1. Кызьы апостол Павел учке вал кенешлы юрттӥсьёс шоры?

 КЕНЕШЛЫ юрттӥсьёс туж кулэ ужез быдэсто. Апостол Павел та оскымон пиосмуртъёсты туж дунъя вал. Кылсярысь, Филиппы карын улӥсь христианъёслы гожтэтсэ гожтыкуз, со тӧроослы но, кенешлы юрттӥсьёслы но салам вераз (Флп. 1:1).

 2. Мар вера Луис агай кенешлы юрттӥсь луыса ужан-тыршонэз сярысь?

² Кенешлы юрттӥсьёс луыса ужало-тыршо пӧртэм аресъем пылатӥськем агайёс. Кылсярысь, Де́ван нимо агай кенешлы юрттӥсь луиз 18 арескын, нош Лу́ис агай — куке солы 50 ареслэсь тросгес вал ини. Сыӵе ужан-тыршон агайёслы бадӟым шумпотон вае. Луис вера: «Мон туж шумпотӥсько агайёслы но сузэръёслы ужаны-тыршыны! Соослэсь яратэмзэс ас вылам шӧдыса, мынам но соослы мар ке но лэсьтэме потэ». Сыӵе ик шӧдонъёссы кылдо быдэс дунне вылысь трос агайёслэн.

 3. Кыӵе юанъёсты ми эскеромы?

³ Тон пылатӥськем агай ке, но кенешлы юрттӥсь ӧвӧл на ке, быгатӥськод-а тон аслыд сыӵе ужпум пуктыны? Малпаськы, мар мылкыдэз ӝутыны кулэ кенешлы юрттӥсь луыны но Библиысь кыӵе куронъёслы тыныд тупаны кулэ. Та статьяын ми та юанъёсты эскеромы. Но нырысь ойдолэ тодомы, кыӵе ужъёсты быдэсъяло кенешлы юрттӥсьёс.

 КЫӴЕ УЖЪЁС БЫДЭСЪЯЛО КЕНЕШЛЫ ЮРТТӤСЬЁС?

 4. Кыӵе ужъёсты быдэсъяло кенешлы юрттӥсьёс? (Озьы ик учке суредъёсты.)

⁴ Кенешлы юрттӥсь — со пылатӥськем агай, кудзэ святой дух пуктӥз, пӧртэм удысъёсын тӧроослы юрттон понна. Куд-ог кенешлы юрттӥсьёс чаклало, агайёслэн но сузэръёслэн тырмыт публикациоссы но тодытон понна участокъёссы мед луозы шуыса. Мукетъёсыз Эксэйлык юртэз утялтон но эскерон-тупатъян ужъёсы пырисько. Озьы ик соос пумиськонъёс дыръя радъясьёс луыса ужало-тыршо но аудио- но видеоаппаратураен ужало. Но самой валтӥсез — кенешлы юрттӥсьёс Иеговаез ярато но солэн куронъёсызъя уло. Озьы ик соос кенешысь агайёссэс но сузэръёссэс туж ярато (Матф. 22:37—39). Кызьы пылатӥськем агай кенешлы юрттӥсь луыны быгатэ?

 5. Мар кароно агайлы, кенешлы юрттӥсь луон понна?

⁵ Библиын гожтэмын, кыӵе куронъёс пуктӥсько кенешлы юрттӥсьёс азьын (1 Тим. 3:8—10, 12, 13). Соосты пыр-поч эскеры но соослы тупаны тыршы. Но нырысь ик малпаськы, малы тынад потэ кенешлы юрттӥсь луэмед.

МАР МЫЛКЫДЭЗ ӜУТЫНЫ КУЛЭ КЕНЕШЛЫ ЮРТТӤСЬ ЛУЫНЫ?

 6. Мар агайлэсь мылкыдзэ ӝутыны кулэ кенешысь агайёслы но сузэръёслы ужаны-тыршыны? (Матфей 20:28; озьы ик учке вылбамысь суредэз).

⁶ Ми адӟем кариськомы Иисус Христослэсь. Со аслэсьтыз Атайзэ но адямиосты яратэ. Сыӵе яратон солэсь мылкыдзэ ӝутэ вал мылысь-кыдысь ужаны но дано луисьтэм ужъёсты быдэсъяны (лыдӟе Матфейлэсь 20:28; Иоанн 13:5, 14, 15). Тон но Инмарез но адямиосты яратӥськод ке, Иегова тонэ бакель кароз но кенешлы юрттӥсь луыны юрттоз (1 Пётр 5:5; 1 Кор. 16:14).

 7. Малы агайлы, кудӥзлэн кенешлы юрттӥсь луэмез потэ, вылтӥяськись луоно ӧвӧл?

⁷ Та дуннеын данъясько соосын, кинъёс вылӥ инты басьтыны быгатӥзы. Но Иеговалэн организацияз озьы ӧвӧл. Агай, кудӥз, Иисус сямен, адямиосты яратэ, кузёяськыса но вылтӥяськыса уз улы. Вылтӥяськись адями тӧро яке кенешлы юрттӥсь луиз ке, со уз быдэсъя, вылды, дано луисьтэм ужъёсты, кудъёсыз туж кулэ Иеговалэн  ыжъёсыз сярысь сюлмаськон понна (Иоанн 10:12). Иегова вылтӥяськись адямиез ноку но бакель уз кары (1 Кор. 10:24, 33; 13:4, 5).

 8. Мае Иисус валэктӥз апостолъёсызлы?

⁸ Иисуслэн самой матысь эшъёсызлэн но куддыръя шонертэм мылпотонъёссы вал. Кылсярысь, Иаков но Иоанн апостолъёс Иисусэз куризы Эксэйлыказ соослы дано инты сётыны. Мар вераз Иисус? Соосты ушъям интые, Иисус 12 апостолъёсызлы валэктӥз: «Тӥ куспын кинлэн ассэ бадӟым каремез потэ, тӥледлы со ляльчи мед луоз; тӥ куспын кинлэн ваньмызлэсь вылӥын луэмез потэ, со ваньмызлы ляльчи мед луоз» (Марк 10:35—37, 43, 44). Агайёс, кудъёсызлэн мукетъёсызлы ужамзы-тыршемзы потэ, кенеш понна зэмос кузьым луозы (1 Фес. 2:8).

КЫЗЬЫ МУКЕТЪЁСЫЗЛЫ УЖАНЫ-ТЫРШЫНЫ МЫЛКЫДЭЗ БУДЭТОНО?

 9. Кызьы мукетъёсызлы ужаны-тыршыны мылкыдэз будэтоно?

⁹ Ми тодӥськомы, тон Иеговаез яратӥськод но тынад мукетъёсызлы ужамед-тыршемед потэ шуыса. Нош мар кароно, тынад уг поты ке быдэсъямед мукет ужъёсты, кудъёссэ ӵем дыръя кенешлы юрттӥсьёслы сётъяло? Мар тыныд юрттоз сыӵе мылкыдэз будэтыны? Малпаськы, макем бадӟым шумпотон тон басьтод, агайёслы но сузэръёслы юрттӥськид ке. Иисус шуиз: «Басьтон сярысь, сётыны умойгес» (Ап. уж. 20:35). Иисус ачиз но та кылъёсъя улӥз. Мукетъёсызлы юрттӥськон солы туж бадӟым шумпотон вае вал. Мукетъёсызлы юрттӥськыса, тон но бадӟым шумпотон басьтод.

10. Кызьы Иисус возьматӥз, мукетъёсызлы ужаны-тыршыны шумпотэ шуыса? (Марк 6:31—34).

¹⁰ Тодамы ваёмы Иисуслэн улонысьтыз учырез, кудӥз возьматэ, со мукетъёсызлы ужаны-тыршыны шумпотэ вал шуыса. (Лыдӟе Марклэсь 6:31—34.) Одӥг пол, куке Иисус но апостолъёс туж жадемын вал, соос шутэтскон понна шыпыт интые кошкизы. Но калык соосты азьпалтӥз, малы ке шуоно соослэн Иисуслэсь дышетскемзы потэ вал. Соосты дышетэм интые, Иисус быгатэ вал шутэтскыны, малы ке шуоно солы но апостолъёслы «сиськыны но маза уг луы вал». Яке Иисус быгатэ вал соослы одӥг-кык малпан вераны но соосты доразы келяны. Но Иисус адямиосты яратэ вал, соин ик со «соосты трос дышетыса улӥз» но ӝыт гинэ дышетэмысь дугдӥз (Марк 6:35). Адямиос Иисуслы жаль потӥзы. Со соосты яратэ вал, соин ик соосты дышетэмез потэ вал. Иисус шумпотэ вал мукетъёсызлы ужаны-тыршыны.

11. Кызьы Иисус юрттӥз соослы, кинъёс сое кылзыны лыктӥзы? (Озьы ик учке суредъёсты.)

¹¹ Адямиосты дышетэм сяна, Иисус соослы уж вылын юрттӥз. Иисус паймымон амалэн трос адямиосты сюдӥз. Иисус сиёнэз дышетскисьёсызлы сётъяз, нош дышетскисьёссэ адямиослы сётъяны косӥз (Марк 6:41). Озьы Иисус дышетскисьёсызлы возьматӥз, кызьы мукетъёсызлы ужано-тыршоно, но валэктӥз, уж вылын юрттыны туж кулэ шуыса. Ӵапак сыӵе ужъёсты быдэсъяло кенешлы юрттӥсьёс. Пуктэ син азяды, макем шумпотӥзы апостолъёс, Иисусэн ӵош паймымон амалэн трос адямиосты кӧттырымон сюдыны быгатӥзы шуыса! (Марк 6:42). Вал трос учыръёс, куке Иисус адямиосты дышетӥз но соослы юрттылӥз. Музъем вылын улытозяз, Иисус котьку но мукетъёсызлы ужаз-тыршиз (Матф. 4:23; 8:16). Адямиосты дышетон но соос сярысь сюлмаськон Иисуслы бадӟым шумпотон ваё вал. Юн оскы: тон кенешлы юрттӥсь  луид ке но вань сюлмысьтыд агайёслы но сузэръёслы юрттӥськид ке, тон но бадӟым шумпотон басьтод.

12. Малы малпано ӧвӧл, ми кенешлы номырин юрттыны ум быгатӥське шуыса?

¹² Тон малпамъя, тынад нимысьтыз быгатонлыкъёсыд ӧвӧл ке, мылкыдыд медаз куашка. Тынад одно ик вань сямъёсыд, кудъёсыз тыныд юрттозы агайёс но сузэръёс сярысь сюлмаськыны. Малпаськы апостол Павеллэн кылъёсыз вылын, кудъёсыз гожтэмын 1 Коринфъёслы 12:12—30. Иеговалэсь юрттэт кур валаны, кызьы тон та кылъёсты улонад пыртыны быгатӥськод. Та кылъёс умой возьмато, тыныд но, Иеговалэн мукет ужась-тыршисьёсызлы но кенешын кулэ луись уж сётэмын шуыса. Тон кенешлы юрттӥсь луон понна куронъёслы уд тупаськы на ке, кидэ эн лэзьы. Лэсьты ваньзэ, мае быгатӥськод, Иеговалы но агайёслы ужан-тыршон понна. Юн оскы: тӧроос тынэсьтыд быгатонлыкъёстэ лыдэ басьтозы но сётозы сыӵе уж, кудзэ тон быдэстыны быгатод (Рим. 12:4—8).

13. Мар вераны луэ тросэз куронъёс сярысь, кудъёсыз пуктӥсько кенешлы юрттӥсьёс азьын?

¹³ Со сяна, лыдэ басьты таӵе малпанэз: тросэз куронъёс, кудъёссэ быдэсъяны кулэ кенешлы юрттӥсьёс, вань христианъёс но быдэсъяны кулэ. Малы ке шуоно ваньмылы Иеговаен кусыпъёсмес юнматоно, мукетъёсызлы ӟеч ужъёс лэсьтоно но Иеговаез шумпоттыса улоно. Соин ик тон та куронъёсты быдэсъяськод ини, дыр. Нош кыӵе нимысьтыз куронъёс пуктӥсько агай азьын, кудӥзлэн кенешын дано ужъёсты быдэсъямез потэ?

МАР КАРОНО, ПУКТЭМ УЖПУМЕЗ БЫДЭСТОН ПОННА?

14. Мае возьмато «асьсэды ӟеч возьыны кулэ» шуэм кылъёс? (1 Тимофейлы 3:8—10, 12).

¹⁴ Эскеромы куд-ог куронъёсты, кудъёсыз гожтэмын 1 Тимофейлы 3:8—10, 12 (лыдӟе). Кенешлы юрттӥсьёс «асьсэды ӟеч возьыны кулэ». Та кылъёсты озьы ик берыктыны луэ «оскымонэсь; гажамонэсь» шуыса. Та уг возьматы, тыныд серекъяны яке шулдыръяськыны уг яра шуыса (Екк. 3:1, 4). Та кылъёс возьмато, тыныд сётэм ужъёсты тыршыса быдэсъяны но пумозяз вуттыны кулэ шуыса. Соку кенешысьтыд агайёс но сузэръёс адӟозы, тон оскымон агай шуыса, но тонэ гажалозы.

15. Мае возьмато «кык пумо вераськисесь» но «асьсэлы пайда-барыш утчасесь медаз луэ» шуэм кылъёс?

 ¹⁵ «Кык пумо вераськисесь... медаз луэ». Та возьматэ, пӧяськоно ӧвӧл, оскымон луоно но сётэм кылдэ быдэстоно шуыса (Мад. 17:20). «Асьсэлы пайда-барыш утчасесь медаз луэ» шуэм кылъёс возьмато, пӧяськоно ӧвӧл шуыса, куке тон коньдонэн герӟаськем ужъёсты нуиськод яке тыныд кенешлэсь коньдонзэ оско. Озьы ик со возьматэ, кенешысь эшъёсмы вылын коньдон поттыны тыршоно ӧвӧл шуыса.

16. а) Мае возьмато «винаез яратӥсесь... медаз луэ» шуэм кылъёс? б) Кызьы ассэ возе со, кин «чылкыт мылкыдын» улэ?

¹⁶ «Винаез яратӥсесь... медаз луэ» шуэм кылъёс возьмато, агай укыр трос вина уг юы, озьы ик мукет адямиос уг малпало, со укыр трос вина юыны быгатэ шуыса. Со, кинлэн «чылкыт мылкыдыз» вань, Иеговалэн эсэпъёсызъя улэ. Сыӵе адями сьӧлыко ке но, солэн Инмарен умой кусыпъёсыз вань, соин ик со каньыл сюлмын улэ.

17. Кызьы агай солы сётэм ужъёсты быдэсъяны кулэ, кенешлы юрттӥсь луон понна? (1 Тимофейлы 3:10; озьы ик учке суредэз).

¹⁷ Библия верамъя, агайёсты кенешлы юрттӥсь луыса ужаны-тыршыны пуктэм азьын «соосты эскерыса-чакласа утчано». Тӧроослы учкыны кулэ, умой-а тон быдэсъяськод тыныд сётэм ужъёсты. Куке тыныд кыӵе ке уж сёто, тӧроосын но Иеговалэн организациеныз сётэм кивалтэтлэсь кылзӥськы. Тыршы валаны, кызьы со ужез быдэстоно но кыӵе дырлы. Тон тыныд сётэм ужъёсты тыршыса быдэсъяд ке, агайёс но сузэръёс адӟозы, тон оскымон адями луид шуыса. Тӧроос, эн вунэтэ, пылатӥськем агайёсты дышетыны кулэ шуыса. (Лыдӟе 1 Тимофейлы 3:10.) Вань-а тӥляд кенешады 10—14 аресъем яке солэсь но егитгес пылатӥськем агайёс? Тыршо-а соос Библиез асьсэос эскерыны но пумиськонъёслы дасяськыны? Ялан-а соос пумиськонъёсын валэктонъёс сётъяло но тодытон уже пырисько? Агайёс та куронъёслы тупало ке, сётъялэ соослы сыӵе ужъёс, кудъёссэ соос быдэстыны быгатозы. Озьы тӥ соосты эскерыны-чакланы быгатоды. Нош куке соослы 17 арес тырмоз, соос кенешлы юрттӥсьёс луыны быгатозы ини.

18. Мае возьмато «шекъёссы ӧвӧл ке» шуэм кылъёс?

¹⁸ Мае возьмато «шекъёссы ӧвӧл ке» шуэм кылъёс? Христиан мурт ассэ шонер возе ке, урод ужъёс лэсьтэм понна сое янгыше  уськытыны уг луы. Милемыз быгато шонертэм янгыше уськытыны. Иисуслы пумит но урод кылъёс вераллязы. Солэн верамезъя, ми но сыӵе югдурен пумиськыны быгатӥськомы (Иоанн 15:20). Нош тон, Иисус сямен, астэ шонер возид ке, соку кенешлэн син азяз тынад ӟеч нимыд луоз (Матф. 11:19).

19. Кызьы валано, кенешлы юрттӥсьлэн «одӥг кышноез луыны кулэ» шуыса?

¹⁹ Кенешлы юрттӥсьлэн «одӥг кышноез луыны кулэ» (1 Тим. 3:12, ВД). Нырысетӥ семьяез кылдытыкуз, Иегова одӥг пиосмуртэз но одӥг кышномуртэз кузпалъёс карыса огазеяз. Вань христианъёс кузпалъяськон шоры Иегова сямен учкыны кулэ (Матф. 19:3—9). Агайлы азон-калгонлэсь палэнсконо (Евр. 13:4). Со кышноезлы оскымон луыны кулэ но мукет кышномуртъёслы мултэс саклыксэ висъяно ӧвӧл (Иов 31:1).

20. Мар агайлы кароно, «ас юртэзлы... ӟеч кузё» луон понна?

²⁰ «Ас юртэзлы... со ӟеч кузё луыны кулэ». Тон карт но атай ке, тыныд семьяеныд герӟаськем ужъёсты тыршыса быдэсъяно. Семьяен йыбырттонэз ялан ортчытъя. Семьяысьтыд котькудӥныз ӵемгес тодытыны тыршы. Нылпиосыдлы юртты Иеговаен эшъяськыны (Еф. 6:4). Тон семьяед сярысь сюлмаськыны быгатӥськод ке, со возьматоз, тон кенеш сярысь но сюлмаськыны быгатод шуыса. (Ӵошатэ 1 Тимофейлы 3:5.)

21. Мар карыны быгато агайёс, кудъёсыз кенешлы юрттӥсьёс ӧвӧл на?

²¹ Дуно агаймы, тон кенешлы юрттӥсь ӧвӧл на ке, та статьяысь малпанъёс вылын малпаськы но со сярысь Иеговалы вӧсяськы. Пыр-поч эскеры куронъёсты, кудъёсыз кенешлы юрттӥсьёс азьын пуктӥсько, но соосъя тупатскы. Тыршы эшшо но зол яратыны агайёстэ но сузэръёстэ но малпаськы, малы тынад соослы ужамед-тыршемед потэ (1 Пётр 4:8, 10). Ужпум пукты кенешлы юрттӥсь луыны. Мукетъёсызлы юрттӥськыса, тон трос шумпотон басьтод. Юн оскы, Иегова тонэ жалятэк бакель кароз шуыса! (Флп. 2:13).