1. Малэсь ми кышканы быгатӥськомы?

 КОТЬКУД адямилэн аслаз кышканъёсыз вань. Кин ке но кышка кулэмъёслэсь, периослэсь но солэсь, мар азьланяз луоз. Нош Библиез дышетыса, ми тодӥмы, солэсь кышкано ӧвӧл шуыса. Но ваньмы ми улӥськомы секыт дыръёсы, куке «кӧшкемыт адӟонъёс» луыло — ожъёс, йыружъёс но черъёс (Лука 21:11). Со сяна, ми кышканы быгатӥськомы, кивалтӥсьёс яке ӵыжы-выжыосмы милемыз уйылозы-уллялозы шуыса. Куд-огъёсыз кышкало, уз чидалэ шуыса шуг-секытэз, кудӥныз али пумисько яке кудӥз азьланяз луыны быгатэ.

2. Кыӵе учыре сюриз Давид Геф каре пегӟемез бере?

² Давидлы но куддыръя кышкыт вал. Кылсярысь, куке со сьӧры Саул эксэй уйиськиз, со кышказ но Геф филистим каре пегӟиз. Ӝоген Геф карлэн Анхус эксэезлы веразы, Давид — туж кужмо ожгарчи шуыса, кудӥз сярысь израиль калык кырӟан но гожтӥз. Со кырӟанын вераськиз, Давид филистим ожгарчиос пӧлысь «дасо сюрсъёссэ» погыртӥз шуыса. Давид сюлмаськиз, Анхус сое виыны малпалоз шуыса. Соин ик Давид «юн кышказ» (1 Экс. 21:10—12). Мар юрттӥз Давидлы кышканзэ вормыны?

3. Мар юрттӥз Давидлы кышканзэ вормыны? (Псалтирь 55:2—4, 12).

³ Давид 55-тӥ псаломын вера, кыӵе солэн шӧдонъёсыз вал Геф карын дыръяз. Со валэктэ, малы со кышказ  но кызьы кышканзэ вормиз. Кышкыт дыръя со Иегова вылэ оскиськиз. (Лыдӟе Псалтирез 55:2—4, 12.) Инмар солы юрттӥз. Давид визьтэм улэ аналскиз но, Анхус сое улляны косӥз. Озьы Давид пегӟыны быгатӥз (1 Экс. 21:13—22:1).

4. Кызьы дышетсконо Иегова вылэ оскиськыны? Вералэ пример.

⁴ Иегова вылэ оскиськон милемлы но юрттоз кышканмес вормыны. Кызьы дышетсконо Иегова вылэ оскиськыны? Эскеромы тае пример вылын. Шуом, тӥ секыт висьыны усиды. Нырысь тӥ кышкады, дыр. Но собере тӥ тодӥды, тӥледыз умой эмъясь эмъялоз шуыса. Со трос адямиослы юрттӥз ини та висёнэз вормыны. Со сяна, со тӥледыз сак но чидаса кылзэ но тӥ сярысь туж сюлмаське. Со тӥледлы умой эмъяськон амал ӵектэ. Соин ик тӥ валаськоды, умой эмъясь доры сюриды но сюлмаськонэз ӧвӧл шуыса. Ӵапак озьы ик милям потэ быдэсак Иегова вылэ оскиськеммы. Со понна малпаськоно, мае Иегова лэсьтӥз ини, мае со али лэсьтэ но мае азьланяз лэсьтоз на. Давид но та сярысь малпаськиз. Эскеромы 55-тӥ псаломысь солэсь кылъёссэ но малпаськомы, кызьы дышетсконо Иегова вылэ оскиськыны но кышканмес вормыны.

МАЕ ИЕГОВА ЛЭСЬТӤЗ ИНИ?

5. Мар сярысь малпаськиз Давид, кышкыт учыръёсы сюрыкуз? (Псалтирь 55:13, 14).

⁵ Кышкыт учыръёсы сюрыкуз, Давид малпаськиз со вылын, мае Иегова лэсьтӥз ини. (Лыдӟе Псалтирез 55:13, 14.) Давидлэн сямыз вал Инмар сярысь малпаськыны. Кылсярысь, со малпаськиз кылдытэмъёс сярысь. Та солы тодаз вайытӥз, Иегова туж кужмо но адямиосты туж яратэ шуыса (Пс. 64:7—10). Озьы ик Давид малпаськиз, макем сюлмаське Инмар вань ужась-тыршисьёсыз сярысь (Пс. 30:20; 36:25, 26). Нош тужгес но солэсь сюлэмзэ бугыртэ вал, кызьы Иегова со сярысь сюлмаське. Пичи дырысеныз ик Инмар солы юрттэ но сое уте вал (Пс. 21:10, 11). Таӵе малпаськон Давидлы юрттӥз Иегова вылэ оскиськыса улыны.

6. Мар юрттоз Иегова вылэ оскиськыны, куке милемлы кышкыт?

 ⁶ Куке тӥледлы кышкыт, малпаське, мае Иегова лэсьтӥз ини. Малпалэ солэн кылдытэмъёсыз сярысь. Кылсярысь, учке тылобурдоос но сяськаос шоры. Соос Инмарлы укшатыса кылдытэмын ӧй вал, соос Инмарлы но уг йыбыртъяло. Озьы ке но Иегова соос сярысь сюлмаське. Нош Инмар соос сярысь но сюлмаське бере, со тӥ сярысь но сюлмаськоз (Матф. 6:25—32). Та сярысь малпаськон тӥледлы юрттоз Иегова вылэ оскиськыса улыны. Озьы ик малпаське, кызьы Иегова аслаз ужась-тыршисьёсызлы юрттэ. Кылсярысь, тросгес тодэ пиосмуртъёс но кышномуртъёс сярысь, кудъёсыз вашкала дыръя улӥзы яке кудъёсыз асьме нуналъёсы уло a. Озьы ик тодады ваелэ, мае Иегова тӥ понна лэсьтӥз ини. Кызьы со тӥледыз ас дораз вайиз? (Иоанн 6:44). Кызьы со вӧсяськонъёстылы ответ сётэ? (1 Иоанн 5:14). Кыӵе пайда тӥледлы вае Иисус Христослэн курбонэз? (Еф. 1:7; Евр. 4:14—16).

7. Кызьы Даниил пророклэн учырез юрттӥз Ванесса сузэрлы кышканзэ вормыны?

⁷ Гаити шаерысь Ванесса b сузэр кышкыт учыре сюриз. Одӥг пиосмурт сое азон-калгон сьӧлыке пыртыны турттӥз. Со пиосмурт котькуд нунал солы жингыртылӥз но гожъяз. Ванесса солы шонерак вераз, юрӟым ӵектонъёсызлы ноку соглаш уз кариськы шуыса. Но пиосмурт ӧз дугды. Со лекъяськыны но Ванессаез кышкатыны кутскиз. Сузэрмы вера: «Мон кышканы кутски». Кызьы со кышканзэ вормиз? Со тыршиз ассэ утьыны. Тӧро юрттӥз солы полицие вазиськыны. Озьы ик со малпаськиз со сярысь, кызьы Иегова азьвыл аслэсьтыз ужась-тыршисьёссэ утьылӥз. Ванесса вера: «Нырысь ик мынам тодам лыктӥз Даниил пророк. Со янгыш ӧй вал ке но, сое левъёсын гуэ куштӥзы. Сыӵе секыт учырын но Инмар со сярысь сюлмаськиз. Мон Иеговаез кури шуг-секытме сэрттыны-пертчыны. Собере мыным кышкыт ӧй вал ини» (Дан. 6:12—22).

МАЕ ИЕГОВА АЛИ ЛЭСЬТЭ?

8. Малы оске вал Давид? (Псалтирь 55:9).

⁸ Геф карын Давидэз виыны быгато вал ке но, со кышканлы ӧз сётскы. Со малпаськиз, кызьы Иегова солы юрттэ. Со адӟиз, Иегова солы кивалтэт сётэ, сое уте но солэсь шӧдонъёссэ вала шуыса. (Лыдӟе Псалтирез 55:9.) Озьы ик Давидлэн оскымон эшъёсыз вал, кылсярысь, Ионафан но Ахимелех быдӟым священник, кудъёсыз солы юрттӥзы но со сярысь сюлмаськизы (1 Экс. 20:41—43; 21:6, 8, 9). Саул эксэй Давидэз виыны малпа вал ке но, Давид пегӟыны быгатӥз. Ваньмыз та Давидэз оскытӥз, Иегова туж умой тодэ шуыса, кыӵе шуг-секытъёсын со пумиськылэ но макем солы секыт.

9. Мае тодэ Иегова котькудмы сярысь?

⁹ Озьы ик милемлы но, шуг-секытъёсын пумиськыкумы, тодамы возёно, Иегова тодэ шуыса, кыӵе шуг-секытъёсын ми пумиськиськомы но мае шӧдӥськомы. Кылсярысь, Инмар адӟиз, кыӵе шуг-секытъёсын израиль калык Египетын пумиськиз но макем солы секыт вал (Пот. 3:7). Давид оскиз, Иегова курадӟыса-кайгырыса улэмзэ но куректэмзэ адӟе шуыса (Пс. 30:8). Нош куке Инмарлэн калыкез шуг-секытъёсын  пумиськылӥз — со ачиз янгыш вал ке но,— Инмар сое ӧз кушты (Ис. 63:9). Куке тӥ кышкаськоды, Иегова тӥлесьтыд шӧдонъёстэс вала но солэн тӥледлы юрттэмез потэ.

10. Малы тӥ оскиськоды, Иегова тӥ сярысь сюлмаське но тӥледлы котьку юрттоз шуыса?

¹⁰ Бадӟым шуг-секытъёс дыръя кышкаменымы сэрен куддыръя Инмарлэсь юрттэмзэ адӟыны секыт луэ. Соку мар кароно? Инмарлэсь куроно, ми солэсь юрттэмзэ мед адӟомы шуыса (3 Экс. 6:15—17). Оло нош, тӥледыз юнматӥз кенешын верам речь яке кинлэн ке валэктонэз. Оло нош, тӥледыз юнматӥз сайтысьтымы статья, видеоролик яке кырӟан. Оло нош, тӥледлы кин ке но юнматӥсь малпан яке Библиысь кылбур вераз. Куддыръя ми вунэтӥськомы, огъя оскисьёсмы но духовной сиён — со Инмарлэн кузьымъёсыз шуыса (Ис. 65:13, 14; Марк 10:29, 30). Иеговалэн та кузьымъёсыз возьмато, со милемыз яратэ но со вылэ котьку оскиськыны луэ шуыса (Ис. 49:14—16).

11. Мар юрттӥз Аидалы сюлмаськонъёссэ вормыны?

¹¹ Сенегал шаерысь Аида сузэр адӟыны тырше, кызьы Иегова солы секыт дыръя юрттэ. Со семьяязы бадӟымез нылпи бере, анай-атаез возьмазы, со соослы коньдонэн юрттоз шуыса. Но Аидалэн пионер луэмез потэ вал. Соин ик со кутскиз ӧжытгес ужаны но ӧжытгес коньдон басьтыны. Ӵыжы-выжыосызлы та туж ӧз кельшы. Аида вера: «Мон туж сюлмаськи, анай-атаелы юрттыны уг быгаты но быдэс семьяе мынэсьтым палэнскоз шуыса. Таӵе секыт югдур кылдэмен, мон Иеговаез но янгыше уськытыны кутски». Собере со кенешын речь кылӥз. Аида азьланьтэ: «Агай тодамы вайытӥз, малы гинэ сюлэммы вӧсь медам луы, Иегова сюлэм вӧсь луэммес вала шуыса. Тӧроос но эшъёсы монэ оскытӥзы, Иегова монэ яратэ шуыса. Пичиен-пичиен Иеговалы осконэ юнмаз. Мон солы вӧсяськыны кутски но юн оски, со мыным юрттоз шуыса. Куке мон адӟисько вал, кызьы Иегова мыным ответ сётэ, мынам сюлмы капчи луэ вал». Дыр ортчыса, Аида  шедьтӥз уж, кудӥз юрттӥз солы пионер луыса ужаны-тыршыны, озьы ик анай-атаезлы юрттыны. Аида вера: «Мон дышетски быдэсак Иегова вылэ оскиськыса улыны. Али вӧсяськеме бере ик мынам сюлмы каньыл луэ».

МАЕ ИЕГОВА АЗЬЛАНЯЗ ЛЭСЬТОЗ?

12. Малы оскиз Давид, Псалтирез 55:10 лыдэ басьтыса?

¹² Давид вера: «Тынэсьтыд юрттэттэ кури ке, тушмонъёсы берлань чигналозы. Мон тодӥсько: Инмар мон палан» (Пс. 56:9, ВД [55:10, УБ]). Та кылъёсысь адӟиське, мар эшшо юрттӥз Давидлы кышканзэ вормыны. Сое азьло сямен ик виыны быгато вал ке но, со малпаськиз со вылын, мае Иегова солы азьланяз лэсьтоз. Давид тодӥз, дырыз дыръя Иегова сое утёз шуыса, малы ке шуоно Инмар сое Израильын эксэй луыны бырйиз (1 Экс. 16:1, 13). Давид оскиз, Иегова сётэм кылзэ быдэстоз шуыса.

13. Мае азьланяз лэсьтыны Иегова кылзэ сётэ котькудмылы?

¹³ Мае лэсьтыны Иегова кылзэ сётэ котькудмылы? Ми ум возьмаське, Иегова милемыз вань шуг-секытъёслэсь утёз шуыса c. Но ми тодӥськомы, выль дуннеын Иегова курадӟонъёсмес быдтоз шуыса (Ис. 25:7—9). Солэн кужымез вань кулэмъёсты улӟытыны, вань висёнъёсмес бурмытыны но тушмонъёсмес быдтыны (1 Иоанн 4:4).

14. Мар сярысь ми малпаськыны быгатӥськомы?

¹⁴ Куке тӥ кышканы кутскиськоды, малпаське, мае Иегова азьланяз лэсьтоз. Малпаське, макем умой улон луоз, куке Шайтан уз луы, нош лек адямиос интые музъем вылын улозы шонерлыко адямиос, кудъёсыз пумен-пумен сьӧлыктэмесь луозы. 2014-тӥ арын улосысь конгрессын возьматэмын вал, кызьы атай семьяезлы юрттэ азьпал улон сярысь малпаськыны. Соос малпазы, мар гожтэмын луысал 2 Тимофейлы 3:1—5, отын выль дунне сярысь вераськысал ке: «Выль дуннеын шудо дыръёс вуозы. Соку адямиос ог-огзэс но Инмарез яратӥсесь луозы; востэмесь, мукетъёссэ гажасесь, лякыт кылын вераськисесь, анай-атайлэсь кылзӥськисесь, тау карисесь, шонерлыкоесь, гажась-жалясесь, простить карисесь, мукетъёсыз сярысь ӟечсэ верасесь, чидасесь, лякытэсь, ӟечез-уродэз валасесь луозы; ог-огзылы оскымонэсь луозы; возьытэз валасесь, зӥбытэсь луозы; каньылэн, эзылыса улон сярысь, Инмарез золгес яратозы. Вань сюлмысьтызы Инмарлы оскозы но ужъёсынызы осконзэс возьматозы. Таӵе муртъёсын эшъяськы». Нош тӥ семьяеныды яке эшъёсыныды ӵош малпаськиськоды-а, кыӵе улон луоз выль дуннеын?

15. Мар юрттӥз Танялы Иеговалы оскымон кыльыны?

¹⁵ Эскеромы Уйпал Македониысь Таня сузэрлэсь учырзэ. Библиез дышетыны кутскыкуз, анай-атаез солы туж зол люкетӥзы. Но со малпаськиз, мае Иегова солы азьланяз лэсьтоз. Та солы юрттӥз кышканэзлы сётскытэк улыны. Таня тодаз вае: «Малэсь мон кышкай вал, озьы ик луиз. Котькуд пумиськон бере анае монэ жугылӥз. Анае но атае мыным верало вал, мон Иеговалэн Адӟись-Ивортӥсез луи ке, соос монэ виёзы шуыса». Берлогес Таняез дорысьтызы уллязы. Мар со кариз? Таня вера: «Мон малпаськи со сярысь, макем мон шудо луо пырак дауръёс ӵоже, Иеговалы оскымон кыли ке. Озьы ик мон малпай, мае ке ыштӥ ке но, выль дуннеын Иегова мыным тыраз берыктоз, нош ваньмыз уродэз вуноз шуыса». Таня Иеговалэсь ӧз  куштӥськы. Солэн юрттэменыз со быгатӥз улон инты шедьтыны. Али со туж умой агайлы быземын, соос шудо уло но, вань дырзэс сётыса, Иеговалы ужало-тыршо.

ИЕГОВАЛЫ ОСКОНДЭС ЮНМАТЭ

16. Мар юрттоз милемлы кышкасьтэмесь луыны, куке быдэсмыны кутскоз со, мар гожтэмын Лукалэсь 21:26—28?

¹⁶ Бадӟым куректон дыръя адямиос туж кышкалозы. Нош Инмарлэн ужась-тыршисьёсыз уз кышкалэ. (Лыдӟе Лукалэсь 21:26—28.) Малы? Малы ке шуоно ми Иегова вылэ оскиськыса уломы. Танялэн верамезъя, кудӥз сярысь кылем абзацын гожтэмын вал, шуг-секытъёс, кудъёсыныз со азьвыл пумиськиз, юртто солы выль шуг-секытъёс пыр потыны. Со вера: «Мон валай, кыӵе гинэ шуг-секытэн ми медам пумиське, Иегова милемлы юрттоз но милемыз бакель кароз шуыса». Со азьланьтэ: «Куддыръя малпан кылдэ, адямиос милесьтым кужмогес шуыса. Но Иегова котькыӵе адямилэсь кужмогес. Самой бадӟым шуг-секытлэн но пумыз вань».

17. Кызьы милемлы юрттоз 2024-тӥ арлы кылбур? (Учке вылбамысь суредэз.)

¹⁷ Ми трос мугъёсын сэрен кышканы быгатӥськомы. Но, Давид сямен, ми кышканлы ум сётскиське. 2024-тӥ арлы кылбурын гожтэмын Давидлэн кылъёсыз, кудъёссэ со Иеговалы вераз: «Кышкан лыктыку, Тон вылэ оскиськисько» (Пс. 55:4). Одӥг тодосчи та кылбур сярысь тазьы вераз: «Давид ӧз малпаськы аслаз кышканъёсыз яке сюлмаськонъёсыз сярысь. Со интые, со аслаз Мозмытӥсез вылэ оскиськыса улӥз». Та кылбур тӥледлы быдэс ар ӵоже мед юрттоз. Кышканы кутскыкуды, сое тодады вае. Дыр висъялэ но малпаське, мае Иегова лэсьтӥз ини, мае али лэсьтэ но мае азьланяз лэсьтоз на. Соку, Давид сямен, тӥ вераны быгатоды: «Инмарлы оскиськисько, уг кышкаськы» (Пс. 55:5).