Куд-ог шаеръёсын кышномуртъёсты нокӧня но уг гажало. Ханс агай, кудӥз Боливиын ёросэз чаклась луыса ужа-тырше, вера, куд-ог пиосмуртъёслы пичи дырысенызы ик вылтӥяськон сямез пыӵато шуыса. Сыӵе пиосмуртъёс малпало, соос кышномуртъёслэсь вылӥынгес шуыса, но ӵем дыръя соосты ултӥяса возё. Нош Шэн Сянь агай, кудӥз Тайваньын тӧро луыса ужа-тырше, вера: «Ми палан тросэз пиосмуртъёс малпало, кышномуртъёслы пиосмуртъёслэн ужъёсазы пыриськыны уг яра шуыса. Пиосмурт кышноезлэсь кылзӥськиз ке, мукет пиосмуртъёс сое уз гажалэ ни». Мукет калыкъёсысь пиосмуртъёс кышномуртъёсты мукет сямен ултӥяны быгато. Кылсярысь, куд-огъёсыз кышномуртъёс сярысь серекъяса-мактаса верало.

Тӥляд калыкады тросэз пиосмуртъёс кышномуртъёсты ултӥяло ке но, тӥ быгатӥськоды асьтэды мукет сямен возьыны (Еф. 4:22—24). Воштӥськыны луэ, Иеговалэсь адӟем карыса. Та статьяын ми эскеромы куинь юанъёсты: кызьы Иегова кышномуртъёс шоры учке? Мар юрттоз агайёслы Иегова сямен кышномуртъёс шоры учкыны? Кызьы тӧроос сузэръёслы гажамзэс возьматыны быгато?

КЫЗЬЫ УЧКЕ ИЕГОВА КЫШНОМУРТЪЁС ШОРЫ?

Иегова котькинлэсь умой возьматэ, кызьы кышномуртъёс шоры учконо. Инмысь Атаймы котькуд нылпизэ яратэ (Иоанн 3:16). Нош сузэръёсмес со аслэсьтыз нылъёссэ кадь яратэ. Ойдолэ тодомы, кызьы Иегова кышномуртъёслы гажамзэ возьматэ.

Со соосты уг ултӥя. Иегова пиосмуртэз но кышномуртэз, аслыз укшатыса, кылдытӥз  (Ул.-выл. 1:27). Со пиосмуртъёсты кышномуртъёслэсь визьмогес но тросгес быгатонлыкъёсын ӧз кылдыты но соосты уг ултӥя (2 Пар. 19:7). Инмар пиосмуртъёслы но, кышномуртъёслы но одӥг кадь луонлык сётӥз Библиысь зэмлыкъёсты валаны но аслэсьтыз адӟем карыны. Озьы ик Иегова пиосмуртъёслы но, кышномуртъёслы но луонлык кузьмаз пырак дауръёс ӵоже рай музъем вылын улыны яке инмын эксэйёс но священникъёс луыса ужаны-тыршыны (2 Пётр 1:1). Адӟиське, Иегова кышномуртъёсты уг ултӥя шуыса.

Со соосты кылзэ. Иегова кышномуртъёслэсь шӧдонъёссэс но сюлмаськонъёссэс лыдэ басьтэ. Кылсярысь, Иегова Рахильлэсь но Анналэсь вӧсяськонъёссэс кылзӥз но соослэсь куронъёссэс быдэстӥз (Ул.-выл. 30:22; 1 Экс. 1:10, 11, 19, 20). Озьы ик Инмар Библие гожтӥз пиосмуртъёс сярысь, кудъёсыз кышномуртъёслэсь кылзӥськизы. Кылсярысь, Авраам Иеговалэсь кылзӥськиз но Сарра кышноезлэн верамезъя лэсьтӥз (Ул.-выл. 21:12—14). Давид эксэй Авигеяез кылзӥз. Со сяна, со вераз, Авигеяез ачиз Иегова ыстӥз шуыса (1 Экс. 25:32—35). Иисус котьку Атаезлэсь адӟем кариз но Мария анаезлэсь верамзэ пеляз понӥз (Иоанн 2:3—10). Та учыръёс валаны юртто, кышномуртъёсты кылзыса, Иегова соослы гажамзэ возьматэ шуыса.

Со соослы оске. Иегова Евалы, Адамлы кадь ик, уж сётӥз музъем сярысь сюлмаськыны (Ул.-выл. 1:28). Озьы Инмар возьматӥз, Адамез но Еваез одӥг кадь дунъя шуыса. Озьы ик Иегова бадӟым ужъёс оскиз Деворалы но Олдамалы. Со соосты азьпалзэ ивортӥсьёс луыса ужаны-тыршыны пуктӥз, кудъёсыныз судьяос но эксэйёс кенешизы (Суд. 4:4—9; 4 Экс. 22:14—20). Иегова туннэ но кышномуртъёслы оске. Сузэръёсмы ӟеч иворез тодыто, пионеръёс но миссионеръёс луыса ужало-тыршо. Соос Эксэйлык юртъёсты но Вефильёсты пуктон но эскерон-тупатъян ужъёсы пырисько. Куд-огъёсыз Вефильын но палэнын берыктон ужез нуон офисъёсын ужало-тыршо. Та сузэръёс туж бадӟым войско кадь, кудӥз огкылысь Иеговалэсь эриксэ быдэсъя (Пс. 68:11, ВД [67:12, УБ]). Адӟиське, Иегова кышномуртъёсты ляб но быгатӥсьтэм адямиосын уг лыдъя шуыса.

МАР ЮРТТОЗ АГАЙЁСЛЫ СУЗЭРЪЁС ШОРЫ ИЕГОВА СЯМЕН УЧКЫНЫ?

Агайёс, кызьы валаны луэ, учкиськомы-а ми сузэръёс шоры Иегова сямен? Со понна малпанъёсмес но ужъёсмес эскероно. Куддыръя ми ум но валаське, вылды, мае ке шонертэм лэсьтӥськомы шуыса. Рентген аппарат валаны юрттэ, сюлэммы висе-а, уг-а. Нош умой эш но Инмарлэн Кылыз валаны юртто, кышномуртъёс шоры учкеммы Инмарлы ярамон-а, ӧвӧл-а. Мар кароно, эшмы но Библия милемлы мед юрттозы шуыса?

Эшеныды вераське (Мад. 18:18). Вераське ӟеч сямо но валась эшеныды. Юалэ солэсь: «Тон малпамъя, кызьы мон асме сузэръёсын возисько? Шӧдо-а соос, мон соосты гажасько шуыса? Кулэ-а мыным мае ке тупатыны?» Эшты визь-кенеш сётӥз ке, сое эн палэнтэ. Со интые, малпаське, мар тӥ карыны быгатӥськоды, воштӥськон понна.

Библиез эскере. Библия тужгес но умой валаны юрттэ, кызьы ми асьмеды сузэръёсын возиськомы (Евр. 4:12). Библиын гожтэмын трос пиосмуртъёс сярысь. Куд-огъёсыз асьсэды кышномуртъёсын умой возизы, нош куд-огъёсыз — ӧз. Инмарлэсь Кылзэ эскерыкумы, асьмелэсь ужъёсмес со пиосмуртъёслэн ужъёсынызы ӵошатыны луэ. Библиысь куд-ог кылбуръёсты лыдӟыса, кышномуртъёс сярысь шонертэм малпан кылдыны быгатэ. Но кышномуртъёс шоры шонер учкон понна, лыдэ басьтоно, мар соос сярысь быдэс Библиын гожтэмын. Кылсярысь, 1 Пётрлэн 3:7 кышномурт «кынартэм сосудэн» ӵошатӥське b. Возьмато-а та кылъёс, пиосмуртэн ӵошатыса, кышномуртлэн визьмыз ӧжытгес яке со лябгес шуыса? Со озьы ӧвӧл!  Тае валан понна, ӵошатэ Пётрлэсь кылъёссэ соин, мар гожтэмын Галатъёслы 3:26—29. Отын вераське, Иегова пиосмуртъёсты но, кышномуртъёсты но Иисусэн ӵош кивалтыны быръе шуыса. Озьыен, Библиез эскерыса но умой эшенымы кенешыса (со пиосмурт но, кышномурт но луыны быгатэ), ми быгатомы кышномуртъёс шоры гажаса учкыны.

КЫЗЬЫ ТӦРООС СУЗЭРЪЁСЛЫ ГАЖАМЗЭС ВОЗЬМАТО?

Кенешысь агайёс адӟем карыны быгато тӧроослэсь, кудъёсыз сузэръёс сярысь сюлмасько. Кызьы тӧроос сузэръёслы гажамзэс возьмато? Эскеромы, мар соос каро.

Соос сузэръёсты ушъяло. Апостол Павел тӧроослы умой адӟем карон возьматӥз. Кылсярысь, Римъёслы гожтэтаз со Трифена, Трифоса но Персида сузэръёсты ушъя (Рим. 16:12). Малпалэ гинэ, макем соос шумпотӥзы, куке та гожтэтэз быдэс кенеш азьын лыдӟизы. Ӵапак озьы ик туннэ но тӧроос сузэръёсты ӟеч кылъёсын юнмато. Соос соосты ушъяло ӟеч сямъёссы понна но Иеговалы ужамзы-тыршемзы понна. Соку сузэръёс шӧдо, соосты гажало но дунъяло шуыса. Куддыръя тӧролэн ӟеч кылъёсыз гинэ но сузэрлы юртто азьланяз но Иеговалы оскымон ужаны-тыршыны (Мад. 15:23).

Тӧроос тыршо сузэръёсты вань сюлмысьтызы но кыӵе ке ужъёссы понна ушъяны. Малы? Тани мар вера Дже́ссика сузэр: «Туж шумпотоно, куке агайёс сузэръёсты ушъяло. Но эшшо но умойгес, куке соос сузэръёсты кыӵе ке ужъёссы понна ушъяло. Кылсярысь, сузэр нылпиоссэ пумиськонъёсын шып пукыны дышетэ ке яке дышетскисезлы Эксэйлык юрттэ лыктыны юрттэ ке». Куке агайёс сузэръёсты огшоры гинэ уг ушъяло, нош кыӵе ке ужъёссы понна ушъяло, сузэръёс шӧдо, кенешын соосты ярато но дунъяло шуыса.

 Соос сузэръёсты кылзо. Зӥбыт-востэмесь тӧроос валало, соослэн гинэ умой малпанъёссы луыны уг быгато шуыса. Соин ик соос сузэръёсты куро асьсэлэсь ӵектонъёссэс вераны. Собере тӧроос соосты сак кылзо. Озьы тӧроос сузэръёсты но шумпотто, асьсэос но малы ке дышетско. Гера́рдо тӧро, кудӥз Вефильын ужа-тырше, вера: «Куке мон сузэръёсын кенешисько, аслэсьтым ужъёсме умойгес быдэстыны быгатӥсько. Ӵем дыръя сузэръёс кыӵе ке ужез умойгес тодо, тросэз агайёс сярысь но». Тросэз сузэръёс пионеръёс луыса ужало-тыршо. Соин ик сузэръёс соос палан улӥсь адямиосты умой тодо. Бра́йан тӧро вера: «Сузэръёсмылэн трос умой сямъёссы но быгатонлыкъёссы вань. Соин ик соос организацимылы бадӟым пайда вайыны быгато».

Куке сузэр мае ке но ӵектэ, визьмо тӧро солэсь ӵектонзэ палэнтыны уг дырты. Малы? Э́двард тӧро вера: «Сузэрлэн ӵектэмез агайлы юрттыны быгатэ югдур шоры пӧртэм паласен учкыны но адямиослэсь шӧдонъёссэс лыдэ басьтыны» (Мад. 1:5). Тӧро сузэрлэсь ӵектэмзэ котьку ик лыдэ басьтыны уз быгаты ке но, со сое ушъялоз но тау кароз.

Соос сузэръёсты дышето. Визьмо тӧроос сузэръёсты дышетыны тыршо. Кылсярысь, соос валэкто, кызьы тодытонлы сӥзем пумиськонэз ортчытоно, отчы пылатӥськем агай ӧз лыкты ке. Озьы ик тӧроос сузэръёсты дышето вырыны тӥрлыкен яке техникаен, сузэръёс организацимылэн эскерон-тупатъян но пуктӥськон ужъёсаз пыриськыны мед быгатозы шуыса. Вефильын но агайёс сузэръёсты дышето туж пӧртэм ужъёсты быдэстыны. Кылсярысь, сое, мар герӟаськемын эскерон-тупатъян но басьяськон ужъёсын, бухгалтериен яке программированиен. Сузэръёсты дышетыса, тӧроос соослы оскемзэс возьмато.

Тросэз сузэръёс басьтэм тодон-валанзэс куто, мукетъёсызлы юрттон понна. Кылсярысь, сузэръёс, кудъёссэ дышетӥзы пуктӥськон ужъёсы пыриськыны, инкуазь шимучыръёс дыръя куашкам юртъёсты тупатъяло. Нош сузэръёс, кудъёссэ дышетӥзы трос калыко интыосын тодытыны, мукет сузэръёсты дышето, соос но та амалэн тодытыны мед быгатозы шуыса. Мар верало сузэръёс тӧроос сярысь, кудъёсыз соосты дышетӥзы? Тани мар вера Дже́ннифер сузэр: «Куке ми одӥг Эксэйлык юртэз пуктӥмы, кылкутӥсь тӧро, дырзэ жалятэк, монэ дышетӥз. Со монэ лэсьтэм уже понна ялан ушъяз. Мыным туж кельшиз соин ӵош ужаны. Мон шӧдӥсько вал, монэ дунъяло но мыным оско шуыса».

МАЛЫ КЫШНОМУРТЪЁС ШОРЫ ИЕГОВА СЯМЕН УЧКОНО?

Милям потэ кышномуртъёс шоры Иегова сямен учкеммы. Соин ик ми сузэръёсмес яратӥськомы но семьяенымы лыдъяськомы (1 Тим. 5:1, 2). Ми соосты дунъяськомы но шумпотӥськомы соосын ӵош Инмарлы ужаны-тыршыны. Ми шумпотӥськомы, куке соос яратэммес но юрттэммес шӧдо. Ване́сса вера: «Мон туж тау карисько Иеговаез, солэн организацияз пырисько шуыса! Татын туж трос сюлмаськись агайёс, кудъёсыз котьку тыныд ӟеч кыл шедьтозы». Нош Тайваньысь сузэр вера: «Мон туж шумпотӥсько, Иегова но солэн организациез кышномуртъёслэсь шӧдонъёссэс лыдэ басьто но соос сярысь сюлмасько шуыса. Та осконме юнматэ. Мон шумпотӥсько, Инмарлэн калыкез пӧлы пырисько шуыса».

Агайёс, Иегова адӟе, кызьы тӥ тыршиськоды кышномуртъёс шоры со сямен учкыны. Со тӥледын туж данъяське! (Мад. 27:11). Шотландиысь Бе́нджамин тӧро вера: «Та дуннеын кышномуртъёсты ӵем дыръя ултӥяло. Нош милям потэ, Эксэйлык юртэ лыктыса, соос мед шӧдозы, соосты гажало шуыса». Ойдолэ Иегова сямен сузэръёсмылы яратэммес но гажаммес возьматомы (Рим. 12:10).