ЭСКЕРОН ПОННА СТАТЬЯ 8
Малы тау карись луоно?
«Тау карыса улэ» (КОЛ. 3:15).
46-ТӤ КЫРӞАН Спасибо, Иегова
ТА СТАТЬЯЫН a
1. Кызьы Самария мурт Иисуслы тау кариз сое бурмытэмез понна?
ДАС пиосмуртъёс туж секыт югдуре сюремын вал. Соос гижлочерен висизы, но азьланяз соосты номыр умоез ӧз возьма. Но одӥг пол соос кыдёкысен адӟизы Иисусэз, Быдӟым Дышетӥсез. Та пиосмуртъёс кылӥзы, со котькыӵе висёнэз бурмытэ шуыса, но оскизы, Иисус соослы юрттоз шуыса. Соос бадӟым куараен веразы: «Иисус Дышетӥсь! Жаля милемыз!» Иисус соослы юрттӥз, но соос быдэсак бурмизы. Веранэз ӧвӧл, ваньзылэн соослэн Иисуслы ӟеч ужез понна тау карон мылкыдзы вал. Но одӥгез гинэ соос пӧлысь солы тау кариз. Бурмытэм пиосмурт, Самария мурт, «бадӟым куараен» Инмарез данъяны кутскиз (Лука 17:12—19).
2, 3. а) Малы ми куддыръя мукетъёссэ тау ум кариське? б) Мае ми эскеромы та статьяын?
2 Милям но, Самария мурт сямен, тау кареммы потэ соослы, кинъёс милемлы ӟеч ужъёс лэсьто. Но куддыръя ми вунэтӥськомы адямилы тау шуыны яке кызьы ке мукет сямен тау каронмес возьматыны.
3 Та статьяын ми эскеромы, малы туж кулэ тау каронмес кылъёсын но ужъёсын возьматыны. Библиын вераське соос сярысь, кинъёс тау карисесь вал, озьы ик соос сярысь, кинъёс тау карисьтэмесь вал. Ми эскеромы та примеръёсты но тодомы, кызьы тау каронэз возьматоно.
МАЛЫ ТАУ КАРИСЬ ЛУОНО?
4, 5. Малы милемлы тау карись луоно?
4 Иегова милемлы адӟем карон возьматэ, кызьы тау карись луоно. Кылсярысь, со бакель каре соосты, кинъёс сое шумпотто (2 Экс. 22:21; Пс. 12:6б; Матф. 10:40, 41). Библиын гожтэмын: «Инмарлэн яратоно нылпиосыз луиськоды бере, Инмарлэсь адӟем карыса улэ» (Еф. 5:1). Озьыен, валтӥсь муг, малы тау карись луоно,— со Иеговалэсь адӟем карон мылкыд.
5 Вань на мукетыз муг. Тау каронэз ческыт сиёнэн ӵошатыны луэ: тон сое быгатӥськод огнад сиыны, нош тросгес шумпотон басьтод, сое кинэн ке ӵош сиид ке. Куке милемлы тау каро, ми шумпотӥськомы. Нош куке ми мукетъёссэ тау кариськомы, соос шумпото. Соос валало, тыршемзы юнме ӧй вал шуыса. Солы луыса эшъяськонмы юнма.
6. Малы тау карон кылъёсты зарни улмоосын ӵошатыны луэ?
6 Тау карон туж дуно луэ. Библиын гожтэмын: «Азвесьлэсь лэсьтэм пыр адӟиськись сосудъёсын возиськись зарни улмоос — со ӟечен верам ӟеч кыл» (Мад. 25:11). Пуктэ син азяды, кыӵе со чебер: зарни улмоос азвесь сосудъёсын! Озьы ик сыӵе арбери туж дуно. Сыӵе кузьымлы тӥ туж шумпотысалды, дыр. Тау карон кылъёс но туж дуноесь. Со сяна, зарни улмоосын кема дыр ӵоже номыр уг луы. Тӥлесьтыд тау карон кылъёстэс но кин ке быдэс улонэз ӵоже сюлмаз возьыны быгатэ.
СООС ТАУ КАРИСЕСЬ ВАЛ
7. Кызьы Давид но мукет адямиос, кудъёсыз псаломъёсты гожъязы, Иеговалы тау каремзэс возьмато вал, кызьы адӟиське Псалтирьысь 68:31?
7 Вашкала дыръя Инмарлэн тросэз ужась-тыршисьёсыз тау каронзэс возьматъязы. Одӥгез соос пӧлысь Давид вал. (Лыдӟе Псалтирез 68:31.) Со туж дунъяз зэмос Инмарлы ужаны-тыршыны луонлыкез но сое ужъёсыныз возьматъяз. Давид храмез пуктонлы ваньбурезлэсь бадӟым люкетсэ сётӥз. Нош Асаф выжыысь адямиос Иеговалы тау каронзэс возьмато вал, псаломъёсты, яке тау карон кырӟанъёсты, гожъяса. Одӥгаз сыӵе кырӟанын соос Инмарлы тау каро но «паймымон ужъёсызлы» шумпото (Пс. 74:2). Зэм, Давидлэн но Асаф выжыысь адямиослэн Иеговалы возьматэмзы потэ вал, макем соос солы тау каро вань бакель каронъёсыз понна. Ма ласянь тӥ соослэсь адӟем карыны быгатысалды?
Малы дышетэ милемыз Павеллэн Римын улӥсьёслы гожтэтэз тау карон пумысен? (Учке 8-тӥ но 9-тӥ абзацъёсты.) b
8, 9. Кызьы апостол Павел возьматылӥз, вын-агайёсты но сузэр-апайёсты дунъя шуыса? Кызьы со эшъяськонзы вылын шӧдӥськиз, вылды?
8 Апостол Павел вын-агайёсты но сузэр-апайёсты дунъяз. Со адӟиське отысь, мар со соос сярысь вералляз. Вӧсяськыкуз Павел соос понна Инмарлы котьку тау каре вал. Христианъёслы тау каремзэ со гожтэтъёс пыр но возьматъяз. Римъёслы 16:1—15 кылбуръёсын Павел 27 вын-агайёсты но сузэр-апайёсты нимзыя вера. Со нимысьтыз пусйиз, Прискилла но Акила со понна «йырзэс ӧжыт гинэ ӧз быдтэ» шуыса но Фива «тросэзлы юрттӥськыса улӥз» шуыса, Павеллы аслыз но. Павел вын-агайёсты но сузэр-апайёсты ушъя, кудъёсыз вань сюлмысьтызы ужало-тыршо.
9 Павел тодӥз, со вын-агайёслэн но сузэр-апайёслэн тырмымтэоссы вань шуыса, но гожтэтэзлэн пумаз со умой сямъёссы сярысь гинэ вера. Куке та гожтэтэз кенешын лыдӟизы, соос шумпотӥзы, дыр, Павеллэсь ушъян кылъёссэ кылыны. Соин ик соослэн Павелэн эшъяськонзы эшшо но юнмаз, луоз. Тыршиськоды-а тӥ кенешысьтыды вын-агайёсты но сузэр-апайёсты ӟеч кылъёссы но ужъёссы понна ушъяны?
10. Малы дышетэ милемыз Иисуслэн дышетскисьёссэ тау каремез?
10 Пичи Азиысь куд-ог кенешъёслы вазиськыса, Иисус тау каремзэ возьматӥз со понна, мае соос лэсьто вал. Кылсярысь, Фиатираысь кенешлы со таӵе кылъёсын вазиськиз: «Тодӥсько тынэсьтыд ужъёстэ, яратондэ но, ужан-тыршондэ но, оскондэ но, чидандэ но тодӥсько. Тодӥсько сое но: кутсконаз сярысь, берло дыре тон бадӟымесьгес-вылӥесьгес ужъёс лэсьтӥськод» (Усьт. 2:18—20). Иисус вераз, та кенешысь вын-агайёс но сузэр-апайёс тодытон уже тросгес пыриськыны кутскизы шуыса, озьы ик со ушъяз соосты сямъёссы понна, кудъёсыз соослэсь мылкыдзэс ӝутӥзы ӟеч ужъёс лэсьтыны. Фиатира кенешысь христианъёслы Иисус визь-кенеш сётоно луиз ке но, та кенешлы вазиськонзэ со кутске но йылпумъя ушъянэн (Усьт. 2:25—28). Малпаське, Иисус вань кенешъёслы йыр луэ, но со милемыз ужъёсмы понна ушъятэк но быгатысал. Озьы ке но со милемлы тау каремзэ возьматэ. Та туж умой адӟем карон тӧроослы.
СООС ТАУ КАРИСЬТЭМЕСЬ ВАЛ
11. Кызьы Исав возьматӥз, со Инмарез ӧз яраты но ӧз гажа шуыса?
11 Жаляса верано луэ, куд-ог адямиос, кудъёсыз сярысь Библиын гожтэмын, тау карисьтэмесь вал. Одӥгез соос пӧлысь — Исав. Исавез будэтӥзы ке но Иеговаез яратӥсь но гажась анай-атайёс, со Инмарез ӧз яраты но ӧз гажа. (Лыдӟе Еврейёслы 12:16.) Кытысь адӟиськиз солэн тау карисьтэм луэмез? Со малпаськытэк вузаз нырысь нуны луон правозэ Иаков вынызлы огшоры сиён понна (Ул.-выл. 25:30—34). Берлогес Исав туж жаляз сыӵе ужпум кутэмез понна. Но со тау карисьтэм вал бере, солэн ӝожтӥськыны мугъёсыз ӧй вал, нырысь нуны луонлэн бакель каронъёсыз мукетызлы сётэмын вал шуыса.
12, 13. Кытысь адӟиськиз израиль калыклэн тау карисьтэм луэмез но кытчы со вуттӥз?
12 Израиль калыклэн Иеговалы тау карыны туж трос мугъёсыз вал. Со соосты ляльчи луонлэсь мозмытӥз, Египет вылэ дас шугадӟонъёсты лэзьыса. Собере Иегова соосты быронлэсь утиз, Египетысь вань ожгарчиосты Горд Кам зарезьын быдтыса. Израиль калык Инмарлы сокем тау кариз, со сое кырӟанъёсын данъяны кутскиз. Нош возиськиз-а соослэн тау карон мылкыдзы азьланяз но?
13 Выль шуг-секытъёсын пумиськыса, соос ӝог вунэтӥзы ваньзэ умойзэ, мар лэсьтӥз соос понна Иегова. Дыр ортчыса, адӟиськиз, соослэн тау карон мылкыдзы уг тырмы шуыса (Пс. 105:7). Библиын гожтэмын, «израиль калык Моисеен Аарон вылэ ӟургетыса улыны кутскиз» шуыса, нош зэмзэ вераса, соос ӟургетӥзы Иегова вылэ (Пот. 16:2, 8). Инмар ӝоже усиз, калыкезлэсь тау карисьтэм мылкыдзэ адӟыса. Берлогес со вераз, Иисус Навин но Халев сяна, израиль калыклэн быдэс выжыез, кудӥз ӟургетыса улӥз, кыр дуннеын кулоз шуыса (Лыд. 14:22—24; 26:65). Ойдолэ эскеромы, малы дышетскыны луэ, та примеръёс вылын малпаськыса.
ТАУ КАРИСЕСЬ ЛУЭ
14, 15. а) Кызьы кузпалъёс возьматыны быгато, ог-огзэс дунъяло шуыса? б) Кызьы анай-атайёс нылпиоссэс дышетыны быгато тау карисесь луыны?
14 Семьяын. Семьяын котькудӥз тау карись луыны тырше ке, со быдэс семьялы пайда вае. Макем ӵемгес кузпалъёс ог-огзылы тау каремзэс возьмато, сокем матысьгес соослэн кусыпъёссы луо но ӝоггес янгышъёссэс простить каро. Карт, кудӥз кышнозэ дунъя, солэсь ӟеч кылъёссэ но ужъёссэ адӟе но со понна ушъяны луонлыкез уг кельты (Мад. 31:10, 28). Нош визьлыко кышно картэзлы котьку вера, мар понна со сое дунъя.
15 Нош кызьы анай-атайёс нылпиоссэс дышетыны быгато тау карисесь луыны? Эн вунэтэ: нылпиос чаклало, мар тӥ вераськоды но мар лэсьтӥськоды, но тӥлесьтыд адӟем каро. Соин ик нылпиостылы умой адӟем карон возьматэ — тау каре соосты со понна, мар соос тӥледлы лэсьто. Озьы ик дышетэ соосты мукетъёссэ тау карыны. Соос мед валалозы, тау карон сюлмысь потэ шуыса но ӟеч кылъёслэн бадӟым кужымзы вань шуыса. Тани мар вера Клари нимо егит кышномурт: «Анае 32 арес дыръяз одӥгназ куинь нылпиен кылиз. Куке мыным 32 арес тырмиз, мон малпай, макем солы соку секыт вал шуыса. Но мон анаелы вераны малпай, кыӵе дунъясько шуыса ваньзэ, мае со лэсьтӥз, монэ, агайме но вынме будэтон понна. Нош алигес анае вераз, со ӵемысь мынэсьтым кылъёсме тодаз вайылэ но соос солэсь сюлэмзэ шунто шуыса».
Дышетэ нылпиостэс тау карись луыны (Учке 15-тӥ абзацез.) c
16. Вералэ пример, кызьы тау карон кылъёс кинлэсь ке мылкыдзэ ӝутыны быгато.
16 Кенешын. Вын-агайёсмылы но сузэр-апайёсмылы тау кареммес возьматыса, ми соослэсь мылкыдзэс ӝутӥськомы. Тани 28 аресъем Хорхе нимо тӧролэн примерез. Одӥг пол со зол висьыны кутскиз но быдэс толэзь ӵоже христиан пумиськонъёсы ветлыны ӧз быгаты. Хорхе пумиськонъёсы ветлыны кутскиз ке но, кенешын пунктъёсты нуыны со ӧз быгаты на. Тани мар со вера: «Мон асме номырлы ярасьтэм шӧдӥ, малы ке шуоно тазалыкеным герӟаськем шуг-секытъёсын сэрен мон уг быгатӥськы вал кенешын сётэм ужъёсме быдэсъяны. Но одӥг пол пумиськон бере мон доры одӥг агай лыктӥз но шуиз: „Тау, тон семьяелы умой адӟем карон возьматылӥд шуыса. Тон уд но тодӥськы, кыӵе милемлы кельшо вал речьёсыд, кудъёссэ тон берпум аръёсы вералляд. Соос милесьтым осконмес юнматӥзы“. Солэн кылъёсыз мынам сюлмам пыризы, но мынам синкылиосы ик потӥзы. Макем та кылъёс дырыз дыръя верамын вал!»
17. Мар карыны мылкыдмес ӝутэ Колоссыослы 3:15 но кызьы сое уже кутоно?
17 Жалятэк сётӥсь Инмармылы. Иегова милемлы духовной сиёнэз жалятэк сётэ. Ми кулэ луись тодон-валан басьтӥськомы, христиан пумиськонъёсы ветлыкумы, озьы ик Библия вылэ пыкиськыса гожтэм публикациосты но сайтысьтымы статьяосты лыдӟыкумы. Луылӥз-а озьы, речез кылыса, статьяез лыдӟыса яке интернет-телевидениысьтымы мае ке адӟыса, тӥ малпады: «Та ӵапак со, мар мыным кулэ вал!» Кызьы Иеговалы тау кареммес возьматоно? (Лыдӟе Колоссыослы 3:15.) Одӥгез амал — Иеговалэн кузьымъёсыз понна вӧсяськонъёсын котьку тау карыны (Иак. 1:17).
Эксэйлык юртэз чылкытатон уже пыриськон — туж умой луонлык Инмарлы тау кареммес возьматыны (Учке 18-тӥ абзацез.)
18. Кызьы тау кареммес возьматыны луэ, Эксэйлык юртмы вань шуыса?
18 Озьы ик ми Иеговалы тау кареммес возьматӥськомы, Эксэйлык юртэз чылкыт возьыса. Ми Эксэйлык юртэз эскерон-тупатъян но утялтон ужъёсы ялан пыриськиськомы. Соос, кинъёс куараез бадӟыматӥсь но видео возьматӥсь аппаратураен выро, сое ӝикыт куто. Ми Эксэйлык юртмес чакласа возиськомы ке, со кемалыгес чидалоз, но сое шергес тупатъяно луоз. Озьы тросгес коньдон кылёз, кудӥз кулэ луэ быдэс дуннеын Эксэйлык юртъёсты пуктон но эскерон-тупатъян ужъёсты нуон понна.
19. Малы дышетскыны луэ ёросэз чакласьлэсь но солэн кышноезлэсь?
19 Соослы, кинъёс ми понна трос тыршо. Тау карон кылъёсмылы луыса адями мукет сямен учкыны быгатоз шуг-секытъёс шоры, кудъёсыныз со пумиське. Тани ёросэз чакласьлэн но кышноезлэн примерзы. Одӥг пол толалтэ соос быдэс нунал ужазы-тыршизы но туж жадьыса бертӥзы. Соку туж кезьыт вал, но кышноез выл дӥсеныз ик изьыны выдӥз. Ӵукнаяз со картэзлы вераз, та ужан-тыршонзэс азьланьтыны кужымез ӧвӧл ини шуыса. Берлогес соослы филиалысь гожтэт вуиз, кудӥз кышноезлы ыстэмын вал. Отын ушъяса верам шуныт кылъёс гожтэмын вал Иеговалы оскымон ужамез-тыршемез но юн луэмез понна. Гожтэтын пусъемын вал, макем секыт котькуд арняе одӥг интыысь мукет интые ветлыны. Но тани мар вераз солэн картэз: «Со гожтэт кышноелэн сюлмаз туж пыриз, но со та ужан-тыршонэз кельтон сярысь ноку но ӧз вера ини. Нош кӧня ке пол со мынэсьтым мылкыдме ӝутылӥз та ужан-тыршонэз азьланьтыны, куке мынам сое кельтэме потэ вал ини». Та кузпалъёс ог 40 ар ӵоже пӧртэм кенешъёстӥ ветлыса ужазы-тыршизы.
20. Мар милемлы котькуд нунал карыны тыршоно но малы?
20 Ойдолэ котькуд нунал мукетъёссэ тау карыса уломы — кылъёсын но ужъёсын. Асьмелэн ӟеч кылъёсмы но ужъёсмы адямилы юрттозы нюръяськыны котькуд нунал кылдӥсь шуг-секытъёсын, кудъёсыз та тау карисьтэм дуннеын пумисько. Озьы ик тау кареммылы луыса эшъяськонмы юнма, кудӥз пырак дауръёс ӵоже кыстӥськыны быгатоз. Но тужгес но кулэез, озьы ми адӟем каромы жалятэк сётӥсь но тау карись Атаймылэсь, Иеговалэсь.
20-ТӤ КЫРӞАН Ты отдал своего дорогого Сына
a Малы ми дышетскыны быгатӥськомы тау карон пумысен Иеговалэсь, Иисуслэсь но гижлочерен висись Самария муртлэсь? Та статьяын ми эскеромы та но мукет примеръёсты, озьы ик тодомы, малы милемлы тау карись луоно но кызьы сое лэсьтоно.
