Мон вордӥськи 1941-тӥ арын Париж карын. Милям семьямы узыр ӧй вал. Мыным туж кельше вал дышетскыны. Но 10 арес дыръям мон туберкулёзэн висьыны кутски но школае ветлыны ӧй быгаты ни. Соин сэрен мынам мылкыды туж куашказ. Тыосме утён понна, эмъясьлэн верамезъя, мон кӧня ке толэзьёс ӵоже кылльыса улӥ. Соку мон словарьёсты лыдӟылӥ но Парижысь университетлэсь радиопередачаоссэ кылзылӥ. Куке эмъясьёс веразы, мон бурми но дышетскыны быгатӥсько шуыса, шумпотэменым мон вӧлдэтозь ик тэтчай. «Эмъясьёс паймымон ужъёс лэсьтыны быгато!» — малпай мон. Соку мынам мылкыды кылдӥз адямиосты эмъяны. Куке атае юа вал, кин мынам луэме потэ, мон котьку вералляй: «Эмъясь». Со дырысен мынам валтӥсь ужпуме вал — адямиосты эмъяны.

Мынам анай-атае асьсэды католикъёсын лыдъязы. Мон Инмар сярысь трос ӧй тоды. Тросэзлы юанъёсылы валэктонъёс ӧй вал. Университетысь эмъянъя факультетэ пырем берам гинэ мон валай, улон кылдытэмын вал шуыса.

Тодӥсько на, кызьы мон нырысьсэ микроскоп пыр учки тюльпанлэсь лулпырызэ. Монэ туж паймытӥз, кызьы со ассэ возе пӧсь но кезьыт дыръя. Мон чаклай, кызьы цитоплазма (лулпыры пушкысь вещество) сылало вуын пичи луэ, нош чылкыт вуын выльысь бадӟыма. Та но мукет быгатонлыкъёссылы луыса улэп макеос вошъяськись югдуръёслы дышыны быгато. Котькуд пичи лулпыры туж паймымон кылдытэмын! Мон валаны кутски, улон ас понназ ӧз кылды шуыса.

 Кыкетӥ курсын мон эшшо но умойгес адӟи, Инмар вань шуыса. Тодӥсько на, анатомияя урокъёсын ми дышетӥмы адямилэсь суйзэ но сое, кызьы со чиньыосты выртыны юрттэ. Туж паймымон, кызьы суйбыгытъёс но сӥныръёс ог-огенызы герӟаськемын! Кылсярысь, одӥгез сӥныр суйысен чиньыозь кыстӥське. Со кыклы люкиське. Со ултӥ ортче мукет сӥныр, кудӥз гижыозь кыстӥське. Сӥныръёс туж юн возисько лыос бордын. Озьы ӧй луысал ке, чиньыос пукыӵ кадь куасалскысалзы, нош сӥныръёс кыстӥськыса улысалзы. Мон туж умой валай, адямилэсь мугорзэ визьмо Кылдытӥсь малпаз шуыса!

Эшшо но золгес Кылдытӥсь монэ паймытӥз, куке мон тодӥ, кызьы нылпи вордӥськем бераз шоканы кутске. Дышетӥсьёсмы валэктӥзы, вордӥськемезлэсь азьло нылпи гогыез пыр кислород анаезлэсь басьтэ шуыса. Со дыре альвеолаосын (тыосысь пичиесь пульыосын) омыр ӧвӧл на. Нылпилэн вордӥськемезлэсь кӧня ке арняослы азьлогес альвеолаос пушласянь шобырско нимысьтыз веществоен, кудзэ сурфактант шуо. Нылпи вордӥськем бере, куке со нырысьсэ шокче, солэн мугорыз мукет сямен ужаны кутске. Али вордӥськем нунылэн сюлмысьтыз пасез пытсаське но, вир тыосы мыныны кутске. Со дыре сурфактантлы луыса альвеолаос уг лякисько, соос ӝог омырен тырмо. Кӧня ке дыр куспын гинэ нуны ачиз шоканы кутске!

Мынам тросгес тодэме потэ вал со сярысь, кин вань та паймымон ужъёсты кылдытӥз. Соин ик мон Библиез малпаськыса лыдӟыны кутски. Монэ паймытӥзы тазалыкез утён сярысь законъёс, кудъёссэ Инмар аслаз калыкезлы ог 3 000 ар талэсь азьло сётӥз. Кылсярысь, израиль калыклы кулэ вал педло потамзэ сюен ӵоксаны, ялан мисьтӥськыны но мукетъёслэсь висъяны соосты, кинъёслэн паласькись висёнзы вал (Лев. 13:50; 15:11; К. Зак. 23:13). Озьыен, Библия азьло ик вераз, кызьы вӧлмо висёнъёс. Нош тодосчиос та сярысь кык дауръёс талэсь азьло гинэ тодӥзы. Со сяна, мон саклыкме висъяй Левит книгаысь законъёслы, кудъёсаз вераське ӵош кӧлан но чылкытатӥськон сярысь (Лев. 12:1—6; 15:16—24). Та законъёслы луыса калыклэн тазалыкез умой вал. Мон валай: Кылдытӥсь та законъёсты израиль калыклы сётӥз, малы ке шуоно соос сярысь сюлмаськиз но та законъёс калыклы пайда вайизы. Мон адӟи: Библия гожтэмын вал Инмарлэн кивалтэмез улсын, кудӥзлэсь нимзэ мон соку уг тодӥськы на вал.

Университетын дышетскыкум, мон тодматски туж чебер Лиди нимо нылашен но яратӥ сое. 1965-тӥ арын, куке мон дышетскисько на вал, ми кузпалъяськимы. 1971-тӥ арын милям куинь нылпиосмы вал ини. Берлогес милям эшшо куинез вордӥськизы. Лиди котьку но мыным умой юрттӥськыса улӥз, кызьы семьяын, озьы ик уж дорам.

Мон куинь ар эмъяськонниын ужай. Собере аслэсьтым эмъяськонниме усьтӥ. Ӝоген мон доры эмъяськыны лыктӥзы кузпалъёс, кудъёсыз сярысь мон верай вал ини. Куке мон  картэзлы гожтӥ, кыӵе эмъюм солы юоно, кышноез куриз: «Туж курисько тӥледыз, эмъюмын вирез медаз луы вал». Мон пайми: «Кызьы? Малы?» Со валэктӥз: «Ми Адӟись-Ивортӥсьёс». Нош соку мон номыр но уг тодӥськы на вал Адӟись-Ивортӥсьёс сярысь но соослэн вир шоры учкемзы сярысь. Соку кышномурт Библизэ поттӥз но валэктӥз мыным, малы соос картэныз вирез уже уг куто (Ап. уж. 15:28, 29). Собере соос валэктӥзы, кыӵе луоз улон Инмар Эксэйлыклэн кивалтэмез улсын: уз луэ ни курадӟонъёс, висёнъёс но кулон (Усьт. 21:3, 4). Ӵапак соку ик мон кеськи: «Зэм-а?! Мон пичи дырысеным ик та сярысь малпаськисько ук! Мон эмъясь луи, малы ке шуоно адямиослэсь курадӟонъёссэс капчиятэме потэ вал». Мыным сокем кельшиз вераськонмы, мон ӧй но шӧды, кызьы одӥг но ӝыны час ортчиз. Вераськонмы бере мон валай, католик луэме уг поты ни шуыса. Со сяна, мон тодӥ, Кылдытӥсьлэн, кудӥз монэ туж паймытӥз, Иегова нимыз вань шуыса!

Со Адӟись-Ивортӥсьёсын аслам эмъяськонниям мон эшшо куинь пол пумиськылӥ на. Ми часлэсь ӧжытгес ӧм вераськылэ. Библия сярысь пыр-почгес вераськон понна, мон соосты ас дорам ӧти. Лиди милемын ӵош Библиез дышетыны соглаш кариськиз вал, кадь. Нош солэн соглаш луэмез ӧз поты, католикъёс шонертэм дышето шуыса. Соин ик мон ас дорамы священникез ӧти но кури вераськыкумы Библиез гинэ уже кутыны. Ми бер уйинозь вераськимы. Со ӝытэ Лиди умой валаз, Иеговалэн Адӟись-Ивортӥсьёсыз гинэ зэмлыклы дышето шуыса. Со дырысен ми Иеговаез эшшо но золгес яратыны кутскимы но 1974-тӥ арын пылатӥськимы.

Инмарлэн малпанъёсыз сярысь тодэме бере мынам улонэ быдэсак воштӥськиз. Иеговалы ужан-тыршон милям улонамы валтӥсь инты басьтыны кутскиз. Ми пиналъёсмес дышетӥмы Инмарез но мукет адямиосты яратыны. Солы луыса милям семьямы юнмаз (Матф. 22:37—39).

Милям нылпиосмы тодӥзы, атайзы но анайзы огкылысь ужало шуыса. Озьы ик соос валазы, семьяямы котьку но таӵе кылъёсъя уло шуыса: «Тӥляд кылды „озьы, озьы“, „ӧвӧл, ӧвӧл“ гинэ мед луоз» (Матф. 5:37). Кылсярысь, одӥг пол таӵе учыр луиз. Куке бадӟымез нылмылы 17 арес вал, Лиди сое эшъёсыныз  шутэтскыны ӧз лэзьы. Соку одӥгез эшез солы шуиз: «Анаед уг лэзьы бере, атаедлэсь юа». Нош нылмы солы вераз: «Номыр уз пӧрмы. Соос огкылысь ужало». Вань куать нылпиосмы ик адӟизы, Библиысь возетъёс милемыз огазеяло шуыса. Ми туж шумпотӥмы, семьяысьтымы тросэз Иеговалы ужаны-тыршыны кутскизы шуыса.

Зэмлык мынэсьтым улон шоры учконме воштӥз ке но, эмъяськонэз яратэмысь мон ӧй дугды. Мынам потэ вал Инмарлэн калыкезлы юрттэме. Соин ик мон аслэсьтым юрттэтме ӵектӥ Франциысь Вефильлы, кудӥз со дыре интыяськемын вал Парижын, нош берлогес Лувье карын. 50 ар ӵоже ини мон Вефильлы юрттӥськыса улӥсько. Та дыр ӵоже мон отын тросэныз матысь эшъяськыны кутски. Соос пӧлысь куд-огъёсызлы али 90 ареслэсь но тросгес ини. Одӥг пол мон туж пайми, куке тодматски Вефильысь егит ужась-тыршисен, кудӥныз ми адӟиськимы вал ини. 20 ар талэсь азьло, со вордӥськыку, мон акушер вал!

Та аръёс ӵоже мон трос пол адӟылӥ, кызьы Иегова аслаз организациез пыр ужась-тыршисьёсызлы ас дыраз кивалтэт сётылӥз но соосты утьылӥз. Тае адӟыса, мон Иеговаез эшшо но золгес яратыны кутски. Кылсярысь, 1980-тӥ аръёслэн кутсконазы Кивалтӥсь кенеш Огазеяськем Штатъёсын нимысьтыз программаез пыртӥз. Со юрттӥз Иеговалэн Адӟись-Ивортӥсьёсызлы но эмъясьёслы ог-огзэс эшшо но умойгес валаны.

Собере 1988-тӥ арын Кивалтӥсь кенеш Вефильын кылдытӥз выль отдел — эмъяськон сярысь ивортӥсь служба. Нырысь та отдел Огазеяськем Штатъёсын эмъюртъёсын герӟаськонъя комитетъёслэсь ужзэс чаклаз. Соос юрттыны кулэ вал Адӟись-Ивортӥсьёслы шедьтыны эмъясьёсты, кудъёсыз дась луысалзы соосты тупась амалэн эмъяны. Берлогес сыӵе комитетъёс быдэс дунне вылын кылдӥзы, озьы ик Франциын но. Монэ туж паймытэ, макем яратыса Иеговалэн организациез сюлмаське вын-агайёс но сузэр-апайёс сярысь, кудъёсызлы эмъяськыны юрттэт кулэ.

Мон эмъяськонэз яратӥсько вал ке но, дыр ортчыса валай: тужгес но валтӥсез — юрттыны адямиослы тодматскыны но эшъяськыны Иегова Инмарен, Улонэз сётӥсен. Пенсие потэм берам ми Лидиен пионеръёс луыса ужаны-тыршыны кутскимы но трос дырмес висъяськомы Инмарлэн Эксэйлыкез сярысь ӟеч иворез тодытонлы. Ми али но быгатэммыя улонэз утись уже пыриськиськомы.

Мон азьло сямен ик адямиосты эмъясько ке но, валасько, соосты огдырлы гинэ эмъяны быгатӥсько шуыса, малы ке шуоно самой умой эмъясьёс но уг быгато вормыны вань висёнъёсты, уката ик кулонэз. Соин ик мон ӵыдытэк витисько со дырез, куке вӧсь луон но, висёнъёс но, кулон но уз луэ ни. Ӝоген та дыр вуоз. Соку мон пырак дауръёс ӵоже быгато пыр-поч эскерыны Инмарлэсь кылдытэмъёссэ, озьы ик адямилэсь мугорзэ но. Зэм, пичи дырысьтым малпанъёсы быдэсмыны кутскизы ини, но мон оскисько: самой умоез азьпалан на!