1. Кызьы тӥ син азяды пуктӥськоды Иеговаез?

 ИЕГОВА сярысь малпаськыкуды яке солы вӧсяськыкуды, кызьы тӥ сое син азяды пуктӥськоды? Ми Инмарез ум адӟиське ке но, со сярысь трос гожтэмын Библиын. Кылсярысь, отын вераське, Иегова — «шунды но щит», озьы ик «ваньзэ сиись-ньылӥсь тыл» шуыса (Пс. 83:12; Евр. 12:29). Нош Иезекиильлы возьматэмын вал, Инмар сапфирлэсь престол вылын пуке но со котырын ваньмыз чиля-пиштэ шуыса, дуно кортъёс но вуюись кадь (Иез. 1:26—28). Тае лыдӟыса, милям сюлэммы ик бугырске яке кышканмы но кылдэ, вылды.

2. Малы куд-огъёсызлы секыт Иеговалы матэ кариськыны?

² Ми Иеговаез ум адӟиське бере, со милемыз яратэ шуыса оскыны куддыръя секыт луэ. Куд-огъёсыз малпало, Инмар соосты уз яраты шуыса, малы ке шуоно соос ноку ӧз шӧдэ, соосты ярато шуыса, семьяязы гинэ но. Иегова милемыз туж умой вала но тодэ, малы милемлы секыт луэ солы матэ кариськыны. Соин ик Библия пыр со возьматэ, макем со ӟеч но яратӥсь.

3. Малы тросгес тодыны кулэ Иеговалэн яратонэз сярысь?

³ Вань кыл, кудӥз тужгес но умой возьматэ, кыӵе со Иегова. Со — яратон (1 Иоанн 4:8). Инмарлэн котькуд ужысьтыз адӟиське солэн яратэмез. Иегова яратэ соосты но, кинъёс сое уг ярато (Матф. 5:44, 45). Та статьяын ми пыр-почгес вераськомы Иегова сярысь но солэн яратонэз сярысь. Инмар сярысь тросгес тодыса, ми сое золгес яратомы.

 ИЕГОВА МИЛЕМЫЗ ТУЖ ЯРАТЭ

4. Мае тӥ шӧдӥськоды, Иеговалэн яратонэз сярысь малпаськыса? (Озьы ик учке суредэз.)

⁴ «Кузё-Инмар ӟеч сюлэмо» (Иак. 5:11). Библиын Инмар ассэ ӵошатэ сюлмаськись, яратӥсь анаен (Ис. 66:12, 13). Пуктэ син азяды, кызьы анай пиналзэ кияз басьтэ, сое бордаз ӝиптэ но соин шыпыт, лякыт куараен вераське. Куке пиналыз бӧрдэ яке солы вӧсь луэ, анай котьку соин артэ. Куке милемлы вӧсь луэ, ми но оскыны быгатӥськомы, Иегова милемын артэ луоз шуыса. Псаломъёсты гожъясь вераз: «Кӧтӝожъёс сюлэмам аляку, Тынад буйгатэмед лулме каньыл каре» (Пс. 93:19).

5. Малы Иеговалэн ӟечлыко луэмез тӥледлы туж дуно?

⁵ Иегова — «туж ӟечлыко Кузё-Инмар» (Пс. 102:8). Янгышаммы бере со милесьтым уг палэнскы. Израиль калык Иеговалэсь сюлэмзэ трос пол вӧсь карылӥз. Нош ӧпкелемзы но со доры берытскемзы бере Иегова соосты оскытэ вал, соосты азьло сямен ик яратэ шуыса. Тани кызьы со вераз аслаз шӧдонъёсыз сярысь: «Мынам син азям тон дуно, мусо, Мон тонэ яратӥ» (Ис. 43:4, 5). Иегова милемыз но яратэмысь ноку уз дугды. Дыр ортчемъя солэн яратонэз уг сӥя. Бадӟым янгыш лэсьтэммы бере но Иегова милесьтым уг палэнскы. Ми ӧпкелимы ке но со доры берытскимы ке, ми валаломы, со милемыз азьло сямен ик яратэ шуыса. Инмар кылзэ сётэ, милемыз гажалоз-жалялоз но быдэсак простить кароз шуыса (Ис. 55:7). Простить каремез бере ми нош ик каньыл сюлмын улыны быгатӥськомы (Ап. уж. 3:19, 20).

6. Мае тодыны луэ Иегова сярысь, Захариялэсь 2:8 лыдӟыса?

⁶ Лыдӟе Захариялэсь 2:8. Та кылбурын Иегова ӵошатэ милемыз синчеберен. Синчебер борды йӧтӥськыны ик уг луы, соку ик вӧсь луэ. Луоз шуыны, Иегова вера: «Котькин, кин тӥледыз вӧсь каре, монэ но вӧсь каре». Иегова милемыз туж яратэ бере, со милемыз туж умой вала но котьку дась милемлы юрттыны. Солы вӧсь луэ, куке ми курадӟиськомы. Соин ик ми Иеговалэсь курыны быгатӥськомы: «Синчебердэ кадь уть монэ» (Пс. 16:8). Иегова милемыз одно ик кылоз.

7. Малы милемлы осконмес юнматоно, Иегова милемыз яратэ шуыса?

 ⁷ Иеговалэн потэ, ми мед оскомы, со милемыз яратэ шуыса. Но со тодэ, милемлы талы оскыны секыт луэ шуыса, малы ке шуоно ми азьвыл кыӵе ке учырен пумиськимы яке али кыӵе ке шуг-секытэн пумиськиськомы. Осконмес юнматон понна, ойдолэ эскеромы, кызьы Иегова яратонзэ возьматӥз Иисуслы, зырӟем христианъёслы но ми пӧлысь котькудӥзлы.

КЫЗЬЫ ИЕГОВА АСЛЭСЬТЫЗ ЯРАТОНЗЭ ВОЗЬМАТЭ

8. Малы Иисус оске вал, Атаез сое яратэ шуыса?

⁸ Иегова но Иисус трос миллион аръёс ӵоже ӵош улӥзы. Со дыр куспын соослэн кусыпъёссы туж матынэсь луизы. Иегова Иисуслы вера вал, сое яратэ шуыса. Та сярысь гожтэмын Матфейлэсь 17:5. Иегова вераны быгатэ вал: «Со бордын Мынам ӟеч эрике». Но ми мед тодомы шуыса, макем юн со Иисусэз яратэ, Иегова вераз: «Та Мынам Яратоно Пие». Иегова данъяське вал соин, мае Иисус лэсьтӥз ини, но быдэсак оске вал, Иисус азьланяз но аслаз ужъёсыныз сое шумпоттоз шуыса (Еф. 1:7). Иисус тодэ вал, Атаез сое яратэ шуыса, но солэсь яратэмзэ ас вылаз шӧдэ вал. Соин ик со ӵем вералляз Атаезлэн яратонэз сярысь (Иоанн 3:35; 10:17; 17:24).

9. Кыӵе кылъёс возьмато, макем юн яратэ Иегова зырӟем христианъёсты? Валэктэ (Римъёслы 5:5).

⁹ Иегова аслэсьтыз яратэмзэ зырӟем христианъёслы но возьматэ. (Лыдӟе Римъёслы 5:5.) Висъялэ саклыктэс «Аслэсьтыз яратонзэ... кисьтэ» кылъёслы. Одӥг книгаын та кылъёс сярысь вераське, яратон зырӟем христианъёслэн сюлэмъёсазы «ӧръяськем шур кадь кисьтӥськиз» шуыса. Та туж умой возьматэ, макем юн яратэ Иегова зырӟем христианъёсты. Соос тодо, Инмар соосты яратэ шуыса (Иуда 1). Соослэн шӧдонъёссы сярысь апостол Иоанн гожтӥз: «Учкелэ, Атай кыӵе юн асьмеды яратӥз,— Инмарлэн нылпиосыз шуыса нимаз» (1 Иоанн 3:1). Нош Иегова зырӟем христианъёсты гинэ яратэ-а? Уг! Со ваньмылы аслэсьтыз яратэмзэ возьматэ.

10. Мар тужгес но умой возьматэ, Иегова милемыз яратэ шуыса?

¹⁰ Иисуслэн ми понна кулэмез тужгес но умой возьматэ, макем юн яратэ милемыз Иегова (Иоанн 3:16; Рим. 5:8). Инмар аслэсьтыз яратоно Пизэ сётӥз, вань адямиос сьӧлыкъёссылэсь мозмытскыны но соин эшъяськыны мед быгатозы шуыса (1 Иоанн 4:10). Куке ми малпаськиськомы со сярысь, мар лэсьтӥзы ми понна Иегова но Иисус, ми умойгес валаськомы, макем юн соос котькуд адямиез ярато (Гал. 2:20). Иисуслэн ми понна кулэмез — дун тырон гинэ ӧвӧл. Со туж дуно кузьым. Одӥг гинэ вордӥськем Пизэ сётыса, Иегова милемлы аслэсьтыз яратэмзэ возьматӥз.

11. Мае тодыны луэ Иегова сярысь, Иеремиялэсь 31:3 лыдӟыса?

¹¹ Кызьы ми адӟимы, Иегова аслэсьтыз шӧдонъёссэ ватыса уг возьы. Со соос сярысь вера. (Лыдӟе Иеремиялэсь 31:3.) Иегова милемыз ас дораз вайиз, малы ке шуоно со милемыз яратэ. (Ӵошатэ Кыкетӥ Законэз 7:7, 8.) Нокин но, номыр но Инмарлэн яратонэзлэсь милемыз люкыны уз быгаты (Рим. 8:38, 39). Кыӵе шӧдонъёсты тӥляд кылдо, Иеговалэн яратэмез сярысь тодыса? Лыдӟе 22-тӥ псаломез но малпаське, кыӵе шӧдонъёсыз Давидлэн кылдӥзы, Иеговалэсь яратэмзэ ас вылаз шӧдыса. Тӥляд но сыӵе ик шӧдонъёсты кылдыны быгато.

 КЫӴЕ ШӦДОНЪЁСТЫ ТӤЛЯД КЫЛДО, ИЕГОВАЛЭН ЯРАТОНЭЗ СЯРЫСЬ ТОДЫСА?

12. Мар сярысь вераське 22-тӥ псаломын?

¹² Лыдӟе Псалтирез 22:1—6. Та псаломын вераське, макем юн оске вал Давид, Иегова сое яратэ но со сярысь сюлмаське шуыса. Давид Иеговаез аслаз Возьмасеныз нима но соин матысь кусыпъёсыз сярысь вера. Давид Инмар вылэ быдэсак оскиське вал, соин ик солэсь кылзӥськыса улэ вал. Та юрттэ вал солы кышкатэк улыны. Давид тодӥз, Иегова сое вань улытозяз яратоз шуыса. Малы солэн сыӵе юн осконэз вал?

13. Малы Давид юн оске вал, Иегова со сярысь котьку но сюлмаськоз шуыса?

¹³ «Номырлы но ӟудыса мон уг улы». Давид адӟе вал, Иегова со сярысь умой сюлмаське но котькуд нунал солы ваньзэ кулэзэ сётэ шуыса. Давид тодӥз, Иегова — солэн Эшез но аслаз улонэныз со Инмарез шумпоттэ шуыса. Соин ик со юн оскиз, Иегова со сярысь котьку но сюлмаськоз шуыса. Та юрттэ вал солы кышкатэк но шумпотыса улыны (Пс. 15:11).

14. Кызьы Иегова ми сярысь сюлмаське?

¹⁴ Иегова ми сярысь сюлмаське тужгес но соку, куке ми куректон-кайгуосын пумиськиськомы. Клэр a сузэрлы, кудӥз Вефильын 20 арлэсь кемагес ужа-тырше ини, туж секыт вал, куке семьяез бадӟым шуг-секытъёсын пумиськиз. Атайзэ инсульт шуккиз, сузэрзэ кенешысь поттӥзы, семьяез коньдонэн герӟаськем шуг-секытъёсын пумиськиз но улон интытэк кылиз. Кызьы Иегова Клэр сузэрлэн семьяез сярысь  сюлмаськиз? Со вера: «Котькуд нунал матысь адямиосылэн ваньмыз кулэез вал. Ӵем дыръя Иегова кулэезлэсь тросгес сётэ вал. Мон ӵем малпаськисько, кызьы Иегова ми сярысь со секыт дыре сюлмаськиз. Со тодэ ваёнъёс мыным кужым сёто. Нош куке выль шуг-секытъёс кылдо, мон киме уг лэзиськы».

15. Мар сярысь вераз Давид, куке шуиз: «Со... лулылы кужым сётэ»? (Озьы ик учке суредэз.)

¹⁵ «Со... лулылы кужым сётэ». Куддыръя, шуг-секытъёсын пумиськыса, Давид малпа вал, номыр карыны уг быгаты ини шуыса (Пс. 17:5—7). Но Иегова солы юрттэ вал. Вераны луоз, Инмар катьтэммем эшсэ «удалтэм турыно возь вылын... кӧлытэ, визыл кошкись ву дуре нуллэ» вал шуыса. Талы луыса Давидлы кужым пыре вал но, со нош ик быгатэ вал Инмарлы ужаны-тыршыны (Пс. 17:29—33).

16. Кызьы Иеговалэн яратэмез тӥледлы кужым сётылӥз?

¹⁶ Ми но шуг-секытъёсын пумиськылӥськомы. Но Иегова милемлы юрттэ (Бӧрд. 3:22; Кол. 1:11). Тани Ре́йчел сузэрлэн учырез. Солы туж секыт вал, куке COVID-19 пандемия дыръя картэз со дорысь кошкиз но Иеговалэсь палэнскиз. Кызьы Иегова сузэрмылы юрттӥз? Со вера: «Иегова сюлмаськиз, мон мед шӧдом, монэ ярато шуыса. Эшъёсы монэн дырзэс ортчытъязы, мыным сиён пӧразы, ӟеч кылъёсын но Библиысь малпанъёсын сообщениос келязы но тодам вайытылӥзы, Иегова монэ туж яратэ шуыса. Соослэсь пальпотэмзэс адӟыса, мон шумпотӥсько вал. Мон ялан тау шуисько Иеговалы бадӟым яратӥсь семьямы понна».

17. Малы Давид вераз: «Уг кышка»?

¹⁷ «Уг кышка, уго Тон монэн». Давидлэн трос кужмо тушмонъёсыз вал бере, вал трос учыръёс, куке сое виыны быгато вал. Но Иеговалэн яратэмез юрттӥз солы кышкатэк улыны. Давид котьку шӧдӥз, Иегова соин ӵош шуыса. Соин ик со Иегова сярысь кырӟаз: «Со.. вань кышкытлыкъёслэсь монэ мозмытӥз» (Пс. 33:5). Давидлэн кышканы мугъёсыз вал ке но, Иеговалэн юн яратэмез юрттӥз солы кышканзэ вормыны.

18. Кызьы оскон, Иегова тӥледыз яратэ шуыса, кышканэз вормыны юрттэ?

¹⁸ Ми но кышкыт учыръёсын пумиськыны быгатӥськомы. Но куке ми тодӥськомы, Иегова милемыз яратэ шуыса, та милемыз  юнматэ. Кызьы? Тани Сью́зи сузэрлэн учырез, кудӥз пионер луыса ужа-тырше. Со вера, мае шӧдӥзы со но солэн картэз, куке пизы ассэ быдтӥз: «Сыӵе кышкыт учыр бере умоезлы оскыны секыт ини но уродзэ гинэ возьмаса улӥськод на. Но Иеговалэсь яратэмзэ ас выламы шӧдыса, ми валамы, со милемлы котьку юрттоз шуыса». Рейчел сузэр, кудӥз дорысь картэз кошкиз, вера: «Одӥг уе мыным тужгес но секыт вал. Сюлмы туж куректыса улӥз, мыным туж кышкыт луиз. Мон зар-зар бӧрдыса Иеговалы вӧсяськи. Соку ик мыным туж каньыл луиз, кызьы пиналлы анаезлэн ки вылаз каньыл луэ. Собере мон умме уси. Мон сое ноку уг вунэты». Та́сос агай, кудӥз тӧро луыса ужа-тырше, армие мынымтэез понна ньыль ар пытсэтын пукиз. Кызьы со Иеговалэсь яратэмзэ но сюлмаськемзэ адӟиз? Со тодаз вае: «Мынам ваньмыз кулэез вал, солэсь тросгес но. Та Иеговалы осконме юнматӥз. Озьы ик Инмар сётӥз мыным святой духсэ, кудӥз юрттӥз мыным сыӵе интыын но шумпотон мугъёс шедьтыны. Мон валай, Иеговалы золгес оскиськыса, солэсь яратэмзэ золгес шӧдӥськод. Соин, пытсэтын пукыкум ик, мон пионер луыса ужаны-тыршыны кутски».

ЯРАТӤСЬ ИНМАРЕН КУСЫПЪЁСТЭС ЮНМАТЭ

19. а) Кыӵеесь луозы вӧсяськонъёсмы, ми оскимы ке, Инмар милемыз яратэ шуыса? б) Иеговалэн яратонэз сярысь кыӵе кылъёс тӥледлы тужгес но кельшо? (Озьы ик учке « Кылъёс, кудъёсыз возьмато, Иегова милемыз туж яратэ шуыса» рамкаез.)

¹⁹ Учыръёс, кудъёссэ ми та статьяын эскеримы, возьмато, Иегова, «яратыса... улонлэн Инмарез», милемын артэ шуыса! (2 Кор. 13:11). Со адӟе, мар котькуд адямилы кулэ, но котькудӥзлы яратэмзэ возьматэ (Пс. 31:10). Куке ми малпаськиськомы со сярысь, кызьы Инмар милемлы яратэмзэ возьматэ, соин кусыпъёсмы юнгес луо. Ми быгатӥськомы солы вӧсяськыны но вераны, макем милемлы кулэ, со милемыз мед яратоз шуыса. Озьы ик ми быгатӥськомы солы сюлмаськонъёсмес вераны но юн оскыны, со милемыз валалоз но милемлы одно ик юрттоз шуыса (Пс. 144:18, 19).

20. Малы милемлы кельше Иеговаен кусыпъёсмес юнматыны?

²⁰ Кызьы кезьыт нуналэ тылскем милемыз шунтэ, ӵапак озьы ик Иеговалэн яратэмез шуг-секытъёс дыръя милемыз буйгатыны быгатэ. Ми туж шумпотӥськомы, ачиз Иегова милемыз яратэ шуыса. Ойдолэ ми но, псаломъёсты гожъясь сямен, шуомы: «Кузё-Инмаре, Тонэ яратӥсько!» (Пс. 17:2).