1. Кыӵе луонлык сётӥз милемлы Иегова?

 ИЕГОВА милемлы луонлык сётӥз ужпум кутыны, кызьы ми уломы. Со дышетэ милемыз шонер быръён лэсьтыны но юрттэ милемлы сыӵе ужпумъёсты кутыны, кудъёсыз сое шумпотто (Пс. 118:173). Соин ик, Инмарлэн Кылысьтыз визьлыко малпанъёсты уже кутыса, ми дышетскиськомы шонер ужпумъёс кутыны (Евр. 5:14).

2. Кыӵе шуг-секытэн ми пумиськыны быгатӥськомы ужпум кутэммы бере?

² Но ми шонер ужпум кутӥськомы ке но, кутскем ужмес быдэстыны милемлы секыт луыны быгатэ. Тани куд-ог учыръёс. Егит агай быдэс Библиез лыдӟыны ужпум кутэ. Со кӧня ке арня ӵоже быгатэ котькуд нунал сое лыдӟыны, но таин ваньмыз йылпумъяське. Сузэр пионер луыса ужаны-тыршыны ужпум кутэ, нош со берлогес дырлы ялан кельтэ сое, ку со та ужан-тыршонэз кутскоз. Тӧроослэн кенешсы огкылысь ужпум кутэ ӵемгес юнматыны соосты, кинъёслы юрттэт кулэ, нош трос толэзьёс ортчыса но, номыр лэсьтэмын ӧвӧл. Та учыръёс туж пӧртэмесь, но соослэн огкадез вань: вын-агайёс но сузэр-апайёс ужпум кутӥзы, нош кутскем ужзэс пумозяз ӧз вуттэ. Нырысетӥ даурын та выллем шуг-секытэн пумиськизы Коринф карысь христианъёс. Эскеромы, малы милемыз дышетыны быгатэ та учыр.

3. Кыӵе ужпум кутӥзы Коринфын улӥсьёс но мар луиз собере?

³ Коринф карын улӥсь христианъёс асьме вакытысь 55-тӥ ар котырын кулэ луись ужпум кутӥзы. Соос тодӥзы, Иерусалимысь но Иудеяысь вын-агайёссы шуг-секытъёсын пумиськыло но куанер уло шуыса, озьы ик мукет кенешъёс, соослы юрттон понна, коньдон люканы малпазы шуыса. Ӟеч но шырыт сямо луэмзэс возьматыса, Коринфын улӥсьёс  но малпазы коньдон люканы, озьы ик соос Павеллэсь юазы, кызьы тае лэсьтыны быгатысалзы. Павел кенешъёслы кивалтэт сётӥз но Титэз юрттыны куриз коньдонэз люканы (1 Кор. 16:1; 2 Кор. 8:6). Нош кӧня ке толэзьёс ортчыса, Павел тодӥз, Коринфын улӥсьёс коньдонзэс люканы ӧз быгатэ на шуыса. Соин сэрен соос ӧз вуысалзы кузьымзэс дасяны со дырлы, куке мукет кенешъёслэсь саламъёссэс Иерусалиме келязы (2 Кор. 9:4, 5).

4. Мар карыны мылкыдзэс ӝутӥз Павел Коринфын улӥсьёслэсь, 2 Коринфъёслы 8:7, 10, 11 лыдэ басьтыса?

⁴ Коринфын улӥсьёс умой ужпум кутӥзы, но Павел ушъяз соосты юн осконзы но шырыт сямзэс возьматыны юн мылкыдзы понна. Нош озьы ик со мылкыдзэс ӝутӥз кутскем ужзэс быдэстыны. (Лыдӟе 2 Коринфъёслы 8:7, 10, 11.) Та учыр дышетэ милемыз, оскымон христианъёслы но кутэм ужпумзыя улыны секыт луыны быгатэ шуыса.

5. Кыӵе юанъёсты ми эскеромы?

⁵ Коринфын улӥсьёслы кадь ик, милемлы но малпам ужмес быдэстыны секыт луыны быгатэ. Малы? Тырбыдэстэм луэммы сэрен ми ваньзэ берлогес дырлы ялан кельтыны быгатӥськомы. Со сяна, малпам ужъёсмылы люкетыны быгато шӧдтэк шорысь кылдэм югдуръёс (Екк. 9:11; Рим. 7:18). Ойдолэ эскеромы, мае лыдэ басьтоно ужпум кутон азьын но сое выльысь эскерон азьын. Озьы ик ми эскеромы визь-кенешъёсты, кудъёсыз юрттозы кутскем ужмес пумозяз вуттыны.

6. Кыӵе учырын кутэм ужпумез выльысь эскерыны кулэ?

⁶ Куд-ог кулэ луись кутэм ужпумъёсмес ми ноку но ум воштэ. Кылсярысь, Иеговалы ужаны-тыршыны но кузпалмылы оскымон луыны сётэм кылъёсмес ми ноку но ум берыктэ (Матф. 16:24; 19:6). Нош куд-ог кутэм ужпумъёсты выльысь эскерыны кулэ. Малы? Малы ке шуоно югдуръёс воштӥсько. Кыӵе визь-кенешъёс юрттозы милемлы тужгес но умой ужпумъёс кутыны?

7. Мар сярысь милемлы вӧсяськоно но малы?

⁷ Визьлык сярысь вӧсяське. Иеговалэн святой духезлэн кивалтэмез улсын Иаков гожтӥз: «Тӥ пӧлысь кинлэн ке визьлыкез уг ке тырмы, Инмарлэсь мед куроз» (Иак. 1:5). Куддыръя милемлы ваньмылы визьлык уг тырмы. Соин ик милемлы Иегова вылэ оскиськыны кулэ ужпум кутыкумы но, озьы ик сое выльысь эскерыкумы но. Соку Иегова юрттоз милемлы визьмо быръён лэсьтыны.

8. Мар юрттоз милемлы пыр-поч эскерон ортчытыны?

⁸ Пыр-поч эскерон ортчытэ. Утчалэ Библиысь визь-кенеш, лыдӟе, мар вераське публикациосын, кудъёссэ поттэ Иеговалэн организациез, но вераське соосын, кинъёслы тӥ оскиськоды (Мад. 20:18). Эскерон ортчытыны тужгес но кулэ, куке тӥледлы ужпум кутоно, кудӥз герӟаськемын ужез воштонэн, мукет интые улыны кошконэн яке дышетсконэз быръёнэн, кудӥз Иеговалы ужан-тыршон понна тырмыт коньдон поттыны юрттысал.

9. Малы ми асьмеды пӧяны кулэ ӧвӧл?

⁹ Малпаське, малы тӥ сыӵе ужпум кутӥськоды. Иегова саклыксэ висъя солы, малы ми кыӵе ке ужпум кутӥськомы (Мад. 16:2). Солэн потэ, ми ноку но медам пӧяське шуыса. Соин ик, ужпум кутыкумы, милям асьмеды но, мукетъёссэ но пӧяммы уг поты со пумысен, малы ми сыӵе ужпум кутӥськомы. Озьы ӧм лэсьтэ ке, милемлы кутэм ужпуммыя улыны секыт луоз, дыр. Эскеромы одӥг учырез. Егит агай пионер луыса ужаны-тыршыны ужпум кутэ. Нош, кӧня ке дыр ортчыса, солы секыт луэ ужан-тыршонлы висъяны сомында дырзэ, кӧня пионеръёслы тодытон ужын ортчытоно, но ужан-тыршон сое туж ик шум уг потты ини. Та агай малпаз,  вылды: со пионер луыса ужаны-тыршыны кутскиз, малы ке шуоно солэн Иеговаез шумпоттэмез потэ вал. Нош мар, солэн нырысь ик анай-атайзэ яке кинэ ке но мукетсэ шумпоттэмез потэ вал ке?

10. Мар кароно воштӥськон понна?

¹⁰ Пуктэ син азяды адямиез, кудӥз Библиез дышетыны кутскиз но тамак кысконэз куштыны малпаз. Нырысь, ог кык арня ӵоже, со быгатэ тамак кыскытэк улыны, нош берлогес уг чида но кыскыны кутске. Озьы ке но со быгатэ умойтэм сямзэ вормыны, малы ке шуоно со Иеговаез яратэ но солэн сое шумпоттэмез потэ (Кол. 1:10; 3:23).

11. Малы аслыд валамон ужпумъёс пуктоно?

¹¹ Асьтэлы валамон ужпумъёс пуктэ. Ужпум валамон ке, сое быдэстыны капчигес. Шуом, тӥ ужпум кутӥды котькуд нунал Библиез лыдӟыны. Нош тӥляд Библиез лыдӟон графикты ӧвӧл ке, соку пуктэм ужпумдэс быдэстыны секыт луоз b. Яке шуом, тӧроос малпазы ӵемгес юнматыны кенешысь вын-агайёсты но сузэр-апайёсты, кудъёсызлы юрттэт кулэ. Нош дыр мынэ, но номыр уг воштӥськы. Пуктэм ужпумзэс быдэстон понна, соослы асьсэды юано: «Малпамы-а ми, кинлы вын-агайёс но сузэр-апайёс пӧлысь тужгес но юрттэт кулэ? Озьы ик малпамы-а ми, ку соосын пумиськомы?»

12. Мае милемлы лэсьтоно луоз, дыр, но малы?

¹² Асьтэлэсь лэсьтыны луонтэмзэ эн возьмалэ. Нокинлэн но ӧвӧл сомында дырыз, кужымез но луонлыкез, ваньзэ, мае потэ, лэсьтон понна. Соин ик асьтэлэсь укыр троссэ эн возьмалэ. Кутэм ужпумдыя лэсьтыны уд ке быгатӥське, соку сое выльысь эскере (Екк. 3:6). Но шуом, тӥ кыӵе ке кутэм ужпумдэс эскериды, кӧня ке сое воштӥды но табере малпаськоды, кутскем уждэс пумозяз вуттыны быгатоды шуыса. Эскеромы вить вамышъёсты, кудъёсыз сое лэсьтыны юрттозы.

13. Мар тӥледлы кужым сётоз кутэм ужпумдыя улыны?

¹³ Вӧсяське, мае ке лэсьтыны кужымды мед луоз шуыса. Инмар тӥледлы кужым сётыны быгатэ, ужпум кутон понна но соя улон понна (Флп. 2:13). Соин ик, кулэ луись кужымды мед луоз шуыса, Иеговалэсь святой духсэ куре. Вӧсяськемысь эн дугдэ, тӥ малпаськоды ке но, Иеговалэсь ответсэ туж кема возьмано луэ шуыса. Иисус вераз: «Курелэ [святой духез], тӥледлы сётэмын луоз» (Лука 11:9, 13).

14. Кызьы Лукалэсь 14:28 визь-кенеш юрттоз тӥледлы кутэм ужпумдыя улыны?

¹⁴ Малпалэ, кызьы кутэм ужпумез быдэстыны. (Лыдӟе Лукалэсь 14:28.) Кыӵе ке ужез кутскон азьын нырысь малпано, мар кароно сое быдэстон понна, нош собере малпаммыя лэсьтоно. Озьы ик, куке ми ужпум кутӥськомы, гожтоно ваньзэ, мар юрттоз милемлы соя улыны. Куке тӥледлы бадӟым ужез быдэстоно, люке сое пичигес ужъёслы. Соку, та пичи ужъёсты быдэстэмдыя, тӥледлы азинсконъёстэс адӟыны капчигес луоз. Павел Коринфын улӥсьёслэсь мылкыдзэс ӝутӥз «арнялэн нырысетӥ нуналаз» уждунзылэсь оглюкетсэ нимаз поныны, солэсь лыктэмзэ возьмам интые но соку гинэ коньдонэз люканы тыршем интые (1 Кор. 16:2). Озьы ик, бадӟым ужъёсты пичигес ужъёслы люкыса, пуктэм ужпумды тӥледлы быдэстыны луонтэм уз поты.

15. Мар эшшо карыны луоз на, кутэм ужпумдэс улонэ пыртыны капчигес мед луоз шуыса?

¹⁵ Тӥ гожтӥды ке, мар кароды, кутэм ужпумдыя улон понна, сое улонэ пыртыны тӥледлы капчигес луоз (1 Кор. 14:40). Кылсярысь, тӧроослэн кенешсылы кивалтэт  сётэмын, тӧроос пӧлысь кин ке но мед гожъялоз шуыса котькуд кутэм ужпумзэс но сое, кинлы та ужез быдэстоно но кыӵе дырлы. Тӧроослэн кенешъёссы, кудъёсыз та кивалтэтъя лэсьто, кутэм ужпумъёссэс быдэстыны быгатозы, луоз (1 Кор. 9:26). Тӥ но та выллем амалэз ас улонады уже кутыны быгатӥськоды. Кылсярысь, котькуд нунал лэсьтоно ужъёстэс бумага вылэ гожтэ но гожъяны кутске соосызлэсь, кудъёссэ нырысь ик лэсьтыны кулэ. Со юрттоз тӥледлы кутскем ужъёстэс быдэстыны, нош озьы ик вакчи дыр куспын тросгес ужъёс лэсьтыны.

16. Мар кароно, пуктэм ужпумез быдэстон понна, но кызьы со возьматэмын Римъёслы 12:11?

¹⁶ Тырше. Кутэм ужпумъя улон понна но кутскем ужез быдэстон понна, тыршыны кулэ. (Лыдӟе Римъёслы 12:11.) Кылсярысь, Павеллэн потэ вал, Тимофей эшшо но быгатыса мед дышетоз шуыса. Со понна Павел солы визь-кенеш сётӥз азьланяз но тыршыны кутскем ужзэ нуыны но та удысын дугдылытэк тыршыны. Павеллэсь визь-кенешсэ кутыны луэ мукет ужъёсын но, кудъёсыз Иеговалы йыбырттонэн герӟаськемын (1 Тим. 4:13, 16).

17. Кызьы визь-кенеш, кудӥз Ефесъёслы 5:15, 16 гожтэмын, малпам ужез быдэстыны юрттэ?

¹⁷ Дырдэс юнме эн быдтэ. (Лыдӟе Ефесъёслы 5:15, 16.) Малпалэ, кыӵе дырлы тӥляд уждэс быдэстэмды потэ, но сое берлогес дырлы эн кельтэ. Тужгес но тупась дырез эн возьмалэ — оло нош, со ноку но уз вуы (Екк. 11:4). Эн лэзе кыӵе ке ужъёслы тӥлесьтыд дырдэс но кужымдэс быдтыны, кудъёссэ тӥ тужгес но кулэ луись ужъёслы висъяны кулэ (Флп. 1:10). Луэ ке, шыпыт инты шедьтэ. Мукетъёсызлы вералэ, та дыр куспын тӥледлы люкетоно ӧвӧл шуыса. Быгатӥськоды ке, телефондэс кысэ, электрон почтадэс берлогес эскере но социальной сетьёсы эн пыралэ c.

18, 19. Мар юрттоз милемлы, шуг-секытъёс шоры учкытэк, пуктэм ужпуммес быдэстыны?

¹⁸ Малпаське, кыӵе пайда ваёз ужез быдэстон. Кутэм ужпуммылэсь бервылъёссэ ӵошатыны луэ мыноно сюреслэн пумыныз. Кулэ интыямы милям зэмзэ но вуэммы потэ ке, ми мынэмысь ум дугдэ, сюреслэн кыӵе ке люкетэз пытсамын ке но, озьы ик милемлы мукет сюрестӥ мыноно луэ ке но. Озьы ик ми но, саклыкмес висъяськомы ке кутэм ужпуммылэн пайдаезлы, шуг-секытъёсын пумиськыку, ми соку ик ум сётске (Гал. 6:9).

¹⁹ Шонер быръён лэсьтыны капчи ӧвӧл. Кутэм ужпумъя улыны но капчи ӧвӧл. Но, кутскем ужез пумозяз вуттон понна, Иегова милемлы визьлык но кужым сётыны быгатэ.