса султоз» (Иоанн 11:23—27). Марфа Иисуслы оскиз. Та кышномурт Иеговалэн оскымон ужась-тыршисез вал но тодӥз, трос сю аръёс солэсь азьло Илия но Елисей пророкъёс кулэмъёсты улӟытъязы шуыса (3 Экс. 17:17—24; 4 Экс. 4:32—37). Со кылӥз, дыр, кызьы Иисус но улӟытӥз палкышнолэсь пизэ но сӥнагогалэн кивалтӥсезлэсь нылзэ (Лука 7:11—15; 8:41, 42, 49—56). Ми но юн оскыны быгатӥськомы, пумиськомы шуыса милемлы дуно луись адямиосын, кудъёсыз кулӥзы ини. Иисуслэн эшъёсыныз ӵош бӧрдэмез возьматӥз, со но улӟытонэз чидатэк возьма шуыса!

9. Кызьы ми, Иисус сямен, юнматыны быгатӥськомы соосты, кинъёс матысь адямизэс ыштӥзы? Вералэ пример.

⁹ Тӥ юнматыны быгатӥськоды соосты, кинъёс матысь адямизэс ыштӥзы. Иисус, Марфаен но Марияен бӧрдэм сяна, соосты кылзӥз но буйгатӥз. Ойдолэ солэсь адӟем каромы. Австралиысь Дэн нимо тӧро вера: «Кышное кулэм бере мыным юрттэт кулэ вал. Кӧня ке кузпалъёс уй но нунал дась вал монэ кылзыны. Соос азьын мон быгатӥ бӧрдыны но шӧдонъёсы сярысь вераны. Куддыръя мынам кужыме ик ӧй вал машинаме миськыны, сиён-юонлы ветлыны яке сиён дасяны. Сыӵе дыръёсы мынам эшъёсы соку ик лыкто вал но монэн ӵош ӵем вӧсясько вал. Соос зэмос эшъёс луизы, кудъёсыз „шуге-леке сюрыку“ юрттыны дась» (Мад. 17:17).

10. Вералэ учыр сярысь, кудӥз гожтэмын Лукалэсь 19:36—40, но мар собере луиз.

¹⁰ Мукетыз учыр луиз асьме вакытысь 33-тӥ арын 9-тӥ нисанэ. Тани-тани Иисус Иерусалиме пыроз. Трос адямиос солэн пумитаз пото но со азьын сюрес вылэ дӥськутъёссэс вӧлдо. Озьы соос возьмато, Иисусэз эксэен лыдъяло шуыса. Ваньзы туж шумпото. (Лыдӟе Лукалэсь 19:36—40.) Нош со, мар луиз собере, дышетскисьёсты паймытӥз. Город доры вуыса, Иисус со шоры учкиз но, солэн синкылиосыз потӥзы. Бӧрдыса Иисус азьпалзэ тодытыса вераз, мар возьма Иерусалимын улӥсьёсты (Лука 19:41—44).

11. Малы Иисус бӧрдӥз, Иерусалимын улӥсьёс сярысь малпаса?

¹¹ Иисуслы вӧсь вал, малы ке шуоно со тодӥз: тросэз иудейёс Эксэйлык сярысь иворез уз кылзэ, соин ик Иерусалим куашкатэмын луоз, отысь троссэ улӥсьёсты виёзы, нош кылемъёссэ пленэ нуозы (Лука 21:20—24). Жаляса верано луэ, кызьы Иисус азьло ик вераз вал, тросэз адямиос сое палэнтӥзы. Нош кызьы тӥ палан улӥсь адямиос учко Эксэйлык сярысь ивор шоры? Сое ӧжытэз гинэ кылзо ке, ойдолэ малпаськомы, малы милемыз дышетэ учыр, кудӥз сярысь гожтэмын Лукалэсь ӟеч иворын 19-тӥ люкетын. Со дышетэ милемыз эшшо куинь кулэ луись зэмлыкъёслы.

12. Малы дышетэ милемыз Иисуслэн бӧрдэмез Иегова сярысь?

 ¹² Иегова адямиос сярысь сюлмаське. Иисуслэн синкылиосыз возьматӥзы, Иегова адямиос сярысь сюлмаське шуыса. Библиын верамъя, Иеговалэн потэ, «нокин но медаз быры, ваньмыз ӧпкельыса сьӧлыкъёсызлэсь мед куштӥськоз шуыса» (2 Пётр 3:9). Ми но адямиосты яратэммес возьматӥськомы, куке шумпотон иворен соослэсь сюлэмъёссэс вырӟытыны тыршиськомы (Матф. 22:39) d.

13, 14. Кытысь адӟиське, Иисус адямиосты жаляз шуыса, но кызьы ми солэсь адӟем карыны быгатӥськомы?

¹³ Иисус ассэ быдэсак ужан-тыршонлы сётӥз. Котькыӵе учыръёсы со адямиосты дышетӥз (Лука 19:47, 48). Куддыръя Иисусэз кылзыны сокем трос калык люкаськылӥз, солы «нянь сиыны но маза ӧз луы ни» (Марк 3:20). Адямилэн Иисусэн уйин пумиськемез потэ вал ке, Иисус соглаш луэ вал (Иоанн 3:1, 2). Малы? Со адямиосты яратӥз но соосты жаляз. Жаляса верано луэ, тросэз, кинлы Иисус тодытӥз, христианъёс ӧз луэ. Но котькудӥз тырмыт тодон-валан басьтӥз, солы оскон понна. Милям но потэ, шумпотон иворез ваньмыз мед кылозы шуыса (Ап. уж. 10:42). Нош со понна милемлы дась луоно ужан-тыршон амалъёсмес вошъяны.

¹⁴ Дась луэ мае ке воштыны. Вань на трос адямиос, кудъёсызлэн мылкыдзы вань ӟеч иворез кылзыны. Нош ми котьку одӥг дыре тодытӥськомы ке, соосты ноку ум шедьтэ, дыр. Тани, мар вера Матильда нимо сузэр, кудӥз пионер луыса ужа-тырше: «Ми картэным тыршиськомы пӧртэм дыре тодытыны. Вазь ӵукна ми адямиосты уж дорысьтызы шедьтӥськомы. Нуназе, куке адямиос ульчае пото, ми публикациосынымы стендэн сылӥськомы. Нош ӝытпал тросгес адямиосты дорысьтызы шедьтыны луэ. Тодытоно ӧвӧл милемлы тупась дыре гинэ. Ми тыршиськомы тодытыны соку, куке тросгес адямиосты шедьтыны луэ. Озьы лэсьтыса, ми Иеговаез шумпоттомы».

15. Мар луиз Иисуслэн музъем вылын улонэзлэн берпуметӥ уяз, кызьы гожтэмын Лукалэсь 22:39—44?

¹⁵ Асьме вакытысь 33-тӥ арын 14-тӥ нисанэ бер ӝыт Иисус Гефсиман садэ лыктӥз. Отын со вань сюлмысьтыз Иеговалы вӧсяськиз. (Лыдӟе Лукалэсь 22:39—44.) Кызьы верамын Еврейёслы 5:7, Иисус «викышъяса, синкылиен куриськиз». Мае со куриз Атаезлэсь музъем вылын улонэзлэн берпуметӥ уяз? Со солэсь кужым куриз оскымон кыльыны но солэсь эриксэ быдэстыны. Иегова адӟиз, макем вӧсь вал Пиезлы. Соин ик, сое юнматон понна, со доры кылчинзэ ыстӥз.

16. Малы Иисус бӧрдӥз, куке Гефсиман садын вӧсяськиз?

¹⁶ Малы Иисус бӧрдӥз, куке Гефсиман садын вӧсяськиз? Зэм но, солы малпаны гинэ но вӧсь вал, сое Инмарез сантэмасез кадь виёзы шуыса. Со тодӥз, Атаезлы оскымон кылёно но солэсь ӟеч нимзэ утёно шуыса. Куд-огъёсыз али ик ини ортчо шуг-секытъёс пыр, кудъёсаз эскериське Иеговалы оскымон луэмзы. Соку малы тӥ дышетскыны быгатоды Иисуслэн учырысьтыз? Эскеромы эшшо куинь кулэ луись зэмлыкъёсты.

17. Мае ми тодӥськомы Иегова сярысь Иисуслэн ӟырдыт вӧсяськемезлы ответ сётэмысьтыз?

¹⁷ Иегова сюлмысь вӧсяськемъёстэс кылзэ. Иегова сак кылзӥз Пиезлэсь куронзэ. Малы? Малы ке шуоно Иисус понна самой валтӥсез вал Атаезлы оскымон кыльыны но солэсь нимзэ чылкытатыны. Ми понна но Иеговалы оскымон луон но солэсь нимзэ чылкытатон валтӥсез луиз ке, соку Инмар юрттэт куреммылы ответ сётоз (Пс. 144:18, 19).

18. Малы Иисусэз жалясь но валась эшен ӵошатыны луэ?

¹⁸ Иисус тодэ, мае тӥ шӧдӥськоды. Шуг-секытъёсты капчигес чиданы, куке ми вӧзын эшмы, кудӥз милемыз умой вала но та выллем шуг-секыт пыр потӥз ини. Иисус — ӵапак сыӵе эш. Со тодэ, мае шӧдэ адями, куке со лябӟемын но солы юрттэт кулэ. Со жаля милемыз но «кулэ дыръя» милемлы юрттыны дась (Евр. 4:15, 16). Иисус тау кариз Гефсиман садын кылчинлэн юрттэмезлы.  Малы та милемыз дышетэ? Иегова вӧсяськонмылы ответ сётыны быгатэ публикациос, видео, речь, тӧро яке юн осконэн эшмы пыр. Иисус сямен ик, ойдолэ Иеговалэсь юрттэтсэ ум палэнтэ.

19. Мар милемыз юнматыны быгатэ, куке Инмарлы оскымон луэммы эскериське? Вералэ пример.

¹⁹ Иегова тӥледлы каньыллык сётоз. Кызьы Иегова милемыз юнматэ? Вӧсяськыкумы со милемлы каньыллыксэ сётэ, кудӥз «котькыӵе визьлэсь но вылӥын» (Флп. 4:6, 7). «Инмарлэн каньыллыкез» юрттэ милемлы сюлэмшугъяськонъёсмес вормыны но сюлмаськытӥсь малпанъёсмес палэнтыны. Тае ас вылаз шӧдӥз Люсия нимо сузэр. Со вера: «Куддыръя мон мӧзмыса улӥсько. Мон малпаны но кутскисько, Иегова монэ уг яраты шуыса. Сыӵе дыръёсы мон соку ик верасько солы аслам шӧдонъёсы сярысь. Вӧсяськон юрттэ мыным умоез сярысь малпаськыны». Кызьы возьматэ Люсиялэн учырез, вӧсяськонлы луыса милям сюлэммы каньыл луэ.

20. Малы тӥ дышетскиды куинь учыръёсысь, куке Иисуслэн синкылиосыз потӥзы?

²⁰ Ми эскеримы куинь учыръёсты, куке Иисуслэн синкылиосыз потӥзы. Макем буйгатӥсь но пайдаё малпанъёсты ми эскеримы! Та статья возьматӥз: милемлы луоно соосын ӵош, кинъёслэн матысь адямизы кулӥз. Озьы ик милемлы осконо: Иегова но Иисус юрттозы милемлы, куке ми сыӵе ик куректонъёсын пумиськомы. Со сяна, та статья милесьтым мылкыдмес ӝутӥз, жаляны адямиосты, кудъёсызлы ми тодытӥськомы, малы ке шуоно Иегова но Иисус адямиос шоры ӵапак озьы учко. Эшшо та статья милемлы тодамы вайытӥз буйгатӥсь малпанэз: Иегова но солэн Пиез милемыз валало но жаляло. Шуг-секытъёсын пумиськыкумы, соослэн милемлы юрттэмзы потэ. Та малпанъёс юрттозы милемлы пумозяз ик чиданы, куке Иегова быдэстоз аслэсьтыз кылсётонзэ но син улысьтымы вань синкылимес ӵушоз (Усьт. 21:4).