1. Кыӵе юанъёс аслыз сётыны кулэ сузэр, кудӥз бызьыны малпа?

 ИИСУС ХРИСТОС вань христианъёслы йыр луэ. Аслэсьтыз ужзэ со туж умой быдэстэ. Нош куке сузэр бызе, солы йыр луэ тырбыдэстэм пиосмурт. Соин ик сузэрлы солэсь кылзӥськыны куддыръя капчи ик ӧвӧл, дыр. Куке сузэр малпа, кыӵе ке агайлы бызёно-а, ӧвӧл-а шуыса, солы аслэсьтыз юано: малы мон малпасько, та агай семьямылы умой йыр луоз шуыса? Луоз-а вераны, Иеговалы ужан-тыршон солэн улоназ нырысетӥ интыын шуыса? Со озьы ӧвӧл ке, малы мон малпасько, кузпалъяськеммы бере со милемлы кыкнамылы но Иеговаен юн кусыпъёс возьыны юрттоз шуыса? Озьы ик сузэрлы аслэсьтыз юано: нош кыӵе сямъёсы вань мынам, умой кышно луон понна? Луоз-а вераны, мон чидась но шырыт адями шуыса? Умой-а мынам Иеговаен кусыпъёсы? (Екк. 4:9, 12). Сузэр быземез бере шудо луоз-а, уз-а, герӟаськемын соин, кыӵе ужпумъёс со кутэ быземезлэсь азьло.

2. Мае ми эскеромы та статьяын?

² Картъёссылэсь кылзӥськыса, трос миллион сузэръёс умой адӟем карон возьмато. Со понна соосты туж ушъяны луэ. Ми туж шумпотӥськомы та оскымон сузэръёсынымы ӵош Иеговалы ужаны-тыршыны. Кыӵе шуг-секытъёсын соос пумиськыло? Малы кышно картэзлэсь кылзӥськыны кулэ? Озьы ик малы дышетскыны быгато картъёс но кышноос Иисус Христослэсь, Авигеялэсь но Мариялэсь, кудӥз Иосифлэн кышноез но Иисуслэн анаез вал? Ойдолэ эскеромы та куинь юанъёсты.

3. Малы вань кузпалъёс шуг-секытъёсын пумиськыло?

³ Кузпалъяськон — со Инмарлэн кузьымез, кудӥзлэн нокыӵе изъянэз ӧвӧл. Нош адямиос янгышатэк улыны уг быгато (1 Иоанн 1:8). Соин ик Инмарлэн Кылыз алэ соосты, кинъёс кузпалъясько, соослэн выль шуг-секытъёссы кылдозы шуыса (1 Кор. 7:28). Ойдолэ эскеромы куд-ог шуг-секытъёсты, кудъёсыныз пумиськыны быгатэ кышно.

4. Малы куд-ог кышноос малпало, картсылэсь кылзӥськыса, соос асьсэды ултӥяло шуыса?

⁴ Куд-ог кышноос малпало, картсылэсь кылзӥськыса, соос асьсэды ултӥяло шуыса, малы ке шуоно соос озьы пичи дырысенызы ик дышетэмын вал. Огазеяськем Штатъёсысь Марисоль сузэр вера: «Вордӥськем палъёсам малпало, кышномурт пиосмуртэн одӥг радын луыны кулэ шуыса. Мон тодӥсько, Иегова йыр луон сярысь возет сётӥз шуыса, озьы ик кышнолы зӥбыт-востэм луоно но картсэ гажано шуыса. Но куддыръя мыным картме гажаны секыт, малы ке шуоно мон котырысь адямиос мукет сямен верало».

5. Кызьы куд-ог пиосмуртъёс учко кышномуртъёс шоры?

⁵ Нош куд-ог сузэръёслэн картъёссы малпало, кышномуртъёс — со кыкетӥ сортъем адямиос шуыса. Тани мар вера Лымшор Америкаысь Ивон нимо сузэр: «Милям калыкамы нырысь пиосмуртъёс сисько, нош собере гинэ кышномуртъёс. Ӵем дыръя нылъёс пӧрасько но утялско, нош пиос шоры учко эксэйёс шоры кадь. Анайзы но, сузэръёссы но соослэсь мылпотонъёссэс быдэсъяло». Нош тани мар вера Азиысь Инлин нимо сузэр: «Ми палан верало, кышномуртлы визь но, быгатонлыкъёс но кулэ ӧвӧл шуыса. Солэн ужез — корка котырысь ужъёсты быдэсъяны но шып улыны». Карт кышноез шоры озьы учкиз ке, кышноез уз шӧды, сое ярато шуыса, но семья улон солы шумпотон уз вайы. Ассэ озьы возьыса, карт Иисуслэсь адӟем уг кары но Иеговалы ярамон уг луы (1 Пётр 3:7; Еф. 5:28, 29).

6. Мар кароно кышноослы, Иеговаен кусыпъёссэс юнматон понна?

⁶ Кызьы вераськиз ини азьвыл статьяын, Иеговалэн потэ, картъёс семьязылэсь вань кулэяськонъёссэс мед быдэсъялозы но Инмарен кусыпъёссэс юнматыны мед юрттозы шуыса (1 Тим. 5:8). Озьы ке но бызем сузэръёслы асьсэлы но котькуд нунал дыр шедьтоно, Библиез лыдӟон понна, со вылын малпаськон понна но вань сюлмысьтызы Иеговалы вӧсяськон понна. Но кышноослэн сокем трос ужъёссы, соос пӧлысь куд-огъёсыз малпаны но быгатозы: «Кытысь ваньмызлы талы дыр но кужым шедьтоно?» Озьы ке но та ужъёслы дыр шедьтыны туж кулэ. Малы? Малы ке шуоно Иеговалэн потэ, ми пӧлысь котькудӥзлэн соин юн кусыпъёсыз мед луозы шуыса (Ап. уж. 17:27).

7. Мар юрттоз кышнолы картсэ гажаны но солэсь кылзӥськыны?

⁷ Кышнолы тырбыдэстэм картэзлэсь кылзӥськыны туж ик капчи ӧвӧл, дыр. Но солы капчигес луоз Иеговалэсь та курон-косонзэ быдэсъяны, со валаз ке, малы со, Библия верамъя, картэзлэсь кылзӥськыны кулэ.

8. Малы кышно картэзлэсь кылзӥське, Ефесъёслы 5:22—24 верамъя?

⁸ Кышно картэзлэсь кылзӥське, малы ке шуоно сыӵе курон-косон солы Иегова сётӥз. (Лыдӟе Ефесъёслы 5:22—24.) Кышно тодэ, Инмар сое яратэ но, мар гинэ солэсь медам куры, со солы пайда ваёз шуыса.  Соин ик кышно инмысь Атаезлэсь дась луыса кылзӥське (К. Зак. 6:24; 1 Иоанн 5:3).

9. Кыӵе пайда вае семьялы кышнолэн картэзлэсь кылзӥськемез?

⁹ Та дуннеысь адямиос кышномуртъёслэсь мылкыдзэс ӝуто Иеговалэсь курон-косонъёссэ лыдэ басьтытэк улыны но малпаны, мукетъёсызлэсь кылзӥськыса, кышномуртъёс асьсэды ултӥяло шуыса. Зэм но, соос, кинъёс сыӵе малпанъёсты вӧлмыто, яратӥсь Инмарез нокӧня но уг тодо. Иегова яратоно нылъёссэ ноку ӧй курысал лэсьтыны сое, мар соосты ултӥясал. Сузэр, кудӥз вань кужмысьтыз тырше быдэстыны ужез, кудзэ солы Иегова сётӥз, семьяезлы огкылысь улыны юрттэ (Пс. 118:165). Та ваньмызлы пайда вае: картэзлы но, нылпиосызлы но, солы аслыз но.

10. Малы милемыз дышетэ Карол сузэрлэн верамез?

¹⁰ Тырбыдэстэм картэзлэсь кылзӥськыса, кышно возьматэ, яратэ но гажа шуыса Иеговаез, сое, кин йыр луон сярысь возетэз сётӥз. Лымшор Америкаысь Карол нимо сузэр вера: «Мон тодӥсько, картэ янгышалоз шуыса. Но мон валасько: со, кызьы мон асме возисько, куке со янгыша, возьматэ, макем мон дунъясько Иеговаен кусыпъёсме. Мынам инмысь Атайме шумпоттэме потэ бере, соин ик мон котьку тыршисько картме гажаны».

11. Мар юрттэ Анис сузэрлы картсэ простить карыны но малы со милемыз дышетэ?

¹¹ Кышнолы картсэ гажаны но солэсь кылзӥськыны секытгес луоз, со малпа ке, картэз солэсь шӧдонъёссэ но сюлмаськонъёссэ лыдэ уг басьты шуыса. Сыӵе ик шӧдонъёсыз куддыръя кылдо Анис нимо сузэрлэн но. Со вера: «Мон валасько, ваньмы ми янгышаськомы шуыса. Соин ик тыршисько йыркуръяськытэк улыны. Иегова милемыз вань сюлмысьтыз простить каре бере, мынам но солэсь адӟем кареме потэ. Со юрттэ мыным каньыл сюлмын улыны» (Пс. 85:5). Кышнолы, кудӥз простить карыны быгатэ, картэзлэсь кылзӥськыны капчигес.

12. Библиысь кыӵе примеръёс юрттозы милемлы кылзӥськыса улыны?

¹² Куд-огъёсызлэн малпамзыя, ляб адямиос гинэ кылзӥськыса уло. Но со озьы ӧвӧл.  Библиын вераське юн сямо трос адямиос сярысь, кудъёсыз мукетъёсызлэсь кылзӥськизы. Соос пӧлын Иисус, Авигея но Мария. Ойдолэ малпаськомы, малы ми соослэсь дышетскыны быгатӥськомы.

13. Малы Иисус Иеговалэсь кылзӥське? Валэктэ.

¹³ Иисуслэн адямиосты огшоры но валамон дышетэмез возьматэ, со туж визьмо шуыса. Озьы ке но со Иеговалэсь кылзӥське (Иоанн 7:45, 46). Иегова туж дунъя Пиезлэсь паймымон быгатонлыкъёссэ. Соин ик со лэзиз солы соин ӵош быдэс дунеез кылдытыны (Мад. 8:30; Евр. 1:2—4). Нош Иисуслэн улӟемез бере Иегова солы «инмын но, музъем вылын но... котькыӵе кужымез» сётӥз (Матф. 28:18). Но вань быгатонлыкъёсыз шоры учкытэк, Иисус котьку но Иеговалэсь кивалтэтсэ утча. Малы? Малы ке шуоно со Атайзэ яратэ (Иоанн 14:31).

14. Малы дышетскыны быгато картъёс: а) Иеговалэсь? б) солэсь, мар гожтэмын Мадёнъёсын книгаысь 31-тӥ люкетын?

¹⁴ Малы дышетскыны быгато картъёс. Иегова куре кышноосты картъёссылэсь кылзӥськыны. Но Инмар уг малпа, кышномуртъёс пиосмуртъёслэсь маин ке уродгес луо шуыса. Со озьы, малы ке шуоно Христосэн ӵош кивалтӥсьёс пӧлын, кудъёссэ Инмар быръе, вань кышномуртъёс но (Гал. 3:26—29). Иегова Пиезлы оске, соин ик со солы кивалтон уж сётӥз. Визьмо карт но кышноезлы маин ке кивалтыны лэзе. Инмарлэн Кылыз валэктэ: ӟеч сямо кышно быгатэ юртъер котырысь ужъёсын вырыны, музъемез басьтыны но вузаны, уж бергатӥсь но луыны. (Лыдӟе Мадёнъёсты 31:15, 16, 18.) Картлы кышноез шоры уг яра учкыны ляльчи шоры кадь, кудӥзлы номыр вераны лэземын ӧвӧл. (Лыдӟе Мадёнъёсты 31:11, 26, 27.) Карт кышнозэ гажаны но солэсь малпанъёссэ лыдэ басьтыны кулэ. Соку кышноез солэсь шумпотыса кылзӥськоз.

15. Малы дышетскыны быгато кышноос Иисуслэсь?

¹⁵ Малы дышетскыны быгато кышноос. Иисус трос паймымон ужъёс лэсьтӥз ке но, со ноку ӧз малпа, Иеговалэсь кылзӥськыса, ассэ ултӥя шуыса (1 Кор. 15:28; Флп. 2:5, 6). Озьы ик умой кышно но, кудӥз Иисуслэсь адӟем каре, уг малпа, картэзлэсь кылзӥськыса, ассэ ултӥя шуыса. Со, картсэ яратэменыз гинэ, солэсь уг кылзӥськы. Нырысь ик со яратэ но гажа Иеговаез.

16. Маин пумиськоно луиз Авигея, 1 Эксэйлыкъёслэн 25:3, 23—28 верамъя? (Учке вылбамысь суредэз.)

¹⁶ Авигея быземын вал Навал нимо пиосмуртлы. Солэн картэз ассэ гинэ яратыса улӥз, вылтӥяськись но тау карисьтэм вал. Та шоры учкытэк, Авигея Навалэн люкиськыны ӧз туртты. Кылсярысь, куке Давид но солэн ожгарчиосыз Навалэз виыны малпазы, Авигея картэз пала кариськытэк но кыльыны быгатысал. Нош со лэсьтӥз ваньзэ, мае быгатӥз, картсэ но семьязэ утён понна. Малпалэ гинэ, макем кышкасьтэм луоно вал Авигеялы, 400 ожгарчиослы пумит потон понна но Давидэн гажаса вераськон понна. Со картэзлэсь янгышсэ ас вылаз но басьтыны дась вал. (Лыдӟе 1 Эксэйлыкъёслэсь 25:3, 23—28.) Озьы ке но ваньмыз умой йылпумъяськиз. Давид валаз, Иегова та кышномурт пыр сое бадӟым янгышлэсь утиз шуыса.

17. Малы дышетскыны быгато картъёс Давидлэсь но Авигеялэсь?

¹⁷ Малы дышетскыны быгато картъёс. Авигея визьмо кышномурт вал. Туж умой, Давид солэсь кылзӥськиз шуыса, малы ке шуоно солы луыса со янгыш луисьтэм адямиосты ӧз виы. Озьы ик визьмо карт но кулэ луись ужпум кутэмезлэсь азьло кышнозэ  сак кылзэ. Соку со шонер ужпум кутыны быгатоз.

18. Малы дышетскыны быгато кышноос Авигеялэсь?

¹⁸ Малы дышетскыны быгато кышноос. Кышно, кудӥз Иеговаез яратэ но гажа, семьязэ юнматыны тырше. Солэн картэз Иеговалэн ужась-тыршисез ӧвӧл ке но яке картэзлэн Инмарен кусыпъёсыз лябӟизы ке но, Авигея сямен, сыӵе кышно люкиськыны уг туртты. Со картсэ гажа но солэсь кылзӥське, озьы ик солэсь мылкыдзэ ӝутыны тырше Иеговаен тодматскыны (1 Пётр 3:1, 2). Тыршемез шоры учкытэк, картэз Иеговалы ужаны-тыршыны ужпум уг куты ке но, сыӵе кышно вала, оскымон луэмез понна Иегова сое дунъя шуыса.

19. Кыӵе учыръёсы кышно картэзлэсь уз кылзӥськы?

¹⁹ Со дыре ик, сузэрмылэн картэз сое Библиысь возетэз яке законэз тӥяны куре ке, со солэсь уз кылзӥськы. Шуом, карт, кудӥз Иеговалэн ужась-тыршисез уг луы, кышнозэ лэсьтыны куре сое, мар Инмарез ӝоже уськытысал, кылсярысь, кинэ ке пӧяны яке мае ке лушканы. Вунэтоно ӧвӧл, вань христианъёс, озьы ик бызем сузэръёс но, нырысь ик Иеговалэсь кылзӥсько шуыса. Соин ик сузэрлэн картэз, сое Библиысь возетэз тӥяны куре ке, со солэсь уз кылзӥськы но лякытэн валэктоз, малы ассэ озьы возе (Ап. уж. 5:29).

20. Малы вераны луоз, Мариялэн Иеговаен матысь кусыпъёсыз вал шуыса?

²⁰ Мариялэн Иеговаен матысь кусыпъёсыз вал. Шӧдӥське, Священной Гожтэмез со туж умой тодӥз шуыса. Елисаветаен, Иоанн Пылатӥсьлэн анаеныз, вераськыкуз, Мария Еврей Гожтэмъёсысь малпанъёсты 20 поллэсь но тросгес вераз (Лука 1:46—55). Со сяна, малпаське на тани мар сярысь: Мария Иосифлы курамын вал ке но, Иеговалэн кылчинэз Иосифлы ӧз возьматӥськы, нош Мариялы возьматӥськиз но вераз солы, со секытэн луоз но Инмарлэсь Пизэ ваёз шуыса (Лука 1:26—33). Иегова Марияез умой тодӥз но быдэсак оскиз, со солэсь Пизэ яратоз но со сярысь сюлмаськоз шуыса. Иисуслэн кулэмез, улӟемез, озьы ик инме ӝутскемез бере но Мариялэн Иеговаен туж умой кусыпъёсыз вал, луоз (Ап. уж. 1:14).

21. Малы дышетскыны быгато картъёс Мариялэсь?

 ²¹ Малы дышетскыны быгато картъёс. Визьмо карт шумпотэ, кышноез Библиез умой тодэ шуыса. Соин сэрен со уг сюлмаськы но уг малпа, кышноез семьязылы йыр луыны турттэ шуыса. Со вала: кышноез Библиез но Библиысь возетъёсты умой тодэ ке, соку со юрттыны быгатоз семьязэс юнматыны. Кышноез тросгес дышетскемын ке но, карт кыл кутыны кулэ, семьяен йыбырттон ортчытон понна но семьязылы Иеговалы ужаны-тыршыны юрттон понна (Еф. 6:4).

22. Малы дышетскыны быгато кышноос Мариялэсь?

²² Малы дышетскыны быгато кышноос. Карт сюлмаськыны кулэ, семьяезлэн Иеговаен матысь кусыпъёсыз мед луозы шуыса. Кышно тае вала ке но, солы аслыз но осконзэ юнматыны тыршоно (Гал. 6:5). Солы дыр висъяно, ас понназ Библиез эскерон понна но со вылын малпаськон понна. Солы луыса кышно эшшо но золгес Иеговаез гажалоз но яратоз. Со сяна, со картэзлэсь шумпотыса кылзӥськоз.

23. Кышно картэзлэсь кылзӥське ке, кыӵе пайда со ваёз солы аслыз, семьяезлы но кенешлы?

²³ Ӵошатоно ке соосын, кинъёс Инмарлэн йыр луон сярысь возетэзлэсь уг кылзӥсько, кышноослы, кудъёсыз, Иеговаез яратэменызы, картъёссылэсь кылзӥсько, семьяен улон тросгес шумпотон вае. Соос егит нылъёслы но пиослы умой адӟем карон возьмато. Со сяна, соос юртто тупаса но огкылысь улыны семьяязы но, кенешын но (Тит. 2:3—5). Туннэ Иеговалэн ужась-тыршисьёсыз пӧлысь тросэз — со кышномуртъёс (Пс. 67:12). Котькудӥзлы — пиосмуртъёслы но, кышномуртъёслы но — Иегова кенешын кулэ луись уж сётӥз. Вуонояз статьяын ми эскеромы, кызьы ми пӧлысь котькудӥз аслэсьтыз ужзэ быдэсъяны быгатэ.