ВАШКАЛА дыръёсы кузпалъяськыкузы выль кенлэн семьяезлы дун тыризы. Сёто вал дуно арбериосты, пудо-животъёсты яке коньдон. Озьы ик выль кен понна эмеспи кыӵе ке ужъёсты но быдэсъяны быгатӥз. Кылсярысь, Иаков Рахиль понна сизьым ар ужаз (Ул.-выл. 29:17, 18, 20). Со Рахильлэн атаезлэсь ыж уллёзэ возьмаз. Малы израиль калыкын таӵе сям-йылолзы вал?

Одӥг тодосчилэн верамезъя, «Вашкала Израильын эмеспи выль кенлэн атаезлы дун тыриз семьяысьтызы ужась адямизэс басьтэмез понна» a. Со дыре израиль калык музъем ужен выриз. Соин ик соослы ужась адями кулэ вал. Озьы ик та сям-йылол эмеспилэсь но выль кенлэсь семьяоссэс огазеяз. Секыт дыръёсы та семьяос ог-огзылы юрттыны быгатӥзы. Со сяна, выль кен понна дун тырон возьматӥз, нылмурт курамын но табере со сярысь, атаез интые, картэз сюлмаськоз шуыса.

Израиль калыкын кышномурт шоры ӧз учке кыӵе ке арбери шоры кадь, кудзэ дунэн басьтыны яке вузаны луэ. Кызьы вераське одӥг энциклопедиын, «малпано ӧвӧл, израиль калыкысь пиосмуртъёс асьсэлы кышно дунэн басьто вал шуыса» b. Одӥг паласен учкыса, выль кен понна дун тырон кельше вал кыӵе ке арбериез басьтонлы. Нош Боб Атли тодосчи вера: «Со выль кенэз коньдонэн басьтон ӧй вал. Дун тыро вал, выль кенлэн семьяез ужась адямизэс ыштэ шуыса» c.

Куд-ог шаеръёсын таӵе сям-йылол али но вань. Мае лыдэ басьтоно христиан луись анай-атайёслы, куке соос нылзы понна дун куро? Уже кутыны луоз Библиысь таӵе возетэз: «Вань адямиос мед адӟозы, тӥ лякыт сюлэмоесь шуыса» (Флп. 4:5; 1 Кор. 10:32, 33). Лякыт сюлэмоесь анай-атайёс нылзы понна укыр бадӟым дун уз куре. Соослэн уг поты «коньдонэз гинэ яратӥсесь» луэмзы (2 Тим. 3:2). Со сяна, анай-атайёс нылзы понна укыр бадӟым дун куризы ке, эмеспилы тырмыт коньдон кема люкано луоз но сюанзы берлолы кылёз. Выль кенлэн анай-атаезлэн уг поты, вуоно эмеспизы, тырмыт коньдон ӝоггес люкан понна, пионер луэмысь мед дугдоз но быдэс нунал мед ужалоз шуыса.

Куке кыӵе ке шаерын кивалтӥсьёс куро выль кен понна дун тырыны, христиан луись анай-атайёслы та катлэсь кылзӥськоно. Малы? Малы ке шуоно Библия христианъёсты куре «вылӥ властьёслы-кивалтӥсьёслы тэрытскись» луыны, соослэн катъёссы Инмарлэн курон-косонъёсызлы пумит уг мыно ке (Рим. 13:1; Ап. уж. 5:29).