1, 2. Кыӵе мугъёсмы милям вань ог-огмылы оскымон яратонмес возьматыны?

 МИЛЯМ мугъёсмы вань ог-огмылы оскымон яратонмес возьматыны. Тани кызьы соос сярысь вераське Библиын Мадёнъёсын книгаын: «Гажан-жалянэн зэмлык тон дорысь медаз ыше-быре... соку Кузё-Инмар дорысь, адямиос дорысь гажан-жалян, ӟечлык шедьтод»; «Гажась-жалясь сюлэмо адями аслаз лулызлы ӟеч уж лэсьтэ»; «Шонер улонэз, гажан-жалянэз тодӥсь мурт шонерлыко, данлыко улонэз шедьтоз» (Мад. 3:3, 4; 11:17; 21:21) b.

² Та кылбуръёсын вераське куинь мугъёс сярысь, малы ми ог-огмылы оскымон яратонмес возьматыны кулэ. Нырысетӥез, Иегова туж дунъя соосты, кинъёс оскымон яратонзэс возьмато. Кыкетӥез, та сям туннэ ик ини милемлы пайда вае, кылсярысь, со юрттэ оскымон эшъёс луыны. Куинетӥез, со, кин оскымон яратонзэ возьматэ, вуонояз бакель каремын луоз, кылсярысь, пырак улыны быгатоз. Зэм но, милям вань мугъёсмы Иеговалэсь кылзӥськыны, кудӥз вера: «Гажан-жаляндэс возьматэ, ог-огдэс жалялэ» (Зах. 7:9).

3. Кыӵе юанъёсты ми эскеромы та статьяын?

³ Та статьяын ми валэктонъёс шедьтомы ньыль юанъёслы: кинлы ми оскымон яратонмес возьматыны кулэ? Малы милемыз дышетэ Руфь книга оскымон яратон сярысь? Кызьы оскымон яратонэз уж вылын возьматоно но кызьы бакель каремын луозы соос, кинъёс оскымон яратонзэс возьмато?

4. Кинлы Иегова оскымон яратонзэ возьматэ но кызьы ми солэсь адӟем карыны быгатӥськомы? (Марк 10:29, 30).

⁴ Кылем статьяын ми вераськимы Иеговалэн оскымон яратонэз сярысь. Сыӵе яратонзэ со возьматэ соослы гинэ, кинъёс сое ярато но солы ужало-тыршо (Дан. 9:4). Ӵем дыръя нылпиос, кудъёссэ яратыса будэто, атайзылэсь адӟем каро. Озьы ик ми но Инмарлэсь адӟем карыны тыршиськомы (Еф. 5:1). Соин ик милям потэ вын-агайёсмылы но сузэр-апайёсмылы оскымон яратонмес возьматэммы но соослы оскымон эшъёс луэммы. (Лыдӟе Марклэсь 10:29, 30).

5, 6. Кызьы адямиос ӵем дыръя валало оскымон луонэз?

⁵ Зэм но, оскымон яратонэз возьматон понна, валаны кулэ, мар со сыӵе. Ойдолэ одӥг пример вылын эскеромы, маин оскымон яратон пӧртэм луэ оскымон луонлэсь.

⁶ Пуктэ син азяды адямиез, кудӥз трос аръёс ӵоже одӥг компаниын ужа. Вераны луоз, со оскымон ужась шуыса. Но со та компаниез но кузёоссэ яратэ шуыса одно ик вераны уг луы. Оло нош, кузёоссэ солэн ноку адӟемез но ӧвӧл. Яке со вань кутэм ужпумъёсынызы соглаш ӧвӧл. Солы кельше уждун, кудзэ солы сёто, соин ик, умойгес уж ӧз шедьты ке, со, пенсие потытозяз ик, та компаниын ужалоз, вылды.

7, 8. а) Мар мылкыдэз ӝутэ оскымон яратонэз возьматыны? б) Кыӵе пайда милемлы ваёз Руфь книгаез эскерон?

⁷ Маин пӧртэм луэ примерысьтымы оскымон ужась со адямилэсь, кудӥз оскымон яратонзэ возьматэ? Пӧртэмлыкез мугез бордын, малы соос мае ке лэсьто. Мар мылкыдзэс ӝутӥз вашкала дыръя улӥсь Инмарлы оскымон ужась-тыршисьёслэсь оскымон яратонзэс возьматыны? Сыӵе яратонэз возьматыны кулэ шуыса гинэ, соос сое ӧз возьматъялэ, соослэн вань сюлмысьтызы сое возьматэмзы потэ вал. Кылсярысь, эскеромы Давидлэсь примерзэ. Давид Ионафанлы вань сюлмысьтыз оскымон яратонзэ возьматӥз, Ионафанлэн Саул атаез сое виыны малпа вал ке но. Ионафанлэн кулэмез бере аръёс ортчыса но, Давидлэн оскымон яратонэз ӧз сӥя. Сыӵе ик яратонзэ со возьматӥз Ионафанлэн Мемфивосфей пиезлы но (1 Экс. 20:9, 14, 15; 2 Экс. 4:4; 8:15; 9:1, 6, 7).

⁸ Библиысь Руфь книгаез эскерыса, трос тодыны луэ оскымон яратон сярысь. Кызьы оскымон яратонзэс возьматъязы соос, кинъёс сярысь вераське та книгаын, но кызьы соослэн примеръёссы юрттозы милемлы вын-агайёслы но сузэр-апайёслы оскымон яратонмес возьматыны? c

9. Малы Ноеминь малпаз, Иегова со доры курадӟонъёс лэзиз шуыса?

⁹ Руфь книгаын вераське Ноеминь сярысь, Руфь кенэз сярысь но Инмарлы оскымон Вооз пиосмурт сярысь, кудӥз Ноеминьлэн картэзлэн ӵыжы-выжыез вал. Куке Израиле сютэм ар вуиз, Ноеминь картэныз но кык пиосынызы Моаве улыны кошкиз. Кӧня ке дыр ортчыса, Ноеминьлэн картэз кулӥз. Кык пиосыз кышно басьтӥзы, но жаляса верано луэ, берлогес соос но кулӥзы (Руфь 1:3—5; 2:1). Та шугадӟонъёс сэрен Ноеминь туж куректыса улӥз. Солы сокем секыт вал, со малпаз та шугадӟонъёсыз понна Иегова янгыш шуыса. Тани кыӵе кылъёсын со шӧдонъёсыз сярысь вераз: «Кузё-Инмарлэн киыз мон доры вӧсь карыны вуиз»; «Дунне Кутӥсь Инмар мон доры туж бадӟым куректон-кайгу лэзиз»;  «Мыным Кузё-Инмар курадӟон сётӥз» (Руфь 1:13, 20, 21).

10. Кызьы Иегова учкиз Ноеминьлэн кылъёсыз шоры, кудъёссэ со куректыса улыкуз вераз?

¹⁰ Кызьы Иегова учкиз Ноеминьлэн кылъёсыз шоры? Иегова Ноеминьлэсь ӧз палэнскы. Со валаз, макем солы секыт но сое жаляз, малы ке шуоно Иегова туж умой вала, куректыса улэмен сэрен, визьлыко мурт но визьзэ ыштыны быгатэ шуыса (Екк. 7:7, ВД). Озьы ке но Ноеминез оскытыны кулэ вал, Инмар сое ӧз кельты шуыса. Иегова тае валаз (1 Экс. 2:8). Соин ик со Руфьлэсь мылкыдзэ ӝутӥз Ноеминьлы юрттыны но солы оскымон яратонзэ возьматыны. Руфь Ноеминьлэсь мылкыдзэ ӝутӥз но валаны юрттӥз, Иегова сое азьло сямен ик яратэ шуыса.

11. Малы ми дась юрттыны соослы, кинъёслэн мылкыдзы усемын?

¹¹ Оскымон яратон мылкыдмес ӝутэ юрттыны соослы, кинъёслэн мылкыдзы усемын. Руфь Ноеминез ӧз кельты. Милям но кельтэммы уг поты соосты, кинъёслы секыт яке кинъёс усем мылкыдын уло. Малы ке шуоно ми яратӥськомы вын-агайёсмес но сузэр-апайёсмес но дась лэсьтыны ваньзэ, мае быгатӥськомы, соослы юрттон понна (Мад. 12:25; 24:10). Ӵапак озьы ик улыны милемыз ӧтиз апостол Павел но: «Усем мылкыдын улӥсьёслэсь мылкыдзэс ӝутэ, начаръёслы юрттӥське. Котькытын, котьма ласянь чидасесь луэ» (1 Фес. 5:14).

12. Кыӵе одӥгез тужгес но умой амал юрттыны солы, кинлэн мылкыдыз усемын?

¹² Ӵем дыръя тужгес но умой амал усем мылкыдын улӥсь вын-агайёслы но сузэр-апайёслы юрттыны — соосты сак кылзыны но оскытыны, ми соосты яратӥськомы шуыса. Иегова адӟе, куке тӥ солэн ужась-тыршисьёсызлы юрттыны тыршиськоды (Пс. 40:2). Мадёнъёсын 19:17 гожтэмын: «Куанерлы ӟеч лэсьтӥсь мурт Кузё-Инмарлы пунэмен сётэ, нош Со солэн ӟеч ужез понна пунэмзэ берыктоз».

13. Маин Руфь Орфалэсь пӧртэм вал но малы Руфьлэн кутэм ужпумез оскымон яратонэз сярысь вераз? (Учке вылбамысь суредэз.)

¹³ Оскымон яратон сярысь эшшо но тросгес тодыны луэ учыръёсысь, кудъёсыз берлогес Ноеминен луизы. Куке со кылӥз, «Инмар Аслаз калыкез доры вуылӥз но соослы нянь сётӥз шуыса», Ноеминь ужпум кутӥз дораз берытскыны, кык кенъёсыз но соин ӵош мынӥзы (Руфь 1:6). Сюрес вылысен Ноеминь туж куриз соосты Моаве берытскыны. Та сярысь со соосты куинь пол куриз. Мар луиз собере? Ми лыдӟиськомы: «Орфа картэзлэн анаеныз люкиськиз, нош Руфь анайзы борды кылиз» (Руфь 1:7—14). Куке Орфа ужпум кутӥз дораз берытскыны, со лэсьтӥз озьы, кызьы солы Ноеминь вераз. Нош Руфь мукет ужпум кутӥз. Солы номыр ӧз люкеты Моаве берытскыны, но со туж яратӥз кайгырись Ноеминез, соин ик ужпум кутӥз соин кыльыны (Руфь 1:16, 17). Руфь озьы лэсьтыны  кулэ шуыса гинэ ӧз лэсьты, со вань сюлмысьтыз озьы лэсьтӥз. Озьы со Ноеминьлы оскымон яратонзэ возьматӥз. Малы дышетэ милемыз та учыр?

14. а) Кызьы тросэз вын-агайёс но сузэр-апайёс ог-огзылы оскымон яратонзэс возьмато? б) Кыӵе курбонъёс Инмарлы ярамон луо, Еврейёслы 13:16 лыдэ басьтыса?

¹⁴ Оскымон яратон мылкыдэз ӝутэ тросгес лэсьтыны. Туннэ но тросэз вын-агайёс но сузэр-апайёс огъя оскисьёссылы оскымон яратонзэс возьмато. Со сяна, сыӵе яратонзэс соос возьмато соослы но, кинъёсын тодмо ӧвӧл. Кылсярысь, куке кытын ке но инкуазь шимучыр луэ, соос соку ик юрттыны дась. Нош куке кенешысь кин ке но шуг-секытэн пумиське, юрттэт сярысь куремзэс возьматэк но, соос юрттэтсэс ӵекто. Таин соос кельшо нырысетӥ даурысь Македонияын улӥсь христианъёслы. Соос асьсэос узыресь ӧй вал ке но, соос дась вал юрттыны соослы, кинъёс эшшо но куанергес улӥзы. Туннэ но христианъёс лэсьто ваньзэ, мае быгато, куддыръя «солэсь но тросгес» (2 Кор. 8:3). Иегова туж шумпотэ адӟыны, ужась-тыршисьёсыз ог-огзылы оскымон яратонзэс возьмато шуыса! (Лыдӟе Еврейёслы 13:16.)

15, 16. Кытысь адӟиськиз, Руфь Ноеминьлы юрттыны тыршемысь ӧз дугды шуыса?

¹⁵ Ойдолэ эскеромы, малы милемыз дышетыны быгатэ со, кызьы Руфь Ноеминьлы юрттӥз.

¹⁶ Юрттыны тыршемысь эн дугдэ. Куке Руфь Ноеминьлы юрттэтсэ ӵектӥз, нырысь Ноеминь соглаш ӧз кариськы. Но Руфь юрттыны тыршемысь ӧз дугды. Мар собере луиз? «Ноеминь солэсь бӧрсяз мыныны юн мылкыдзэ адӟиз но сое либатэмысь дугдӥз» (Руфь 1:15—18).

17. Кыӵе сям мылкыдмес ӝутэ, номыр шоры учкытэк, усем мылкыдын улӥсь вын-агайёслы но сузэр-апайёслы юрттыны?

¹⁷ Малы со милемыз дышетэ. Усем мылкыдын улӥсь вын-агайёслы но сузэр-апайёслы юрттон понна, чидан кулэ, озьы ик юрттыны тыршемысь дугдоно ӧвӧл. Шуом, сузэр, кудӥз шуг-секытэн пумиськиз, нырысь юрттэтмес палэнтэ d. Но со, кин оскымон яратонзэ возьматэ, эшсэ секыт дыръя уз кельты (Гал. 6:2). Соин ик ми азьланяз но тыршомы та сузэрлы юрттыны но юн оскомы, юрттэтмес басьтыны со соглаш кариськоз шуыса.

18. Маин сэрен Руфь Ноеминьлы йыркуръяськыны быгатысал?

¹⁸ Йыркуръяськыса эн улэ. Вифлееме берытскыса, Ноеминь азьвыл бускельёсызлы вералляз: «Татысь мон ваньбурен потӥ вал, нош берыктӥз монэ Кузё-Инмар буш киын» (Руфь 1:21). Малпалэ гинэ, макем вӧсь вал Руфьлы тае кылыны! Ноеминь понна со лэсьтӥз ваньзэ, мае быгатӥз. Соин ӵош со бӧрдӥз, сое буйгатӥз, соин ӵош кузь сюресэз ортчиз, нош Ноеминь Руфь азьын ик вера: «Берыктӥз монэ Кузё-Инмар буш киын». Малпаны луэ вал, Ноеминь Руфьлэсь юрттэмзэ ӧз но дунъя шуыса. Руфьлы таӵе кылъёсты кылыны вӧсь вал, дыр. Но со Ноеминез ӧз кельты.

19. Мар юрттоз вӧсь карись кылъёслы йыркуръяськытэк улыны?

¹⁹ Малы со милемыз дышетэ. Куддыръя усем мылкыдын улӥсь сузэрлы кӧня гинэ юрттыны медад тырше, со вӧсь карись кылъёс вераны быгатэ. Тырше сузэрлы йыркуръяськытэк улыны, солэсь эн палэнске но Иеговалэсь юрттэт куре валаны, мар кароно, сое буйгатон понна (Мад. 17:17).

20. Мар Руфез юнматӥз азьланяз но Ноеминьлы юрттыны?

 ²⁰ Юрттэ соослы, кинлы юрттэт кулэ. Руфь Ноеминьлы оскымон яратонзэ возьматӥз. Но табере Руфез ассэ юнматыны кулэ вал. Сое юнматыны Иегова мылкыдзэ ӝутӥз Воозлэсь. Вооз Руфьлы шуиз: «Та ужед понна Кузё-Инмар тыныд тыр берекетсэ мед сётоз, Израильлэн Инмарез Кузё-Инмар, Кин доры тон лыктӥд Солэн бурд улаз буйгатскон шедьтон понна, бадӟым медзэ-кузьымзэ тыныд мед сётоз!» Та кылъёс Руфез туж буйгатӥзы. Руфь шуиз: «Тон монэ буйгатӥд, ляльчиедлэн сюлмызлы кельшымон кылъёс верад» (Руфь 2:12, 13). Воозлэн шунытэсь, умой быръем кылъёсыз Руфьлэсь сюлэмзэ шунтӥзы но юнматӥзы, Ноеминьлы азьланяз но юрттон понна.

21. Мар карыны кулэ сюлмаськись тӧроос, Исаиялэсь 32:1, 2 лыдэ басьтыса?

²¹ Малы со милемыз дышетэ. Адямилы, кудӥз мукетъёсызлы оскымон яратонзэ возьматэ, аслыз но юрттэт кулэ луэ. Кылсярысь, Руфь туж шумпотӥз Воозлэсь ушъямзэ кылыны. Тӧроос Воозлэсь адӟем каро: соос вын-агайёслэсь но сузэр-апайёслэсь ӟеч ужъёссэс адӟыны тыршо но со понна соосты ушъяло. Зэм, шунытэсь, умой быръем кылъёс юрттыны быгато азьланяз но оскымон яратонмес возьматыны. (Лыдӟе Исаиялэсь 32:1, 2.)

22, 23. Кызьы учкыны кутскиз Ноеминь аслаз югдурез шоры но мар солы юрттӥз? (Псалтирь 135:23, 26).

²² Кӧня ке дыр ортчыса, Вооз Руфьлы но Ноеминьлы туж трос йыды тысь сётӥз (Руфь 2:14—18). Кызьы учкиз Ноеминь Воозлэн кузьымез шоры? Со вераз: «Кузё-Инмар сое бакель мед кароз улэпъёсты но, кулэмъёсты но гажам-жалямез понна!» (Руфь 2:20а). Ноеминь чылкак мукет сямен малпаськыны кутскиз! Азьвыл со бӧрдыса шуэ вал: «Мыным  Кузё-Инмар курадӟон сётӥз». Нош табере со шумпотыса вера Иеговалэн оскымон яратонэз сярысь. Мар юрттӥз Ноеминьлы югдурез шоры мукет сямен учкыны?

²³ Ноеминь валаз, Иегова сое ноку ӧз кельтылы шуыса. Иудеяе бертыкузы, Иегова солы Руфь пыр юрттӥз (Руфь 1:16). Озьы ик Ноеминь валаз, солы но Руфьлы Иегова Вооз пыр но юрттӥз шуыса (Руфь 2:19, 20б). Ноеминь малпаз луоз: «Табере мон адӟисько: Иегова монэ ноку ӧз кельтылы. Вань та дыр ӵоже со монэн ӵош вал!» (Лыдӟе Псалтирез 135:23, 26.) Зэм, Ноеминь туж тау кариз Руфьлы но Воозлы, соос сое огназэ ӧз кельтэ шуыса. Соослы луыса Ноеминь улӟиз кадь. Малпалэ гинэ, макем соос куиньназы ик талы шумпотӥзы!

24. Малы ми вын-агайёслы но сузэр-апайёслы оскымон яратонмес возьматыны кулэ?

²⁴ Малы ми дышетскимы, Руфь книгаез эскерыса? Со, кин вын-агайёслы но сузэр-апайёслы оскымон яратонзэ возьматэ, соосты секыт дыръя уг кельты но дась соослы юрттыны. Тӧроослы вын-агайёслэсь но сузэр-апайёслэсь, кудъёсыз мукетъёсызлы оскымон яратонзэс возьмато, ӟеч ужъёссэс адӟыны тыршоно но со понна соосты ушъяно. Ми асьмеос но шумпотӥськомы, куке мукетъёсызлы оскымон яратонмес возьматӥськомы но куке вын-агайёс но сузэр-апайёс солы луыса юнматско (Ап. уж. 20:35). Нош мар нырысь ик милесьтым мылкыдмес ӝутэ вын-агайёслы но сузэр-апайёслы оскымон яратонмес возьматыны? Милям туж потэ адӟем кареммы но кылзӥськеммы Иеговалэсь — Инмарлэсь, кудӥз оскымон яратонэн пачылмемын (Пот. 34:6; Пс. 32:22).