1. Малы милемлы кылзӥськоно Иеговалэсь, Сюрес Возьматӥсьмылэсь?

 ПУКТЭ син азяды, тӥ бадӟым нюлэскын йыромиды шуыса. Котькытын пӧйшуръёс, ядо нымы-кибыос но мур нюкъёс. Тӥ туж шумпотысалды, тӥледын луысал ке адями, кудӥз умой тодэ, кызьы сыӵе кышкыт интыын улэп кылёно. Та дуннеез сыӵе нюлэсэн ӵошатыны луэ. Та дуннеын трос кышкытлыкъёс, кыдъёсыныз сэрен Иеговаен кусыпъёсмы сӧриськыны быгато. Но милям вань самой умой Сюрес Возьматӥсьмы — Иегова. Со милемыз уте но выль дуннее нуэ.

2. Кызьы милемыз нуэ Иегова?

² Кызьы Иегова милемыз нуэ? Нырысь ик, аслаз Кылыз, Библия, пыр. Озьы ик со милемыз нуэ адямиос пыр, кылсярысь, «оскиськымон, визьмо ляльчи» пыр. Та ляльчи духовной сиён сётэ, кудӥз юрттэ милемлы шонер ужпумъёс кутыны (Матф. 24:45). Со сяна, Иегова кивалтэ милемын мукет пиосмуртъёс пыр но, кылсярысь, ёросэз чакласьёс но тӧроос пыр. Соос милемыз юнмато но визь-кенешъёс сёто, кудъёсыз юртто шуг-секытъёсмес сэрттыны-пертчыны. Ми туж тау кариськомы, та берпум нуналъёсы оскиськымон визь-кенешъёс шедьтыны быгатӥськомы шуыса! Соос милемлы юртто Иеговаен кусыпъёсмес утьыны но улон сюрес вылтӥ мыныны.

3. Мае ми эскеромы та статьяын?

³ Озьы ке но Иеговалэсь кылзӥськыны котьку ик капчи  ӧвӧл, тужгес но, куке со тырбыдэстэм адямиос пыр кивалтэ. Малы? Малы ке шуоно куддыръя соослэн верамзы милемлы уг кельшы яке, ми малпамъя, соослэн визь-кенешъёссы шонертэмесь но Иегова дорысь уг пото. Соку туж кулэ юн оскыны, та визь-кенешъёсты Иегова сётэ но соос милемлы котьку пайда ваё шуыса. Иеговалы осконмес юнматон понна, ми эскеромы: 1) кызьы Инмар нуиз аслэсьтыз калыксэ вашкала дыръёсы, 2) кызьы со нуэ милемыз туннэ но 3) малы солэсь котьку кылзӥськыны кулэ.

КЫЗЬЫ ИЕГОВА НУИЗ ИЗРАИЛЬ КАЛЫКЕЗ

4, 5. Кызьы Иегова возьматӥз, калыкеныз Моисей пыр кивалтэ шуыса? (Учке вылбамысь суредэз.)

⁴ Иегова Моисеез пуктӥз израиль калыкез Египетысь поттыны. Инмар возьматӥз калыклы, Моисей пыр со ачиз кивалтэ шуыса. Кылсярысь, нуназе соос пилем юбоез адӟизы, нош уйин — тыл юбоез (Пот. 13:21). Моисей мынӥз юбо сьӧры, кудӥз соосты Горд зарезь дуре вуттӥз. Нош куке адямиос адӟизы, азьпалазы — зарезь, нош беразы — соос сьӧры уйиськись египет ожгарчиос шуыса, соос туж кышказы. Израиль калык малпаз, соосты зарезь дуре вуттыса, Моисей янгышаз шуыса. Но нокыӵе янгыш ӧй вал. Иеговалэн потэ вал, Моисей соосты ӵапак отчы мед вуттоз шуыса (Пот. 14:2). Собере Инмар израиль калыкез паймымон амалэн утиз (Пот. 14:26—28).

⁵ Моисей юн оскиз, 40 ар ӵоже луоё кыр дуннеетӥ ветлыкузы, Иегова аслаз калыкезлы пилем юбо пушкысен сюрес возьматылӥз шуыса a. Кӧня ке дыр ӵоже со юбо Моисейлэн скинияез вылын сылэ вал, нош быдэс калык сое адӟе вал (Пот. 33:7, 9, 10). Иегова Моисеен юбо пушкысен вераськиз, нош Моисей Иеговалэсь кылъёссэ калыклы вералляз (Пс. 98:7). Израиль калык адӟиз, Иегова соосын Моисей пыр кивалтэ шуыса.

6. Кылзӥськиз-а израиль калык Иеговалэн кивалтэмезлэсь? (Лыдпусъёс 14:2, 10, 11).

⁶ Жаляса верано луэ, израиль калык пӧлысь тросэз ӧз оске, Моисей пыр Иегова кивалтэ шуыса. (Лыдӟе Лыдпусъёсты 14:2, 10, 11.) Соин ик Инмар соослы ӧз лэзьы Сӥзем музъеме пырыны (Лыд. 14:30).

7. Кин Иеговалэсь кылзӥськиз? (Лыдпусъёс 14:24). (Озьы ик учке суредэз.)

⁷ Но израиль калык пӧлысь куд-огъёсыз Иеговалэсь кылзӥськизы. Кылсярысь, Инмар вераз, Халев солэсь кылзӥськиз шуыса. (Лыдӟе Лыдпусъёсты 14:24.) Иегова сое бакель кариз но аслыз бырйыны лэзиз Ханаанысь музъем люкетэз (Иис. Н. 14:12—14). Со сяна, луоё кыр дуннеын кулэм израиль калыклэн нылпиосыз но умой адӟем карон возьматӥзы. Соос Иеговалэсь кылзӥськизы. Куке Моисей интые Иисус Навин пуктэмын вал, соос сое гажаса, «солэсь кышкаса улыны кутскизы» (Иис. Н. 4:14). Соин ик Иегова соосты бакель кариз но Сӥзем музъеме пыртӥз (Иис. Н. 21:43, 44).

8. Валэктэ, кызьы Иегова кивалтӥз аслаз калыкеныз, эксэйёс кивалтон вакытэ. (Озьы ик учке суредэз.)

⁸ Берлогес Иегова аслаз калыкеныз судьяос пыр кивалтӥз. Собере, эксэйёс кивалтыку, Инмар пророкъёс пыр кивалтӥз. Инмарлы оскымон эксэйёс пророкъёслэсь кылзӥськизы. Кылсярысь, Давид эксэй Нафан пророклэсь кылзӥськиз (2 Экс. 12:7, 13; 1 Пар. 17:3, 4). Иосафат эксэй Иозиил  пророклы ачиз но оскиз, Иудеяын улӥсьёсты но ӧтиз Инмарлэн пророкъёсызлы оскыны (2 Пар. 20:14, 15, 20). Туж секыт югдуре сюрыса, Езекия эксэй Исаия пророклы вазиськиз (Ис. 37:1—6). Куке эксэйёс Иеговалэсь кылзӥсько вал, со соосты бакель каре вал но калыксэ уте вал (2 Пар. 20:29, 30; 32:22). Ваньзы валаны кулэ вал, Иегова аслаз калыкеныз пророкъёс пыр кивалтэ шуыса. Озьы ке но тросэз эксэйёс, озьы ик кивалтэмзы улсын улӥсьёс но, Иеговалэн пророкъёсызлэсь ӧз кылзӥське (Иер. 35:12—15).

КЫЗЬЫ ИЕГОВА НУИЗ НЫРЫСЕТӤ ХРИСТИАНЪЁСТЫ

9. Кызьы Иегова кивалтӥз нырысетӥ христианъёсын? (Озьы ик учке суредэз.)

⁹ Асьме вакытысь нырысетӥ даурын Иегова христиан кенешез кылдытӥз. Кызьы со соин кивалтӥз? Инмар Иисусэз кенешлы йыр карыса пуктӥз (Еф. 5:23). Но Иисус котькуд дышетскисезлы ӧз вера, мар солы карыны кулэ. Со дышетскисьёсыныз кивалтӥз Иерусалимысь апостолъёс но тӧроос пыр (Ап. уж. 15:1, 2). Озьы ик котькуд кенешын тӧроос пуктэмын вал (1 Фес. 5:12; Тит. 1:5).

10. а) Кылзӥськизы-а нырысетӥ христианъёс курон-косонъёслэсь? (Апостолъёслэн ужъёссы 15:30, 31). б) Малы вашкала дыръёсы куд-огъёсыз ӧз кылзӥське адямиослэсь, кудъёсыз пыр Инмар аслаз калыкеныз кивалтӥз? (Учке « Малы куд-огъёсыз ӧз оске, Инмар адямиос пыр кивалтэ шуыса» рамкаез.)

¹⁰ Кылзӥськизы-а нырысетӥ христианъёс курон-косонъёслэсь? Тросэз дась луыса кылзӥськизы. Кылсярысь, куке дышетскисьёс тодӥзы, кыӵе ужпум кутӥзы Иерусалимысь агайёс, соос шумпотӥзы. (Лыдӟе Апостолъёслэсь ужъёссэс 15:30, 31.) Нош кызьы Иегова кивалтэ аслаз калыкеныз туннэ?

КЫЗЬЫ ИЕГОВА НУЭ МИЛЕМЫЗ ТУННЭ

11. Кызьы Иегова кивалтӥз аслаз калыкеныз адямиос пыр берло дыръёсы? Вералэ пример.

¹¹ Иегова кивалтэ аслаз калыкеныз туннэ но. Со милемыз нуэ аслаз Кылыз но Пиез пыр, кудзэ кенешлы йыр карыса пуктӥз. Нош мар ке но возьматэ-а, Иегова аслаз калыкеныз адямиос пыр но кивалтэ шуыса? Возьматэ. Кылсярысь, эскеромы, мар луиз  XIX даурлэн пумаз. Чарлз Тейз Расселл но солэн эшъёсыз валаны кутскизы, Инмарлэн Эксэйлыкез понна 1914-тӥ ар — нимысьтыз ар луоз шуыса (Дан. 4:22, 23). Соос таӵе малпанэ вуизы, малы ке шуоно Библиез эскеризы но Библиысь азьпалзэ ивортонъёслы оскизы. Юрттӥз-а соослы Иегова зэмлыкез шедьтыны? Одно ик юрттӥз! 1914-тӥ арын кутскиз Нырысетӥ дунневыл ож. Собере урод черъёс, музъем зурканъёс но сютэм аръёс кутскизы. Таӵе югдур возьматӥз, 1914-тӥ арын Инмарлэн Эксэйлыкез кивалтыны кутскиз шуыса (Лука 21:10, 11). Татысь адӟиське, Иегова та пиосмуртъёс пыр аслаз калыкезлы юрттӥз шуыса.

12, 13. Мар лэсьтэмын вал Кыкетӥ дунневыл ож дыръя, тодытон но дышетскисьёсты дасян ужез паськытатон понна?

¹² Со сяна, тодамы ваёмы, мар луиз Кыкетӥ дунневыл ож дыръя. Валтӥсь кивалтонниысь агайёс эскеризы азьпалзэ ивортонэз, кудӥз гожтэмын Усьтӥськонын 17:8. Соос валазы, Кыкетӥ дунневыл ож бере Армагеддон уз кутскы, нош собере кӧня ке дыр ӵоже тупаса улон луоз шуыса, кудӥз дыръя тодытон ужез паськытатыны луоз. Со дыре со валантэм потэ вал ке но, Иеговалэн организациез радъяз Галаад библейской колледжез b. Отын дышетскизы миссионеръёс, быдэс дунне вылын тодытон но мукетъёссэ дышетон понна. Миссионеръёсты ыстылӥзы ож дыръя но. Со сяна, «оскиськымон, визьмо ляльчи» радъяз Инмарлы ужан-тыршон курсэз c, кенешъёсысь вань ивортӥсьёс эшшо но умойгес тодытыны но дышетыны мед быгатозы шуыса. Ваньмыз та Инмарлэсь калыксэ вуоно ужлы дасяз.

¹³ Ортчемез шоры учкыса, ми адӟиськомы, со секыт дыре Иегова аслэсьтыз калыксэ ӧз кельты шуыса. Кыкетӥ дунневыл ож йылпумъяськем бере трос шаеръёсын Иеговалэн ужась-тыршисьёсыз кышкатэк тодытыны быгатӥзы. Солы луыса трос адямиос Иеговаен тодматскизы. Нош туннэ Эксэйлык сярысь ивор быдэс дунне вылын вӧлмытӥське.

14. Малы ми оскыны быгатӥськомы курон-косонъёслы, кудъёссэ сётэ Иеговалэн организациез но тӧроос? (Усьтӥськон 2:1). (Озьы ик учке суредэз.)

 ¹⁴ Туннэ но Кивалтӥсь кенешысь агайёс Иисус Христослэсь кылзӥсько. Курон-косонъёс сётыкузы, соос тыршо югдур шоры Иегова но Иисус сямен учкыны. Нош ёросэз чакласьёс но тӧроос со курон-косонъёсты кенешъёслы сёто d. Зырӟем тӧроос, озьы ик кенешъёсысь вань тӧроос но, Христослэн «бур кияз» возисько. (Лыдӟе Усьтӥськонэз 2:1.) Валамон, та агайёс тырбыдэстэмесь но куддыръя янгышало шуыса. Кылсярысь, Моисей, Иисус Навин, апостолъёс но куддыръя янгышазы (Лыд. 20:12; Иис. Н. 9:14, 15; Рим. 3:23). Озьы ке но Иисус оскиськымон ляльчи пыр но тӧроос пыр кивалтэмысь уг дугды. Со сяна, со соос пыр кивалтоз «вань нуналъёсы, дунне бырытозь» (Матф. 28:20). Соин ик ми быдэсак оскыны быгатӥськомы курон-косонъёслы, кудъёссэ Иисус сётэ быръем агайёс пыр.

МАЛЫ ИЕГОВАЛЭСЬ КОТЬКУ КЫЛЗӤСЬКЫНЫ КУЛЭ

15, 16. Малы тӥ дышетскиськоды соослэсь, кинъёс Иеговалэсь кылзӥськизы?

¹⁵ Иеговалэсь кылзӥськон али ик пайда вайыны быгатэ. Кылсярысь, Э́ндрю e но Ро́уз кузпалъёс кылзӥськизы огшоры улыны ӧтёнлэсь (Евр. 13:5). Солы луыса соос быгатӥзы пыриськыны Инмарлы йыбыртъян понна юртъёсты пуктон ужъёсы. Роуз вера: «Куддыръя ми туж пичи комнатаосын улӥмы, кудъёсаз пӧраськон инты но ӧй вал. Мон туж яратӥсько тус пуктылыны. Но трос фотокамераосме но объективъёсме мыным вузано луиз. Соосты вузакум, мон бӧрдӥ. Но мынам потэ вал Авраамлэн кышноезлэсь, Сарралэсь, адӟем кареме. Соин ик мон кылемез шоры ӧй учкы, нош азьпала учкыны тырши» (Евр. 11:15). Кыӵе пайда вайиз та кузпалъёслы кутэм ужпумзы? Роуз вера: «Ми туж шумпотӥськомы, ваньзэ, мармы милям вань, Иеговалы сётыны быгатӥськомы шуыса! Солэсь ужъёссэ быдэсъяса, ми асьмеды выль дуннеын кадь шӧдӥмы». Эндрю соглаш кариське: «Ми туж шумпотӥськомы,  малы ке шуоно вань дырмес но кужыммес Иеговалы сётӥськомы».

¹⁶ Кыӵе эшшо пайда вае на Иеговалэсь кылзӥськон? Кылсярысь, школазэ йылпумъямез бере, Марси́я сузэрлэн туж потэ вал пионер луэмез, малы ке шуоно солэсь азьвыл со кылӥз тросгес ужаны-тыршыны ӧтёнэз (Матф. 6:33; Рим. 12:11). Со вера: «Мыным ӵектӥзы дун тырытэк университетын дышетскыны. Но мынам потэ вал самой умойзэ Иеговалы сётэме. Соин ик мон малпай вакчи дыр куспын дышетскыны ужлы, кудӥз юрттысал мыным пионер луыны. Со туж умой ужпум вал. Али мон пионер. Со сяна, ужан графике мыным луонлык сётэ Вефильлы юрттыны но Иегова понна трос мукетсэ лэсьтыны».

17. Кыӵе эшшо пайда вае на Иеговалэсь кылзӥськон? (Исаия 48:17, 18).

¹⁷ Куддыръя милемлы сёто сыӵе курон-косонъёс, кудъёсыз милемыз утё. Кылсярысь, Иегова алэ милемыз коньдонэз яратэмлэсь но ужъёслэсь, кудъёссэ лэсьтыса, ми солэсь катъёссэ тӥясалмы. Иеговалэсь кылзӥськимы ке, ми чылкыт возьытлыкен но мултэс сюлмаськытэк уломы (1 Тим. 6:9, 10). Нош соку ми быгатомы вань сюлмысьтымы Иеговалы ужаны-тыршыны. Сыӵе улон шумпотон вае но каньыл сюлмын улыны юрттэ. (Лыдӟе Исаиялэсь 48:17, 18.)

18. Малы тӥляд потэ котьку кылзӥськемды Иеговалэсь?

¹⁸ Иегова милемын адямиос пыр кивалтоз бадӟым куректон дыръя но, Иисус Христослэн Сюрс ар ӵоже кивалтонэз дыръя но (Пс. 44:17). Кылзӥськомы-а ми Иеговалэсь, солэн курон-косонъёсыз милемлы ӧз кельше ке но? Кылзӥськыны капчигес луоз, ми Иеговалэсь али ик ини кылзӥськимы ке. Соин ик ойдолэ котьку Иеговалэсь кылзӥськомы, соку но, куке со милемын быръем пиосмуртъёс пыр кивалтэ (Ис. 32:1, 2; Евр. 13:17). Ми быгатӥськомы быдэсак оскиськыны Иеговалы, Сюрес Возьматӥсьмылы, кудӥз милемлы юрттэ палэнскыны ваньмызлэсь, мар соин кусыпъёсмес лябӟытыны быгатэ, но милемыз выль дуннеын пырак улонэ нуэ.