1, 2. Матфейлэсь 5:11 лыдэ басьтоно ке, кызьы милемлы учконо шуг-секытъёс шоры?

 ИИСУС кылзэ сётӥз, со сьӧры мынӥсьёс зэмзэ ик шудо луозы шуыса. Озьы ик, солэн верамезъя, соос шуг-секытъёсын пумиськозы (Матф. 10:22, 23; Лука 6:20—23). Ми шумпотӥськомы Иисуслэн дышетскисьёсыз луыны. Но кыӵе милям шӧдонъёсмы кылдо, куке матысьёсмы люкето милемлы Иеговалы ужаны-тыршыны, куке кивалтӥсьёс уйыло-улляло милемыз, озьы ик куке ӵош ужасьёсмы яке ӵош дышетскисьёсмы милемыз шонертэм уж лэсьтыны косо? Ми сюлмаськыны кутскиськомы, дыр.

² Тросэз адямиос, шуг-секытъёсын пумиськыса, шум уг пото. Но Инмарлэн Кылыз ӧте милемыз шумпотыны. Кылсярысь, Иаков гожтӥз, шуг-секытъёс шоры шумпотыса учконо шуыса (Иак. 1:2, 12). Иисус но дышетскисьёслы вераз: «Тӥледыз курлазы ке, уллязы ке... тӥ шудоесь». (Лыдӟе Матфейлэсь 5:11.) Мар кароно, шуг-секытъёс дыръя шумпотонмес медам ыштэ шуыса? Та юанлы валэктон сётон понна, ойдолэ учкомы Иаковлэн гожтэтысьтыз куд-ог малпанъёсты, кудъёссэ со гожтӥз огъя оскисьёсызлы. Нош нырысь ойдолэ эскеромы, кыӵе шуг-секытъёсын пумиськизы нырысетӥ даурысь христианъёс.

3. Мар луиз Иаков Иисуслэн дышетскисез луэмез бере ӝоген?

³ Иисуслэн Иаков выныз дышетскисез луэмез берегес ик Иерусалимысь христианъёсты уйылыны-улляны кутскизы (Ап. уж. 1:14; 5:17, 18). Нош Стефанэз вием бере тросэз христианъёс  карысь пегӟыса кошкизы но «Иудеялэн но Самариялэн пӧртэм палъёсаз пазьгиськоно луизы». Соос пӧлысь куд-огъёсыз Кипрозь но Антиохияозь ик вуизы (Ап. уж. 7:58—8:1; 11:19). Соос трос пӧртэм шуг-секытъёсын пумиськизы. Озьы ке но котькытын, кытчы гинэ соос медам вуэ, мылысь-кыдысь ӟеч иворез веразы. Солы луыса быдэс Рим империын кенешъёс кылдӥзы (1 Пётр 1:1). Нош азьланяз та христианъёсты эшшо но огыр-бугыр дыръёс возьмало вал.

4. Кыӵе эшшо шуг-секытъёсын пумиськизы на христианъёс нырысетӥ даурын?

⁴ Нырысетӥ даурын христианъёс трос пӧртэм шуг-секытъёсын пумиськылӥзы. Кылсярысь, асьме вакытысь 50-тӥ ар котырын Рим империысь Клавдий кивалтӥсь «вань иудейёсты Римысь кошкыны косӥз». Соин ик со христианъёс, кудъёсыз иудейёс вал, ас коркаоссэс кельтоно но мукет интые улыны кошконо луизы (Ап. уж. 18:1—3). Асьме вакытысь 61-тӥ ар котырын апостол Павел гожтӥз, вын-агайёсыз но сузэр-апайёсыз пӧлысь троссэ вань калык азьын ултӥязы, пытсэтэ пуктылӥзы но соослэсь ваньбурзэс талазы шуыса (Евр. 10:32—34). Со сяна, мукет адямиос сямен ик, христианъёс но куанер но висьыса улӥзы (Рим. 15:26; Флп. 2:25—27).

5. Кыӵе юанъёслы ми валэктонъёс шедьтомы?

⁵ Иаков гожтӥз аслэсьтыз гожтэтсэ асьме вакытысь 62-тӥ арлэсь азьвылгес. Со умой тодэ вал, кыӵе шуг-секытъёсын пумиськылӥзы вын-агайёс но сузэр-апайёс. Иегова Иаковлэсь мылкыдзэ ӝутӥз христианъёслы та гожтэтэз гожтыны, визь-кенешъёс сётон понна, кудъёсыз юрттысалзы соослы, шуг-секытъёсын пумиськыкузы но, шумпотыса улыны. Ойдолэ эскеромы Иаковлэсь гожтэтсэ но валэктонъёс шедьтомы таӵе юанъёслы: кыӵе шумпотон сярысь гожтӥз Иаков? Малы  христиан мурт шумпотонзэ ыштыны быгатэ? Кызьы визьлык, оскон но кышкасьтэм луон юртто милемлы, шуг-секытъёс шоры учкытэк, шумпотыса улыны?

6. Лукалэсь 6:22, 23 верамъя, малы христиан мурт шумпотыны быгатэ, шуг-секытъёсын пумиськыкуз но?

⁶ Тросэз малпало, адями шудо, куке солэн умой тазалыкез, трос коньдонэз но шудо семьяез вань. Но шумпотон, кудӥз сярысь гожъяз Иаков, Инмарлэн святой духезлэн емышез пӧлы пыре. Со котырысь югдуръёсын герӟаськемын ӧвӧл (Гал. 5:22). Христиан мурт шумпотэ, яке каньыл сюлмын улэ, малы ке шуоно со тодэ, Иеговалэн эрикезъя улэ но Иисус Христослэсь адӟем каре шуыса. (Лыдӟе Лукалэсь 6:22, 23; Кол. 1:10, 11.) Христиан муртлэн сюлмысьтыз шумпотонзэ ӵошатыны луэ фонарь пушкысь тылэн, кудӥзлы зор но, тӧл но кышкыт ӧвӧл. Тазалыкен яке коньдонэн герӟаськем шуг-секытъёс сэрен ми шумпотонмес ум ыштэ. Ми азьланяз но шумпотыса уломы, семьямылэн яке мукет адямиослэн мыскыллямзы но пумитъяськемзы шоры учкытэк. Куке адямиос тыршо милесьтым мылкыдмес куашкатыны, шумпотонмы эшшо но юнма. Осконмы понна шуг-секытъёсын пумиськеммы возьматэ, ми Христослэн зэмос дышетскисьёсыз луиськомы шуыса (Матф. 10:22; 24:9; Иоанн 15:20). Тӥни малы Иаков гожтӥз: «Агай-вынъёсы, пӧртэм визь сынаськонъёс улэ сюриды ке, туж шумпотэлэ» (Иак. 1:2).

7, 8. Малы шуг-секытъёс дыръя осконмы юнма?

⁷ Иаков вера эшшо одӥг муг сярысь, малы христианъёс бадӟым шуг-секытъёс пыр потыны но дась. Со вера: «Инмарлы оскондэс эскерыку, чидан вордӥське» (Иак. 1:3). Шуг-секытъёс кортэз кыдатэм кадь. Куке кортэз ӟырдато, нош собере шуак сӥято, со юнгес луэ. Озьы ик, куке ми шуг-секытъёсты чидаськомы, милям осконмы юнма. Соин ик Иаков гожтӥз: «Тӥ быдэсак дун-шектэмесь... мед луоды шуыса, тӥляд чиданды быдэс улонды ӵоже юн мед луоз» (Иак. 1:4). Куке ми адӟиськомы, кызьы шуг-секытъёс осконмес кыдато, соосын пумиськыса, ми шумпотонмес ум ыштэ.

⁸ Озьы ик аслаз гожтэтаз Иаков вера куд-ог шуг-секытъёс сярысь, кудъёсыз сэрен ми шумпотонмес ыштыны быгатӥськомы. Кыӵе со шуг-секытъёс но мар кароно соос пыр потон понна?

9. Малы милемлы визьлык кулэ?

⁹ Шуг-секыт: тӥ уд тодӥське, мар кароно. Ми валаськомы, шуг-секытъёсын пумиськыкумы, Иеговалэсь юрттэт куроно шуыса. Соку ми быгатомы кутыны сыӵе ужпумъёс,  кудъёсыз сое шумпоттозы, юрттозы милемлы солы оскымон кыльыны, озьы ик вын-агайёслы но сузэр-апайёслы пайда ваёзы. Тодон понна, кызьы асьмеды возёно но кызьы вераськоно соосын, кинъёс милемлы пумит мыно, милемлы визьлык кулэ. Но куке ми ум тодӥське, мар кароно, милям мылкыдмы куашканы но шумпотонмы ышыны быгатэ.

10. Мар кароно, визьлыко луон понна, Иаковлэн 1:5 верамъя?

¹⁰ Мар кароно: Иеговалэсь визьлык куре. Шуг-секытъёс дыръя шумпотонмес медам ыштэ шуыса, нырысь ик Иеговалэсь визьлык куроно. Сотэк шонер ужпумъёс кутыны уг луы. (Лыдӟе Иаковлэсь 1:5.) Но мар кароно, ми малпаськомы ке, Инмар вӧсяськеммылы соку ик ответ уг сёты шуыса? Висъялэ саклыктэс: Иаков гожтӥз, «Инмарлэсь мед куроз» шуыса. Иегова вожзэ уг потты, куке ми выльысь но выльысь солэсь визьлык куриськомы. Сое куреммы понна со милемыз ноку уз пыкылы. Куке ми, шуг-секытъёсты чидан понна, инмысь Атаймылэсь визьлык куриськомы, со жалятэк милемлы сое сётэ (Пс. 24:12, 13). Со адӟе, кыӵе шуг-секытъёсын ми пумиськиськомы, милемыз жаля но милемлы юрттэмез туж потэ. Зэм но, та милемыз шумпоттэ! Но кызьы Иегова милемлы визьлык сётэ?

11. Мар эшшо кароно на, визьлыко луон понна?

¹¹ Иегова милемлы визьлык сётэ аслаз Кылыз пыр (Мад. 2:6). Визьлыко луон понна, милемлы эскероно Инмарлэсь Кылзэ но со вылэ пыкиськыса гожтэм публикациосты. Но тодон-валанъёсты люкам сяна, милемлы Инмарлэсь кылъёссэ улонамы пыртоно. Иаков гожтэ: «Инмар кылэз быдэсъяса улэ» (Иак. 1:22). Ми Инмарлэсь визь-кенешъёссэ уже кутӥмы ке, соку эшшо но умойгес быгатомы адямиосын тупаса улыны, лякытэсь но гажась-жалясесь луыны (Иак. 3:17).  Та сямъёс юртто милемлы, шумпотонмес ыштытэк, котькыӵе шуг-секытъёс пыр потыны.

12. Малы туж кулэ Библиез умой тодыны?

¹² Библия синучкон выллем. Со юрттэ тырмымтэосмес адӟыны но соосты тупатыны (Иак. 1:23—25). Шуом, Инмарлэсь Кылзэ эскерыса, тӥ валады, тӥледлы асьтэды кияды кутыны дышетсконо шуыса, малы ке шуоно тӥ ӝог пурӟиськоды. Инмарлэн юрттэменыз, тӥ дышетскиськоды асьтэды лякыт возьыны, куке кин ке яке мар ке тӥлесьтыд вождэс поттэ. Солы луыса тӥ быгатӥськоды умой малпаськыны, шонер ужпумъёс кутыны но шуг-секытъёс пыр потыны (Иак. 3:13). Зэм но, туж кулэ Библиез умой тодыны!

13. Малы милемлы малпаськоно Библиысь примеръёс вылын?

¹³ Куддыръя ми дышетскиськомы ас янгышъёсмы вылын. Но со секыт дышетскон амал. Умойгес луоз дышетскыны мукет адямиослэн умой но урод ужъёссы вылын. Соин ик Иаков милесьтым мылкыдмес ӝутэ малпаськыны Авраам, Раав, Иов но Илия сярысь (Иак. 2:21—26; 5:10, 11, 17, 18). Иеговалэн та оскымон ужась-тыршисьёсыз шуг-секытъёссы пыр потыны быгатӥзы но шумпотонзэс ӧз ыштэ. Соин ик, Иеговалэн юрттэменыз, ми но быгатомы Иеговалы оскымон кыльыны.

14, 15. Малы милемлы мар ке но кароно, осконмы медаз лябӟы шуыса?

¹⁴ Шуг-секыт: тӥ зэмлыклы туж ик уд оскиське. Куддыръя ми ум валаське Библиысь куд-ог малпанъёсты. Яке Иегова вӧсяськеммылы ответ уг сёты, вылды, озьы, кызьы ми возьмамы вал. Осконмес ӧм юнматэ ке, Иеговаен кусыпъёсмы лябӟыны быгато (Иак. 1:7, 8). Со сяна, вуоноезлы оскемысь но дугдыны быгатомы.

¹⁵ Апостол Павел вуоноезлы осконмес ӵошатӥз якорен (Евр. 6:19). Зарезь вылын кужмо сильтӧл дыръя якорь кораблез интыяз возьыны юрттэ, со бадӟым изъёс борды медаз шуккиськы шуыса. Но якорь юрттоз соку гинэ, куке солэн жильыез юн. Кызьы жильы сыномыса сисьмыны быгатэ, озьы ик ми но, куд-ог зэмлыкъёслы туж ик ум ке оскиське, Инмарлы осконмы лябӟыны быгатэ. Сыӵе адями, шуг-секытъёсын пумиськыкуз, оскемысь дугдыны быгатэ, Иегова кылсётонъёссэ быдэстоз шуыса. Нош соку со вуоноезлы осконзэ но ыштоз. Кызьы вера Иаков, сыӵе адями «тӧлын ӝуткам но пазяськыса улӥсь зарезь тулкымлы укша» (Иак. 1:6). Солы шумпотыса улыны капчи ӧвӧл.

16. Мар кароно, осконмы лябӟыны кутскиз ке?

¹⁶ Мар кароно: оскондэс юнматэ. Та ужез берлолы эн кельтэ. Илия пророк улон нуналъёсы Иеговалэн калыкезлэн осконэз лябӟыны кутскиз. Илия израиль калыклы вераз: «Кема-а кык пыдыныды но чутыса ветлоды на? Кузё-Инмар — Инмар ке, Со сьӧры мынэ, нош Ваал ке инмар, соку со сьӧры мынэ» (3 Экс. 18:21). Осконды лябӟыны кутскиз ке, ӝегатскытэк мар ке но кароно. Эскерон ортчытэ. Соку тӥ валалоды, Иегова — зэмос Инмар, Библия — солэн Кылыз, нош Иеговалэн Адӟись-Ивортӥсьёсыз — солэн калыкез шуыса (1 Фес. 5:21). Та юрттоз оскондэс юнматыны. Кулэ ке, тӧроослэсь юрттэт куре. Иеговалы шумпотыса ужан-тыршон понна, тырше ӝоггес оскондэс юнматыны!

17. Мар луоз, ми кышкасьтэм ӧм луэ ке?

¹⁷ Шуг-секыт: тӥляд мылкыдды лябӟиз. Инмарлэн Кылаз гожтэмын: «Шугадӟон нуналэ ляблыко луид ке, соку начар тынад кужымед» (Мад. 24:10). Еврей кыл, кудӥз татын «ляблыко луыны» шуыса берыктэмын, озьы ик возьматэ кышкасьтэм луэмысь дугдэмез. Нош ми кышкасьтэм ӧм луэ ке, шумпотонмес соку ик ыштомы.

18. Кызьы ассэ возе шуг-секытъёсты чидась адями?

 ¹⁸ Мар кароно: Иеговалы оске, со тӥледлы кышкасьтэм луыны юрттоз шуыса. Милемлы кышкасьтэм луоно, шуг-секытъёсты чидан понна (Иак. 5:11). Кыл, кудӥз Иаковлэн гожтэтаз «чидан» шуыса берыктэмын, вера адями сярысь, кудӥз, номыр шоры учкытэк, одӥг интыяз сылэ. Син азе пуктыны луоз кышкасьтэм ожгарчиез, кудӥз, тушмонэз со вылэ урдскыку, аслэсьтыз интызэ уг кельты но берлань уг чигна.

19. Кыӵе адӟем карон возьматӥз милемлы апостол Павел?

¹⁹ Апостол Павел туж умой адӟем карон возьматӥз, кызьы кышкасьтэм но чидась луоно. Куддыръя со но лябӟе вал. Но Павел быгатӥз ваньзэ чиданы, малы ке шуоно оскиськиз Иеговалы, кудӥз солы тырмыт кужым сётӥз (2 Кор. 12:8—10; Флп. 4:13). Юн но кышкасьтэм луон понна, зӥбыт-востэмен валано, милемлы Иеговалэн юрттэтэз кулэ шуыса (Иак. 4:10).

20, 21. Малы ми юн оскыны быгатӥськомы?

²⁰ Ми оскиськомы, шуг-секытъёс, кудъёсыныз пумиськиськомы, Иегова бордысь уг пото шуыса. Иаков гожтэ: «Визь сынаськон лыктыку нокин но медаз шуы: „Инмар визьме сына“. Нокыӵе но урод ужлэн Инмарлэсь визьзэ сынамез уг луы, Инмар Ачиз но нокинлэсь визьзэ уг сына» (Иак. 1:13). Ми талы оскиськомы ке, соку яратӥсь инмысь Атаенымы кусыпъёсмы эшшо но юнгес луозы (Иак. 4:8).

²¹ Иегова уг вошъяськы (Иак. 1:17). Со нырысетӥ даурысь христианъёслы юрттӥз бере, ми пӧлысь котькудмылы но юрттоз. Сюлмысь вӧсяське Иеговалы, визьлык, оскон но кышкасьтэм сям курыса. Со одно ик тӥледлы юрттоз. Соку тӥ юн оскоды, кыӵе гинэ шуг-секытъёсын медад пумиське, тӥ шумпотондэс уд ыштэ шуыса!