1, 2. Кыӵе ужез быдэсъяло тӧроос?

 ТОН кӧня ке дыр ӵоже кенешлы юрттӥсь луыса ужаськод-тыршиськод ке ини, тон туж трос лэсьтӥд ини тӧро луон понна. Потэ-а тынад та «ӟеч ужез» быдэсъямед? (1 Тим. 3:1).

² Кыӵе «ужез» быдэсъяло тӧроос? Соос ӟырдыт мылкыдын кенешен ӵош тодыто, агайёслы но сузэръёслы юрттӥсько но соосты дышето, кылъёсынызы но ужъёсынызы кенешез юнмато. Соин ик Библия тӧроосты «саламъёс-кузьымъёс» шуыса нима (Еф. 4:8, ВД).

 3. Мар кароно агайлы, тӧро луон понна? (1 Тимофейлы 3:1—7; Титлы 1:5—9).

³ Мар карыны кулэ, тӧро луон понна? Кылсярысь, кыӵе ке уже интыяськыку, кулэ луись ужез быдэсъяны быгатоно. Нош тӧро луон понна, тодытӥсь но дышетӥсь луыны гинэ тырмыт ӧвӧл. Со понна агайлы тупаны кулэ куронъёслы, кудъёсыз гожтэмын 1 Тимофейлы 3:1—7 но Титлы 1:5—9 (лыдӟе). Та статьяын ми эскеромы со куронъёс пӧлысь куд-огъёссэ. Ми тодомы, мар кароно агайлы, мукетъёсыз азьын ӟеч нимыз мед луоз, умой карт но атай мед луоз, озьы ик дась луыса кенешлы ужаны-тыршыны мед быгатоз шуыса.

ӞЕЧ НИМ

 4. Мар кароно, шектэм луон понна?

⁴ Тӧро луон понна, тыныд «шектэм луыны кулэ». Сыӵе адями сярысь агайёс но сузэръёс умойзэ гинэ верало  но шонертэм ужъёс понна янгыше уг уськыто. Со сяна, агайлэн «калык пӧлын ӟеч данэз» луыны кулэ. Соос, кинъёс Иеговалы ужатэк-тыршытэк уло, тынэсьтыд оскондэ тэрганы быгато. Но тонэ пӧяськись адямиез кадь янгыше уськытыны соослэн мугзы луыны кулэ ӧвӧл (Дан. 6:4, 5). Юа аслэсьтыд: «Мар мон сярысь малпало агайёс но сузэръёс, озьы ик соос, кинъёс Иеговалэн ужась-тыршисьёсыз ӧвӧл?»

 5. Мар кароно, «ӟечез яратон» понна?

⁵ Агайлы, кудӥзлэн тӧро луэмез потэ, «ӟечез яратыны» кулэ. Соин ик солы мукетъёсызлэсь ӟеч сямъёссэс адӟоно но со понна соосты ушъяно. Озьы ик агайлы мукетъёсызлы ӟеч ужъёс лэсьтоно. Со сяна, дась луоно адямиослэн малпамзылэсь тросгес лэсьтыны (1 Фес. 2:8; Тит. 1:8, ВД). Малы со кулэ? Агай ӟечез яратэ ке, со дась луоз агайёс но сузэръёс сярысь сюлмаськыны но мукет ужъёсты быдэсъяны (1 Пётр 5:1—3). Мукетъёсызлы ужан-тыршон понна трос кужым кулэ ке но, со агайлы бадӟым шумпотон ваёз (Ап. уж. 20:35).

 6. Мар кароно, куно карись адями луон понна? (Еврейёслы 13:2, 16; озьы ик учке суредэз).

⁶ «Ӟудыса-ёрмыса улӥсьёслы юрттӥськись» луон понна, мукетъёсызлы ӟечсэ лэсьтоно, соослы но, кинъёс матысь эшъёсмы пӧлы уг пыро (1 Пётр 4:9). Одӥг книгаын куно карись адями сярысь гожтэмын: «Солэн коркаез но сюлмыз котьку усьтэмын тодмотэм адямиослы». Юа аслэсьтыд: «Малпало-а адямиос, мон котькыӵе кунолы шумпотӥсько шуыса?» (Лыдӟе Еврейёслы 13:2, 16.) Соос пӧлын луыны быгато куанер адямиос, озьы ик ёросэз чакласьёс, агайёс, кудъёсыз милям кенешамы лыктӥзы речь вераны, но Иеговалэн мукет ужась-тыршисьёсыз, кудъёсыз трос лэсьто, агайёслы но сузэръёслы юрттӥськон понна (Ул.-выл. 18:2—8; Мад. 3:27; Лука 14:13, 14; Ап. уж. 16:15; Рим. 12:13).

 7. Кытысь адӟиськоз, агай «узырлыкез яратӥсьтэм» шуыса?

⁷ «Узырлыкез яратӥсьтэм» луон понна, коньдонэз улонын самой валтӥсеныз лыдъяно ӧвӧл. Кӧня гинэ коньдонмы милям медам луы, Инмарлэсь Эксэйлыксэ нырысетӥ интые пуктоно (Матф. 6:33).  Дырдэ, кужымдэ но коньдондэ уже кут, Иеговалы йыбыртъян понна, семьяед но кенешед сярысь сюлмаськон понна (Матф. 6:24, сноска; 1 Иоанн 2:15—17). Юа аслэсьтыд: «Кызьы мон учкисько коньдон шоры? Шумпотӥсько-а мон солы, маи мынам вань, яке мынам валтӥсь ужпуме — тросгес коньдон поттыны но ялан выль арбериос басьтылыны?» (1 Тим. 6:6, 17—19).

 8. Мар кароно тӧролы, котьма ласянь «ассэ кутыны быгатӥсь» луон понна?

⁸ Тӧролы котьма ласянь «ассэ кутыны быгатӥсь» луоно. Со понна солы мултэс сиыса, вина юыса улоно ӧвӧл, шонер шутэтскон амалъёсты быръёно но ӝикыт дӥсяськоно. Озьы ик адӟем кароно ӧвӧл та дуннеысь адямиослэсь, кудъёсыз Иеговалы ужатэк-тыршытэк уло (Лука 21:34; Иак. 4:4). Со сяна, куке адямиос тӧролэсь вожзэ поттыны туртто, тӧролы ассэ кияз кутоно. Тӧролы «юонэз яратӥсь» луоно ӧвӧл. Соку адямиос уз малпалэ, со трос вина юыны быгатэ шуыса. Юа аслэсьтыд: «Адӟиське-а мынам ужъёсысьтым, мон котьку но асме киям кутыны тыршисько шуыса?»

 9. Мар кароно, визьмын улон понна но ваньзэ радызъя лэсьтон понна?

⁹ «Визьмын улӥсь» луон понна, ужпумъёс кутыку, Библиысь возетъёсты лыдэ басьтоно. Сыӵе адями возетъёс вылын мур малпаське. Соин ик со югдурез умойгес вала но визьмо ужпум кутыны быгатэ. Дыртыса ужпум кутэм интые, со ваньзэ лыдэ басьтыны тырше (Мад. 18:14). Сыӵе агай югдур шоры Иегова сямен учке. Агай, кудӥз ваньзэ радызъя лэсьтэ, ужъёссэ дырыз дыръя быдэстэ, со вылэ оскиськыны луэ но со кивалтэтлэсь кылзӥське (1 Тим. 3:2, ВД). Тон кылзӥськид ке куронъёслэсь, кудъёсыз сярысь ми али вераськимы, соку тынад ӟеч нимыд луоз. Нош али ми тодомы, кыӵе куронъёс пуктӥсько тӧроос азьын, кудъёсызлэн семьязы вань.

СЕМЬЯ СЯРЫСЬ СЮЛМАСЬКОН

10. Мар кароно, семьяедлы «ӟеч кузё» луон понна?

¹⁰ Тынад семьяед вань ке но тӧро луэмед потэ ке, семьяысьтыд котькудӥзлэн ӟеч нимыз луыны кулэ. Соин ик тыныд семьяедлы «ӟеч кузё» луоно. Тыныд яратӥсь но оскымон карт но атай луыны кулэ. Со понна тыныд семьяен йыбырттонэз ортчытъяно, кышноедлы но нылпиостылы юрттоно пумиськонъёсы ветлыны но тодытон уже пыриськыны. Малы со кулэ? Апостол Павел гожтӥз: «Кин ас юртэныз кивалтыны уг быгаты, кызьы со Инмарлэн Черкеныз кивалтыны быгатоз?» (1 Тим. 3:5).

11, 12. Агайлэн тӧро луэмез потэ ке, кызьы асьсэды возьыны кулэ солэн нылпиосыз? (Озьы ик учке суредъёсты.)

¹¹ Тынад быдэ вуымтэ нылпиосыд вань ке, соос «кылзӥськисесь, тэрытскисесь луыса мед будозы». Тыныд соосты яратыса дышетоно. Валамон, нылпиослэн шудэмзы но шулдыръяськемзы потэ. Но соосты дышетыны кулэ анай-атайзылэсь кылзӥськыны, мукет адямиосты гажаны но асьсэды умой возьыны. Со сяна, тыныд нылпиосыдлы юрттоно Инмарен эшъяськыны, солэн возетъёсызъя улыны, пылатӥськыны ужпум пуктыны но со понна вамышъёс лэсьтыны.

¹² Агайёслэн, кудъёсызлэн тӧро луэмзы потэ, «нылпиоссы Инмарлы оскисесь мед луозы. Азыса-калгыса яке тэрытскытэк уло шуыса, калык пыкылоно медаз лу». Пылатӥськем нылпи яке нылпи, кудӥз пылатӥськыны ужпум пуктӥз, бадӟым сьӧлык лэсьтӥз ке, кызьы со шӧдӥськоз атаез вылын? Агай нылпизэ ӧз дышеты ке но ӧз визьма ке, со тӧро луон понна куронъёслы  уз тупа, вылды. (Учке 1996-тӥ арын 15-тӥ коньывуон понна поттэм «Возьмаськон башняез», 21-тӥ бамез, 6-тӥ но 7-тӥ абзацъёсты.)

КЕНЕШ СЯРЫСЬ СЮЛМАСЬКОН

13. Кытысь адӟиськоз, агай зӥбыт-востэм сямо но вылтӥяськисьтэм шуыса?

¹³ Агайёс, кудъёсызлэн христиан сямъёссы вань,— кенеш понна зэмос кузьым. «Зӥбыт-востэм сямо» агай ачиз но котькинэн тупаса улыны тырше, мукетъёсызлы но юрттэ адямиосын тупаса улыны. Озьы ик сыӵе агай адямиослэсь малпанзэс валаны тырше. Шуом, тон тӧро ини. Тӧроослэн кенешсы пумиськыку, тросэз агайёс куто сыӵе ужпум, кудӥз тыныд уг кельшы. Мар тон карод, со ужпум Библиысь возетъёслы пумит уг мыны ке? Тон тросэныз соглаш кариськод-а? Агай, кудӥзлэн тӧро луэмез потэ, «вылтӥяськись» луыны кулэ ӧвӧл. Соин ик со аслэсьтыз малпанзэ кужмысь уз ӵекты. Со вала, мукетъёсыныз кенешыны кулэ шуыса (Ул.-выл. 13:8, 9; Мад. 15:22). Тӧролы «тупаса улонэз яратӥсь» луоно но «йыркуръяськись» луоно ӧвӧл. Соин ик солы ассэ лякыт возёно, споръяськоно ӧвӧл но адямиослэсь шӧдонъёссэс лыдэ басьтоно. Солы тыршоно туж секыт дыръя но тупаса улыны (Иак. 3:17, 18). Ӟеч кылъёс адямиез буйгатыны быгато, озьы ик соосты но, кинъёс Иеговалэн калыкезлы пумит мыно (Суд. 8:1—3; Мад. 20:3; 25:15; Матф. 5:23, 24).

14. Кызьы валано, агай «али пылатэмъёс пӧлысь» луыны кулэ ӧвӧл но «вӧсяськыса шонер улӥсь» луыны кулэ шуыса?

¹⁴ Агай, кудӥзлэн тӧро луэмез потэ, «али пылатэмъёс пӧлысь» луыны кулэ ӧвӧл. Тӧро луон понна, одно ик трос аръёс пылатӥськемын луыны кулэ ӧвӧл ке но, юн осконэн христиан мурт луон понна, кӧня ке дыр ортчыны кулэ. Иисус Христослэсь адӟем кар. Соку тон быгатод зӥбыт-востэм луыны, дась луыса кенешын котькыӵе ужъёсты быдэсъяны но чидаса возьманы, ку Иегова  тыныд мукет ужъёсты оскоз (Матф. 20:23; Флп. 2:5—8). Со сяна, тӧролы «вӧсяськыса шонер улӥсь» луоно, яке солы Иеговалэн шонерлыко эсэпъёсызъя улоно но организациезлэн куронъёсызлэсь кылзӥськоно (1 Тим. 4:15).

15. Кулэ-а тӧролы одно ик быгатыны сцена вылысен туж умой дышетыны? Валэктэ.

¹⁵ Библия валамон вера, тӧро «дышетыны-валэктыны быгатӥсь» луыны кулэ шуыса. Возьматэ-а та, тӧро одно ик быгатыны кулэ шуыса туж умой речьёс вераны? Одно ик уг. Вань тӧроос сцена вылысен туж умой дышетыны уг быгато. (Ӵошатэ 1 Коринфъёслы 12:28, 29 но Ефесъёслы 4:11.) Озьы ке но тодытон понна яке агайёсты но сузэръёсты юнматон понна, тӧролы быгатыса Библиез уже кутоно но дышетон быгатонлыкъёссэ ялан умоятоно. Мар тыныд юрттоз?

16. Мар кароно, умой дышетӥсь луон понна? (Озьы ик учке суредъёсты.)

¹⁶ Тӧро «шонер дышетон вылэ пыкиськыса» дышетыны кулэ. Соин ик, сцена вылысен дышетыкуд яке кинлы ке визь-кенеш сётыкуд, тынад кылъёсыд Инмарлэн Кылыз вылэ пыкиськемын луыны кулэ. Тыршыса эскеры Библиез но публикациосмес (Мад. 15:28; 16:23). Эскерон ортчытыкуд, саклыктэ висъя, кызьы Библиысь кылбуръёс валэктӥсько. Соку тон соосты шонер уже кутыны быгатод. Мукетъёсты дышетыкуд, соослэсь сюлэмзэс вырӟытыны тыршы. Эшшо но умой дышетӥсь луон понна, быгатӥсь тӧроослэсь юа, мае тон умоятыны быгатӥськод, но соослэн визь-кенешсылэсь кылзӥськы (1 Тим. 5:17). Тӧроос агайёсты но сузэръёсты дышетыны кулэ «шонер сюрес вылэ султыны». Озьы ик куддыръя тӧроос «пумитъяськисьёсты шарае поттыны» кулэ. Соку соослы асьсэды лякыт возёно. Тон астэ лякыт возид ке но яратондэ возьматӥд ке, нош визь-кенешъёсыд котьку но Библия вылэ пыкиськемын луизы ке, тон возьматод Быдӟым дышетӥсьлэсь, Иисус Христослэсь, адӟем кариськод шуыса (Матф. 11:28—30; 2 Тим. 2:24).

 АЗЬЛАНЯЗ НО ТЫРШЕ УЖПУМДЭС БЫДЭСТЫНЫ

17. а) Мар азьланяз но лэсьтоно кенешлы юрттӥсьёслы, кудъёсызлэн тӧро луэмзы потэ? б) Мар сярысь тодазы возёно тӧроослы, куке соос малпало, кыӵе ке агай тӧро луыны быгатэ-а, уг-а? (Учке  «Тӧроос, зӥбыт-востэмесь луэ» рамкаез.)

¹⁷ Куд-ог кенешлы юрттӥсьёс малпало, тӧроос луыны ноку уз быгатэ шуыса. Соос малпамъя, куронъёслы, кудъёсыз тӧроос азьын пуктӥсько, соослэн тупамзы ноку уз луы. Эн вунэты: Иегова но, солэн организациез но уг возьмало, тон со куронъёслы быдэсак тупалод шуыса (1 Пётр 2:21). Со сяна, тодад возь, Иегова тонэ огнад уз кельты шуыса. Со тыныд юрттоз но святой духсэ сётоз (Флп. 2:13). Вань-а со куронъёс пӧлын сыӵеез, кудӥзлы тон туж ик умой уд тупаськы на? Соку со сярысь Иеговалы вӧсяськы, сое публикациосмыя эскеры но тӧроослэсь юа, мае тон умоятыны быгатӥськод.

18. Кыӵе ужпум пуктоно кенешлы юрттӥсьёслы?

¹⁸ Куронъёс пӧлын, кудъёсыз сярысь та статьяын вераськиз, вань сямъёс, кудъёссэ ваньмылы возьматоно, озьы ик тӧроослы но (Флп. 3:16). Тон кенешлы юрттӥсь-а? Соку ужпум пукты кенеш понна эшшо но трос лэсьтыны. Кур Иеговаез тонэ дышетыны но тупатъяны, агайёслы но сузэръёслы эшшо но умой юрттӥськыны мед быгатод шуыса (Ис. 64:8). Юн оскы: тӧро луыны тыршемдэ Иегова одно ик бакель кароз!