1, 2. Кыӵе шуг-секытъёсын пумиськыло Иеговалэн ужась-тыршисьёсыз?

 КЫШКЫТ учыр улонмес син куспын воштыны быгатэ. Кылсярысь, Луи́с a агайлэсь рак висёнзэ шедьтӥзы. Эмъясез вераз, солы кӧня ке толэзь гинэ улыны кылиз на шуыса. Мо́ника сузэр но солэн картэз Иеговалы ужазы-тыршизы. Но берлогес со тодӥз, картэз, кудӥз тӧро луыса ужаз-тыршиз, трос аръёс ӵоже ини солы оскымон ӧвӧл шуыса. Оли́виялы, бызьымтэ сузэрлы, ӝегатскытэк улон интызэ кельтоно луиз, малы ке шуоно соос пала кужмо сильтӧл матэктэ вал. Нош бертэмез бере со коркаезлэсь куашкам бервылъёссэ гинэ адӟиз. Луис агайлэн, Моника но Оливия сузэръёслэн улонзы син куспын воштӥськиз. Тӥ но та выллем учыръёсы сюрылӥды-а?

² Ми Иеговалы ужаськомы-тыршиськомы ке но, ми шуг-секытъёсын пумиськылӥськомы. Кылсярысь, ми пумиськылӥськомы сыӵе шуг-секытъёсын но висёнъёсын, кудъёсыныз вань адямиос пумиськыло. Со сяна, милемлы люкето яке милемыз уйыло-улляло соос, кинъёс Инмарлэсь калыксэ адӟемпотостэм каро. Иегова уг вера, милемыз шуг-секытъёслэсь утёз шуыса. Озьы ке но со кылзэ сётэ милемлы юрттыны (Ис. 41:10). Солэн юрттэменыз ми быгатомы умой мылкыдын улыны, шонер ужпумъёс кутылыны но секыт дыръя солы оскымон кыльыны. Та статьяын ми эскеромы ньыль амалъёсты, кызьы Иегова милемлы секыт дыръя юрттэ. Озьы ик тодомы, мар кароно, со милемлы мед юрттоз шуыса.

 ИЕГОВА ТӤЛЕДЫЗ УТЬЫСА ВОЗЁЗ

3. Мар карыны милемлы секыт луэ, кышкыт учырен пумиськыкумы?

³ Шуг-секыт. Кышкыт учырен пумиськыса, секыт малпаськыны но шонер ужпумъёс кутыны. Малы? Малы ке шуоно ми туж куректӥськомы но сюлмаськиськомы. Тани мар веразы асьсэлэн шӧдонъёссы сярысь кык сузэръёс, кудъёсыз сярысь вераськиз ини. Оливия вера: «Куке сильтӧл коркаме куашкатӥз, мон мар карыны ик ӧй тоды». Моника, кудӥзлэн картэз солы оскымон ӧй вал, вера: «Мон ноку ӧй малпа, таӵе учыре сюро шуыса. Мыным туж вӧсь вал — сюлмам пуртэн бышкалтэм кадь. Огшоры ужъёс гинэ но мыным секыт сётӥсько вал». Мар карыны Иегова кылзэ сётэ, куке ми куректыса но сюлмаськыса улӥськомы?

4. Мае сётыны кылзэ сётэ Иегова, Филиппыослы 4:6, 7 лыдэ басьтыса?

⁴ Мар каре Иегова. Со кылзэ сётэ, милемлы сётоз шуыса сое, мае Библия «Инмарлэн каньыллыкез» шуыса нима. (Лыдӟе Филиппыослы 4:6, 7.) Куке милям Инмарлэн каньыллыкез вань, ми капчи сюлмын, гань-гань улӥськомы. Озьы луыны быгатэ соку гинэ, куке милям Иеговаен матысь кусыпъёсмы вань. Сыӵе каньыллык «котькыӵе визьлэсь но вылӥын», яке Иегова быгатэ милемыз буйгатыны озьы, кызьы ми ӧм но малпалэ. Кылсярысь, тодады вае, кызьы тӥ вань сюлмысьтыды Иеговалы вӧсяськиды но собере тӥледлы туж капчи луиз. Со ик вань «Инмарлэн каньыллыкез», кудзэ сётэ Иегова.

5. Кызьы Инмарлэн каньыллыкез визьмес но сюлэммес утьыса возе?

⁵ Со кылбурын ик гожтэмын, Инмарлэн каньыллыкез «тӥлесьтыд сюлэмдэс но, малпанъёстэс но... утьыса возёз» шуыса. Грек кыл, кудӥз татын «утьыса возёз» шуыса берыктэмын, вашкала дыръя кутӥськиз, куке вераськон мынэ вал ожгарчиос сярысь, кудъёсыз карез утизы. Сыӵе карын адямиос каньыл сюлмын улӥзы, малы ке шуоно тодӥзы, соосты утё шуыса. Ӵапак озьы ик, куке Инмарлэн каньыллыкез сюлэммес но визьмес уте, ми кышкатэк улӥськомы (Пс. 4:9). Югдурмы соку ик ӧз воштӥськы ке но, Анна сямен, Самуил пророклэн анаез сямен, ми каньыл сюлмын улӥськомы (1 Экс. 1:16—18). Нош куке ми каньыл сюлмын улӥськомы, ми быгатӥськомы малпаськыны но шонер ужпумъёс кутыны.

6. Мар кароно, Инмарлэн каньыллыкез милемыз мед утёз шуыса? (Озьы ик учке суредэз.)

⁶ Мар кароно милемлы. Вашкала дыръя карын улӥсьёс, кышкыт учыр кылдыку,  юрттэт курыса, ожгарчиослы вазиськыны быгато вал. Нош мар кароно милемлы, кышкатэк улон понна? Вӧсяськоно, сюлэммы каньыл луытозь (Лука 11:9; 1 Фес. 5:17). Тани мар каризы Луис но Анна кышноез, куке тодӥзы, солы кӧня ке толэзь гинэ улыны кылиз на шуыса. Луис вера: «Сыӵе дыре туж секыт эмъяськон амал бырйыны но кыӵе ке ужпум кутыны. Вӧсяськон гинэ милемлы юрттӥз каньыл сюлмын улыны». Луис но солэн кышноез куризы Иеговаез соосты буйгатыны но соослы визьлык сётыны. Соос адӟизы, кызьы Иегова соослы юрттэ. Тӥ но кышкыт учыре сюриды ке, ялан вӧсяське. Тӥ одно ик адӟоды, кызьы Инмарлэн визьлыкез визьдэс но сюлэмдэс уте (Рим. 12:12).

ИЕГОВА ТӤЛЕДЛЫ ЮРТТОЗ КАНЬЫЛ СЮЛМЫН УЛЫНЫ

7. Кыӵе шӧдонъёс кылдыны быгато бадӟым шуг-секытъёс дыръя?

⁷ Шуг-секыт. Куддыръя, бадӟым шуг-секытъёсын пумиськыку, милемлы секыт асьмеды киямы кутыны, асьмеды дышем сяммыя возьыны. Кызьы зарезь вылын кужмо сильтӧл дыръя кораблез палэнысь палэнэ сэрпалля, милям пӧртэм шӧдонъёсмы кылдыны быгато но ми кытчы пырон инты ум шедьтӥське. Картэзлэн кулэмез бере Анналэн пӧртэм шӧдонъёсыз кылдылӥзы. Со вера: «Нырысь мон мӧзмыса улӥ, собере асме жаляны кутски. Мынам воже потэ вал, Луис вӧзам ӧвӧл ни шуыса». Анналы туж секыт вал быдэсъяны ужъёсты, кудъёсыныз азьвыл картэз выриз. Со кытчы пырон инты ик ӧз шедьты. Кызьы Иегова милемлы юрттэ, куке милям таӵе шӧдонъёсмы кылдо?

8. Мар карыны кылзэ сётэ Иегова, Псалтирез 61:3 лыдэ басьтыса?

⁸ Мар каре Иегова. Со кылзэ сётэ, милемыз юнматоз но асьмеды киямы кутыны юрттоз шуыса. (Лыдӟе Псалтирез 61:3.) Зарезь вылын кужмо сильтӧл дыръя кораблез палэнысь паланэ сэрпалляны кутске. Корабль медаз бекырскы шуыса, ву пушкын кык палаз ик солэн стабилизаторъёсыз вань. Соослы луыса со сокем уг лэйка ни, нош кораблен мынӥсьёс кышкатэк но гань-гань мыныны быгато. Стабилизаторъёс умойгес ужало, куке корабль одӥг интыяз уг сылы, нош кытчы ке мынэ. Ӵапак озьы ик Иегова но милемыз юнматоз но асьмеды киямы кутыны юрттоз, куке секыт дыръя ми одӥг интыямы ум сылӥське.

9. Мар милемлы юрттоз эскерон ортчытыны, каньыл сюлмын улон понна? (Озьы ик учке суредэз.)

⁹ Мар кароно милемлы. Сюлмады пӧртэм  шӧдонъёс бугыръяськыку, азьланяз но тырше вӧсяськыны, кенешлэн пумиськонъёсаз ветлыны но тодытыны. Валамон, азьвыл мында тӥ лэсьтыны уд быгатэ. Но Иегова тӥлесьтыд сое уг но возьма. (Ӵошатэ Лукалэсь 21:1—4.) Дыр висъялэ ас поннады Библиез эскерыны но малпаськыны. Малы со туж кулэ? Аслаз организациез пыр Иегова сётэ милемлы туж умой статьяосты но видеороликъёсты, кудъёсыз юртто каньыл сюлмын улыны. Эскерон ортчытыны милемлы юрттозы JW Library^® приложение, «Возьмаськон башнялэн публикациосызлэн индекссы» но «Иеговалэн Адӟись-Ивортӥсьёсызлэн публикациоссыя эскерыны юрттэт» (ӟуч). Ӵапак озьы ик лэсьтэ вал Моника сузэр, куке солы секыт луэ вал. Кылсярысь, со эскериз «вожпотон» яке «оскымон луон» кылъёсты. Собере со туж трос лыдӟиське вал, сюлмыз капчи луытозь. Со вера: «Эскерон ортчытыны кутскыкум, мыным туж секыт вал. Нош эскерон бере сюлмы капчи луэ вал. Лыдӟиськыкум мон валасько вал, Иегова монэ туж умой тодэ, шӧдонъёсме вала но мыным юрттэ шуыса». Иеговалэн юрттэменыз тӥ но быгатоды каньыл сюлмын улыны (Пс. 118:143, 144).

ИЕГОВА ТӤЛЕДЫЗ ЮНМАТОЗ

10. Кызьы ми асьмеды шӧдыны быгатӥськомы, кышкыт учырен пумиськыкумы?

¹⁰ Шуг-секыт. Кышкыт учырен пумиськыку, куддыръя кужыммы но мылкыдмы воксё быре. Сыӵе учыре ми кельшиськомы спортсменлы, кудӥз вӧсь луиз. Азьвыл со туж ӝог бызьылэ вал, нош вӧсь луэмез бере мырдэм, чутыса гинэ ветлэ. Оло нош, милемлы но секыт быдэсъяны ужъёсты, кудъёсыз азьвыл капчиен сётӥсько вал. Яке милемлы асьмеды косоно луэ лэсьтыны сое, мар азьвыл шумпотон вае вал. Оло нош, Илия пророк сямен, ми но шӧдӥськомы, султыны кужыммы ӧвӧл но иземмы гинэ потэ шуыса (3 Экс. 19:5—7). Мар карыны Иегова кылзэ сётэ, куке ми катьтэммемын?

11. Кызьы эшшо юрттэ на Иегова, Псалтирез 93:18 лыдэ басьтыса?

¹¹ Мар каре Иегова. Со кылзэ сётэ милемыз юнматыны. (Лыдӟе Псалтирез 93:18.) Тодамы ваёмы вӧсь луэм спортсменэз. Со ветлыны быгатэ кинлэн ке юрттэменыз гинэ. Милемлы но, секыт дыръя Иеговалы ужан-тыршон понна, кинлэн ке юрттэмез кулэ. Секыт дыръя инмысь Атаймы милемыз таӵе кылъёсын юнматэ:  «Мон уго тынад Инмаред Кузё-Инмар; тонэ бур китӥд кутыса возисько но тыныд шуисько: „Эн кышка, Мон тыныд юрттӥськисько“» (Ис. 41:13). Давид эксэй Инмарлэсь юрттэмзэ ас вылаз шӧдӥз. Куке тушмонъёсыз сое уйылыса-улляса возизы, Давид Иеговалы шуиз: «Бур киыд монэ кутыса возе» (Пс. 17:36). Нош кызьы Иегова юнматыны быгатэ?

12. Кин пыр Иегова милемлы юрттыны быгатэ, куке милемлы секыт?

¹² Ӵем дыръя Иегова милемлы юрттэ адямиос пыр. Кылсярысь, куке Давидлы секыт вал, со доры Ионафан эшез лыктӥз но солы ӟеч кылъёс вераз (1 Экс. 23:16, 17). Нош Илиялы Иегова юрттӥз Елисей пыр (3 Экс. 19:16, 21; 3 Экс. 2:2). Туннэ но Иегова милемлы юрттыны быгатэ семьямы, эшъёсмы яке тӧроос пыр. Но куке милям мылкыдмы куашкамын, милям мукетъёсызлэсь палэнскеммы, огнамы кылеммы потэ. Со валамон. Озьы ке но милемлы Иеговалэн юрттэтэз кулэ. Кытысь сое шедьтоно?

13. Мар кароно, Иегова милемлы мед юрттоз шуыса? (Озьы ик учке суредэз.)

¹³ Мар кароно милемлы. Адямиослэсь эн палэнске, малы ке шуоно, мукетъёсызлэсь палэнскыса, ми асьмеос сярысь но шуг-секытъёсмы сярысь гинэ малпаськыны кутскиськомы. Нош соин сэрен ми шонертэм ужпумъёс кутыны быгатомы (Мад. 18:1, ВД). Валамон, куректыкумы милям огнамы улэммы потэ. Но ми кема дыр ӵоже огнамы улӥмы ке, вераны луоз, ми Иеговаез но солэсь юрттэтсэ палэнтӥськомы шуыса. Соин ик, тӥледлы туж секыт ке но, семьядылэсь, эшъёстылэсь но тӧроослэсь юрттэтсэс эн палэнтэ. Эн вунэтэ, ӵем дыръя Иегова соос пыр юрттэ шуыса (Мад. 17:17; Ис. 32:1, 2).

ИЕГОВА ТӤЛЕДЫЗ БУЙГАТОЗ

14. Малы милемлы куддыръя кышкыт луэ?

¹⁴ Шуг-секыт. Куддыръя милемлы кышкыт луэ. Библиын гожтэмын, мар шӧдӥзы Инмарлэн ужась-тыршисьёсыз, кудъёсыз туж кышкаса улӥзы, кылсярысь, куке соосты тушмонъёссы уйылӥзы-уллязы (Пс. 17:5; 54:2, 6). Ми но куддыръя кышкаськомы, куке милесьтым секыт висёнмес шедьто яке ӵош ужасьёсмы, ӵош дышетскисьёсмы, семьямы но кивалтӥсьёс милемлы пумитъясько. Сыӵе вакытъёсы ми асьмеды номыр карыны быгатӥсьтэм, пичи нылпи кадь шӧдӥськомы, вылды. Кызьы Иегова соку юрттыны быгатэ?

15. Мар карыны Иегова кылзэ сётэ, Псалтирез 93:19 лыдэ басьтыса?

 ¹⁵ Мар каре Иегова. Со милемыз буйгатэ. (Лыдӟе Псалтирез 93:19.) Пуктэ син азяды пичи нылашез, кудӥз, туж зол гудыръяку, кышка но умме усьыны уг быгаты. Соку со доры атаез лыктэ, сое ӟыгыртэ но, умме усьытозяз, каллен ветта. Куазь ӧз воштӥськы ке но, атаез вӧзын нылаш уг кышка ни. Куке милемлы туж кышкыт луэ, милям но потэ, инмысь Атаймы милемыз мед ӟыгыртоз но мед буйгатоз шуыса. Нош мар со понна кароно милемлы?

16. Мар ми карыны быгатӥськомы, Иеговалэсь буйгатэмзэ шӧдон понна? (Озьы ик учке суредэз.)

¹⁶ Мар кароно милемлы. Ялан Иеговалы вӧсяське но солэсь Кылзэ лыдӟе (Пс. 76:2, 13—15). Соку, секыт учырен пумиськыку, тӥ нырысь ик инмысь Атайдылэсь юрттэтсэ утчалоды, вылды. Вералэ Иеговалы сюлмаськонъёсты но кышканъёсты сярысь. Нош собере кылзэ, мар со тӥледлы вера Библия пыр. Соку тӥ Инмарлэсь буйгатэмзэ шӧдоды (Пс. 118:28). Библиез лыдӟон тӥледыз буйгатоз. Тросэзлы юртто Иов, Псалтирь, Мадёнъёсын книгаос, озьы ик Иисуслэн кылъёсыз, кудъёсыз гожтэмын Матфейлэсь ӟеч иворын 6-тӥ люкетын. Иеговалы вӧсяськыса но солэсь Кылзэ лыдӟыса, тӥ шӧдоды, кызьы Иегова тӥледыз буйгатэ.

17. Малы ми оскыны быгатӥськомы?

¹⁷ Туж секыт дыръя но Иегова милемыз уз кельты (Пс. 22:4; 93:14). Со кылзэ сётэ милемыз утьыса возьыны, милемлы юрттыны каньыл сюлмын улыны, милемыз юнматыны но буйгатыны. Исаиялэн 26:3 Иегова сярысь гожтэмын: «Духеныз юн муртэ тупаса улон пӧлын Тон возиськод, уго со Тон вылэ оскиськыса улэ». Соин ик Иегова вылэ оскиське. Солэсь юрттэтсэ эн палэнтэ. Соин ӵош тӥ самой секыт вакытъёсты чиданы быгатоды.