1, 2. а) Малы алигес кузпалъяськемъёслы Иегова вылэ оскиськоно? (Псалтирь 36:3, 4). б) Мае ми эскеромы та статьяын?

 ТӤ АЛИГЕС кузпалъяськиды ке яке матысь дыре кузпалъяськыны малпаськоды ке, валамон, тӥляд яратоно адямиеныды быдэс улондэс ортчытэмды потэ шуыса. Озьы ке но кузпалъёс шуг-секытъёсын пумиськыны быгато но кулэ луись ужпумъёс кутоно луо. Семьяды шудо луоз-а, уз-а, герӟаськемын соин, кызьы тӥ шуг-секытъёстэс сэрттоды-пертчоды. Тӥ Иеговалы оскиськиды ке, со юрттоз тӥледлы визьмо ужпумъёс кутыны, кусыпъёсты эшшо но юнгес луозы, нош тӥ асьтэос эшшо но шудогес луоды. Нош тӥ Инмарлэн визь-кенешъёсызлэсь ӧд ке кылзӥське, кусыпъёсты лябӟозы но тӥ шудтэм луоды, вылды. (Лыдӟе Псалтирез 36:3, 4.)

² Та статья нырысь ик алигес кузпалъяськемъёслы гожтэмын ке но, татын эскерисько шуг-секытъёс, кудъёсыз котькыӵе семьяын кылдыны быгато. Ми эскеромы, малы дышетскыны луэ Инмарлы оскымон пиосмуртъёслэсь но кышномуртъёслэсь, кудъёсыз сярысь Библиын гожтэмын. Та статьяысь пайдаё малпанъёсты уже кутыны луэ семьяын но, мукет удысъёсын но. Озьы ик ми эскеромы, кыӵе адӟем карон возьмато куд-ог туала семьяос.

3, 4. Кыӵе шуг-секытъёссы кылдыны быгато алигес кузпалъяськемъёслэн?

³ Куддыръя адямиос алигес кузпалъяськемъёслэсь мылкыдзэс ӝуто улыны озьы, кызьы тросэз адямиос уло. Кылсярысь, анай-атайёс соосты туж курыны быгато нылпиос ӝоггес вордыны. Нош эшъёс но мукет ӵыжы-выжыос, умойзэ малпаса гинэ, алигес кузпалъяськемъёслэсь мылкыдзэс ӝуто улон инты но умой улон понна мукет арбериос басьтыны.

⁴ Алигес кузпалъяськемъёс малпаськытэк ужпумъёс кутӥзы ке, соос пунэмаськоно луозы яке кредитъёс басьтозы, вылды. Нош соосты тырон понна, картлы но, кышнолы но трос ужано луоз. Дырез, кудзэ соос висъязы Библиез ас понназы эскеронлы, семьяен йыбырттонзылы но ужан-тыршонлы, соос пумен ужлы висъялозы. Ужзэс ыштыны кышкаса, яке тросгес коньдон поттон понна, соос кутскыны быгато тросгес ужаны но кенешлэсь пумиськонъёссэ кельтылыны. Озьыен, кузпалъёс ыштозы шумпотонзэс, кудӥз соослэн луысал, соос Иеговалы ужан-тыршонлы тросгес дырзэс висъясалзы ке.

5. Малы тӥледыз дышетэ Клаус но Марисалэн учырзы?

⁵ Ӵем дыръя адӟыны луэ: ваньбур люканы тыршыса, адями шудо уг луы. Тае ас вылазы шӧдӥзы Клаус но Мариса b. Сюанзы бере умой улон понна, соос кыкназы но быдэс нуналэн ужазы. Но сюлмазы шумпотонзы ӧй вал. Клаус вера: «Милям укыр трос арбериосмы вал, но Иеговалы тросгес ужаны-тыршыны милям ужпуммы ӧй вал. Зэмзэ вераса, ми асьмеос ик улонмес секытгес каримы». Оло нош, тӥ но шӧдӥды, выль но выль арбериосты басьтон зэмос шумпотон уг вайы шуыса. Со озьы ке, мылкыдды медаз куашка. Та статьяысь визь-кенешъёс тӥледлы юрттыны быгатозы кулэ луись воштӥськонъёс лэсьтыны. Но нырысь ойдолэ эскеромы, малы картъёс дышетскыны быгато Иосафат эксэйлэсь.

6. Кызьы Иосафат секыт югдурын уже кутӥз визь-кенешез, кудӥз гожтэмын Мадёнъёсын 3:5, 6?

⁶ Картъёс, луылэ-а тӥледлы секыт ужъёстэс быдэсъяны? Соку тӥледлы пайда ваёз Иосафат эксэйлэн учырез. Со быдэс калык понна кыл кутэ вал. Мар солы юрттӥз табыдӟа ужез быдэсъяны? Со лэсьтӥз ваньзэ, мае быгатӥз, калыкез утён понна. Со Иудеяысь каръёсты юнматъяз но туж кужмо армия люказ, кудаз 1 160 000-лэсь но тросгес ожгарчиос вал (2 Пар. 17:12—19). Берлогес Иосафат, солэн семьяез но калыкез кышкыт югдуре сюризы: Иудеялы пумит ӝутскизы аммон, моав но Сеир гурезьысь калыкъёс (2 Пар. 20:1, 2). Мар кариз Иосафат? Со Иеговалы юрттэт курыса вазиськиз. Озьы карыны мылкыдэз ӝутэ визь-кенеш, кудӥз гожтэмын Мадёнъёсын 3:5, 6 (лыдӟе). 2 Паралипоменонын 20:5—12 гожтэмын Иосафатлэн зӥбыт-востэм вӧсяськемез.  Солэн сюлмысь верам кылъёсысьтыз адӟиське: со быдэсак оскиськиз инмысь яратӥсь Атаезлы. Кызьы Иегова Иосафатлэн вӧсяськемезлы ответ сётӥз?

7. Кызьы Иегова Иосафатлэн вӧсяськонэзлы ответ сётӥз?

⁷ Иегова Иозиил левит пыр Иосафатлы таӵе кылъёсын вазиськиз: «Султэ но учкыса сылэ Кузё-Инмарлэн тӥ доры ыстэм утиськонэз шоры» (2 Пар. 20:13—17). Тушмонъёсын ожмаськон понна таӵе амал туж паймоно кадь потыны быгатэ. Но та кивалтэт адямилэсь ӧй вал, со Иеговалэн кивалтэтэз вал. Инмарезлы быдэсак оскиськыса, Иосафат озьы ик лэсьтӥз. Куке со но солэн калыкез тушмонъёссылы пумит потӥзы, эксэй ожгарчиосызлэн азязы пуктӥз ожтӥрлыктэм кырӟасьёсты, кудъёсыз Иеговаез данъязы. Инмар аслэсьтыз кылзэ быдэстӥз: со тушмонъёссэс быдтӥз (2 Пар. 20:18—23).

8. Малы дышетскыны быгато картъёс Иосафатлэсь?

⁸ Картъёс, тӥ Иосафатлэсь тросэзлы дышетскыны быгатоды. Тӥледлы семьяды понна сюлмаськоно. Соин ик тӥ туж тыршиськоды сое утьыны но юнматыны. Шуг-секытъёсын пумиськыса, тӥ малпаны быгатоды, соосты асьтэос но сэрттыны-пертчыны быгатоды шуыса. Но эн тырше асьтэлэн кужымдылы гинэ оскиськыны. Вӧсяське Иеговалы, озьы ик ӟырдыт вӧсяське кышноеныды ӵош. Куре Иеговаез возьматыны тӥледлы солэсь эриксэ, эскере Библиез но публикациосты, кудъёссэ Инмарлэн организациез поттӥз. Собере Инмарлэсь визь-кенешъёссэ улонады пыртэ. Кутэм ужпумъёсыныды ваньзы соглаш уз луэ. Куд-огъёсызлы соос туж ик визьмо уз потэ. Соослэн верамзыя, семьялы номыр кышкытлык медаз вайы шуыса, картлы трос коньдон поттоно. Но эн вунэтэ Иосафатлэн учырез сярысь. Со Иеговалы оскиськиз. Та солэн ужъёсысьтыз адӟиськиз. Иегова та оскымон ужась-тыршисьсэ ӧз кельты бере, со тӥледыз но уз кельты! (Пс. 36:28; Евр. 13:5). Нош мар карыны быгато кузпалъёс, семьязы шудо мед луоз шуыса?

9. Мае ми тодӥськомы Исаия пророк но солэн кышноез сярысь?

⁹ Исаиялэн но солэн кышноезлэн улоназы Иеговалы ужан-тыршон валтӥсез вал. Кытысь ми сое тодӥськомы? Исаия ужаз-тыршиз пророк луыса. Библия солэсь кышнозэ азьпалзэ тодытӥсь шуыса нима. Озьыен, Иегова солы но азьпалзэ тодытон ужъёс сётылӥз, вылды (Ис. 8:1—4). Адӟиське: та кузпалъёслэн улоназы Иеговалы ужан-тыршон нырысетӥ интыын вал. Кыӵе умой адӟем карон туала семьяослы!

10. Кызьы Библиысь азьпалзэ ивортонъёсты эскерон кузпалъёслэсь мылкыдзэс юнматыны быгатэ Иеговалы ужан-тыршонын эшшо но тросгес лэсьтыны?

¹⁰ Туала семьяос Исаиялэн семьяезлэсь адӟем карыны быгато, ужан-тыршонын лэсьтыса ваньзэ, мае быгато. Куке соос Библиысь азьпалзэ ивортонъёсты ӵош эскеро но адӟо, соос котьку быдэсмо шуыса, соослэн Иеговалы осконзы юнма (Тит. 1:2) c. Озьы ик кузпалъёслы пайда ваёз, куке соос малпаськозы, мар соос карыны быгато, Библиысь куд-ог азьпалзэ ивортонъёс мед быдэсмозы шуыса. Кылсярысь, сыӵе азьпалзэ ивортонъёс пӧлысь одӥгез — Иисуслэн таӵе кылъёсыз: «Эксэйлыклэн та Евангелиез быдэс дунне вылын тодытэмын луоз» (Матф. 24:14). Макем умойгес кузпалъёс адӟо, Библиысь азьпалзэ ивортонъёс пыр-поч быдэсмо  шуыса, сокем юнгес соослэн мылкыдзы луоз Иеговалы ужан-тыршонын эшшо но тросгес лэсьтыны.

11. Мар лэсьтыны быгатӥзы Акила но Прискилла Иеговалы ужан-тыршонын но малы?

¹¹ Егит семьяослы туж умой адӟем карон возьмато Прискилла но Акила. Та кузпалъёс Римын улӥзы. Соос еврей калыкысь потэмын вал. Иисус сярысь ӟеч иворез кылыса, соос христианъёс луизы. Улонзы соослы кельше вал. Но ваньмыз малпамтэ шорысь воштӥськиз, куке Клавдий император вань еврейёсты Римысь кошкыны косӥз. Малпаське, кызьы со шӧдӥськиз Акилаен Прискилла вылын. Соослы корказэс, палаткаосты лэсьтон ужзэс кельтоно луиз, мукет каре кошконо но ваньзэ выльысь кутсконо луиз. Кызьы та воштӥськонъёс шӧдӥськизы Акила но Прискилла вылын? Югдурзы воштӥськемен, Эксэйлыклэн ужез улоназы кыкетӥ интые кошкиз-а? Та юанъёслы валэктонъёсты тӥ тодӥськоды, дыр. Выль интыын, Коринфын, Акила но Прискилла ӟырдыт мылкыдын со интыысь кенешен тодытӥзы но апостол Павелэн ӵош вын-агайёсты юнматъязы. Берлогес соос кӧня ке пол ветлӥзы мукет каръёсы, кытын ивортӥсьёс уг тырмо вал (Ап. уж. 18:18—21; Рим. 16:3—5). Зэм, соослэн улонзы туж тунсыко вал!

12. Малы кузпалъёслы Иеговалы ужан-тыршонэн герӟаськем ужпумъёс пуктоно?

¹² Туала кузпалъёс Акилалэсь но Прискиллалэсь адӟем карыны быгато, Эксэйлыклэсь ужзэ улоназы нырысетӥ интые пуктыса. Умойгес луоз, кузпалъяськыны малпасьёс ужпумъёссы сярысь пумиськылыкузы ик вераськизы ке. Соос Иеговалы ужан-тыршонын ужпумъёс пукто ке но соосты ӵош быдэсъяны тыршо ке, соослэн тросгес луонлыкъёссы вань адӟыны, кызьы Иегова соослы юрттэ (Екк. 4:9, 12). Тае адӟыны луэ Расселлэн но Элизабетлэн кылъёсысьтызы. Расселл вера: «Иеговалы ужан-тыршонэн герӟаськем ужпумъёсмы сярысь ми сюанмылэсь азьло вераськимы». Элизабет ватса: «Та юрттӥз милемлы кузпалъяськеммы бере. Ми ваньзэ лэсьтӥськомы, та ужпумъёсмес лыдэ басьтыса, но номырлы ум лэзиське  люкетыны соосты быдэсъяны». Солы луыса Расселл но Элизабет кошкыны быгатӥзы Микронезия шаере — отчы, кытын ивортӥсьёс ӧжыт.

13. Псалтирез 27:7 лыдэ басьтыса, кыӵе пайда вае кузпалъёслы, куке соос Иеговалы оскисько?

¹³ Расселл но Элизабет сямен, тросэз кузпалъёс ужпум кутӥзы огшоры но ас вылазы мултэс ужъёс басьтытэк улыны. Солы луыса соос быгато тросгес дырзэс висъяны тодытон но дышетскисьёсты дасян ужлы. Куке карт но кышно Иеговалы ужан-тыршонын кулэ луись ужпумъёс пукто но соосты ӵош быдэсъяло, со соослы пайда гинэ вае. Соос одно ик адӟозы, кызьы Иегова соос сярысь сюлмаське, соослэн Иеговалы осконзы юнмалоз. Со сяна, соос зэмзэ ик шудоесь луозы. (Лыдӟе Псалтирез 27:7.)

14. Кызьы апостол Пётр но солэн кышноез возьматӥзы, оско шуыса кылсётонлы, кудӥз гожтэмын Матфейлэсь 6:25, 31—34?

¹⁴ Кузпалъёс апостол Пётрлэсь но солэн кышноезлэсь тросэзлы дышетскыны быгато. Пётрен ӝыны ар яке ар ортчыса пумиськемзы бере, Иисус солы ӵектӥз дышетскисез луыны. Куке Пётр малпаськиз, кыӵе ужпум кутоно, солы лыдэ басьтоно вал, семьяез сярысь сюлмаськоно шуыса. Та ужзэ быдэстон понна, Пётр чорыгаз (Лука 5:1—11). Озьы ке но со ужпум кутӥз Иисус сьӧры мыныны. Со визьмо ужпум вал. Пётрлэн кышноез картэзлэн кутэм ужпуменыз соглаш вал. Со Библиысь адӟиське. Иисуслэн улӟемез бере со кӧня ке дыр ӵоже картэныз ӵош пӧртэм интыосы ветлӥз (1 Кор. 9:5). Со умой христиан мурт но умой кышно вал бере, Пётр чылкыт возьытлыкен кенешысь картъёслы но кышноослы визь-кенеш сётъяны быгатӥз (1 Пётр 3:1—7). Адӟиське: Пётр но, солэн кышноез но оскиськизы Иеговалэн кылсётонэзлы сюлмаськыны соос сярысь, кинъёс Эксэйлыкез улоназы нырысетӥ интые пукто. (Лыдӟе Матфейлэсь 6:25, 31—34.)

15. Малы ми дышетскыны быгатӥськомы Тьягу но Эстер кузпалъёслэсь?

¹⁵ Тӥ кӧня ке аръёс ӵоже ини кузпалъяськемын ке, мар юрттоз тӥледлы азьланяз но ӟырдыт мылкыдын тодытыны? Та сярысь тӥ быгатӥськоды мукет кузпалъёсын вераськыны. Кылсярысь, сыӵе вын-агайёс но сузэр-апайёс сярысь вераське «Они с готовностью предоставили себя для служения» рубрикаысь статьяосын d. Та статьяослы луыса Бразилиысь Тьягу но Эстер нимо кузпалъёслэн мылкыдзы ӝутскиз кошкыны отчы, кытын ивортӥсьёс уг тырмо. Тьягу валэктэ: «Ми лыдӟимы учыръёсты со сярысь, кызьы Иегова асьме нуналъёсы аслаз ужась-тыршисьёсызлы юрттэ. Милям но ас выламы шӧдэммы потӥз, кызьы Иегова милемын валтоз но семьямы сярысь сюлмаськоз». Дыр ортчыса, соос Парагвай шаере кошкизы. 2014-тӥ арысен соос тодыто адямиослы, кудъёсыз португал кылын верасько. Эстер вера: «Милемлы кыкнамылы но туж кельшо кылъёс, кудъёсыз гожтэмын Ефесъёслы 3:20. Иеговалы ужаса-тыршыса, ми выльысь но выльысь адӟиськомы, кызьы та кылъёс милям улонамы быдэсмо». Та кылбурын Павел оскытэ, Иегова, «мае куриськомы яке мар сярысь малпаськом-сюлмаськиськом, бадӟымлэсь но бадӟымгес ӟечлык сётыны быгатэ» шуыса. Тае трос учыръёсысь адӟыны луэ.

16. Кинэн вераськыны быгато егит семьяос, кудъёсыз малпасько, кыӵе ужпумъёс пуктоно?

¹⁶ Егит семьяос вераськыны быгато соосын,  кинъёс Иеговалы оскиськыса уло. Кылсярысь, куд-ог христиан кузпалъёс трос дасо аръёс ӵоже ини вань дырзэс сётыса Иеговалы ужало-тыршо. Тӥ малпаськиськоды ке, кыӵе ужпумъёс пуктоно, сыӵе христианъёсын вераськыны луоз. Озьы тӥ Иеговалы оскиськемдэс возьматоды (Мад. 22:17, 19). Озьы ик егит семьяослы тӧроос юрттыны быгато Иеговалы ужан-тыршонэн герӟаськем ужпумъёс пуктыны но соосты быдэсъяны.

17. Кыӵе учырен пумиськизы Клаус но Мариса но малы дышетэ тӥледыз соослэн учырзы?

¹⁷ Куддыръя ми малпаськомы ужаны-тыршыны одӥг амалэн, нош Иегова кутэ милемыз мукет сямен. Озьы ик луиз Клаус но Мариса кузпалъёсын, кудъёсыз сярысь статьялэн кутсконаз вераськиз. Кузпалъяськемзы бере куинь ар ортчыса, соос кошкизы Финляндие, отысь филиалэз пуктыны юрттон понна. Но берлогес соос тодӥзы, отын куать толэзь гинэ ужалозы-тыршозы шуыса. Нырысь соослэн мылкыдзы куашказ. Но ӝоген соослы ӵектӥзы араб кылэз дышетонъя курсъёсты ортчыны. Табере соос шумпотыса мукет шаерын ужало-тыршо но араб кылын вераськись адямиослы тодыто. Ортчемез шоры учкыса, Мариса вера: «Дышымтэ уж борды басьтӥськыны но Иеговалы оскиськыны нырысь кышкыт вал. Но мон валай: Иегова милемлы котьку но юрттэ, куддыръя озьы, кызьы ми ӧм но малпалэ. Та учыръёс бере мон эшшо но золгес солы оскиськыны кутски». Клаус но Мариса кузпалъёслэн учырзы возьматэ: Иегова одно ик бакель кароз соосты, кинъёс быдэсак солы оскисько.

18. Мар юрттоз кузпалъёслы котьку но Иеговалы оскиськыны?

¹⁸ Иегова адямиослы кузпалъяськыны луонлык кузьмаз (Матф. 19:5, 6). Солэн потэ, кузпалъёслэн ӵош улэмзы соослы шумпотон мед ваёз шуыса (Мад. 5:18). Егит кузпалъёс, малпаське, малы тӥ улондэс сӥзиськоды? Тыршиськоды-а тӥ Иеговаез тау карыны кузьымъёсыз понна? Вӧсяське Иеговалы, утчалэ солэн Кылысьтыз возетъёсты, кудъёссэ асьтэлэн югдурады кутыны быгатоды. Собере Иеговалэсь визь-кенешъёссэ улонады пыртэ. Юн оске: Иеговалы ужан-тыршон улонады нырысетӥ интыын луиз ке, семьяды шудо луоз!