1. Мар сярысь ми сюлмаськыны быгатӥськомы?

 СЮЛМАСЬКЫТЭ-А тӥледыз со, мар вуонояз луоз — зэмос луисьтэм религиез быдтон, Магог музъемысь Гоглэн урдскемез но Армагеддон ож? Кышкаськоды-а тӥ, со секыт дыре Иеговалы оскымон кыльыны уд быгатэ шуыса? Тӥляд куке но таӵе малпанъёсты вал ке, та статья тӥледлы. Ми пыр-поч эскеромы Иисуслэсь кылъёссэ, кудъёсыз гожтэмын та статьялы валтӥсь кылбурын: «Тӥляд сюлэмды ӝоже медаз усьы; Инмарлы оскыса, Мыным оскыса улэ» (Иоанн 14:1). Юн оскон юрттоз милемлы вуоноез шоры кышкатэк учкыны.

2. Кызьы ми осконмес юнматыны быгатӥськомы но мае ми эскеромы та статьяын?

² Осконэз юнматон понна но вуоно шуг-секытъёс пыр потон понна, малпаськоно со сярысь, кызьы ми туннэ шуг-секытъёс пыр потӥськомы. Со юрттоз валаны, кыӵе удысъёсын милемлы осконмес юнматыны кулэ. Котькуд шуг-секыт пыр потыса, милям осконмы эшшо но юнгес луэ. Нош со юрттэ милемлы вуоноезлы дасяськыны. Иисуслэн дышетскисьёсыз но пумиськылӥзы сыӵе учыръёсын, кудъёсыз возьматӥзы, соослэн осконзы ляб вал шуыса. Та статьяын ми эскеромы со учыръёс пӧлысь ньыльзэ. Озьы ик тодомы, кызьы ми со выллем шуг-секытъёс пыр потыны быгатӥськомы но кызьы соос милемыз вуоноезлы дасяны быгато.

3. Матфейлэсь 6:30, 33 лыдэ басьтыса, оскон сярысь кыӵе малпанэз пусйиз Иисус?

³ Котькуд семьялэн йырыз тырше, кышноезлэн но нылпиосызлэн ваньмыз кулэез мед луоз шуыса: сиёнзы, дӥськутсы  но улон интызы. Асьме нуналъёсы куддыръя со капчи ӧвӧл. Куд-ог вын-агайёсмы но сузэр-апайёсмы ужзэс ыштӥзы. Кӧня гинэ соос медам тырше, выль уж шедьтыны уг быгато. Мукетъёсыз ужзэс кельтоно луизы, малы ке шуоно христианъёслы со уг тупа. Вань та учыръёсын юн оскон кулэ, Иегова семьяосмы сярысь сюлмаськоз шуыса. Та малпанэз Иисус пусйиз Гурезь йылын тодытыкуз. (Лыдӟе Матфейлэсь 6:30, 33.) Ми юн оскиськомы ке, Иегова милемыз уз кельты шуыса, соку саклыкмес висъяломы кулэезлы — Эксэйлыклэн ужезлы. Нош куке ми адӟиськомы, Иегова милемлы улон понна ваньзэ кулэзэ сётэ шуыса, милям соин кусыпъёсмы но солы осконмы эшшо но юнгес луо.

4, 5. Мар юрттӥз одӥг семьялы коньдонэн герӟаськем шуг-секытъёссы пыр потыны?

⁴ Иегова юрттӥз Венесуэлаысь одӥг семьялы коньдонэн герӟаськем шуг-секытъёссы пыр потыны. Азьло Мигель Кастро b агай, семьяез сярысь сюлмаськон понна, фермаяз ужаз. Но собере ожтӥрлыкъёсын бандитъёс корказэс но музъемзэс талазы. Мигель вера: «Али ми арендовать карем пичи гинэ музъеме мерттӥськиськомы но улӥськомы соин, мар отын будэ. Котькуд ӵукна мон Иеговаез курисько, семьяелы та нуналлы ваньзэ кулэзэ мед сётоз шуыса». Та семьялэн улонэз капчи ӧвӧл. Озьы ке но соос быдэсак оскисько инмысь яратӥсь Атаймылы но юн оско, со соослы котькуд нуналлы ваньзэ кулэзэ сётоз шуыса. Талы луыса Мигельлэн семьяез кенешлэн пумиськонъёсаз ялан ветлэ но тодытон уже пыриське. Соос Инмарлэсь Эксэйлыксэ улоназы нырысетӥ интые пукто, нош Иегова соослы ваньзэ кулэзэ сётэ.

⁵ Та секыт дыре Мигель но Юрай кышноез адӟыны тыршо, кызьы Иегова соос сярысь сюлмаське. Куддыръя Иегова юрттэ вын-агайёс но сузэр-апайёс пыр, кудъёсыз соослы мар ке но сёто яке Мигельлы тупась уж шедьтыны юртто. Нош куддыръя — филиал пыр, кудӥз юрттэт ыстылэ. Иегова котьку соосын ӵош. Талы луыса соос шӧдо, осконзы юнма шуыса. Йоселин нимо бадӟымез нылзы Иеговалэн юрттэмез сярысь верамез бере шуиз: «Туж шумпотоно адӟыны, кызьы Иегова ми сярысь сюлмаське! Мон шӧдӥсько, со мынам эше шуыса, кудӥзлы мон быдэсак оскиськыны быгатӥсько. Шуг-секытъёс, кудъёсыныз семьямы пумиськиз, дасязы милемыз эшшо но бадӟымгес шуг-секытъёслы, кудъёсыз азьланяз луозы».

6. Мар юрттоз тӥледлы оскондэс юнматыны, коньдонэн герӟаськем шуг-секытъёсын пумиськыса но?

⁶ Семьядылы коньдон тырмытыны секыт ке, тӥляд мылкыдды куашканы быгатэ. Но кыӵе гинэ секыт югдурды медаз луы, тӥ быгатӥськоды оскондэс юнматыны. Иеговалэсь юрттэт куре малпаськыны Иисуслэн кылъёсыз вылын, кудъёсыз гожтэмын Матфейлэсь 6:25—34. Малпаське вын-агайёс  но сузэр-апайёс сярысь, кудъёсыз ӟырдыт мылкыдын Эксэйлыклэн ужаз пырисько, но со сярысь, кызьы Иегова соослы ваньзэ кулэзэ сётэ (1 Кор. 15:58). Инмысь Атайды юрттӥз бере соослы, кинъёс тӥляд кадь югдуре сюремын вал, со тӥледлы но юрттоз. Со тодэ, мар тӥледлы кулэ, озьы ик тодэ, кызьы сое сётоно. Иеговалэсь юрттэмзэ шӧдыса, тӥ оскондэс юнматоды но эшшо но бадӟымгес вуоно шуг-секытъёслы дасяськоды (Авв. 3:17, 18).

7. Кызьы зарезь вылысь сильтӧл возьматӥз, Иисуслэн дышетскисьёсызлы осконзэс юнматоно шуыса? (Матфей 8:23—26).

⁷ Одӥг пол Иисус но солэн дышетскисьёсыз «зарезь вылын кужмо сильтӧлэн» пумиськизы. Та учыр вылын Иисус дышетскисьёсызлы валаны юрттӥз, соослы осконзэс юнматоно шуыса. (Лыдӟе Матфейлэсь 8:23—26.) Сильтӧл сокем зол вал, пыже ву но пырыны кутскиз. Нош Иисус со дыре номыре шӧдытэк изе вал. Кышкаменызы дышетскисьёсыз сое сайкатӥзы но курыны кутскизы соосты утьыны. Нош Иисус соослэсь лякытэн юаз: «Малы тӥ сокем кышкасесь, ӧжыт оскисьёс?» Иисуслэн дышетскисьёсызлы кышкыт вал ке но, соос валаны кулэ вал: Иеговалы секыт ӧвӧл Иисусэз но дышетскисьёссэ котькыӵе кышкытлыклэсь утьыны. Малы дышетэ милемыз та учыр? Юн оскон юрттоз милемлы инкуазь шимучыръёс пыр потыны яке улонысь «сильтӧлъёсты» чиданы.

8, 9. Кыӵе шуг-секытэн пумиськиз Анель но мар юрттӥз солы со пыр потыны?

⁸ Пуэрто-Рикоысь Анель нимо бызьымтэ сузэрлы бадӟым шуг-секыт пыр потоно луиз. Та солэсь осконзэ юнматӥз. Анель кужмо сильтӧлэн пумиськиз. Ваньмыз кутскиз 2017-тӥ арын, куке «Мария» сильтӧл солэсь корказэ куашкатӥз. Собере со ужзэ но ыштӥз. Анель вера: «Со секыт дыре мон туж сюлмаськыса улӥ. Но мон дышетски Иеговалы быдэсак оскиськыны но солы вань сюлмаськонъёсы сярысь вераны. Та юрттӥз мыным сюлмаськонъёсылы сётскытэк улыны».

⁹ Озьы ик Анель вераз, шуг-секытъёс пыр потыны солы кылзӥськон юрттӥз шуыса. Тани мар со вера: «Мон Иеговалэн организациезлэсь кылзӥськи. Соин ик каньыл сюлмын улыны быгатӥ. Вын-агайёс но сузэр-апайёс пыр Иегова юрттӥз мыным юн осконэн улыны, озьы ик улон понна ваньзэ кулэзэ сётӥз. Куремелэсь Иегова мыным эшшо но тросгес сётӥз. Мынам осконэ юнгес луиз».

10. Мар кароно, «кужмо сильтӧлэз» чидан понна?

¹⁰ Ми пӧлысь котькудӥз «кужмо сильтӧлэн» пумиськыны быгатэ. Оло нош, тӥ инкуазь шимучырен пумиськиды. Яке со луыны быгатэ мукет пумо сильтӧл, кылсярысь, тазалыкен герӟаськем шуг-секыт. Соин сэрен  тӥляд мылкыдды куашканы быгатэ но тӥ мар карыны ик уг тодӥське, вылды. Но эн лэзе сюлмаськонъёслы Иеговалы оскондэс лябӟытыны. Инмарлы ӟырдыт вӧсяськыса, соин кусыпъёстэс юнматэ. Тодады вайылэ, кызьы со тӥледлы азьло юрттылӥз ини (Пс. 76:12, 13). Та оскондэс юнматоз, Иегова тӥледыз ноку уз кельты шуыса!

11. Малы кылзӥськоно соослэсь, кинъёс милемын валто?

¹¹ Мар эшшо юрттоз на милемлы шуг-секытъёс пыр потыны? Кызьы вераз Анель, кылзӥськон. Дышетске оскыны соослы, кинъёслы Иегова но Иисус оско. Куддыръя милемын валтӥсь вын-агайёслэн кутэм ужпумъёссы туж ик визьмоесь уг пото. Но Иегова кылзӥськись адямиосты бакель каре. Кызьы возьмато Библиысь, озьы ик вын-агайёсмылэн но сузэр-апайёсмылэн улонысьтызы учыръёс, кылзӥськон улонэз уте (Пот. 14:1—4; 2 Пар. 20:17). Малпаське сыӵе учыръёс вылын. Со тӥлесьтыд мылкыддэс ӝутоз Иеговалэн организациезлэсь кылзӥськыны али но, вуонояз но (Евр. 13:17). Соку тӥ уд кышкалэ сильтӧллэсь, кудӥз та дунне вылэ лыктэ (Мад. 3:25).

12. Шонерлыктэм ужен пумиськыкумы, мар карыны мылкыдмес ӝутоз юн оскон? (Лука 18:1—8).

¹² Иисус тодӥз, дышетскисьёсыз шонерлыктэм ужъёсын пумиськылозы но та соослэсь осконзэс эскероз шуыса. Соин ик Иисус вераз соослы палкышно сярысь мадёнэз. Та палкышно туж куриз шонерлыктэм судьяез солэн ужезъя шонер ужпум кутыны. Палкышно юн оскиз, куремысь ӧз дугды ке, судья солы юрттоз шуыса. Озьы ик луиз. Малы та милемыз дышетэ? Иегова та шонерлыктэм судья кадь ӧвӧл. Соин ик Иисус вераз: «Инмар-а уз утьы Аслэсьтыз быръемъёссэ, уй но нунал Солы тэльмырисьёсты?» (Лыдӟе Лукалэсь 18:1—8.) Собере со ватсаз: «Нош Адями Пи лыктӥз ке, шедьтоз на меда музъем вылысь осконэз?» Озьыен, шонерлыктэм ужен пумиськыкумы, юн осконмы луиз ке, та палкышно сямен, ми чиданмес возьматомы но куремысь ум дугдэ. Ми юн оскомы, дырыз дыръя Иегова шонерлыкез тупатоз шуыса. Со сяна, вунэтоно ӧвӧл, вӧсяськонлэн бадӟым кужымез вань шуыса. Куддыръя Иегова вӧсяськеммылы ответ сётэ озьы, кызьы ми ӧм но малпалэ.

13. Кызьы вӧсяськон одӥг семьяез утиз?

¹³ Тани мар луиз Вероника сузэренымы, кудӥз улэ Конго шаерын (Киншаса). Граждан ожмаськонъёс дыръя со, солэн Адӟись-Ивортӥсь луисьтэм картэз но 15-аресъем нылзы гуртысьтызы бызьыса кошконо луизы. Одӥгаз блокпостын соосты боевикъёс дугдытӥзы но виёзы шуыса кышкатӥзы. Вероника бӧрдыны кутскиз. Нош нылыз, анайзэ буйгатон понна, шара вӧсяськыны кутскиз но кӧня ке пол Иеговалы нимызъя вазиськиз. Вӧсяськемез бере боевикъёслэн  командирзы солэсь юаз: «Нылаш, кин тонэ вӧсяськыны дышетӥз?» Со вераз: «Анае. Со дышетӥз монэ Иисуслэн вӧсяськонэз вылын, кудӥз гожтэмын Матфейлэсь 6:9—13». Нош командир солы шуиз: «Мынэ. Иегова Инмаред тонэ мед утёз!»

14. Мар осконмес эскерыны быгатэ но мар юрттоз милемлы юн луыны?

¹⁴ Та выллем учыръёс дышето милемыз, вӧсяськонлэн туж бадӟым кужымез вань шуыса. Нош мар кароно, Иегова вӧсяськонъёстылы соку ик но валамон валэктон уг сёты ке? Иисуслэн мадёнысьтыз палкышно сямен, куремысь эн дугдэ. Вӧсяське но юн оске, Иегова тӥледын ӵош но со тодэ, ку но кызьы тӥледлы ответ сётоно. Азьланяз но Иеговалэсь святой духсэ куре (2 Кор. 4:7). Эн вунэтэ: ӝоген Иегова тӥледыз сокем бакель кароз, али курадӟемды сярысь тӥ тодады но уд вае ини. Шуг-секытъёс дыръя Иеговалы оскиськыса, тӥ дась луоды вуоно шуг-секытъёслы (1 Пётр 1:6, 7).

15. Матфейлэсь 17:19, 20 лыдэ басьтыса, мае карыны ӧз быгатэ Иисуслэн дышетскисьёсыз?

¹⁵ Иисус дышетскисьёсызлы вераз, оскон соослы котькыӵе шуг-секытъёс пыр потыны юрттоз шуыса. (Лыдӟе Матфейлэсь 17:19, 20.) Одӥг пол соос ӧз быгатэ периез улляса поттыны, солэсь азьвыл трос пол быгатӥзы вал ке но. Малы? Иисус валэктӥз, соослэн осконзы ляб шуыса. Иисуслэн верамезъя, дышетскисьёсызлэн осконзы юн луысал ке, соос гурезез но интыысьтыз вырӟытыны быгатысалзы. Мукет сямен вераса, соос котькыӵе шуг-секытъёс пыр потысалзы. Ми но пумиськыны быгатӥськомы гурезьёс выллем шуг-секытъёсын, кудъёсыз милемлы вормонтэм потыны быгато.

16. Кызьы оскон юрттӥз Хейди сузэрлы куректонзэ чиданы?

¹⁶ Эскеромы, мар луиз Гватемала шаерысь Хейди сузэрен. Куке соос Эдди картэныз кенешлэн пумиськонэз бере доразы берто вал, картсэ виизы. Кызьы оскон юрттӥз Хейди сузэрлы куректонзэ чиданы? Со вера: «Вӧсяськыса мон вань сюлмаськонъёсме Иегова кие сётӥсько но каньыл сюлмын улыны быгатӥсько. Со сяна, мон адӟисько, кызьы Иегова юрттэ мыным ӵыжы-выжыосы но кенешысь эшъёсы пыр. Озьы ик мон тыршисько тросгес ужаны-тыршыны. Талы луыса мынам сюлмы сокем вӧсь уг луы ни. Ӵуказе нунал сярысь мон сокем зол уг сюлмаськиськы ни. Ваньмыз пыр потыса, мон валай: вуонояз, маин гинэ мон медам пумиськы, Иеговалэн, солэн организациезлэн но Иисуслэн юрттэменызы мон ваньзэ чиданы быгато».

17. Мар кароно, куке пумиськиськомы шуг-секытъёсын, кудъёсыз вормонтэмесь пото?

¹⁷ Ми пӧлысь тросэз матысь адямизэс ыштэменызы куректо. Оло нош, тӥ но матысь адямидэс ыштӥды. Со озьы ке, соку выльысь  но выльысь лыдӟе Библиысь учыръёсты со сярысь, кызьы Иегова кулэмъёсты улӟытъяз. Та юрттоз улӟытонлы оскондэс юнматыны. Оло нош, тӥлесьтыд ӵыжы-выжыдэс кенешысь поттӥзы. Соку эскерон ортчытэ, кудӥз оскондэс юнматоз, Иеговалэн кылкутытонэз котьку но пайда вае шуыса. Котькыӵе шуг-секыт шоры учке оскондэс юнматыны луонлык шоры кадь. Вералэ Иеговалы, макем тӥледлы вӧсь. Вын-агайёсын но сузэр-апайёсын дырдэс ортчытъялэ но соослэсь ноку эн палэнске (Мад. 18:1). Шуг-секытты сярысь малпаськыса, тӥледлы туж вӧсь луэ ке но, тырше кенешлэн пумиськонъёсаз ветлыны, тодытыны но Библиез лыдӟыны (Пс. 125:5, 6). Та юрттоз тӥледлы секыт мылкыддэс вормыны. Котьку тодады возе, макем умой улон дасяз милемлы Иегова. Ми адӟиськомы ке, кызьы Иегова милемлы юрттэ, соку осконмы юнма.

18. Мар кароно, кыӵе ке шуг-секытэн пумиськыкуды, тӥ валады ке, оскондэс юнматоно шуыса?

¹⁸ Кыӵе ке шуг-секытэн пумиськыкуды, тӥ валады ке, оскондэс юнматоно шуыса, мылкыдды медаз куашка. Табере тӥ тодӥськоды, мар вылын ужаны кулэ. Адӟем каре Иисуслэн апостолъёсызлэсь, кудъёсыз куризы: «Милесьтым осконмес будэты» (Лука 17:5). Озьы ик малпаське вын-агайёслэн но сузэр-апайёслэн учыръёссы сярысь, кудъёсыз та статьяын эскериськизы. Мигель но Юрай кузпалъёс сямен, тодады вайылэ, кызьы Иегова тӥледлы юрттылӥз ини. Вероникалэн нылыз но Анель сузэр сямен, Иеговалы ӟырдыт вӧсяське, тужгес но соку, куке шуг-секытты вормонтэм потэ. Хейди сузэр сямен, эн вунэтэ, Иегова тӥледлы ӵыжы-выжыосты но эшъёсты пыр юрттыны быгатэ шуыса. Тӥ Иеговалы али ик ини оскиськыны дышетскиды ке, соку юн оскоды, со тӥледлы вуонояз но котькыӵе шуг-секытъёс дыръя юрттоз шуыса.

19. Кыӵе осконэз вал Иисуслэн но кыӵе осконмы вань милям?

¹⁹ Иисус дышетскисьёсызлы валаны юрттӥз, соослы осконзэс юнматоно шуыса. Но со дыре ик со оскиз, Иеговалэн юрттэменыз соос котькыӵе шуг-секытъёс пыр потыны быгатозы шуыса (Иоанн 14:1; 16:33). Иисус оскиз: туж-туж трос калык но быгатоз юн осконзэ будэтыны но бадӟым куректон пыр потыны (Усьт. 7:9, 14). Луомы-а ми со адямиос пӧлын? Иеговалэн юрттэменыз луомы! Но со понна милемлы асьмелы но вань кужмысьтымы тыршоно осконмес будэтыны (Евр. 10:39).