1, 2. а) Ку ми тужгес но тодамы вайиськомы матысь адямимы сярысь, кудӥз кулӥз ини? б) Кыӵе ужрадэз Иисус пыртӥз улонэзлэн берпуметӥ нуналаз?

 МИ МАТЫСЬ адямимес ыштӥмы ке, кӧня гинэ дыр медам ортчы, ми со адями сярысь ум вунэтэ. Тужгес но ми сое тодамы вайиськомы солэн кулон нуналаз.

² Котькуд ар быдэс дунне вылысь трос миллион вын-агайёсынымы но сузэр-апайёсынымы ӵош ми люкаськиськомы дуно эшмылэн, Иисус Христослэн, кулон нуналаз (1 Пётр 1:8). Со аслэсьтыз улонзэ курбонлы сётӥз, ми пырак улыны мед быгатомы шуыса (Матф. 20:28). Иисуслэн потэ вал, христианъёс солэн кулонэз сярысь медаз вунэтэ шуыса. Музъем вылын улонэзлэн берпуметӥ нуналаз, оскымон апостолъёсыныз ӝытсэ сиськыкуз, со нимысьтыз ужрад пыртӥз но соосты косӥз: «Монэ буре вайыса, тае быдэсъялэ» (Лука 22:19).

3. Мае ми эскеромы та статьяын?

³ Христослэсь кулонзэ Тодэ ваён ӝытанэ лыктэмъёс пӧлысь ӧжытэз гинэ инмын улыны оско. Но, соос сяна, Ӝытанэ лыкто трос миллион адямиос, кудъёсыз оско музъем вылын пырак улыны. Та статьяысь ми тодомы, малы соосыз но, таосыз но котькуд ар Тодэ ваён ӝытанэ лыкто но кыӵе со соослы пайда вае. Нырысь эскеромы куд-ог мугъёсты, малы Ӝытанэ зырӟем христианъёс лыкто.

4. Малы Тодэ ваён ӝытанын зырӟем христианъёс нянь сиё но вина юо?

⁴ Котькуд ар зырӟем христианъёс Ӝытанэ пырисько. Малы соос, отчы лыктыса, нянь сиё но вина юо? Та юанлы валэктон шедьтон понна, ойдолэ тодамы ваёмы, мар луиз Иисуслэн музъем вылын улонэзлэн берпуметӥ ӝытаз. Апостолъёсыныз Пасхаез пусъемез бере Иисус пыртэ ужрадэз, кудӥз Господьлэн Ӝытанэз шуыса нимаськоз. Иисус 11 оскымон апостолъёсызлы нянь но вина сётэ но вера, соос сое мед сиёзы но мед юозы шуыса. Со сяна, Иисус вера соослы кык тупанкылъёс сярысь: выль тупанкыл но Эксэйлык сярысь тупанкыл b (Лука 22:19, 20, 28—30). Та кык нимысьтыз тупанкылъёс апостолъёслы но куд-ог мукет христианъёслы луонлык сёто инмын эксэйёс но священникъёс луыны (Усьт. 5:10; 14:1). Соин ик музъем вылэ кылем зырӟем христианъёс гинэ — соос, кинъёсын та тупанкылъёс кутэмын,— Ӝытанын нянь сиё но вина юо.

5. Мае умой тодо зырӟем христианъёс?

⁵ Тани эшшо одӥг муг. Ӝытанэ лыктыса, зырӟем христианъёс малпасько вуоноезлы осконзы сярысь, кудзэ кузьмаз соослы Иегова. Малпалэ гинэ: 144 000 христианъёслы сисьмисьтэм мугор сётэмын луоз но соос ноку уз кулэ. Соос улӟытэм Иисус Христосэн ӵош ужалозы-тыршозы. Со сяна, соос Иеговаез адӟозы! (1 Кор. 15:51—53; 1 Иоанн 3:2). Зырӟем христианъёс умой тодо, соослы сыӵе дан сётэмын луоз шуыса. Но инмын улон понна, соослы кулытозязы ик Иеговалы оскымон кыльыны кулэ (2 Тим. 4:7, 8). Зырӟем христианъёс шумпотыса малпасько со сярысь, мар соосты возьма (Тит. 2:13). Нош табере ойдолэ малпаськомы, малы Ӝытанэ «мукет ыжъёс» лыкто (Иоанн 10:16).

6. Малы Ӝытанэ «мукет ыжъёс» лыкто?

⁶ «Мукет ыжъёс» Ӝытанэ уг пырисько, соос — куноос. Нырысьсэ та христианъёс Ӝытанэ ӧтемын вал 1938-тӥ арын. Тани мар со сярысь вераське 1938-тӥ арын 1-тӥ южтолэзь понна поттэм «Возьмаськон башняын» (англи): «Умой луысал, [„мукет ыжъёс“] та пумиськонэ лыктысалзы но учкысалзы ке, кызьы со ортчытӥське... Та соосты шумпоттыны кулэ. Зэмзэ вераса, со озьы ик вань». Кызьы сюанэ ӧтем куноос кузпалъяськисьёс понна шумпото, озьы ик «мукет ыжъёс» но Ӝытанэ куноос кадь шумпотыса лыкто.

7. Малы «мукет ыжъёс» Ӝытанын шумпотыса речез кылзо?

⁷ Ӝытанэ лыктыса, «мукет ыжъёс», зырӟем христианъёс сямен, малпасько азьпал осконзы сярысь, кудзэ кузьмаз соослы Иегова. Кылсярысь, Ӝытанын Библия вылэ пыкиськыса дасям речез кылзыны луэ. Отын трос вераське со сярысь, мар карозы «мукет ыжъёс» понна Иисус Христос но 144 000 христианъёс сюрс ар ӵоже кивалтонзы дыръя. Иисус Христос эксэйлэн кивалтэмез улсын инмысен та кивалтӥсьёс Инмарлэсь кылзӥськись адямиослы юрттозы музъемез райлы пӧрмытыны но тырбыдэс луыны. Трос миллион куноос, кудъёсыз арысь аре Ӝытанэ ветло, син азязы пукто, кызьы быдэсмозы Библиысь азьпалзэ ивортонъёс, кудъёсыз гожтэмын, кылсярысь, Исаиялэн 35:5, 6; 65:21—23 но Усьтӥськонын  21:3, 4. Асьсэды но матысь адямиоссэс выль дуннеын син азязы пуктыса, соос вуоноезлы осконзэс юнмато но эшшо но юн мылкыдын Иеговалы ужало-тыршо (Матф. 24:13; Гал. 6:9).

8. Кыӵе эшшо муг вань на, малы «мукет ыжъёс» Ӝытанэ лыкто?

⁸ Вань на эшшо одӥг муг. Ӝытанэ лыктыса, «мукет ыжъёс» возьмато, зырӟем христианъёсты ярато но соослы юрттыны дась шуыса. Инмарлэн Кылаз азьло ик гожтэмын вал, зырӟем христианъёслэн но соослэн, кинъёс музъем вылын пырак улыны оско, матысь кусыпъёссы луозы шуыса. Ойдолэ куд-ог сыӵе азьпалзэ ивортонъёсты эскеромы.

9. Мар сярысь вераське азьпалзэ ивортонын, кудӥз гожтэмын Захариялэн 8:23?

⁹ Лыдӟе Захариялэсь 8:23. Та азьпалзэ ивортонын вераське «мукет ыжъёслэн» зырӟем вын-агайёслы но сузэр-апайёслы оскымон луэмзы сярысь. «Вань кылъёсын вераськись калыкъёс пӧлысь дас мурт» — со «мукет ыжъёс». «Ми тон сьӧры мыномы» кылъёсын соос вазисько «иудей пилы», яке зырӟем христианъёслы (Рим. 2:28, 29). Пророк вера, дас муртъёс «иудей пилэн дӥсянэзлэн сӧзы бордаз кутӥськозы» шуыса. Мукет сямен вераса, соос котьку но зырӟем христианъёслы юртто но соосын ӵош Иеговалы йыбыртъяло. Зэм но, «мукет ыжъёслэн» зырӟем вын-агайёсын но сузэр-апайёсын матысь кусыпъёссы. Соин ик паймонэз ӧвӧл, «мукет ыжъёс» зырӟем христианъёсын ӵош Ӝытанэ лыкто шуыса.

10. Кызьы Иегова быдэстӥз азьпалзэ ивортонэз, кудӥз гожтэмын Иезекиильлэн 37:15—19, 24, 25?

¹⁰ Лыдӟе Иезекиильлэсь 37:15—19, 24, 25. Кызьы быдэсмиз та азьпалзэ ивортон? Иеговалэн юрттэменыз, зырӟем христианъёс но «мукет ыжъёс» валче ужало. Та азьпалзэ ивортонын вераське кык бодыос сярысь. Иудалэн бодыез возьматэ христианъёсты, кудъёсыз инмысен кивалтозы, малы ке шуоно Израильлэн ӵапак та выжыысьтыз эксэйёс потӥзы. Нош Ефремлэн бодыез возьматэ соосты, кинъёс оско музъем вылын пырак улыны c. Иегова вера: «Соосты одӥг боды каро». Яке Инмар зырӟем христианъёсты но «мукет ыжъёсты» огазеялоз. Соос Иисус Христослэн кивалтэмез улсын огкылысь ужалозы-тыршозы. Соин ик котькуд ар зырӟем христианъёс но «мукет ыжъёс» Ӝытанэ ӵош люкасько. Соос «одӥг уллё» луо, кудӥз сярысь «одӥг Возьмась» сюлмаське (Иоанн 10:16).

11. Мар нырысь ик каро Иисуслэн мадёнысьтыз «мукет ыжъёс», Христослэн вынъёсызлы юрттон понна? (Матфей 25:31—36, 40).

¹¹ Лыдӟе Матфейлэсь 25:31—36, 40. Кинэ возьмато та мадёнысь ыжъёс? «Мукет ыжъёсты», яке шонерлыко адямиосты, кудъёсыз та дуннелэн берпум нуналъёсаз уло но музъем вылын пырак улыны оско. Соос Христослэн вынъёсызлы оскымон юрттӥсько. Нош кызьы? Нырысь ик соос юртто туж кулэ луись ужез нуыны — быдэс дунне вылын тодытыны но дышетскисьёсты дасяны (Матф. 24:14; 28:19, 20).

12, 13. Кызьы эшшо «мукет ыжъёс» Христослэн вынъёсызлы юрттӥсько?

¹² Котькуд ар быдэс дунне вылын Ӝытан азьын кӧня ке арня ӵоже адямиосты та ужрадэ ӧтёнъя кампания ортчытӥське. «Мукет ыжъёс» шумпотыса отчы пырисько. Озьы соос Христослэн вынъёсызлы юрттӥсько.  (Учке « Кутскиды-а ни тӥ Ӝытанлы дасяськыны?» рамкаез.) Тросаз интыосын Ӝытанэ лыктэмъёс нянь уз сие но вина уз юэ. Озьы ке но «мукет ыжъёс» дасяло ваньзэ, Ӝытан котькуд кенешын мед ортчытӥськоз шуыса. Соос шумпотыса Христослэн вынъёсызлы юрттӥсько. Соосты шумпотто Иисуслэн таӵе кылъёсыз: «Тае тӥ Мынам покчи братъёсы пӧлысь одӥгезлы лэсьтӥды бере, тӥ сое Мыным лэсьтӥды» (Матф. 25:37—40).

¹³ Малы эшшо вань христианъёс Ӝытанэ лыкто?

14. Кызьы Иегова но Иисус возьматӥзы, милемыз ярато шуыса?

¹⁴ Ми тау кариськомы Иеговалы но Иисуслы яратэмзы понна. Иегова милемыз яратэмзэ трос амалъёсын возьматӥз. Но одӥгез тужгес но яркыт. Ми понна Иегова туж бадӟым курбон вайиз: со аслэсьтыз дуно Пизэ курадӟыса кулыны сётӥз, ми пырак улыны мед быгатомы шуыса (Иоанн 3:16). Ми понна улонзэ сётыса, Иисус возьматӥз, со но милемыз туж яратэ шуыса (Иоанн 15:13). Мар гинэ ми медам лэсьтэ, Иеговалы но Иисуслы ми ноку номырин берыктыны ум быгатэ. Но ми быгатӥськомы яратэмзы понна тау кареммес возьматыны соин, кызьы котькуд нунал улӥськомы (Кол. 3:15). Ӝытанэ лыктыса, ми Иеговалы но Иисуслы вераськомы, яратэмзэс ум вунэтӥське но соосты яратӥськомы шуыса.

15. Малы зырӟем христианъёс но, «мукет ыжъёс» но дун тырон понна тау каро?

¹⁵ Ми тау кариськомы дун тырон понна (Матф. 20:28). Дун тыронлы луыса зырӟем христианъёслэн вуоноезлы паймымон осконзы вань. Соин ик соослы та кузьым туж дуно потэ. Соос Иисус Христослэн курбонэзлы оско бере, Иегова соосты шонерлыкоосын нима но аслаз нылпиосыныз лыдъя (Рим. 5:1; 8:15—17, 23). «Мукет ыжъёс» но дун тырон понна тау каро. Соос Христослэн кисьтӥськем вирызлы оско. Соин ик соос быгато Инмарлэн эшъёсыз луыны, солы ужаны-тыршыны но оскыны, «туж бадӟым курадӟон-куректон» пыр потозы шуыса (Усьт. 7:13—15). Зырӟем христианъёс но, «мукет ыжъёс» но дун тырон понна тау карыны быгато, котькуд ар Ӝытанэ лыктыса.

16. Малы эшшо ми Ӝытанэ лыктӥськомы?

¹⁶ Со сяна, ми Ӝытанэ лыктӥськомы, малы ке шуоно Иисуслэсь кылӟиськеммы потэ. Куке Иисус Ӝытанэз пусйыны косӥз, со шуиз: «Монэ буре вайыса, тазьы каре» (1 Кор. 11:23, 24). Кыӵе гинэ осконмы милям медам луы — инмын яке музъем вылын улыны,— ми лыдъяськомы, Иисус та курон-косонэз милемлы сётӥз шуыса.

17. Кызьы Ӝытан юрттэ милемлы Иеговалы эшшо но матэ кариськыны?

¹⁷ Ӝытан юрттэ милемлы Иеговалы матэ кариськыны (Иак. 4:8). Тодэ ваён ӝытан милемлы луонлык сётэ малпаськыны вуоно оскон сярысь, кудзэ кузьмаз милемлы Иегова, но со сярысь, макем юн со милемыз яратэ (Иер. 29:11; 1 Иоанн 4:8—10). Куке ми малпаськиськомы вуоноезлы осконмы но Инмарлэн яратонэз сярысь, Иеговаез яратонмы но соин эшъяськонмы эшшо но юнмало (Рим. 8:38, 39).

18. Мар карыны милесьтым мылкыдмес ӝутэ Иисус сярысь малпаськон?

¹⁸ Ӝытан милесьтым мылкыдмес ӝутэ Иисуслэсь адӟем карыны (1 Пётр 2:21).  Ӝытан азьын Библиез лыдӟыса, ми малпаськиськомы Иисуслэн музъем вылын берпуметӥ нуналъёсыз сярысь, озьы ик солэн кулэмез но улӟемез сярысь. Собере, Библия вылэ пыкиськыса дасям речез кылзыса, ми малпаськиськомы солэн яратонэз но ми понна улонзэ сётэмез сярысь (Еф. 5:2; 1 Иоанн 3:16). Арысь аре Ӝытанэ ветлыса, милям мылкыдмы юнма улыны озьы, «кызьы Иисус Христос улӥз» (1 Иоанн 2:6).

19. Мар милемлы кароно, азьланяз но Иеговаен эшъяськон понна?

¹⁹ Ӝытан милесьтым мылкыдмес ӝутэ азьланяз но Иеговалэн эшез луыны (Иуда 20, 21). Иегова милемыз мед яратоз шуыса, милемлы вань кужмысьтымы тыршоно солэсь сюлэмзэ шумпоттыны, солэсь нимзэ данъяны но солэсь кылзӥськыны (Мад. 27:11; Матф. 6:9; 1 Иоанн 5:3). Ӝытанэ лыктыса, милям мылкыдмы юнма котькуд нунал Иеговаез шумпоттыны но возьматыны солы, милям соин пырак дауръёс ӵоже эшъяськеммы потэ шуыса.

20. Кыӵе кулэ луись мугъёсмы милям вань Ӝытанэ лыктыны?

²⁰ Кызьы ми адӟимы, вань христианъёслэн кулэ луись мугъёссы вань Ӝытанэ лыктыны. Арысь аре ми та нимысьтыз нуналэ ӵош люкаськиськомы, дуно эшмес, Иисус Христосэз, тодэ ваён понна. Нош тужгес но кулэез: озьы ми тау кариськомы Иеговалы, кудӥз туж бадӟым яратонзэ возьматӥз, ми понна аслэсьтыз Пизэ курбонлы сётыса. 2022-тӥ арын Тодэ ваён ӝытан ортчоз 15-тӥ оштолэзе, удмуртарняе. Ми яратӥськомы Иеговаез но солэсь Пизэ. Соин ик Иисус Христослэн кулон нуналаз, вань ужъёсмес кельтыса, ми Ӝытанэ лыктомы.