1, 2. а) Кыӵе пайда милемлы ваёз Нойлэн, Данииллэн но Иовлэн улонзы сярысь малпаськон? б) Ку гожтэмын вал Иезекиильлэн 14:14 кылъёс?

 ВИСИСЬКОДЫ-А тӥ, ёрмыса-а улӥськоды, уйылон-уллянъёсын-а пумиськиськоды яке Иеговалы ужан-тыршон тӥледлы шумпотон уг вайы ни, соку тӥледлы юрттоз Нойлэн, Данииллэн но Иовлэн улонзы сярысь малпаськон. Соос ми кадь ик тырбыдэстэм адямиос вал но милям кадь ик шуг-секытъёсын пумиськылӥзы. Куддыръя соослэн улонзылы кышкытлык кылдэ вал. Но, номыр шоры учкытэк, соос Иеговалы оскымонэсь кылизы но милемлы умой пример возьматӥзы, кызьы оскымон но кылзӥськись луоно. (Лыдӟе Иезекиильлэсь 14:12—14.)

² Та статьялы валтӥсь кылбурысь кылъёсты Иезекииль асьме эралэсь азьло 612-тӥ арын Вавилония музъемын  гожтӥз, вылды (Иез. 1:1; 8:1) a. Со бере вить ар гинэ ортчиз но, асьме эралэсь азьло 607-тӥ арын Инмарлэсь палэнскем Иерусалим куашказ. Куд-огъёсыз гинэ утиськизы — соос, кинъёс Нойлэсь, Данииллэсь но Иовлэсь адӟем каризы (Иез. 9:1—5). Соос пӧлын вал Иеремия, Варух, Авдемелех но Рехав выжыысь пиос.

3. Мае ми эскеромы таяз статьяын?

³ Дунне, кудаз ми улӥськомы, ӝоген быроз ини. Утиськыны быгатозы соос гинэ, кинъёс, Ной, Даниил но Иов сямен ик, Иеговалэн син азяз чылкытэсь луозы (Усьт. 7:9, 14). Ойдолэ эскеромы, малы Иегова соосты шонерлыко адямиос шуыса нимаз но милемыз соослэсь адӟем карыны косӥз. Ми эскеромы: 1) кыӵе шуг-секытъёсын пумиськиз котькудӥз соос пӧлысь но 2) кызьы ми соослэсь оскемзэс но кылзӥськись луэмзэс адӟем карыны быгатӥськомы.

4, 5. Кыӵе шуг-секытъёсын пумиськиз Ной? Маин тунсыко луэ солэн чидамез?

⁴ Шуг-секытъёс, кудъёсыныз пумиськиз Ной. Нойлэн песятаезлэн атаез, Енох, улыку ик ини адямиос туж сьӧлыкоесь луизы. Со сяна, соос Иегова сярысь «лек кылъёс» веразы (Иуда 14, 15). Дунне лекгес но лекгес луиз, но музъем Ной улон нуналъёсы «сьӧсь ужъёсын пачылмиз». Инмарлы пумит ӝутскем кылчинъёс, музъем вылэ васькыса, адями кадь кариськизы но асьсэлы кышноос басьтылӥзы. Соослэн пиоссы вордскылӥзы, кудъёсыз туж лек луэменызы тодмо луизы (Ул.-выл. 6:2—4, 11, 12). Ной чылкак мукет адями вал. Библиын верамын: «Нош Ной Кузё-Инмар дорысь дэлет басьтӥз. ...Ной ас вакытаз вань адямиос пӧлысь... дун-шектэм улӥсь мурт вал; Ной Инмар азьтӥ ветлӥз» (Ул.-выл. 6:8, 9).

⁵ Мае ми тодӥськомы Ной сярысь та кылъёсысь? Ву тудӟон азьын со Инмар азьтӥ 70—80 ар гинэ ӧз ветлы (сомындагес али адямиос уло). Ной 600 ар пала улӥз Инмарлэсь палэнскем дуннеын! (Ул.-выл. 7:11). Со сяна, солэн ӧй вал кенешез, кудӥз солы юрттысал но юнматысал сое, кызьы со юнматэ милемыз туннэ. Озьы ик, солэн агай-вынъёсыз но апай-сузэръёсыз со палан ӧй вал, шӧдске b.

6. Малы вераны луоз, Ной кышкасьтэм адями вал шуыса?

⁶ Ной вала вал, огшоры умой адями луыны гинэ ӧжыт шуыса. Со «шонерлыкез тодытӥсь» вал. Со кышкатэк Иеговалы оскемез сярысь мукетъёсызлы вераса ветлӥз (2 Пётр 2:5). «Солэн осконэз возьматӥз, дунне судэ сюрымон луэмын шуыса»,— гожтӥз Ной сярысь апостол Павел (Евр. 11:7). Адямиос Ноез серекъязы, луоз, люкетӥзы солы, оло, виёзы шуыса но кышкатӥзы. Но со «адямиослэсь кышкаса улонлы» ӧз сётскы (Мад. 29:25). Ной кышкасьтэм вал, малы ке шуоно Иегова аслаз оскымон ужась-тыршисьёсызлы кышкасьтэм луыны юрттэ.

7. Кыӵе шуг-секытъёсын пумиськиз Ной, ковчег лэсьтыкуз?

⁷ Ной Иеговалы 500 арлэсь кемагес  ужаз-тыршиз. Собере Иегова солы уж сётӥз — ковчег лэсьтыны, отын адямиос но пудо-животъёс утиськыны мед быгатозы шуыса (Ул.-выл. 5:32; 6:14). Иеговаен сётэм уж Нойлы туж секыт кадь потӥз, луоз, малы ке шуоно со вала вал, сое бадӟым лэсьтӥськон уж возьма шуыса. Со сяна, со вала вал, солы эшшо тросгес мыскыллямез но уйылон-уллянъёсты чидано луоз на шуыса. Библиын верамын: «Ной ваньзэ лэсьтӥз, кызьы Инмар сое косӥз, озьы ик со лэсьтӥз». Озьы Ной аслэсьтыз оскемзэ но кылзӥськись луэмзэ возьматӥз (Ул.-выл. 6:22).

8. Кытысь адӟиське, Ной Иеговалы оскиськиз шуыса?

⁸ Со сяна, Нойлы аслэсьтыз кышнозэ но пиналъёссэ сюдыны-вордыны капчи ӧй вал. Ву тудӟонлэсь азьло адямиослы, сиён будэтон понна, секыт но трос ужано вал. Ной но озьы ик ужаз (Ул.-выл. 5:28, 29). Озьы ке но, со ӧз лэзьы, семьязэ сюдон-вордон улоназ нырысетӥ интыын мед луоз шуыса, нош Инмарлы ужан-тыршон кыкетӥ интыын. Ковчег лэсьтыкуз но, кудзэ со 40—50 ар ӵоже лэсьтӥз, луоз, Ной нырысь ик Иеговаен кусыпъёсыз сярысь сюлмаськиз. Ву тудӟон бере со эшшо 350 ар улӥз на но вань со дыр ӵоже Иеговалы оскымон кылиз (Ул.-выл. 9:28). Макем умой пример со возьматӥз, кызьы оскымон но кылзӥськись луоно!

9, 10. а) Кызьы адӟем карыны луэ Нойлэсь оскымон но кылзӥськись луэмзэ? б) Кызьы Инмар учке адямиос шоры, кудъёсыз солэн законъёсызъя уло?

⁹ Кызьы адӟем карыны луэ Нойлэсь оскымон но кылзӥськись луэмзэ? Со понна милемлы Инмарлэсь шонерлыко эсэпъёссэ утёно, Шайтанлэн дуннеезлэсь палэнын возиськоно но Иеговалы ужан-тыршонэз нырысетӥ интые пуктоно (Матф. 6:33; Иоанн 15:19). Зэм, озьы улыса дунне ми шоры умоен уз учкы, дыр. Куд-ог шаеръёсын ми сярысь умойтэм кылъёс вераны быгато газетъёсын, телевидение но радио пыр, малы ке шуоно милям юн мылкыдмы вань кылзӥськыны Инмарлэн курон-косонъёсызлэсь секс но кузпалъяськон пумысен. (Лыдӟе Малахиялэсь 3:17, 18.) Нош ми, Ной кадь ик, адямиослэсь ум кышкаське, Иеговалэсь кышкаськомы. Ми тодӥськомы, со гинэ адямиослы пырак улон сётыны быгатэ шуыса (Лука 12:4, 5).

¹⁰ Нош тӥ сярысь мар вераны луоз? Азьланяз но ветлоды-а тӥ Инмар азьын, тӥледыз серекъязы яке тӥ сярысь урод кылъёс веразы ке но? Коньдонлы ёрмыса улыны кутскиды ке, азьло сямен ик оскиськоды-а тӥ Иеговалы, кудӥз аслаз ужась-тыршисьёсыз сярысь сюлмаськыны кылзэ сётэ? Нойлэсь адӟем каре но оскондэс но кылзӥськись сямдэс возьматэ. Соку тӥ оскыны быгатоды, Иегова тӥледлы одно ик юрттоз шуыса (Флп. 4:6, 7).

11. Кыӵе шуг-секытъёсын пумиськиз Даниил но солэн куинь эшъёсыз вавилон пленын? (Учке статья кутсконысь суредэз.)

¹¹ Шуг-секытъёс, кудъёсыныз пумиськиз Даниил. Даниил, аслаз мылыз потыса, Вавилонэ ӧз вуы, каре, кудӥз тунаськон-пелляськон но сульдэръёслы-идолъёслы йыбыртъян пӧлы выемын вал. Мукет еврейёсты сямен, сое пленэ нуизы. Вавилонын соосты ултӥязы, озьы ик, соосты но соослэсь Инмарзэс, Иеговаез, мыскыллязы (Пс. 136:1, 3). Сое адӟыса,  Данииллэн но мукет оскымон еврейёслэн сюлэмзы туж вӧсь луэ вал, дыр. Со сяна, Даниилэз но солэсь куинь эшъёссэ — Ананияез, Мисаилэз но Азарияез — туж чакласа возизы, малы ке шуоно соосты бырйизы, вавилон эксэйлэн корказ ужаны дышетон понна. Соос понна ваньзэ малпазы: сое но, мае соос сиёзы. Ӵапак со соослы шуг-секыт кылдытӥз. Соослы сётъязы сое, мае Иегова аслаз калыкезлы сиыны ӧз лэзьы. Нош Данииллэн «эксэй ӝӧк вылысь сиёнэн, винаен, кудзэ эксэй сие, юэ» саптаськемез ӧз поты (Дан. 1:5—8, 14—17).

12. а) Кыӵе адями вал Даниил? б) Кызьы Иегова Даниил шоры учке вал?

¹² Эшшо одӥг ватӥськем шуг-секыт вал на, кудӥныз Данииллы пумиськоно луиз. Со туж усто адями вал, соин ик солы троссэ оскизы (Дан. 1:19, 20). Даниил вылтӥяськыны быгатысал, но со зӥбыт но востэм кылиз. Со ассэ ӧз данъя, нош котьку данъяз сое, кин данъяны ярамон вал,— Иеговаез (Дан. 2:30). Тунсыко луэ, куке Иегова Данииллэсь адӟем карыны косӥз, Даниил туж егит на вал. Озьы ке но, Иегова сое одӥг радэ пуктӥз Ноен но Иовен — шонер улӥсь адямиосын, кудъёсыз вань улытозязы солы оскымон кылизы. Иегова Данииллы быдэсак оске вал, но Даниил сое ӝоже ӧз уськыты. Кулытозяз Даниил Иеговалы оскиз но солэсь кылзӥськиз. Куке Данииллы сю арес котырын вал, Инмарлэн кылчинэз шуныт кылъёсын солы вазиськиз: «Даниил, Инмарлы яратыны ярамон мурт!» (Дан. 10:11).

13. Кызьы Даниил Инмарлэн калыкезлы юрттӥз, вылды?

¹³ Инмарлэн юрттэмезлы луыса, Даниил вылӥ пуктэм мурт вал, кызьы вавилон эксэй кивалтыку, озьы ик мидянъёслэн но персъёслэн эксэйзы кивалтыку но (Дан. 1:21; 6:1, 2). Озьы Иегова тупатӥз, вылды, Даниил пыр аслаз калыкез сярысь сюлмаськон понна, кызьы со сюлмаськиз Египетын Иосиф пыр, нош Персиын Есфирь но Мардохей пыр (Дан. 2:48) c. Пуктэ син азяды, макем шумпотӥзы, дыр, пленэ басьтэм еврейёс, озьы ик Иезекииль но, Иеговалэсь аслаз калыкезлы юрттэмзэ адӟыса!

14, 15. а) Маин милям югдуръёсмы тупало Данииллэн улон вакытэзлы? б) Малы дышетскыны быгато анай-атайёс Данииллэн анаезлэсь но атаезлэсь?

 ¹⁴ Кызьы адӟем карыны луэ Данииллэсь оскымон но кылзӥськись луэмзэ? Ваньмы асьмеос куноос кадь луиськомы та дуннеын, кудӥз сьӧлыке мургес но мургес вые но Инмарлэсь палэнске. Адямиос вылын шӧдӥське Быдӟым Вавилон — зэмос луисьтэм религилэн дунневыл империез, кудӥз Библиын «периослы улон инты» шуыса нимамын (Усьт. 18:2). Ми адямиослэсь туж пӧртэм луиськомы, соин ик милемыз ӵем дыръя серекъяло (Марк 13:13). Ойдолэ Данииллэсь адӟем каромы но Иегова Инмаренымы кусыпъёсмес юнматомы. Ми зӥбыт-востэм улӥськомы, Инмарлэсь кылзӥськиськомы но котьку солы оскиськомы ке, ми но солэн син азяз яратыны ярамон муртъёс но солэн быръемъёсыз луомы (Агг. 2:7).

¹⁵ Малы дышетскыны быгато христиан луись анай-атайёс Данииллэн анаезлэсь но атаезлэсь? Даниил Иудаын лек, сьӧлыко адямиос пӧлын будӥз. Озьы ке но, номыр шоры учкытэк, пияш Иеговаез яратӥз. Солы туж юрттӥз анаез но атаез (Мад. 22:6). Данииллэн анай-атаез Инмарлы оско вал шуыса адӟиське, кылсярысь, отысь, кыӵе ним соос пизылы бырйизы. Данииллэн нимыз «Мынам судьяе — Инмар» шуэм луэ. Дуно анай-атайёс, азьланяз но нылпиостэс чидаса зэмлыклы дышетэ. Ноку но эн сётске! (Еф. 6:4). Соосын ӵош вӧсяське. Нимаз вӧсяськыкуды но Иеговалы соос сярысь вералэ. Тырше, нылпиосты мед яратозы шуыса сое, мае яратэ Иегова. Соку со тӥлесьтыд тыршемдэс одно ик бакель кароз (Пс. 36:5).

16, 17. Кыӵе шуг-секытъёсын пумиськиз Иов ас улоназ?

¹⁶ Шуг-секытъёс, кудъёсыныз пумиськиз Иов. Иовлэн улонэз чутрак воштӥськиз. Шугадӟонъёсын пумиськемезлэсь азьвыл со «шундыӝужанысь вань пиосмуртъёс пӧлысь ваньмызлэсь но нимо-даногес вал» (Иов 1:3). Иов вал узыр, тодмо но гажамон адями (Иов 29:7—16). Но со вылтӥяськись ӧз луы но ӧз малпа, солэн Инмартэк но улэмез луоз шуыса. Иегова Иовез аслаз ляльчиез шуыса нимаз но вералляз, со «сьӧлыкасьтэм, шонерлыко, Инмарлэсь кышканэн улӥсь, уродлэсь-леклэсь палэнскылӥсь» адями шуыса (Иов 1:8).

¹⁷ Но шӧдтэк шорысь Иовлэн улонэз воштӥськиз. Со ас вылаз шӧдӥз, мар со сыӵе ёрмыса но сюлэм чигиськыса улон. Иовлэн вань шуг-секытъёсыз, кызьы ми тодӥськомы, Шайтан бордысь пото вал. Со юнме Иовез янгыше уськытӥз, Иов Инмарлы аслыз пайда басьтон вылысь гинэ ужа-тырше шуыса. (Лыдӟе Иов книгаез 1:9, 10.) Иегова со пӧяськон шоры синзэ ӧз ворса. Со Иовлы луонлык сётӥз возьматыны, со солы оскымон, но вань сюлмысьтыз солы ужа-тырше шуыса.

18. а) Иовлэн оскымон луэмез сярысь малпаськоды ке, мар тужгес но тӥлесьтыд сюлэмдэс вырӟытэ? б) Мае ми тодӥськомы Иегова сярысь Иовен луэм учырысь?

¹⁸ Огез бӧрсьы мукетсэ шугадӟонъёсты лэзьыса, Шайтанлэн потэ вал, Иов Инмарез янгыше мед уськытоз шуыса (Иов 1:13—21). Собере Иов доры эшъёсыз лыктӥзы. Соос сое янгыше уськытыны выризы но веразы, озьы сое Инмар кыл кутытэ шуыса (Иов 2:11; 22:1, 5—10). Но Иов Иеговалы оскымон  кылиз. Зэм, куддыръя Иов, чик малпаськытэк, вералляз, но Иегова валаз, макем со курадӟе (Иов 6:1—3). Инмар адӟе вал, со азьын мур кайгырись адями шуыса, кудӥз ӧз берытскы солэсь, Шайтан сое курадӟытӥз ке но. Шайтан Иовез музъем вылэ погыртӥз, шуыны луоз, нош собере «эшъёсызлэн» янгыше уськытӥсь кылъёсынызы вӧсьгес но вӧсьгес кариз. Вань шугадӟонъёс ортчем бере Иегова Иовлы азьвыллэсь кык поллы тросгес сётӥз. Со сяна, солэсь улонзэ эшшо 140 арлы кузятӥз на (Иак. 5:11). Иов кулытозяз Инмарлы вань сюлмысьтыз оскымон вал. Малы озьы вераны луоз? Малы ке шуоно, Иезекииль та статьялы валтӥсь кылбурысь кылъёсты гожтыку, Иов кулэм дырысен трос дауръёс ортчемын вал ини.

19, 20. а) Кызьы адӟем карыны луэ Иовлэсь оскымон но кылзӥськись луэмзэ? б) Кызьы милемлы мукетъёссэ Иегова кадь ик гажано-жаляно?

¹⁹ Кызьы адӟем карыны луэ Иовлэсь оскымон но кылзӥськись луэмзэ? Кыӵе гинэ югдуре ми медам шеде, Иегова котьку нырысетӥ интыын луыны кулэ. Милемлы быдэсак солы оскиськоно но вань сюлмысьтымы солэсь кылзӥськоно. Озьы улыны милям мугъёсмы Иовлэсь но трос. Малпалэ: милемлы тросэз тодмо Шайтан но солэн сьӧлтэтъёсыз сярысь (2 Кор. 2:11). Библиысь, кылсярысь, Иов книгаысь, ми тодӥськомы, малы Инмар курадӟонъёсты уг быдты. Данииллэн книгаезлы луыса, ми валаськомы, Инмарлэн Эксэйлыкез — со быдэс дуннеен кивалтӥсь кивалтэт, кудаз йыр луэ Иисус Христос (Дан. 7:13, 14). Со Эксэйлык ӝоген вань курадӟонъёсты пыраклы быдтоз.

²⁰ Иов сярысь веранысь озьы ик адӟиське, милемлы шуг-секытъёсын пумиськем вын-агайёсмес но сузэр-апайёсмес гажано-жаляно шуыса. Куд-огъёсыз соос пӧлысь, Иов кадь ик, куддыръя малпаськытэк верало, оло (Екк. 7:7). Милемлы соосты судъяно ӧвӧл. Умойгес луоз, ми соосты гажамы-жалямы но валамы ке. Озьы ми адӟем каромы яратӥсь но гажась-жалясь Атаймылэсь, Иеговалэсь (Пс. 102:8).

21. Кызьы 1 Пётрлэн 5:10 кылъёс тодамы вайыто, маин пумиськиз Ной, Даниил но Иов?

²¹ Ной, Даниил но Иов пӧртэм вакытъёсы улӥзы но пӧртэм шуг-секытъёсын пумиськылӥзы ке но, соос Инмарлы оскымон кыльыны быгатӥзы. Соослэн улонзы сярысь лыдӟиськомы ке, со тодамы вайытэ апостол Пётрлэсь кылъёссэ: «Котькыӵе но дэлет сётӥсь Инмар... тӥляд вакчияк курадӟонды бере тӥледыз юнматоз, кужмоятоз, чигиськисьтэм-куасаськисьтэм кароз» (1 Пётр 5:10).

22. Мае ми эскеромы мукетаз статьяын?

²² Пётр пыр Иегова оскытэ милемыз, аслаз ужась-тыршисьёсызлы со юнэсь но кужмоесь луыны юрттоз шуыса. Кылъёс, кудъёссэ Пётр Инмарлэн святой духезлэн кивалтэмез улсын гожтӥз, асьме дыръёсысь ужась-тыршисьёс сярысь но верамын. Ваньмылэн потэ, Иегова милемыз мед юнматоз но ужан-тыршонамы юнэсь кыльыны мед юрттоз шуыса. Соин ик ойдолэ адӟем каромы Нойлэсь, Данииллэсь но Иовлэсь оскымон но кылзӥськись луэмзэс. Мукетаз статьяын ми адӟомы, Иеговаез умой тодэмзы соослы Иеговалы оскымон кыльыны юрттӥз шуыса. Соос умой валало вал, мае соослэсь возьма Инмар (Мад. 28:5). Ми но озьы ик быгатомы.